破紀錄

真係開blogger以黎, 第一次係一個月內所打既文章數目係得單位數!!! 真係唔知咩事, 日日都好似好忙咁, 晚晚都有事做, 可能係中秋前有連續2個星期既Monday, Tuesday, Thursday都要去上堂, 又加上約人食飯(話晒我9月生日!!), 所以就忙上加忙!!

不過, 黎緊一年會仲更加忙, 因為要裝備自己, 下年既考試來勢兇兇, 未來一年, 我諗除左必要既活動之外, 都應該唔多出街!! 閉關修行.....是也!!

燶左

上星期六&日, 去左赤柱玩左樣好勁既野, 就係去學滑~浪~風~帆~, 點解冇啦啦走去學, 其實係因為Anna之前係康文署學過獨木舟個d, 佢話好抵學, 因為係康文署學只需要$160就可以報到"初級滑浪風帆班"(兩日個喎, 仲要係朝9晚5), 如果出面學, 分分鐘要成$300-$350一堂不等, 所以Anna見咁岩有得報名就叫埋我一齊去玩, 原先諗住一齊報名, 應該可以一齊去上堂啦, 點知最後抽簽, 抽唔到一齊去玩, 佢就抽中左去大尾篤, 我就去左赤柱玩!!

係康文署報玩呢d水上活動課程, 基於安全問題一班最多都只係5個人, 今次我去到個時, 雖然係有5個人有報名, 不過最終都係得3個人黎上堂!! 一黎到, 阿sir當然就係介紹下d裝備同埋理論啦, 講左咩叫上風位、下風位(背風面帆就可以起到帆架啦!!) 之後就係去拎風帆, 要玩之前當然就要先學識點樣去安裝一個滑浪風帆出黎!! 話咁快, 阿sir三兩下手勢就教完點樣安裝一個風帆出黎, 係呢個時候, 阿sir就問大家想係陸上練習完先出海, 定直接出海玩, 大家費事企係沙灘上面乾煎, 諗都唔諗就當然係話直接出海試玩啦!!


由於第一次玩, 原來要起板都唔係一件易事, 又可能我平身個平衡力不足, 每每企唔到2-3秒就跌落海, 慘痛!! 由於冇預到天氣真係會咁曬, 加上平時都唔會點搽太陽油, 所以經過全日係烈日當空暴曬之下, 最後變左隻大燒豬!! 好在, 係第一晚有d事要上牛牛屋企, 佢見到我曬到燶晒, 咁岩又見潔妹有2,3支太陽油(細支旅行裝)就送俾我第2日用!!

到左第2日, 已經開始適應d風向, 成個人都開始企得穩, 而且可以順住d風向走, 話雖如此, 不過自己就仲係未懂得如何控制自己既方向, 成鬼日只係識得俾d風帶住, 雖然呢個只係一個"初級滑浪風帆班", 不過都需要考試, 因為考完試之後, 你以後就可以自由係康文署既水上活動中心租借用具自己去玩!! 頭先講左啦, 因為自己控制唔到方向, 所以阿sir就fail左我! 不過都冇所謂啦, 當係見識下都算係幾好玩呀!!

Anna就好野啦, 又係一take pass, 所以佢以後獨本舟, 風帆, 滑浪風帆都可以去玩啦, 好勁呀!! 講多少少野, 頭先咪講左我有兩隻新既太陽油既, 係第二日, 我見有太陽油, 我就興致勃勃咁起勢咁搽起勢咁搽落身, 由頭搽到落腳, 唉, 就係咁就賴野啦, 原來太陽油平時就唔應該搽埋落額頭, 因為一出汗, d汗就係額頭標出黎就會流到落對眼度, 加埋d太陽油, 就辣到我對眼飛起!! 所以各位以後做運動又要搽防曬就記住唔好搽埋落額頭!!

生日大典

開心時刻開始啦!!
我既全年通行證 + 生日章
迪迪尼工作人員係掃地期間, 用枯葉砌左個米奇老鼠個logo出黎!!

上星期918乃本人生日, Anna早在成個月前已經提議係我生日正日個時去迪迪尼慶祝我生日, 仲話到時會買全年通行證, 咁遲D我地得閒就可以去迪迪尼玩啦!! 原先諗住18號當日到迪迪尼門口先買全年通行證, 就係搭緊地鐵去迪迪尼途中, Anna突然拎左份全年通行證送俾我, 原來Anna好有心思, 佢早在前一日已經去左香港站既迪迪尼專櫃買左呢set套票, 特登俾個驚喜我, 哈, 實在太開心啦!!

之後, 我地當然係浩浩蕩蕩咁入去迪迪尼啦, 其實朝早個時臨出門口個突然落好鬼大雨, 仲要有行雷, 幾驚今日開心之旅去唔成, 我驚死仲特登拎把大傘出街, 好彩天公做美, 出左門口之後, 個天都算慢慢放晴, 雖然係有少少熱, 不過起碼唔駛怕落雨呀!! 好啦, 講返今次生日之旅先, 原來買左全年通行證既話, 首次使用既時候, 要係入閘機個度用手指模黎確認身份, 咁以後即使有人執到你個張通行證都用唔到啦!!
合手恭喜~~
再黎攬頭攬頸!!

既然係我生日正日黎到迪迪尼就當然要去拎返個生日章出去威威啦, (只要你係正日生日到迪迪尼玩, 只要出示証明你係當日生日, 迪迪尼就會送你一個生日章, 只要你扣住呢個章係迪迪尼入面玩, 入面既工作人只就會同你講生日快樂, 當然啦, 其他既迪迪尼主角都會同你打招呼祝你生日快樂)!! 拎完生日章之後, 咁岩隔離就有隻唐老鴨同人影緊相, 我地見人少少咪立即上去排隊影相羅, 哈, 到我地影相個時, 唐老鴨見到我個生日章就立即彈後幾步, 即刻向我合手作恭喜手勢, 又大大力攬實我, 真係好攪笑, 不過後尾自己諗諗下, 其實套唐老鴨衫入面o個個人應該係麻甩佬黎架, 點解我俾個麻甩佬攬住仲可以咁開心!!

好景不常, 就係同唐老鴨影完相之後, 發現自己部相機居然冇電, 枉我一世聰明, 我明明已經係前日, 特登過晒D相入電腦, 而且再差爆電, 點知天意弄人, 居然突然間冇電, 幸好呢個世界上有手機就等於有相機, 雖然同相機影出黎既相係就差咁d, 不過總算係聊勝於無!! 收拾心情, 再一次出發玩羅, 由於當日係閒日既關係, 基本上都唔係特別多人, 所以呢我地就可以好快咁玩左幾款機動遊戲, 仲係講緊完全係唔駛排隊個隻喎, 一行入去就有得玩, 又唔駛拎定d fastpass, 完全超good, 平日去果然係有平日去既好處!! 話咁快就玩完"明日世界"個幾款遊戲!! 其中有個係同"史迪仔傾計"既遊戲, 我不嬲都幾欣賞佢既工作人員既即時反應, 如果大家都玩過都知佢會係同現場既人傾下計, 講下笑, 今次我同Anna入去, Anna有幸可以同佢做到傾計對象, 哈, 個史迪仔居然當住咁多人面前話佢愛Anna, 仲叫Anna飛左我, 真係好好笑!!

小小世界, 其實入面都幾光下, 不過我部相(手)機都係影唔到!!
腸仔三文魚撈麵~~
三文治+蛋x2+馬仔

玩完之後, 我地就去"小小世界", 上次黎個時都仲未開, 依家開左, 就當然要去昅一昅啦!! 第一次黎小小世界, 原來係坐係個船仔度睇下全世界既特色風景, 加上去到不同既國家就播用返當地既語言唱返首"世界真細小", 即係去到泰國就會聽到泰文版既"世界真細小", 都幾得意下, 不過聽Anna講, 佢之前去過法國個迪迪尼, 佢話對比香港既"航程"就會短左少少!!! 玩完肚餓係時候食lunch, 今次我就自己準備左兩盒午餐盒, 係朝早起身prepare, 咁就唔駛係入面食埋d貴又唔好食既野啦!!

巡遊~~
High school表演~~

之後再睇下巡遊呀, 再睇埋獅子王, 再出黎睇埋另一個high school既跳舞表演, 之後, 我地就去迪迪尼酒店食飯餐啦, 今次就book左迪迪尼酒店既"翠樂庭"度食buffle, 由於之前睇過openrice話係呢間餐廳食buffle, 會時不時有d迪迪尼主角出黎同大家影下, 所以就係成個月前book定, (因為之前有人話呢度d位都幾難book, 所以就早少少book定!!)

好多野食下~~

呢度d野食種類好多下, 基本上行5, 6轉先可以試得晒所有食物!! 而且d食物源源不絕咁供應, 魚生又keep住出!! 真係幾好, 甜品款式就相對弱左少少, 不過有(黑,白)朱古力噴泉, 又有軟雪榚機俾人玩都算係幾好, 今次食buffle, 由於係有全年通行證既關係, 所以係有8折優惠, 不過埋單都要幾7舊水(兩位), 不過野食多, 又有迪迪尼主角出黎同你影相都幾係唔錯, 幾好!! 講開d迪迪尼出黎同你影相, 其實隨後佢地仲有個攝影師係後面, 佢地會用佢地既專業相機同你地又影返幾張相, 之後就會print返set靚靚既相出黎俾你, 如果你有興趣就可以幫襯佢買, 當然啦, 價錢都唔平啦, 好似都要成$120 - 5"x 7"既相, 又或者係$150/兩個有相既鎖匙扣!! 當然, 難得黎到, Anna就話買返個返去!!

就係咁盡情日開心玩完一整日, 多謝Anna俾我既驚喜及各樣既安排, 好開心!! 我會同史迪仔一樣對妳咁好, 仲係過之而冇不及!! 黎緊我地仲要去迪迪尼萬聖節夜場, yeah!!!