日本中部之旅(六)浸...浸...浸【14/4 - Day 3】

唔好以為民宿就好流呀!! 其實都不知幾乾淨!!
一朝早就有cake食, 正呀!!

到第二日, 因為前一晚我地同民宿主人講, 我地會6:30a.m食早飯(因為我地今日要去浸好多個溫泉, 趕時間去好多地方!!), 嘩, 好早呀!! 好辛苦, 要成6:00a.m就爬左起身!! 簡直係想死, 仲早過平時起身返工!! 梳洗完之後, 我地就就到樓下享用我地既早飯, 又一如琴晚一樣, 又係排得靚靚的!!


食飽飽, 我地就上去執行李, 又係時候出發!! 由於民宿既關係, 當然係唔會look card架啦, 所以我地就要俾cash!! 之後, 民宿主人俾左本簿仔我地叫留低一d資料方便佢自己作記錄, 我地靜靜雞偷睇其他客人d資料, 原來今個月暫時只得我地黎呢度住, 而呢度既旺季係冬天既12月, 1月既時候!!! 臨走個時, 民宿主人好客氣, 叫我地係汽水機度隨便選擇一款飲品, 佢請客!! so nice!!

今次旅程既目的, 之前講過其中一個係睇櫻花, 其實仲有兩個目的就係浸溫泉同埋睇祭典!! 而今日我地行程將會浸3個溫泉!! (係呀, 老媽話睇完我個行程之後, 佢都話幾驚我會浸到甩晒d皮呀!!) 我地會係白骨溫泉度浸兩個不同既溫泉, 之後就再去新穗高再浸另一個溫泉!!!!

白骨溫泉 - 泡@湯旅館都係個句, 浸之前要洗乾淨!!

呢個今日浸既溫泉全部都係混浴 - 即係男女一齊浸!!! 男既固自然唔可以著泳褲啦, 女既都唔可以著泳衣, 不過友伴好醒目, 佢知黎日本浸溫泉會有混浴, 所以黎日本之前, 已經係香港買左條圍巾, 該圍巾可以將上下身都包得好好, 咁就唔怕走光啦!! 係日本浸露天溫泉對住個藍天白雲又真係幾舒服個喎!! 不過, 可能係閒日既關係, 基本上黎浸溫泉既除左我地係後生仔女之外, 黎得浸既多數都係d公公婆婆!!

呢個係白骨溫泉入面另一個溫泉 - 丸永溫泉
我就係小店度叫左碗天婦羅烏冬!! 味道, 咸左d!!
飛驒牛肉刺身

係白骨溫泉度前後浸完兩個之後, 係時候休息下搵下野食, 先再浸第三個!! 我地途經一個小店, 由於大家都好餓既關係(聽講浸完溫泉個人會易餓d!), 所以唔理三七廿一, 入左去食Lunch先!! 呢間小店食物既選擇唔多, 我同友伴各自叫左一碗烏冬同喬麥麵!! 食飽之後, 見到小店後面有間小型超市, 一場黎到, 食飽當係運動下, 於是入去逛一逛啦!! 唔講我笑, 一逛, 就俾領隊佢地發現呢度既名物既"飛驒牛肉刺身"只需要564円(即係約$43)就可以品嚐飛驒牛肉, 佢地當然唔會放過啦!! 於是佢地就叫埋我地一齊試下, 可能自己對食冇咩要求, 食落肚, 冇咩特別感覺, 好好食咩, 又唔係, 唔好食咩, o.k啦!! 我諗或者用黎打邊爐就可能會好食d, hehe!!!

另一個位於新穗高自稱日本最既露天溫泉 - 水明館
海天一色, so great!!

食飽飽就再出發去另一個溫泉啦, 呢個溫泉位於新穗高的, 佢自稱係全日本最大既溫泉, 雖然我唔知係唔係全日本最大, 不過以之前個兩個溫泉作比較又真係大好多!! 而且更加開揚接近大自然!! 四周圍都係俾d樹包圍住, 一眼遠望出去就係d山景, 如果落住雪黎浸, 我諗仲好feel呀!!

(待續)