寶麗萊

唔知大家有冇一部寶麗萊呢? 冇, 唔緊要, 依家上網有個software可以將你d DC相轉化為寶麗萊相, 都幾似架, 而且佢仲會將你原本個張相會執一執d色, turn完之後, 完全有寶麗萊feel, 仲有仲有, 佢仲要你當真相咁, 要慢慢慘d色出黎~~
Web-site : http://www.poladroid.net/

墾丁

相片來自:五個背包的廿七天練習曲

早排無聊(偷懶唔溫書!!), 上網search下有咩好睇, 睇睇下, 搵到個blog, 係講佢地5個女子岩岩畢業就自己攪左個畢業大旅行(其實都講緊係07年既事!!), 係一共27DAY既台灣環島遊, 當中佢地去左好多特別既地方, 阿里山, 墾丁, 花蓮等等.......而且佢地全程都係住係d民宿度, 而且d民宿各有特色, 一路睇落去都覺得幾得意幾好玩!! 再睇落去之後, 原來佢地仲將呢個咁特別既經歷出埋書, 真係好厲害呀!! 回想當年我既畢業旅行都係去左台灣架, 不過就冇佢地咁勁, 只係得3日2夜, 不過個次旅行可以同最好既好朋友去玩, 真係好開心!!! 自個次旅行之後, 都開始愛上自由行~~~ Jessica更加愛上左台灣, 開始佢一年去3-4次台灣既紀錄!!

相片來自:五個背包的廿七天練習曲

另外, 之前都聽過人地講墾丁係一個好靚既地方, 即使之前有睇"海角七號"個時, 都冇特別留意到, 點知係睇完呢個BLOG之後, 見到佢地影墾丁既相, 真係好靚, 藍天白雲, 黎緊係旅行計劃當中, 墾丁將會成為我其中一個目的地!!!

五個背包的廿七天練習曲

你又用左幾耐呀!!

這是我的~~~

MSN打敗ICQ, 到家陣成立已經十週年, 依家Window -Live有個Web-site俾大家上去, 只要用msn a/c登入佢個web-site, 佢就就會顯示返你本身係何年何月何日成為MSN用家, 我本身係比較遲一批用MSN既人, 不過睇返原來都不經不覺用左MSN成6年!!

其實係未用MSN之前, 我都一直鍾情用ICQ, 不過後尾實在太多人用MSN, 攪到ICQ個"on-line" list長期都冇咩人, 所以就唯有跟大勢一齊去用MSN!!

http://10.msn.com.cn/

[中文字幕] 英國星光大道 Susan Boyle 感人演唱 驚艷全場 I Dreamed a Dream

今朝聽"晴朗的一天"(家陣朝早出門口, 多數都係聽住手電個收音機返工), 林海峰介紹岩岩係外國既星光大道出左一位一夜成名既女仕, 佢年已47歲但係依然有佢既夢......終於俾佢實現到!!!

大家可以去youtube睇下, 真係幾好睇!!

http://www.youtube.com/watch?v=izucgB-lBaI

仙樂飄飄

岩岩係網上見到呢段片, 好得意, 成班人係火車站聞歌起舞!! 香港唔知會唔會有d咁既情況出現呢!!

玩樂@元朗 (下)

我地叫呢款係牛奶味既綿綿冰, 上面再淋上葡萄糖醬 + 底層舖左梅子魔豆 + 蘆薈粒 + 椰果!!

坐完街渡出返去元朗市中心, 我地係附近踩多幾個圈就拿拿臨去還車啦, 因為元朗仲有大把野食待緊我地架麻, yeah!!!! 踩到身水身汗, 成身熱辣辣, 最好當然係去食返個冰凍野食cool down下成個人先啦!! 首先我地先去離單車舖不遠既地方食個"綿綿冰"先, 係呢間舖頭入面除左平時食既普通甜品之外, 佢仲有款好特別既甜品食, 就係綿綿冰!! 千萬唔好以為綿綿冰就等同一般既刨冰, 當你食落去個時, 同平時一般既硬卜卜碎冰式刨冰係完全兩回事!! 由於陣間仲有好多野等住我地去食, 所以我地只係叫左一款綿綿冰share黎食就算!!! 如果大家有機會入去食, 大家記住要試個d魔豆, 佢d魔豆既口感好得意, 你一咬佢就會爆開!!

其實呢間舖頭位置就係B仔涼粉隔離~~~
係menu上面寫"滑雞排" - 其實係指有雞皮既雞排就稱為"滑雞"是也!!

食完甜品warm up, 於是就再去食多樣小食再熱熱身先得, 我地行到去大坑渠個邊, 聞說呢度有間食大大塊雞排間小食舖, 又係個句啦, 一場入到黎又點會唔試下先得架!! 由甜品舖行到黎呢度先發現呢間小食店既位置正正就係B仔涼粉既隔離!! 開頭諗住佢以台灣大大塊雞排作賣點, 難食極都有個限度呀, 點知.......唉!! 一去到舖頭, 見到佢岩岩新鮮熱辣炸起左幾塊雞排, 我地諗住今次有運行啦, 平時呢d炸物, 唔係新鮮食落去, 味道真係差一截!! 等如你將老麥d薯條放係度一陣淋晒先去食既情況完全一樣!! 當我滿懷期待咁咬落品嚐呢件美食, 頂, 一件完全冇味既雞排, 雖然上表面已經灑左一d味粉, 不過個d雞本身係完全冇味道, 嘩, 自己講真, 都唔知咬緊件咩野黎!! 所以大家都冇需特別入去搵呢間野食!!

超大碗既蟹子沙律~~~當麵食都得呀!!
點左大約12件壽司~~~件件都份量十足, 飯底足料, 上面件刺身又新鮮兼大件!! 左上角個碟係响螺刺身+右上角個碗就係食極都食唔完既大大碗蟹子沙律!!!
天婦羅炸蠔~~

之後, 我地就去左間隔街食日本野啦, 呢間酒泉係之前anna提過話要黎食, 因為佢地d野食非常大件夾抵食, 當然都係好好食啦!!! 我地大約5:15pm入到去, 待應話, 六點前仲有得叫下午茶優惠野食, 望一望d下午茶menu, 嘩, 真係好抵食喎!! 尤其係個蟹子沙律, $19之麻, 平時係出面d日本料理食都係得個細細碗, 但係呢度就唔同啦, 分分鐘仲同碗拉麵既分量有得fight!!

之前都上過open rice見到其他人都講過呢度d野食都好大件, 分量好多, 不過人總係貪心, 原先我地已經叫左12件唔同款既壽司 + 大大碗蟹子沙律 + 仲有個响螺刺身!! 不過, 待應臨六點前再行過黎話, 特惠下午茶last order啦, 問我地仲叫唔叫野, 哎呀, 就係咁我地就口多多手多多咁點多一樣野食 - 就係天婦羅炸蠔(menu話得5件, 唔知點解送到黎有成6件)!! 就係咁, 我地又再一次食到頂頸頂喉嚨!!! 兩條友, 食左咁多野, 埋單其實講緊都係$200多少少, 呢度仲要係免收加一, 如果我地唔叫咁多野食, 分分鐘百零蚊落樓都得呀!!

食飽飽之後, 就係元朗附近行下, 消化消化!!! 一天既元朗遊係不斷食不斷食既情況下完結啦!!

(完)

綿綿冰甜品屋
地址: 元朗建業街59號慶年大廈3號地下
電話: 2470 9083
菜式: 港式、果汁、甜品/糖水

大雞大超級雞排
地址: 元朗金輝徑金禧樓地下5號鋪
菜式: 台灣菜

酒泉日本料理
地址: 元朗教育路81號元達樓地下
電話: 2479 8618
菜式: 日本菜、壽司/刺身

玩樂@元朗 (中)

嘩, 食埋個好到底既麵之後, 真真真真真係飽到上頂, 係時候搵單車出發去做做運動消化消化先得!! 對上上一篇講左搵車既經過都唔係度再講多次啦!! 終於俾我地搵到有單車出租, 唔理咁多, 出發先再算!!

其實南生圍路唔係單車徑, 沿途時不時都會有車係你尾, 所以踩個時要非常小心!!

係河上面, 其實只要細心d睇下就可以見到d鴨仔係河入面游水~~

係單車舖一轉出去已經係元朗西鐵站, 隔雜就係新元朗中心, 只要一直踩, 話咁快就會去到博愛醫院架啦!! 過左博愛醫院有理冇理再繼續向前踩, 應該好快就會見到南生圍個指示牌, 跟住轉入去南生圍路就岩架啦!!


開頭因為唔係太識路, 一路踩, 點解踩極都唔到人地成日拍戲, 影相好鬼靚既地方, 唔通自己不自覺咁行錯路, 原來其實只要沿住南生圍路踩一段幾長下既路段, 去到尾就可以去到d人成日話好靚既地方啦!! 我地一場入到黎呢度, 唔駛講就係四周圍影呀影, 起勢咁影, 冇執輸咁!! 當然, 除左我地之外, 其實都仲有好多人係度影相同埋欣賞風景!! 不過, 我地拖住架單車, 有d地方就唔係咁方便行, 所以就係南生圍外邊影下相就算, 冇再特別行入去!!! (其實另一個重點係我地仲有下場, 就係趕住出去再食野!! yeah!!)


過左街渡先影!!! 我地係對面過黎架!!
落左船再踩返出去街口就見到呢個指示牌, 向左轉返出去踩多陣, 就係元朗西鐵站啦!!

再沿住個指示牌有街渡過河, 一場黎到又點唔會放過搭下出名既街渡過河呀!! 位位$5, 兩岸基本上長期都會有人等上船!! 揸船伯伯當然唔會放過任何賺錢機會, 行多兩轉, 快快手賺多幾蚊呀麻!! 落船之後, 再沿路轉返出去, 話咁快就可以到元朗西鐵站啦!!

其實, 大家唔想踩單車(or踩太長路段), 又或者想行入去南生圍, 其實只要係元朗西鐵站後面直接行入去都可以, 先入舊墟路之後, 再轉入山背路, 話咁快就會見到上面個指示牌架啦!!

(再待續.......)

玩樂@元朗 (上)

星期六一朝早就同Anna搭巴士直接入元朗, 對上一篇講過, 人生路不熟, 入到黎開頭個時搵唔到單車租, 所以就四周圍搵下, 入得黎元朗又點會淨係踩單車咁簡單, 當然係順手搵下d好野食啦, 所以又係晨早係openrice度搵定d好野食既資料, 咁岩一路搵單車租既時候, 經過其中一間好野食, 橫掂經過加上又就快到lunch, 拿拿聲入去醫一醫個肚先再搵車先!!
間舖頭既裝修有d"搶"~~~ 掛晒燈籠, 吊扇!!!
十寶丸 + 腩雜十寶
特別呈獻 - 牛之四寶: 牛鞭 o 牛春子o 牛開心 o 牛子

呢間舖叫"嘉麗園潮州粉麵餐廳", 人家出面有咩四寶麵啊, 呢度就勁啦, 四寶就當然有啦, 呢間餐廳連十寶都有呀, 其實一下說穿, 所謂既十寶就只不過係雜丸, 除左呢個十寶之外, 仲有另一款十寶就係"腩雜十寶", 呢個都唔算勁呀, 係我等食期間四圍望下d牌, 突然見到有"堅"野, 呢度居然仲有牛鞭食個喎, 除左牛鞭, 仲有咩牛春子, 牛開心(其實我都唔知咩叫係牛開心!!!), 我於是問anna, 不如我地賣條牛鞭用條竹籤串起佢, 再係條街度食, 都幾過癮, 當然, 佢就彩我都傻, 最後都只係叫左兩碗十寶食就算!!!
好到底~~~
雲吞伊麵~~~

食完兩碗"十寶"基本上都已經飽左7, 8成, 不過, 過左唔夠兩個街口, 我地又見到元朗名物之一: 『好到底』, 雖然頭先個兩碗"十寶"食完已經飽到上喉嚨, 不過一場黎到, 再加上之後應該都唔會再路經此地, 於是, 再入舖頭再食多餐, 其實係"好到底"入面食野, 其實都唔會怕飽得好多, 因為佢地本身個碗麵都係好細碗, 如果係一般未食野入黎既男士, 分分鐘食兩至三碗先夠飽, 所以呢, 我地呢D入黎淺嚐兩碗就足夠啦!!

"好到底", 出名係佢D麵足夠彈牙, 麵冇梘水味, 而且老店都有幾十年歷史, 唔入黎食返一輪, 都對唔住自己, 講到麵, 佢又真係冇咩枧水味, 不過可能頭先食飽左7, 8成攪到D味覺鈍晒, 反而食左佢個伊麵呢, 又真係唔錯喎, anna都讚呢個伊麵整得幾好, 臨走, 佢仲想買返d伊麵返出去做手信添!!

(待續........)

嘉麗園潮州粉麵餐廳
地址: 元朗康景街利景樓5號地下
電話: 2476 6882
菜式: 潮州菜、中菜館、粉麵/米線

好到底
地址: 元朗阜財街67號
電話: 2476 2495
菜式: 港式、粉麵/米線

玩樂@元朗(前章)

話說上星期, Anna提議星期六去踩單車, 見天氣晴朗加上上星期六又涼返dd, 襯涼涼地出去玩下都好!!之前踩單車踩黎踩去又係大圍踩到大埔冇黎新意, 於是上網昅昅睇下香港仲有咩單車路線玩下, 有人提議可以到元朗踩下單車去南生圍玩下, 咁都好, 總算係有新玩法!!

話晒第一次入元朗踩單車, 人生路不熟, 臨去之前當然要做足功課啦, 睇下邊樹有單車租, 左搵右搵上網搵極都唔多見元朗有單車租俾人玩(反而賣單車既舖頭就有好多!!), 之前有人話有間叫"昌緯"既單車舖有租單車, 但係咁岩係早兩個月前就開始暫停唔再租車俾人, 攪到我頭都痕唔知邊樹搵單車踩好!!

最後, 左搵右搵幾經辛苦(連yahoo小知識都搵埋)終於搵到有間單車舖租車俾人啦(天豐單車)!! 不過講真, 網上面d人話就話呢間有得租, 其實開頭都幾驚架, 點知到時俾佢地"扇"獲甘既, 仲得了既, 山長水又遠入一心入黎元朗先知冇得租單車, 真係好掃興架麻!! 好彩最後當然係有車租啦, 而且係天豐整單車個位師傅仔都幾好禮貌, 幾nice!!

過左醫院, 再直去, 之後會落個大斜路, 再直去多一陣就會見到南生圍個大牌!!

既然搵到單車, 當然要搵埋路線啦, 講真, 上網睇, 其實又係冇咩人講下條路點去, 我地呢d九龍人士, 十年都唔多入去元朗, 真係鬼識咩!! 查地圖又唔見得有咩明確既路線話你知, 又係另一頭痕點!! 終於最後俾我考究到原來只要過左博愛醫院之後, 繼續向前踩, 過埋條大落斜之後, 再踩多一陣就會有個南生圍既指示牌出現, 跟住轉入去就係南生圍路啦!! 沿住南生圍路踩踩踩到尾(都一段幾長既路程!!), 就會到達平時人地拍戲, 影相, 好鬼靚既南生圍啦!!

天豐單車
地址: 元朗安樂路35號利群樓地下

Seven Pounds

Seven Pounds 就已經係上上星期日去戲院睇, 不過忙加懶, 所以遲遲都未寫, 其實到左依家應該已經有好多人睇左呢套電影, 之前一直未入戲院睇呢套戲個時, 成日睇個d簡介, 基本上都係講叫大家唔好學佢係戲入面做既野, 完全冇提到個故事內容, 所以一開始個時都對呢套電影冇咩好感!!

不過好彩最終都入左戲院睇呢套電影, 因為佢都算係一套值得推薦既電影!! 基本上呢套戲都係一套十分dark既電影, 講述Will Smith因為自己引致嚴重車禍導致七人死亡, 因為佢深感內疚覺得需要贖罪, 所以決定搵七個人幫助七人重過新生!! 至於如何重新就正正電影開始前叫大家唔好學既事, 就係自殺再將自己既器具捐予有需要既人 - 患血癌既病人(捐骨髓!!), 心臟病既人, 腎病既人......將自己身上捐得既都捐晒俾人!! 當然當中就有一d情節啦, 呢度都唔多講!! 但係睇咁多套Will Smith既電影都唔試過有一套見到套差不多有八成既時間都係拿口拿面!!

題外話, 係電台既影評度聽返黎, 片名為"seven pounds", 其實當中包含一d意義, 根據莎士比亞既其中一個劇所描述, 古時英國如果有人欠債而又未能償還的話, 個位欠債人就要係身上割下一磅肉以作為還債之作, 所以電影今次起用"seven pounds"之名, 實際有還債之意!!

Yes Man

上星期六情人節, 當然係同情人出街啦, 一朝早我地呢d慳家人仕先走去睇早場, 早場價錢平成半喎, 所以好多時候我同Anna如果要睇戲既話多數都係睇早場居多!! 今次呢套Yes Man係Anna一早點名要睇既!! 既然係咁就先去睇個做早場作為情人節warm up活動先啦!!

Yes Man係一套輕鬆喜劇, 今次Jim Carrey重回喜劇之路, 好多人都好期待, 今次呢套戲, 講Jim Carrey參加左一個會, (其實我覺得類似係異教會個d呢!! 好有宗教狂熱個隻!!!), 凡事都要say yes, 根據該會既宗旨, 只要有yes no question出現既時候, 你一定要答yes, 咁先可以開創人生另一天地!!! 因而Jim Carrey本著呢個宗旨, 當中自然就會有好多趣事發生啦!!

不過Jim Carrey真係老啦, 雖然佢都出力咁做出好多浮誇既表情同埋動作, 但有時真係不復當年勇!! 而且戲入面大部分既笑位基本上係traliar個度都出晒, 話雖如此, 話晒呢套戲始終都係Jim Carrey從返喜劇電影之作, 整套戲出黎既效果都會令好多人抱腹大笑, 如果大家想開心, 而近排又冇咩其他開心喜劇睇既情況下, 呢套戲都不失為一個好既選擇!!