一家人

前日朝早搭車返工, 係等車既途中, 聽到一位媽媽同位小朋友既對話,

媽媽: 去到婆婆屋企, 記住要幫手做家務, 要聽話, 如果唔乖, 媽媽一定會知道架!! 乖既話, 星期日就有份大禮物!! 仲有, 如果想睇咩卡通片, 話俾媽媽知, 媽媽Download俾你呀!!

嘩, 家陣d媽媽襯d小朋友咁細個就教佢d咁既野都有既, 有咩事都係話Download就算, 係, 我知自己都冇資格話人(我都上網download野), 不過小朋友麻!! 小朋友就應該由細個就教佢, 什麼是知識產權, 如何尊重人地創作!! 唔應該一早就灌輸d唔好既觀念俾念俾佢, 雖然佢大個左之後, 佢都可能會用翻版, 上網download, 只不過呢個就係另一個課題!! 唉!! 呢d可以話係大教壞細!!

唔知大家有冇睇廣告, 係講一家人, 做大人或者做家長都應該要以身作則, 做個榜樣, 唔係小朋友就會有樣學樣~~

既然講開知識產權既野, 順手介紹一個blog俾大家睇 - 香港好相似設計, 呢位blogger搜尋香港設計同其他地方相類似既設計! 即講緊部份香港既設計有d都係"抄襲"人地既地方, 佢同時開放此平台俾其他人"舉報"抄襲事件!! 睇落又幾得閒架!!

無妄之災

成手都係@@!! total 好似俾人吸左4個印~~

原來近睇又幾似d生豬運落黎, 俾人吸左印之後個樣~~~

今朝有事返舊center個邊做野, 見到舊同事, 當然少不免吹下水, 點知即刻"賴野"!! 俾人突襲成功~~~攪到成手都係!! 唉!!! 這就是我的同事們!! 曾有不少朋友同我講, 我個樣天生係"嬲屌"格, 永遠都會令人有一種好想打我既衝動, 有時d人硬係唔該都冇聲, 真係二話不說就係兜野星埋黎!! o.k!! 好彩我好肉地, 唔怕姐!!

大家都睇到我隻手, 發生左咩事啦!! 唉!! 呢個都唔係問題, 岩岩朝早做完正經事之後, 咁岩就撞到大老細, 大老細話不如Lunch一齊食飯飲茶去(當然唔止我一個啦, 仲有其他同事), 一行5人, 於是全程飲茶當中, 我隻手都係放左係枱下面, 上至幫人倒茶, 下至自己食野, 完全唔敢放上黎枱面! 萬一俾大老細見到, 我都唔知點解釋俾佢聽好!!!

以輪會友

講開又講, 近排"全民皆股", 全公司大部分既同事對此都已經進入瘋狂狀態!! 見佢地按keyboard上面d數目字仲多過d敬文字就知啦!! 不過, 唔好睇小股票既威力, 佢除左可以令你係呢個遍地黃金既股市上執返兩水, 佢仲可以促進人與人之間既關係, 唔係講笑, 公司原先各不相關干的同事們, 平日絕少相關往來, 真係話不投機半句多, 但都因為近日股風熱棘帶動下, 大家都得閒冇事就企起身吹兩水!! 講下呢隻股唔得, 個隻就一定賺呀!! 幾時係高位!! 點解仲趺緊!! 走唔走得切!!!

我呢d係全面經濟復蘇之下仍未能得到任何受惠既小蟻民黎講, 好明顯真係插唔到d咩咀, 因為佢地成日都開口埋口都係講d No. (股票代號), 鬼識咩!! 唉, 成日見到佢地圍埋一團, 係度講下呢隻應該幾時放, 個隻你又入左未!! 早左放, 賺少左成千, 云云!! 我呢d人十分認同"吃不的葡萄是酸的", 邪念就立即走出黎, 我成日都係度諗, 唔知個市幾時會冧, 到時個市一冧, 睇下你班友仔仲會唔會咁多聲氣呀啦! wahahah~~

五月天&陳綺貞~私奔到月球

上星期, 上d forum度見到我鍾意既陳綺貞同五月天合唱左一首新歌, 於是上youtube search下, 又俾我搵到, 幾好聽!! 大家可以聽下!!

<五月天．陳綺貞 - 私奔到月球>
其實你　是個心狠又手辣　的小偷
我的心　我的呼吸和名字　都偷走
你才是　綁架我的兇手　機車後座的我　吹著風　逃離了平庸
這星球　天天有五十億人　在錯過
多幸運　有你一起看星星　在爭寵
這一刻　不再問為什麼　不再去猜測人和人　心和心　有什麼不同
＊一二三　牽著手　四五六　抬起頭
七八九　我們私奔到月球
讓雙腳　去騰空　讓我們　去感受
那無憂的真空　那月色純真的感動
REPEAT＊
當你說　太聰明往往還是　會寂寞
我笑著　傾聽孤單終結後　的寂寞
看月亮　像夜空的瞳孔　靜靜凝視你我 　和我們閙嚷的星球
靠近你　怎麼突然兩個人　都詞窮
讓心跳　像是野火燎原般　的洶湧
這一刻　讓命運也沉默　讓腳尖劃過天和天　地和地　緣分的宇宙



又, 係youtube search開陳綺貞時, 見到其中一首MV係攝於花之姿態演唱會<女明星>, 其實呢首歌本身好似係陳綺貞作俾林嘉欣唱, 只不過岩岩陳綺貞佢係自己既演唱會上面, 重新自己演繹返出黎, 又幾好聽!!! 尤其是係MV尾段, 見佢對住小虎(佢男友)黎唱, d歌詞黎得更有meaning!!

p.s: Jessica你最鍾意既五月天, 同我鍾意既陳綺貞cross over~~ so great!!!

吾湯吾水

通常老媽都會裝定咁大碗湯俾我"享用"~~

老媽乃一代家庭煮婦是也, 拜大小不良的福, 家中湯水每晚都永無缺少!! 通常我夜歸, 老媽都喜歡裝定碗湯放係廚房, 等我返黎之後, 自己"叮"返熱佢自己飲!! 琴日乃係大暑之日, 天氣之酷熱簡直非一般文字能所形容!! 呢d節氣之日(大, 小暑), 指定湯水當然就少不免, 琴晚出完街返屋企, 果然見到一碗冬瓜水已經放左係廚房, 一飲之後, 完全解暑!! 琴晚, 我連冷氣都唔駛開, 老媽煲的冬瓜水果然有d料子呀!!

屌xxx!!!

基本上識我既朋友都知我對朋友既包容性都算係幾大, 即使係精神有問題的人, 我亦樂意同佢交朋友, 不過有幾類人, 我就會比較敬而遠之!! 唔係連朋友都做唔到既, 只不過, 只係做hi & bye朋友羅, 未必可以深入d!!

1.) 有種人總喜愛扭扭拎拎的, 凡事都故作神秘!! 問佢野時, 佢就ee哦哦, 傾計交談要有來就有往, 問完你d野, 佢就唔會講返自己d野, 如果咁樣既話就冇左個種等價交換既樂趣! 這一類人, 於我黎講, 大家都只可能傾一d流於表面既課題!! such as: 前排做過咩, 早排睇過d咩戲, 就係咁羅~~

2.) 女人型(那型) - 唔知點解, 由我中學年代開始, 一對住d女人型, 就會有個衝動想一拳打落去, 男人老狗扮到嬌滴滴, 呢個純粹係個人問題, 重申我係鍾意女人架!!

3.) 有d人, 如果問佢意見既時候佢會話冇咩所謂, 隨便得啦, 你話事, 跟大圍啦! 不過, 當一切塵埃落定之後, 又會謙三謙四, 又話呢樣又話個樣, 多多意見, 呢d人就應該"斬立決", 明明一早問左想有咩意見, 既然冇所謂又何苦一切都決定左之後, 要俾"說話"人地聽呢, 要做聯絡個位的已經不好受, 既然係你自己不提出, 就應該要接受當中既決定!! 啦, 教大家一個term, 呢d人擺明"嬲屌"!!

4.) 自怨自艾的人, 成日話人地呢樣個樣, 自己又唔識得自我檢討, Fine, 你有料你有權係度話人, 但係又唔係喎, 成日話自已懷才不遇, 呢個世界邊樹有咁多懷才不遇呀!! 你估你自己係李嘉誠咩, 真係痴膠花, 可以發達, 如果你真係咁諗, 你就真係"痴膠花"!!! 當然唔係叫你應命, 不過, 最好就去自我增值下, 呢個世界冇人係欠左你, 自己都要努力先得架!!

5.) 小氣既人(尤其是男的), 此類人每每俾人話兩句, 開兩句玩笑兩句玩笑之後, 就會嬲晒成村人, 我呢d口沒遮欄既人, 見此類人尤如"剋星", 每次講說話時都要諗過度過, 睇下有冇踩過佢條底線, 每次講說話時都會好慢好慢咁遂粒字由喉嚨吐出黎!! 十分辛苦!!

p.s: 暫時係咁多, 諗到再寫!!

哈利波波

上星期日約左Jessica, 牛牛 & 堅去睇"Harry Potter - Order of the Phoenix"知點解, 凡親有咩系列式重頭大電影, 我地幾個都會不約而同咁約埋一齊睇, 之前既例子如: Lord of the Ring, Matrix, 都係...好明顯Harry Potter都唔會例外啦!! 其實, 我地呢d所謂約埋一齊睇戲既活動, 都只不過係俾另一種藉口大家, 順便出黎聚一聚姐!!

成套戲入面最壯觀既場面就係最尾, Dumbledore同Voldemort之後, 玻璃爆晒出黎!!

講返今集Harry Potter先, 今次既進度, 篇幅比上兩集慢左少少!! 不過都還可以接受, 到暫時為止, 我諗都係以Harry Potter第2集為最悶既一集, 我咁大個仔, 個集應該係我唯一一次係戲院睇戲會睇到訓著覺既一集!! 今集入面主要開始入戲肉, 講Voldemort既回歸!! 不過, 又實在太少激鬥場面, 而片中應該算係高潮位既"天狼星"既死, 都去唔到應該有既效果, 話死就死左, 完全冇左個必震撼感, 某程度上, 可能你唔覺以打個呵欠就會miss左呢一段!! 而且, 今集有好多野都冇交代過, 例如一開始, 有幾條友出黎接Harry返學校, 除左有個係止集出現過之外, 基本上, 其他都唔知係咩人(好似話個d係正氣師喎(!)), 又, 最尾個個爭住要既預言"波波", 實際上有咩用, 有冇人可以答到我呀????

7年前既主角們, 仲係一面稚氣~~

7年後, 個個都變晒樣~~

岩岩上網check返原來Harry Potter電影第一集係2000年上畫, 到依家去到第5集已經係2007年, 上開網又順手搵返第一集主角d樣, 哈, 7年時間原來真係可以變得好厲害!! 完全變晒樣, 尤其是主角Daniel Radcliffe!! 岩岩睇電視話無線同明珠黎緊會播返Harry Potter頭3集, 大家如果冇買DVD睇既話可以係電視睇返佢地細細個既樣, 好得意!!

有隻小蜜蜂呀, 飛到花叢中

琴日約左jessica, 牛 & 堅去睇戲!! 講開又講, 我又好似冇見Jessica好耐, 就係冇見咁耐, 佢真係一見面就整獲甘既俾我!

話說, 琴日我我地係約左睇7:00p.m個Harry Potter, 一早講左我地會先食tea, 後睇戲, 再食飯!! Jessica琴日一早就出左尖沙咀, 之後佢就打俾我話佢已經係新加坡餐廳坐低左叫我地去join佢, 其實我聽完佢講"新加坡餐廳都心知不妙, 事關係早兩年係呢間餐廳食過dinner, 當時已經見到四圍都有好多蒼蠅 飛黎飛去, 自此, 我都對呢間野冇乜好感!! 其實, 我都同佢講左呢間野好dirty, 不過見佢坐低左就算啦!! 我去到之後, 就叫左碗牛肉啦沙食, 本來食個時都冇事, 不過, 去到差不多食晒個時, 唉!! 不幸既時發生左, 俾我係碗野度了到隻"野", 係咩, 我就唔清楚, 總之係隻小昆蟲個類啦!! 我就立即叫個待應過黎, 我叫佢望下係d咩黎, 雖然佢都有講sorry, 不過最火佢都係同我講, 幫我換過碗新既, 頂!! 我都差不多食晒啦, 況且見完頭先個隻野, 我邊樹敢放佢地餐廳d野食入口呀!! 幸好我身體健康, 冇樹冇幹, 如果俾著第2個, 我諗佢已經頂唔蒲走左入toliet嘔都唔定!!

所以係度同大家講, 記住, 千萬唔好去尖沙咀, 亞士厘道o個間既新加坡餐廳!! 呢間野好鬼好鬼"那渣", 不過, 如果你係想試下膽量, 同埋有返好似我咁上下強壯, 去試下都冇妨既!!!

這個是我, 這個都是我

牛牛話牛媽媽掛住我, 叫我上去食飯, 相請不如偶遇, 於是約左琴晚上牛牛屋企食飯!! 除左我之外, 達達都一齊上左去食飯, 達達岩岩去左成個月既歐遊, 聽講佢係行程既尾段染上手足口病, 即係手手腳腳有d一撻撻既野, 仲要好痕個隻, 幸好依家好得七七八八, 不過唔知點解, 琴晚俾佢摸完之後, 自已成日凝住好似都有少少痕添!! 食飽飯我地當然又係打Wii, 今次我地玩Mario Party(其實都出左一段時間)!! 呢個Game真係岩晒成班人玩, 好好玩, 其實佢係似大富翁形式玩法, 當中又包含一d mini game!! 如果有Wii既朋友都不妨整隻Mario Party玩下!!

類似大富翁形式咁進行!!!

每一個turn之後, 就會有mini game出現, 有時係4個人分別對賽, 有時就會3揪1, 好得意!!

依家越黎越多朋友屋企有Wii, 每部Wii入面都可以砌自己個樣出黎, 有個大頭人就可以方便玩Wii Sport個類型既Game!! 我係不同既Wii入面有不同既樣, 唯一每次一樣既都係整到對眼細到無倫!! 唔係一條線就係得一點, 永遠唔會見到有眼珠既出現!!

呢個係牛牛屋企部Wii既我!!! (麻煩牛牛幫我照住呢個樣再執過, 上次整完之後, 又真係唔係幾似, 都係舊呢個似樣d, thx)

呢個係Jackie屋企部Wii既我~~ 唔明點解我係會有雀斑(Jackie好似話呢d係暗瘡印喎)

呢個係小狗屋企部Wii既我 - Player 4 個位就係我啦!!

慶祝回歸, 投奔祖國之旅 #2

話說, 小貞貞第二日下午因為要返教會練歌, 所以第二朝要提早離隊, 而Jacike既男友William兄又因臨時收到電話, 話第二日要陪個外國黎既客上大佛玩, 又係要早走, 所以我地原先既6人行, 就變得返4個, 1:00p.m正式展開我地第二日回歸祖國之旅, 首先, 由瑪雅城專車(其實只不過係爛鬼VAN仔一架)送我地到書城(舊o個個), 之後, 我地就自已再轉搭地鐵去新開既書城, 呢間新既書城位於深圳地鐵既少年宮站, 要係地鐵入面轉線先去到, 其實Lingling之前去過呢間24小時書城一次, 不過佢既comment話呢間野"大而冇當", 雖則如此, 我地呢d屎忽痕,新屎坑, 未去過當然係要襯下熱鬧行下啦!!

書城正門~~

書城外觀

一行到入去個感覺唔夠光猛, 灰灰暗暗咁, 令人提唔起勁睇書(又或者, 我本身琴晚訓得唔好都唔定), 而且仲有個main point就係佢冷氣唔多夠!! 自由活動開始, 我地幾個對一對表, 2個鐘頭之後再係門口集合, 唔係講笑呢度真係好多人睇書, 都不特止, 好多人仲肆無忌憚坐係地下睇書阻住其他人行路, 我諗下年08奧運之前, 中國政府要改良下d同胞們既習慣, 如果俾其他外國人見到, 其實真係唔多好睇~~ 講返呢個書城先, 佢就一味得個大字, 分類比較鬆散, 而且佢只係得一層(連埋Basement, 應該算係兩層先岩), 所以有時行行下都唔知自已行左去邊, 雖然話就話24小時營業, 其實到左夜晚只係其中一個part係開放, 其他地方依然會close!! 計我話都係去返科學館站既書城比較好d, 一來佢有幾層, 行完一層再去第2層, 而且每一層分類比較清晰!! 而且個環境感覺上係舒服d!!

成個書城就係得呢層, 同埋個Basement兩層~~, 真係幾大下!!

呢邊係買CD, DVD影音產品~

我地自由活動既時候, 我就拍住Jackie行孖必, 而Lingling同阿康, 則各有各行, 有策略地搵書, 原來佢地真係一心上黎書城買書, 我聽到Lingling講左句:"我地帶左個購物袋黎, 方便陣間裝書走架!!", 我同Jackie一路行就一路四圍望, 雖然我地大部份時間都係keep住咁行, 好少可駐足咁睇書, 不過即使咁係咁e就咁行法, 2個鐘既時間話咁快就過!! 我同Jackie各自有一, 兩本書既斬獲!! 而數口精明既Lingling&阿康都有不俗既戰利品!! 不過Lingling始終都係搵唔到佢想買好耐既"150cm"繪本!!

滿足完精神食糧, 當然要滿足埋實際食糧啦 - 醫肚是也!! 因為唔想太夜先返到落去香港, 所以我地5:00p.m左右就去到"小肥羊"打邊爐, 雖然時尚早, 唔好以為冇乜人, 其實眼見已經有好多人打緊邊爐, 記住係打緊, 唔係開始打!! 即係話我地都唔算係早個批, 不過, 因為我地食過完早餐之後就冇食其他野, 所以都可以講係已經相當肚餓, 夜晚打邊爐, Jackie既屋企人再一次Join埋一齊食, 咁都好, 人多d可以叫多幾款野食, 如果唔係, 得我地4條友, 叫幾樣野都已經飽晒!! 好明顯係深圳食過小肥羊既香港人, 真係唔係太鍾意係香港食小肥羊, 因係上面食真係抵好多, 我地最後埋單都位位$60左右, 如果係香港食小肥羊既話, 分分鐘要位位$200!! 記住喎, 我地仲要係叫左好多野, 有d係食唔晒個隻~~係香港就會調返轉唔係食唔晒, 係食唔飽....

廢寢忘餐式打機~~ 睇佢個頭, 真係頂住包紙巾

講開Jackie個姪仔, 佢細細個(好似升小二)已經學人打NDS, 仲要係廢寢忘餐個隻, 我見到佢打機個時真係好得意, 成條頸屈到90度咁, 仲要係將枱度, 用包紙巾托住個額頭黎打機!! 如無意外, 我諗佢應該會好快要戴眼鏡~

食飽飽都差唔多9:00p.m, 起程返歸, 完成2日1夜回歸祖國之旅! 再一次感謝Jackie領隊, 希望下次我地再第二間按摩城揼骨可以齊人同埋玩得開心d!!

慶祝回歸, 投奔祖國之旅 #1

早在上個月既10號個時, 上左小狗屋企玩Wii, 同Jackie佢地傾開計, 發現近來活動除左打Wii之外, 都好耐冇出去活動過, 所以就一早約定岩岩既星期六&日北上(深圳only)!! 美其名係"慶祝回歸, 投奔祖國之旅", 回歸喎, 查實我地邊樹會咁有神心呀, 實則只不過係返深圳揼下骨, 行下書城就係咁大把之麻, wahahhah!!! 今次既統籌領隊由Jackie主持, 因為佢基本上每個星期起碼會stay係大陸3 day, 所以照理佢對上面有咩玩有咩食, 佢應該係最熟識!! 十分有責任心既佢, 一早就搵齊各方面既資料再加以分析!! 由佢帶團, 完全放心冇問題~~

其實原先諗住可以成班人可以齊齊整整上深圳玩, 點知小狗 & milk都分別有私人理由, 缺席是次活動, 呢個係唯是此活動中有點兒美中不足之處!!!

首先, 我地係3:30p.m先係九龍塘火車站集合, 由於是此活動除左我地6個之外, 仲有Jackie佢屋企人, 我地差不多一行12人有老有嫩浩浩蕩蕩齊齊出發北上"尋歡"去!!! wahahahah~~

第一站就首先係食!! 凡事唔食飽邊樹有氣力玩, 所以我地一上去就係食, 今次Jackie介紹左我地去一間日本鐵板燒料理食放題, 呢間叫"大漁鐵板燒日本料理", 唔好以為呢間野係深圳就係cheap野, 其實原來佢係國內都算係有點名氣, 佢係來自上海, 全國有成20間分店!!! 講真, 好鬼抵食, $150任叫任食3粒鐘($150已經係實數, 冇加一), 包括鐵板燒(包括 - 羊架, 牛排, 海鮮~~~), 刺身, 壽司, 天婦羅.............因為我地成12人所以就可以包房, 聽Jackie講6個人都已經可以包房, 不過唔好以為咁老定實有位, Jackie好細心咁, 一早plan好晒行程就拿拿臨打電話去book枱, 唔係講笑, 夜晚又真係幾多人!! 我地人多去食野有個好處, 可以坐係鐵板bar枱, 望住個師傅係你面前表演so great!! 最好笑, Jackie問師傅可唔可以表演d火黎睇下, 點知個師傅話餐廳唔俾放明火, 聽完之後, 大家都O左咀!!! 大家如果有機會去食既話, 有幾樣打要注意:

1.) 記住打電話訂位!!

2.) 記住要坐bar枱, 唔係冇晒食鐵板燒個意義, 點知佢會唔會係廚房煎完拎出黎就算呀(應該都唔會既, 我講下姐)

3.) 唔好飲個d所謂既鮮果汁, d味好怪, 最穩陣都係飲汽水可樂, 包冇死!!

4.) 好似星期六 & 日有分時段: 5:00p.m-8:00p.m/8:00p.m-11:00p.m, 我建議食頭輪, 因為頭輪食完之後, 個鐵板都已經炒到燶晒!! 第2 round食個d都係食炭屎多...

坐bar枱就可以望住師傅表演~~

主理我地今次既晚餐係一位女師傅!!

大家睇下, 個鐵板幾燶, 我地食第1 round就唔會有咁既情況出現, 塊鐵板會靚靚仔仔, 好乾淨~~

賣相不俗的鐵板生蠔, 師傅加左d煙肉條同埋芝士係上面, 好好食~~望住d芝士溶係面, 正!!

推介之一, 羊架, 又係好入味~~師傅燒完之後, 佢仲會加返d蔥花做點綴~~lovely ^^

食飽飽我地就出發去我地今次主打節目"揼骨"是也, Jackie本想介紹我地去"皇室假期", 不過佢話佢上次去過要成3舊水先可以落樓, 精打細算既Lingling一聽到之後, 就立即話: "嘩, 我同阿康, 兩個人喎, 夾埋咪要7百蚊!!" 所以, 我地就轉戰去另一個比較平既地方玩 - 瑪雅城!!

呢度係瑪雅城既入口~~裝修比一般既按摩場靚好多!!

其實, "皇室假期", "瑪雅城"呢d地方, 應該算係一站式服務高級按摩場, 有得揼骨,過夜, 仲有其他娛樂設置, 瑪雅城算係中等價錢, 唔算貴!! 我地一踏入門口, 就有好多位著制服既小姐峰擁而上, 我feel自己係佢地既獵物咁, 感覺似係個魚缸度放d魚糧落去之後, 一定會引到成班魚圍埋黎食野咁!! 佢地圍埋黎都係想推介下d套票, 呢個時候當然係由我地偉大既領隊Jackie出馬, 由佢了解完之後, 就正式開始活動, 我比較大鄉里之前未去過呢d地方, 唔知有咩玩&做, 所以由頭到尾都係跟大隊, 咁就實冇死!!

呢間瑪雅城成6層樓高, 入面有按摩池, 泳池, 餐廳, 桑拿房, k 房, 麻雀房(聽聞實際得個3間), 其中一層全部都係按摩用既房黎!! 一入去就沖個靚涼先, 之後, 就去焗個桑拿, 乾蒸完就濕蒸, 之後又再乾蒸, wahahahah, 爽呀!! 再換返套監獄衫 (入到去, 個個都要著返佢入面提供既衫), 等齊人就係休息區坐下, 所謂休息區就係有好多張大班椅(每張椅都有獨立電視機), 俾人坐係度做腳底按摩!! 我地就首先黎個腳底按先啦!!! 當我地做完腳底按摩之後, Lingling就走埋黎同我地講, 下次都係唔好黎呢度按摩, 佢話呢度d按摩女郎, 做按摩個時都貼得好埋身, 佢其實想講唔想阿康(佢男友)可以接觸到其他女性, 哈!!! 好好笑!!

之後, 我地就上去揼骨, 今次Jackie佢一心諗住上黎做香薰推油, 所以就自已拎定支私家香薰油上黎, 而我地成班男人就話一齊去做式按摩, 雖然我去過泰國旅行, 不過泰式按摩我又真係未試過! 唔係講笑, 按摩師傅真係同我黎個"Lock"頸動作, 真係下下都鏗鏘悅聲, 我成身起碼有7, 8個地方, 俾佢"Lock"過既地方, 真係好似散晒咁!! 玩完按摩, 都已經2點左右, 大家就各自去返男女分開既睡眠區, 其實睡眠區只不過係好多個一隔隔既地方俾人訓覺, 有少少似太空倉. 頂!!個晚有條友仔, 成晚扯鼻寒, 好鬼大聲, 攪到我成晚都訓得唔係幾好!!

偉大既領隊幫我地爭取權益~~

到左10:00a.m我地既起身時間(個休息區訓個時, 可以叫工作人員morning call), 已經見到Lingling同阿康係度篤緊波, 佢地話, 琴晚都係訓 緊唔好, 所以就一早起身玩下!!我地食埋早餐, 再自由活動多一陣就換衫走人, 埋單個時, 如果買佢地d套票既話, 就有d discount, 其實計埋每位都係$200都唔駛, 基本上都o.k!!

另外, 呢度有個好特別既野就係係場內所有既生果同飲品都係任叫任飲~~

(續)

一團火

新版奧運五星"福娃"~~~

話說琴日同Jackie佢地去左深圳玩, 係深圳搭地鐵個時, Jackie望到有張奧運福娃張Poster, 突然間問左句, 個5隻野係用左咩動物做代表, 基本上除左紅色個隻之外, 其餘個買隻我都講得到係咩動物, 不過我望左紅色個隻野好耐都唔知係咩動物扮出黎, Jackie就索性叫我上網搵下再話佢知, sorry, 算我無知, 一時醒唔係紅色個隻野原來係代表奧運聖火, 成日一心以為個5隻野都係由動物扮成的, 失禮晒!!

原裝福娃~~

根據官方網頁係咁描述: "福娃是五個可愛的親密小夥伴, 他們的造型融入了魚、大熊貓、藏羚羊、燕子以及奧林匹克聖火的形象。 　每個娃娃都有一個瑯瑯上口的名字:“貝貝”、“晶晶”、“歡歡”、“迎迎”和“妮妮”，當把五個娃娃的名字連在一起，你會讀出北京對世界的盛情邀請“北京歡迎您”。 "

循環再用

早陣子, 無記明珠台力播史力加1, 2集, 由於係第二日係星期一關係, 老媽一早就叫大不良上床訓覺, 大不良係10萬個唔願意之下, 爬左上床, 又係我呢個舅父仔出馬, 其實事情好易解決, 我只要用部DVD錄影機錄起套卡通片, 留返第2日放學返黎咪可以慢慢睇羅, 就係咁, 事情圓滿解決!!!

早兩日, 準時放工6:15p.m左右返到, 望一望電視, 估唔到大不良又拎返之前錄起既史力加再睇一次!! 老媽話, 呢幾日, 日日放學返屋企都會播下岩岩錄起個隻史力加既DVD出黎睇下, 佢話又幾好喎, 連埋d廣告, 慢慢睇, 咁就過左2個鐘!! 哈..咁又幾好喎, 每次如果無記or明珠播下呢d卡通片, 咁就可以慳返d錢, 唔駛去DVD舖頭買碟!! 睇完又睇, 再翻睇~~~

講開史力加, 戲院依家上緊第三集, 基本上冇咩意欲去睇第3集, 因為之前睇第2集個時, 已經悶到有少少抽筋, 其實佢只不過係<<搞乜鬼奪命雜作>>既卡通版!! 係呢套卡通片入面我比較鍾意"驢友"呢個角色, 我諗主要原因係因為由張衛健配音既關係, 令到呢個角色更加突出, 鮮明~~

下星期已經約左人去睇"Harry Porter - 5", so great, Jessica快d去買飛呀~~~~

香港小姐???

有日, 同老媽係個廳度睇緊"學警出更"個時, 佢問左我一個問題,

老媽: 仔呀, 呢個男人頭, 係唔係香港小姐黎架! !

我: 係呀! 香港小姐黎架! 仲要係冠軍添!!!

老媽: o下!! 佢都做到冠軍??

xxxxxxxx

Kenix, 唔知妳似徐小珊係一件好事定係壞事呢!!!

千軍萬馬在中環

今日一早因公事要過對面海, 由於家住荔枝角, 過對面海最快途徑都莫過於搭MTR既東涌線, 路經香港站過中環站一段路, 一路行就四圍望下, 眼見四圍OL挽著的包包都係以下列三大牌子為首 - Gucci, Agnes'b and Burbarry, 唔係講笑, 起咁e望兩眼, 嘩, 大大話話都有四, 五個OL都係拎住同一個pattern既monogram手袋, 雖然款式係有少少唔一樣, 不過, 人人都係拎住d咁上下既包包出街, 等於大家都係著住件Bossine既Logo Tee出街一樣!!! 感覺上有d怪怪的!!

早在兩三年前, 本想襯老媽生日之時買個LV包包俾佢, 不過, 唔知點解成日係街見到d師奶拎住個Gucci, LV monogram手袋, 硬係凝住佢地係拎緊個包包係深圳A貨, 將心比已, 如果老媽拎住出街, 都可能會咁樣俾人歧視, 為免老媽遭人白眼, 我覺得都係現兜兜俾錢佢, or請佢食餐貴既仲好!!

仲有, 仲有, 如果大家晨早係會行經由香港站過中環站個段路既話, 大家可以係搭扶手電梯個段路期間, 合埋對眼淨係聽下d OL行路d聲, 好鬼有震撼感, 因為大部分OL都係著高跟鞋返工, 行路個時"lok, lok, lok..........",尤如有成隊解放軍步操緊!! 好鬼得意~~~

雜

呢排搭小巴, 發現依家d小巴司機好鍾意將自己架車個look棍波改裝為一look勁粗水晶波棍, 咩係水晶波棍, 大家試諗下, 時不時有d親友朋友, 買埋d行貨手信, 一舊透明既爛舊水晶入面裝住幾粒字樣呀, 水中生物呀個d呢, 就係個d水晶啦!!! 小巴司機就興整到我條前臂咁look左右啦!! 真係唔明點解d司機要整到好似我手臂咁大look既波棍有咩用, 真係好揸手d咩!!!

+++++++++++++++++++

早兩日, 屋企個冷氣機再一次滴水, 又再一次叫左個師傅上黎整, 師傅同頭左望右望, 唔知咩事, 於是佢就成部冷氣機托左出黎, 終於發現原來係個水盤穿左個洞, 所以即使條喉去得流暢, 都依然會係滴水, 師傅立即將個位封返佢, 今次師傅好好人, 冇收我地錢!! 大家係冷氣機上面有咩問題, 可以隨時同我講, 我介紹呢位師傅俾你!!!

+++++++++++++++++++


呢個就係 "牛蒡xx珍珠堡"~~~


成日聽人講Mos Burger有幾咁好食, 又排長龍排得幾咁誇張, 聽就聽得多, 但係就未去食過!! 終於岩岩個星期日, 行經旺角返屋企個陣, 諗住買個tea屋企同老媽一齊食, 於是就走左去朗豪坊度買左兩個包, 一個係"海鮮珍珠堡", 另一個就係"牛蒡xx珍珠堡", 頂!!! 原先係想要另一款rice burger"帶子天婦羅珍珠堡", 點知冇, 就唯有叫個 "牛蒡xx珍珠堡", 頂, 咁就high野, 開頭以為有個"牛"字以為有牛肉啦!!! 妖!! 返到屋企聽老媽講, "牛蒡"係人地煲湯既用料, 唔係肉黎架!! 頂, 我即係咪買左個菜包~~~, 唉!!! 味道一般啦!! 冇咩特別!! 講真!! 原來d人話Mos Burger係個漢堡排burger好食, 下次都係再試下先!!!