好朋友系列: 小貞貞

又係好耐冇打過好朋友系列啦!! 哈, 基本上都已經放低左一段 (長) 時間!! 上星期五去完拜山之後, join返小貞貞佢地行山, 不過, 行行下突然間小貞貞同我講左一句:『早陣子睇過你個blog, 個"好朋友系列"好似話下個到我! 點解等左咁耐仲未出場!!』哈!! o.k, o.k~~~ 依家係時候又再繼續寫返先得啦!!!

小貞貞~~ 又係我既中學同學仔, 夾夾埋埋都識左十六年! 其實比我同佢仲有淵源既應該要數到Jackie同小狗(小狗都會係我好朋友系列遲d出現), 因為佢地係由小學一齊升上中學添呀, 何止16年, 佢地識左20年都有羅!! 當然最重要既就係依家都仲係一齊玩緊啦!!

講返小貞貞先, 係中學時代, 佢本身就唔多似一個女生, 因為佢本身又比較高挑(排球隊是也!!), 再加上佢份人比較粗豪(我諗佢應該係受屋企人既感染居多, 其實佢屋企陽盛陰衰, 佢(好似)有5個阿哥!)再再加上佢個時又短頭髮, 所以係中學個時(後來聽講小學年代都已經開始偽咁叫!), 大家都叫佢做"男人"!!

由於中學既時候對佢認識唔太多, 唯一既印象只係知佢屋企有好多人, 同埋有好多個阿哥!! 小貞貞俾我既感覺有時比較沉鬱, 又有時係大顛大肺, 簡單一句, 又有少少神經質, 有時做事又井井有條, 但佢又成日係度自稱自己係"雞手鴨腳之王!! (女人既心理真係難以捉摸!!) 總之, 對佢黎講有心情好既時候會講好多野, 心情唔好就會屈下屈下, "病"埋一二邊!!

由中學時代至IVE年代都見佢積極參加運動(打排球), 對佢身體素質有一定既評價&信心, 故此佢係我係呢堆朋友之中唯一一個被我邀請一齊去參加"環島行"比賽活動, 唉, 點知我自己睇漏左眼, 去到"環島行"尾段, 佢話佢對腳已經頂唔順, 冇可能再行落去, 由於環島行既最尾段係一段落山路段, 如果堅持要佢再行落去, 我怕佢會斷腳都唔定, 所以最後就只好放棄比賽, 噢, 我玩過3-4次既環島行, 係唯一一次行完成唔到成個賽事!!

小貞貞畢業之後曾經係某大型連鎖店工作, 因為呢間公司, 我覺得係形象上佢改變左好多, 因為呢間公司需要員工係上班個時化妝, 一開始個時都聽過小貞貞話好唔慣要化妝, 咁又係, 試問本身係一個男人, 平時又點會冇啦啦化起妝黎呀!! wahhahaha, 最慘既就係, 因為小貞貞平時唔多化妝, 一旦化起妝上黎, d皮膚一下子接受唔到d chemical, 敏感起黎(我覺得係佢本身個d男人基因抗拒, 唔俾佢化妝都唔定!), 當然啦, 經過一輪既處理之後, 佢都開始適應到化妝品, 而且, 開始懂得打扮起黎終於似返個女人!!

早兩個年頭由於小貞貞係大型連鎖店工作, 由於係以輪班制返工, 加上唔似我地平日返一至六咁!! 我地d活動都好難就到佢, 有時少不免只好miss左佢!! 唔知係唔係咁既關係, 攪到我成日都將佢忘記左, 我諗呢個情況好似唔止發生過一次! 記得有一次, 約左大家係Time Square大電視機下面集合, 之後再出發入去赤柱BBQ, 當我(以為)齊人之後就上車出發啦, 點知, 入到赤柱之後先發現"賴"低左小貞貞係Time Square, 而最慘既就係佢咁岩自己部電話又冇電, 又唔記得我地d手提電話no., 所以最後佢就唯有自己返屋企!! 其實, 早陣子係Jackie結婚當日都有個極佳既例子, 話說當日我地成班兄弟姐妹去Lunch去左酒樓食飯, 走個時, 我又(以為)齊人就開車, 點知又再一次"賴"低小貞貞佢係酒樓, 最後, 佢打電話俾我問我地係邊度, 個時我先知原來又"賴"低左佢, 小貞貞唯有自己打的去新郎哥屋企!! 哈.......真係好抱歉呀!!

曾經, 小貞貞因為感情而令佢行左一段好特別既路, 雖然係其他人眼未必會睇好, 不過, 在我地呢班朋友中, 只要你有咩事的話要我地撐你, 我地隨時都會挺身而出!! 今年小貞貞既part-time生涯終於畢業啦!! 今年年尾可以同你影畢業相啦, so cool, 同時希望你快快搵返個Mr. Right啦!!

小貞貞呢度既規矩, 要留言呀!! 如果你唔留言, 下次出去玩, 我又"賴"低你架啦, wahahhah~~~

(下期預告: 小狗)

好朋友系列: Ling Ling

繼上次介紹完Jackie之後, Ling Ling都係中學同學全女班成員之一!! LingLing係我第一位認識高度唔超過/或接近5尺既朋友!! (Lingling你唔駛驚, 因為天外有天, 我呢兩年都識到d人新朋友仲矮過你)哈!! 平日如果約佢出街, 我好鍾意企係佢隔離, 因為我可以將隻手"掠"係佢頭頂度, 真係幾舒服下!! 佢既家族可以話係以"禮記"(我的中學)為指定學校, 因為佢哥哥, 表哥, 甚至佢屋企其他成員都好似先後都入讀"禮記", 成間學校, 話唔定佢撞口撞面都係自己d親戚!!

Lingling係傳統既品學兼優既學生, 由中一至中七, 永遠都係名列前矛, 我地呢d上堂訓覺, 落堂打波走去玩, 係成績之上當然可以話係遙不可及!! 真係唔明, 我地明明係兩種人, 家陣又會咁熟, 咁friend!! 不過, 又係個句, 係中學時代同佢真係冇咩兩句, 係除左抄功課個時之外! 因為好明顯, 大家玩個班都唔係同一班人!! 我地相熟既時候都已經係中學畢業之後既事!! 我諗係呢班女生之中, 除Jackie之外, 同Lingling都算係傾得至多計既人!!

Lingling的家, 比牛牛的家仲要嚴, 之前講過, 中學牛爸牛媽每逢到晚上10:00p.m左右就會開始佢地既"追魂call", 招佢地個寶貝女返屋企, 不過幸好的是, 對牛牛黎講這已成過去!! 但係呢d事情直到現在, 依然發生係Lingling身上, 當我地出街食完飯, 再去飲杯野或食個甜品既時候(多數都已經係10:30p.m左右)就一定聽到Lingling會係電話度同佢媽媽講句: 係呀, 就走啦!! 返緊黎啦!! 我曾經有一次忍唔住問過佢, 都咁大個人, 家陣都管住妳幾點返屋企, 妳唔覺得好煩既咩?? 佢解釋俾我知, 細個個時都有為此而煩過, 不過人大左, 父母仲可以管你/關心你, 呢個係一種福份, 你應該要珍惜!! 從此睇得出, 佢對"家"係十分之重視!!

係咁多個朋友之中, 我成日都覺得Lingling係讀得書最多既一位, 係中學時代佢既成績就不在話下, 雖則話佢係讀書讀得叻, 但係好不幸佢都未能順利進入大學, 只能進入higher diploma課程, 不過, 咁並冇打擊到佢, 佢完成higher diploma課程之後, 緊接再用多兩年時間就再完成埋大學degree課程! 雖然係俾人用多一年時間, 不過我覺得咁會好似抵d, 話晒用多一年時間就可以多一張cert拎, 都幾化算下!! 不過亦因為咁, 佢就從此踏上不歸路, 因為佢係學業生涯上作出一個唔太好既決定就係去進入左一個甚少女生選擇既學科!!

係呢班全女班當中, 多數由我organize大家d活動之外, Lingling就係另一個主力!! 但凡有親d咩大型活動(such as: 旅行, 返大陸, 行山, BBQ等~~~~~)Lingling都是必會事先上網搵齊資料, 做足功課, 再俾大家參考, 解釋有咩玩, 邊度玩最抵!! 記得好耐之前, 我地成班難得有一次去中山, 佢就事先去定旅行社搵左好多資料俾我地!! Lingling畢業出黎辦事之後, 發現朋友既重要性, 我記得佢同我講過, 返工放工, 生活好刻板, 好少時間同d朋友聯絡, 所以依家佢時不時都會打電話俾各朋友了解最新既生活狀況!!

係中學時代既佢因為終日埋首係書本間, Lingling對感情事一冇所知! 到左大學時代, 情竇初開既佢經常搵人問詢問意見, 我地呢d咁淵博的, 當係可以解答到佢既問題啦, 當時既我總係叫佢嘗試一下拍拖既味道, wahahha, 係我既推波助瀾下佢終於開始第一段情(當然佢都有問過其他人既意見啦)!! 曾經, 我地對佢既感情事作出一番評論, 但時間可以証明一切, Lingling恭喜妳, 係妳努力堅持自己眼光同信念下, 終於開花結果, 希望你地有一個美滿幸福既將來!! 仲有, 我真係未見過有人會恨結婚恨得咁誇張, 佢已一早疊埋心水結婚生仔, 佢仲話要30歲前就要生個隻!! Lingling依家成日都為左搵樓, 睇屋係度苦惱緊!! (好似已經接近完成階段, 恭喜晒!!), 如果佢真係買到屋之後, 我地繼Jackie, 小狗屋企之後, 又可以多一個地方玩, whahahaha!! Lingling到時妳記住買返部Wii!!!

Lingling 呢度既規矩, 要留言呀!! 我知係你地班人入面, 你算係update我個blog最快既人, 快d留言呀!! whahahaha!

(下期預告: 小貞貞)

好朋友系列: Jackie

暫停左好一段時間既好朋友系列, 係時候再一次出場, 今次講既朋友仔應該該係我好朋友之中既好朋友, 因為我地可以話係冇所不談, 我地大家都知彼此既好多既秘密, 當然啦, 講到秘密, 我唔會係呢度講啦!!! 難得佢前排終於上黎我呢個blog度睇, 終於留左一個小小既留言!! 早前, 佢終於都開口問我呢個好朋友系列幾時寫到佢, 哈, 其實佢唔出聲, 我都已經諗住黎緊呢篇"好朋友系列"都係寫佢架啦!!!

之前講過對上一個篇係我好朋友系列入面既分水嶺(section 1), 依家呢個就係section 2!!! 係呢個section 2入面介紹的全部都係我中學入面第二批最熟最要好既朋友, 除此之外, 佢地仲係全女班, 我地呢班"混一色團員"total有6位(including me!!), 我係難得佢地中學朋友堆中唯一既男仔, 嘩哈哈, 係唔係好威呢!!! 講真個感覺除左覺得自己係萬紅之中一點綠既感覺之外, 更加似係一個馬伕, wahahhah~~~當然啦, 我地又係大時大節, 生日呢d時間出黎聚一聚啦!!! (係佢地仲未有男朋友之前, 都幾盞鬼, 一拖五出街, 真係威盡全場), 最威一次, 係我地成班人, 我一個拖佢地5位女仕去澳門玩, 個次真係好威威!! 話雖說佢地係女生, 不過佢地對於集體活動such as: 行街睇戲食飯等活動都唔係太熱衷, 所以基本上大部分既活動發起人都係由我黎做起!!

其實呢班朋友, 係中學時期既時候並不是太混熟, 只不過, 係畢業之後, 唔知點解, 冇端端, 居然熟左起黎, 大家得閒就會約出黎食飯, 攪活動(我地成班都有試返過大陸旅行架!! 不過係跟團~~) Jackie係我中學既同學仔, 識左十幾年o架啦!! 如果你問我咁多個好朋友之中, 以邊個最熟, 我諗應該就係Jackie, 因為我同佢真係咩都講一餐, 事無大小, 應該講既當然有講, 連唔應該講既我地都有講!!! 至於係d咩就唔寫出黎啦!!

你問我點解會同佢咁熟, 講真, 呢個問題冇從考究, 我地中學個時又唔係特別熟!! 但係畢左業之後, 大家又可以無所不談, 可能呢d就係人夾人緣, 又可以咁講, 我鍾意同佢傾計個時, 大家都放開懷抱, 你問到我問題時, 我會毫無保留地告訴你, 到我問你問題時, 你又不會扭擰地說東說西, 當然啦, 呢個係信任上既問題, 彼此互相信任, 我信得過佢, 佢唔會將我d野隨便話俾其他人知, 佢都清楚我唔會爆佢大獲(起碼暫時未爆過, hehe!!)!! 如果大家想知邊個係你心目中既真正朋友, 方法好簡單, 只要當你有事想搵人講, 傾既時候, 係你腦海入面第一個浮現的那位就係你既真正朋友!! 興幸, 自己仲有二, 三位咁既朋友, 不至於孤單, Jackie你都係我個名單入面架, 話晒我等車, 搭車個時都想搵你傾下計, 攝時間, 唔好睇少呢個俾人攝時間既角色, 冇返咁上下份量既人我都唔會搵佢黎攝架...hehe_

係佢身上真係可以發現好多係平常人身上唔會發生既事出現, 例如: 佢會走去報玩Phyical做gym, 仲要係一次過俾晒一年既費用, 佢居然夠膽死可以係成年入面, 一次都未去過Phyical做gym, 唔好講做gym呀, 連涼都好似未係入面沖過!! 中學時代, 個個人升上中六, 好正常咁會繼續讀埋個中七考A-level, 佢又唔係個喎, 讀完中六既上學期, 居然就話唔讀要出黎做野, 當時既佢話唔適合繼續讀書, 不如早d出黎儲下經驗仲好!! 不過事實上証明, 佢都係岩既, 雖然佢讀書唔差, 不過就唔會係好好叻個隻, 高不成低不就, 與其係咁, 不如出黎早d工作, 佢依家係佢個行, 都算係做到senior既位置, 成績幾好!!!

最感動既係, 佢有時一年有一兩次出trip, 每次佢會買份小手信俾我, 不過, 多數都係d唔特駛既野多, 最經典個次, 都莫過於佢去德國做exhibition個時, 係個邊買左本德國既咸書俾我, 冇記錯, 其實係佢去之前, 我叫佢幫我買本德國版既playboy, 開頭我都係咁e講下, 估唔到佢真係買左返黎俾我!! 呢d咁既朋友真係邊度搵呀!! 簡直係將我地既友情度立即標升到極點, 係呀, 我好膚淺架, 你買本咸書俾我, 我就會當你係我好朋友架啦!!! wahhahahah!! 講笑, 講笑~~~

中學時代既佢, 身形算係正常, 無線有段時間熱播"還珠格格"時候, Jackie佢憑住一副同趙微有幾分相似既面孔, 佢成日都自稱自己為"港版小燕子", 哈!! 其實當時既佢都真係有幾分似!! 不過自從佢出黎做野之後, 呢隻小燕子食得太多家外雜糧, 由小燕子身形變成火雞咁, Sorry, 我好似講到誇張左d, 不過呢個係事實, 就算冇10成都有7, 8成架啦!! 下年, 佢將為人妻, 為著可以以最佳既狀態穿起婚紗, 佢依家已經積極進行瘦身計劃!!

佢黎緊俾人逼婚, 雖然佢滿口話呢樣, 講個樣, 其實我知佢心入面都不知幾鬼咁開心!! 難得可以搵到生命中既另一半, 而且大家都致趣相投, 我係呢度祝佢同William未來生活愉快, 如果William恰你既話, 有咩事, 隨時call我!! 我撐你架!!!

Jackie, 呢度既規矩, 要留言呀!! 唔好睇完就算呀, 唔係我爆你d秘密出黎架, whahahaha!!

(下期預告: Ling Ling)

好朋友系列: 特別加開 - 神秘嘉賓

其實今次呢個並唔係咩什麼特別嘉賓, 只不過好耐之前Jessica打電話黎同我投訴(係好耐既事, 大大半年有多), 話佢個篇blog是在云云眾多篇好朋友系列中, 篇幅較短, 故強烈要小弟加開一個specail俾佢, 我都明白, 因為佢個篇係好朋友系列既第一篇, 當時仲未摸透點先可以好深入咁寫一個朋友, 不過, 每寫一篇, 寫作既技巧都好左, 同時都好似勾起返好多回憶, 岩岩都睇返自己之前打個D好朋友系列既blog, 感覺良多!!!

講返Jessica, 前文冇提及的, 其實佢同我一樣, 主要係係呢班朋友仔活動入面既召集人兼聯絡主辦單位, 基本上, 佢所有大大少少既活動, 唔係佢的話, 就係我去負責籌備, 所以透過係呢d大大少少既活動上, 我同佢既關係都越黎越熟!!! 有幸既, 我同佢都係一齊讀part-time, 雖然唔同科, 不過, 有時放學之後, 原來大家都岩時間, 佢都會搵我一齊去食dinner, 傾下計!!!

在中學時代, Jessica曾經諗過中七畢業之後會出國留學, 我記得佢好似真係走去考toefl, 雖然唔記得佢最後出黎既成績係點, 但係當時都真係幾驚佢會去得成留學, 你知啦, 平時都係得我同佢先會攪活動(包括出黎食飯聚餐及慶祝各位生日), 如果佢真係走左, 一來, 咪得返我一個人攪, 我咪死硬, 再者, 當時, 我都未同jaemi同thomas好熟, 唔算係有太多野講, 到時出到黎, 佢又唔係度, 冇佢做一個中間人既角色(佢同jamei & thomas熟d), 到時大家出到黎出現冷場既話, 大家都可能都會好尷尬!!! (當然啦!! 依家就算冇左佢, 都唔會出現呢個情況, 因為大家都熟左好多同成長左好多!!)

其實, 講開攪活動, 佢真係幾有心架!! 時不時都提出去玩d新玩意, 或者去d新既地方食飯!! 係我最深刻個時, 我諗都係有一年既christmas, 我地成班人係馬鞍山一個酒店式既住宅book左一晚既房玩, o個一次我同Jessica都安排左大大小小既遊戲(又畫鬼腳交換禮物, 又分組煮飯仔比賽.......), 而且為左呢次既聖誕大節, 仲同佢特登走去IFC個間citysuper(當時係岩岩新開)訂party食物, 而且仲有佢精心炮製既Shabu Shabu (雖然我覺得唔係咁好食, hehe~~), 個次係我地咁多年黎玩得最開心既一晚!!! 講真如果冇左佢係度, 我自己一個人都攪唔到咁多花臣出黎, 大家都唔會玩得咁開心!!! 實在係感激不已~~

佢本身既身子有d毛病, 自從佢發現自己有呢個病之後, 曾經有一段時間, 唔知點解, touchwood講句, 我硬係覺得佢會係早死個隻, sorry, 純粹感覺, jessica, 我唔係咀咒你呀, 所以呢, 我一早就同佢講左, 咪鬼成日蒲, 自己身子差又唔多d做運動, 仲要成日蒲!!! No good ar!!! 早陣子, 佢走去學人跑馬拉松個時(10km), 我真係覺得佢應該係會跑跑下粹死個隻, 所以平時我都會問佢想我送咩花牌俾佢, 又或者花牌上面寫d咩字好!!!(講笑~~~) 平時做運動唔應該係得個講, 走去跑下步, 再唔係游下水都好, 最緊要就吸下陽光, 進行下光合作用, 持之以恆, 咁就成個人都會好好多!!!

早前同佢傾計個時提及過, 依家有一段情係佢前面出現, 雖然都未有什麼的真正著落, 佢對呢份情有一個好好既形容, 就係:『好想有被人照顧既感覺!!!』, 聽到呢到我既感覺特別強, 是的, 由中學時代開始, 唔知係性格關係定係俾我地任何一個人早出世既關係(佢係3月生日), 係我地朋友中最大既一個, 佢永遠都當著一個領導既角色, 如果有任何問題既時候佢都會做一個最終決定者!!! 都會以一個照顧人既角色出現!! 難得依家有段令妳有咁既感覺出現就應該好好把握, 明白, 一切都應順其自然, 但願一切如妳所願~~

佢計劃係未來既日子當中, 可能會作出一個好大膽既嘗試, 佢暫定會係30歲之前會去apply "Working Holiday VISA"其實, 呢個plaining都唔錯, 話晒可以擴闊自己既眼界, 而且係我朋友之中, 暫時都未有人參加得成, 當佢同我提及會join呢個Scheme既時候, 我係十分之贊成, 襯我地仲係後生呢段時間入面, 襯自己仲未有任何既擔子, 而屋企又容許妳可以放縱一下, 呢D係十分難得既機會, 時間眨眼就過, 下定決心就應該多多去放眼世界, 對自己既將來絕對有好大既幫助!!!

最後一句, 唔好飲咁多, 適可而止!!!

老規矩, jessica特登為妳再打多篇, 希望今次岩妳口味!!!你要多多留言呀!!!

(下期預告: Jackie)

好朋友系列: Jaemi

Jaemi又係我中學既其一位同學仔, 用咩黎形容佢呢, 應該咁講我諗用虔誠既教徒黎形容佢就最貼切不過, 當然唔係話佢成口都係馬太福音呀, 創世紀呀(唔係電視劇呀!!!), 得閒無事就同你講下五餅二魚故仔, 只不過自中學以黎, 佢好似已經開始返教會, 約佢出去玩的話佢都會以教會為先(要睇下教會有冇function), 雖然佢好少向我地說教, 不過, 我知佢對教會既事係絕對係百分百既投入, 正因如此, 所以平時都比較難約到佢出去玩。 可能佢係一個教徒關係, 對於我呢d"魔鬼"佢都好似好少同我接觸(講笑!!!)傾下計, 講下心事, 所以有時同佢d話題都比較顯淺, 唔係話表面, 只不過就好少講到d太深入既野, 不過呢方面既野可以交俾Jessica。

講真個句, 係咁多個女仔入面, 唔知點解, Jaemi唔係好似女仔咁, 佢成個骨架都有d係男仔格, 係中學時代, 唔講佢係正常女仔的話, 其實佢真有d似 TB(Tom Boy), 佢d打扮都幾鬼男性化, 不過, 自畢業, 出黎做野之後, 呢個殘酷既社會就將佢潛在體內深深深深處既女性荷爾蒙迫返晒出黎, 終於開始似返個女仔, haha, 仲有起碼家陣有阿譚要佢, 咁就証明佢真係一個real woman, whhahahha

其實, 正如頭先所講, 可能中學畢業之後, 佢一方面忙工作, 兩來佢又忙教會事項, 所以平時活動出席既次數都可以話係唔多, 我知佢同我地呢班fd出黎玩既時候, 有時可能會格格不入, 講真有時我真係好似見到佢一個人呆呆的坐係度, 冇咩聲出, 不過, 每次既活動佢都十分願意盡量抽空出席, 希望日後, 大家多d出黎玩, 可以更加投入or溶入大家玩樂方式。

Jaemi既出現, 永遠都覺得會令我諗起Jessica, 因為佢地兩個係中學時代永遠都係『孖公仔』咁出現, 而佢兩個既出現又令我諗起Thomas, 由於某d關係既情況下, 佢地三個可以話係用『鐵三角』黎形容, 劇我所知當年中學時代好興寫信仔, 就係將寫完個d信就會將佢摺到心型呀, 三角形個d呢!!! 佢地三條友成日係度互相寫信交換架, 當年已經好奇心比較大既我,已經好想知佢地成日寫d咩既呢, 奈何, 當時同佢地熟既程度只屬一般, 所以都唔好意思問出口。 仲有, Jessica講過, 平日就算佢地兩個好耐冇見, 如果一旦見返面既話都可以傾好多好多野, 佢同Jamei可以話係一對真正既好姐妹。

Jaemi可以話係一個長期病患者, 係中學時代已經成日見佢話胃痛, 又話要食胃藥, 又要飲牛奶。 到左出黎做野之後, 可能workload大, 令到佢個胃既情況更加惡化, 成個人瘦得好厲害, 人稱『火柴人』就係佢個類, 之後, 佢就去左做一次bodycheck, 發現原來佢個胃有d唔知咩菌既存在(佢講過不過唔記得), 所以會令到佢個胃成日都唔舒服, 既然已經搵到咩原因令佢變成咁的話, 希望佢打後既日子佢要好好保重身子啦!!! 唔駛成條柴咁啦, 仲有樣野想話過你知, 我一見到d火柴人, 不其然就有個衝動想過去"啪"斷佢地d手手腳腳, 所以Jaemi為左你既生命安全著想, 你都係肥d好...唔係, 有一日我怕我自己控制唔到自己, 到時......... wahahahha~~~~

之前都講過同Jessica, 牛牛, 堅都一齊去過唔少地方旅行, 就連Camus & 蘇生都試過一齊去澳門, 中山等, 係我地過往既各類"合家歡"長短線旅程中, 包括, 中山, 澳門, 深圳, 廣州等, Jaemi佢都好似缺席左不少, 嚴格d黎講, 應該係一次都冇一齊去過, 據我所知佢缺席原因大多數都係同佢本身返教會d時間撞期or有其他事令佢join唔到, 不過正正就係咁, 令到我成日都覺得成班friend一齊玩都未試過可以齊齊整整咁去玩一次, 永遠都好似有個缺口, 黎緊小弟生日各位都已經一早confirmed話去返兩日一夜玩返餐, 希望今次可以真真正正咁齊人。

黎到呢度, 我可以以此作為一個分水嶺先(Section 1), 其實前文曾提過既Jessica, 牛, 堅, Camus, Thomas & 本文既Jaemi佢地全部都係我中學之中其中一批最好朋友之一, 亦都係我生命中不可缺少既其中一部份, 對上個二十幾年黎佢地俾左我不少既歡樂回憶, 打後更希望大家繼續加深大家彼此友誼, 繼續我地一個月一大相聚(大活動就等我, jessica or牛牛去攪), 二個星期一小相聚(呢d就自己各自約啦!!!), 生日又聚, 大時大節-新年, 聖誕, 端午, 清明, 重陽, 國慶, 回憶又聚一聚, 得閒無事聚一聚既精神, whahahaha。

p.s: Jaemi, 之前有叫過你得閒上黎我呢度睇下&留言, 點知你話我個blog講d野唔夠深度, 聽完之後有d唔開心, 我仲記住你個句說話架!!! 不過, 雖然知你忙, 但都希望你係度好似jessica佢地咁, 係度留返少少既留言呀!!!!

(下次預告: 特別加開 - 神秘嘉賓)

好朋友系列: 蘇生

蘇生又是本人的中學同學之一, 都唔知佢係食咩大, 好鬼"高"佢好似應該6尺有多, 舊時大家都係同一間中學返學, 早餐&Lunch大家都係食o個d野, 唔係餐蛋麵就係什排飯架啦, 有咩理由佢就標得咁鬼高架, 所以我成日都懷疑佢應該係個d腦下垂體生左個腫瘤, 之後就有個d"高大症"之類既野, 不過, 識左佢十幾年佢都仲係"生勾勾"仲未死, 所以我既推斷應該係錯既!!!

講開佢食野, 佢屋企係一個非常十分健康的家庭, 佢屋企既廚房係搵唔到呢個世界上最偉大既發明, 而且係生活既必需品(起碼我應為係~~)----->公仔麵, 天呀, 一個屋企, 點可以冇公仔麵做儲量架!!! 曾經聽佢講佢媽媽唔俾佢地食呢d咁唔健康既野食, 仲有呀, 就算屋企煮公仔麵的話, 都唔可以落個包味精, 個包公仔麵點解會值$2.5, 完全就係個包味精既存在, 唔落, 咁我寧願食粥算罷!!! 所以中學o個時, 同佢出開去茶餐廳食野, 佢都會食公仔麵(仲要係丁麵個隻喎)。 正因如此, 有一年佢生日, 我地成班人夾錢原本想買箱丁麵俾佢拎返屋企, 不過, 就算送左俾佢, 佢返到屋企咪一樣冇得食, 仲有我地要送既話咪托餐死, 所以我地後尾決定買一條有"出前一丁"print既的孖煙通俾佢, 當佢想食個時就可以除左條褲就可以有得幻想下自己已經身處呢個"丁麵海"之中, 仲有條雞尾腸送添!!!!(唔好意思, 爛gag一個~~~)

我同佢中學時有個特別既稱號叫『黃社孖寶』(其實係我自己作既!!!), 因為我o個時同佢都係黃社既人, 係每一年既陸運會, 我同佢均係不同既項目上面贏取冠軍, 佢就跑長跑, 我就跑短跑, wahahhah, 各自為自己既house拎到不少既分數, 所以我地個house可以連續幾屆得到在場總冠軍, 都係拜我地兩個所賜, wahahhahah~~~

出黎做野之後, 雖然至今我都唔係好知佢份工係做d咩, 不過, 都幾羨慕佢份工可以四周圍飛, 佢去美國, 德國, 英國..........總之就去左好多地方啦, 因此人和事佢都見識過不少。 試過有一次大家去飲野o個時, 佢好晏先到, 聽佢講話佢岩岩見完客, 係中國城飲完過黎, 什麼! 中~國~城~!!!! 係香港鼎鼎大名既夜場, 我呢世仔暫時仲未儲夠錢入去玩一晚, 依家只會係『金雞』既橋段先會睇到既場合, 佢居然有得去, 天呀, 家陣呢間老牌夜總會仲要已經執左粒!!! 你話我係幾咁羨慕佢呀!!!又可以去唔同國家地方(雖然都只不過係做野), 又可以去d特別地方such as 中國城。 雖然係咁, 但係因為經常四圍飛所以都另自己既私人時間&空間都少左好多。

身邊有好多朋友都係教友, 佢都係之一位, 嚴格d應該話佢對信仰呢方面既不斷修練(好似d武打小說咁, haha!!)同時都對自己既教會放左不少心血, 因為有時約佢去玩, 佢都係話要幫教會做事or係教會開會等, 不過, 平日既佢絕少開口埋口都係耶穌基督等。

係咁多個朋友入面之中, 我諗我對佢既了解應該係好少既一個, 一來平時好少同佢傾計, 另外, 佢既一切好似都係神秘, 攪到我都好少去問佢野(問既當然唔係學業上既問題啦), 不過, 好多時, 有佢既出現成個好多活動都會變得有趣好多。 記得, 有一次, 大家去旅行, 唔知係澳門定中山o個次, 佢因為眼訓佢就提議玩一個新遊戲, 大家以為佢有咩提議啦, 佢就話不如玩睡王子/睡公主遊戲, 佢話邊個最快訓得著就為止贏, 哈....咁既野都俾佢諗得出!!! 根本就係佢自己眼訓之麻...

仲有一樣野, 雖然識左佢十幾年, 佢屋企應該係唯一個不對外公開既地方, 基本上, 牛, 堅, jessica, jaemi & camus既屋企我都上過晒, 就係單單係佢屋企就未去過, 唔知佢幾時會安排我地上去實地視察下佢屋企呢...

(下次預告: Jaemi)

好朋友系列: 余弟兄

又一位中學同學, 中學時代佢乃係"攪攪陣, 冇幫襯"叛逆學生一名, 佢可以話係老師黑名單中應該係穩守住一定的極高位置。 佢同時係『促進"花名"生產力主席』一席, 經佢出手的"花名"真係可謂不勝其數, 數之不盡, 佢可以媲美一位婦產科的接生醫生, 將一個又一個的小生命(花名)迎接到呢個世界, 當然啦, 當年我地成班人都冇一幸免, 包括小弟在內。

佢係我識咁多個男仔之中, 最鬼"哦過", 記得中學時期時不時都一齊搭小巴返屋企, 佢係早過我落車但係佢永遠都唔會自己叫站落車, 永遠都係推我叫我幫佢叫落車(記住, 我係遲過佢好幾個街口先落車, 真係幾驚司機以為我玩野, 岩岩叫完落車又唔落, 過多幾個街口又叫過), 真係唔知佢係怕羞呀, 定係什麼的一回事。正所謂"哦過"的事, 唔止呢d架(難得有機會, 篤多d先, haha!!!), 佢舊時買新衫新褲, 佢自己一定會搵d朋友陪佢去買, 到買o個時就會問呢件好唔好睇, 個件得唔得, 唔講以為自己陪緊女朋友去買衫, 仲有呀(死~越講越興奮添!!!), 舊時同佢去買褲, 佢永遠都係係試身室試完就算, 唔會著出黎俾我地過目, 佢唔講有時真係唔知佢原來已經試左條褲, 我諗佢可能怕俾人睇蝕掛。

係我咁多朋友入面, 佢係唯一一個中學時候已經有自己夢想&理想的人, 係中學時代佢曾想過自己會成為馬榮成2號(香港漫畫書"天下"的主筆), 佢真係好想實現呢個夢想架, 何以見得? 就係中學o個時, 只要有一個直徑10cm x 10cm的空白地方, 佢就好自然咁拎起支筆就起勢咁係度畫公仔, 不過, o個時佢都係受"天下"個d港產式漫畫所影響, 次次見佢畫親都係得個幾款樣(唔係聶風, 就係步驚雲類), 所以, 你打開佢本教課書時就一定見到佢"筆跡"(唔係上堂take note, 係畫公仔個d)。 自畢業後, 佢依舊朝著呢個目標方向進發, 雖然佢唔係去左d咩漫畫公司做助理, 但係佢就從不間斷地去左不同的地方進修佢畫功上的技術, 佢係呢方面真係付出過不少。 經過不斷修煉, 佢既理念亦開始轉變, 現在的他不再是去當一名出色的漫畫師, 而是要當一位講求創意無限的設計師來, 雖然係理論上佢有持續增長, 但係係實戰上經驗始終欠奉, 佢到左近呢兩年先開始踏觸設計呢個範疇, 雖然表面上好像俾人遲人起步, 但還希望見到你有成功的一日。 (仲有中學o個時, 佢好型架, 佢同我講:『Gary, o拿!! 你keep住我d畫, 第時我出名之後, 你個d畫一定升到"巴巴"聲』, 上面個幅係其中一幅, haha)

係中學同學入面, 佢應該係唯一一個會單獨搵我食飯傾計的男同學(sorry, 我係比較受女士歡迎, wahahahha)。 我同親佢出黎食飯個時都會去我地的指定吹水飯堂, 該吹水飯堂座落於旺角洗衣街的『美而廉』, 呢間餐廳其實只係一間普通不過的扒房, 呢度有名你叫啦 - 平靚正呀麻! 兩條麻甩佬都係岩去呢d地方爛爛地feel的地方吹下水就最岩。 不過, 近呢兩年都少左, 你得閒就搵我啦, 我知我呢d兩袖清風, 幾時都咁得閒, 唔好得個講字呀, 我等你架!!!

有一點不可不提出的, 在此亦當我向余弟兄的忠告, 有時每個人心中都有些已過的憾事, 這些事在其他人眼中可能不足為道, 但係就唔好將呢d事當作笑話般看待, 你都唔想有人將你d唔開心野當笑話咁講架, 有時唔係講我什至乎在其他人的都不願再提, 或再掛在口邊, 希望你明白。 有時過左火位就唔再係笑話。

在余弟兄生命中, 不得不提的就是他的女友Melody, 佢簡直尤如一位馴獸師般令余弟兄由一隻張牙舞爪的老虎馴服至一隻牙都未出的小貓, 令佢那不修邊幅的人生, 完完整整的重新執拾起來。而 我地亦認定呢個世界上只有Melody先可以整治到余弟兄, 所以Melody你有咩事, 余弟兄激嬲妳的話就同我地講, 我地實撐妳架!!! 自從佢識左Melody之後, 就開始佢既信仰之道, 因為信仰令佢有更加大的轉變, 當然呢個係一個好事~~

其實, 我同余弟兄當中有一件鮮為人知的秘密, 嚴格D黎講, 其實係關於佢的事, 由始至今係我地朋友界中, 真係冇咩人知。當然啦!!! 我都唔會係呢度講出黎~~~waahahhaha

老規矩, 余弟兄你識做啦!!! 堅都寫到咁多野, 你冇理由少得過佢呀!!!

(下次預告: 蘇生)

好朋友系列: 堅

堅又是我的中學同學, 中學時代花名呢個傢伙, 每個人都總會有一個傍身, 不知何故, 堅的花名總是給別人的多5-10倍, 不過由於太多多到記唔晒, 所以都不在此談。 中學時代, 係我身邊每一位同學仔都好叻好聰明, 堅更加係一個表表者, 他的成績永遠都係頭1,2,3,4名, 正所謂物以類聚, 我地呢d平凡人, 點解會同到呢d讀書人做到朋友呢, 我諗深一層一定係佢想追阿牛先同我地玩(講笑姐!!!), 由於, 讀書人思想比較正經, 一旦同我地呢班口多多人士玩起上黎, 真係有少少執輸, 亦因為如此, 當年概佢就成為我同余弟兄等人取笑對象, ....whahaha!!!! 不過, 經過我地多年黎訓練佢都略有所成啦, 再唔係我地取笑焦點。

於中學時代, 本人與他有一件事永遠令人難忘, 亦於朋友聚會中時不時都間中提起下, o個件事亦係我人生之中簡直係屈辱&污點。 話說本人於中學時代乃係一名運動健將, 有一次上體育課時, 老師將男生分派兩隊, 作足球比賽對壘, 當時本人就充當龍門。 敵方進攻時, 平日以我身手敏捷去救波, 簡直係冇難度, 點知, 最後我都係衰左係堅手上, 竟然俾佢係我手上入左一球, 黎到呢度大家請注意一點, 堅---佢係同我同一隊, 咁即係話呢一球係『Own Goal』, 其實實情係當時有敵方傳中, 堅就返黎後防幫手, 點知佢就用頭一頂, 就頂入左我個龍門入面, 呢件『Own Goal』事件可以話令我永世難忘。 當時我仲諗住自己林源三上身, 應該冇人入到我波架啦, 點知~~~唉, 人算不如天算, 你有冇睇過"足球小將"入面概林源三要救"own goal"架, 冇呀麻, 所以咪輸羅...

堅亦都係我唯一位中學同學入面(熟個d呀!!!), 順順利利暢通無阻完成9年免費教育兼完成預科兼直上香港第一學府(香港大學)的第一人, 不過, 我就有少少遺憾的是, 當年堅畢業時影畢業相(當然係香港大學入面取景啦!!!), 各友人均有不同原因缺席刻次影相活動, 當日只得我, jessica 及牛出席。 難得有朋友於第一學府畢業, 並有藉口可以於香港大學影相沾少少光(起碼自己唔會冇啦啦走去HKU影風景相~~), 實在難得。

堅, 牛, jessica & 我, 呢4人組合, 可以話係一齊去過唔少地方旅行, 計一計有台灣, 韓國, 日本, 中山, 大陸(好多人甩底o個次, 包括jessica), 澳門, 我覺得每次旅行之後, 大家都一齊經歷一d事, 有開心有唔開心, 大家關係更因為了解會再進一步, 仲記得當年, 大家大學畢業, 我同jessica都係同一間U, 堅就係另一間, 佢o個間就好衰係全港U最遲考完Exam的一間, 同我o個間的exam period差不多有成一個月之差距。 由於我地一早定左畢業一齊去台灣旅行, 所以我同jessica就要等佢, 工都唔搵, 最後, 堅考完試第二日我地就馬上上機出發, 就係咁去左我地第一次(起碼係我自己第一次)的自由行之旅, o個次真係玩得好開心, 四條友第一次一齊搭飛機去旅行個種感覺真係好特別, 始終同平日大家約行街食飯係唔同。

自出黎社會做事, 我就覺得佢就越黎越多野諗有時仲有d走入左個"死胡同"入面, 其實佢中學個時都成日諗野(堅, 你仲乜成日諗野!!!)(講多樣野, 正因為咁佢中學已經有白頭髮), 當時伙當然係諗點樣考第1啦!!! 家陣就成日諗住點樣發達, 我諗佢最大關係都係因為佢概另一半, 佢想阿牛有個"唔休做境界", 所以某程度上佢都受到一定程度的壓力, 不過, 卻正正因為咁, 就更加突顯阿牛係佢生命中的另一重要, 牛牛的天性樂觀往往為堅帶出新一道的思維方向, 不再用轉牛角尖。仲有, 有一次上去阿牛屋企食飯(係呀!! 我又貢上去食飯啦~~wahahah!!!), 食完飯之後, 牛媽媽同我講左一句:『阿Gary, 志堅個人成日都好多野諗!!!』, o拿!!! 唔係我講架, 其他人都發覺到架, 唔好成日諗住點樣發達, 有時d野, 好講機遇, 唔係你話想就得, 有時俾自己太大壓力好辛苦架!!! 香港人relax~~~

最後, 老規矩, 堅上黎留言~~~~快.....

(下期預告: 余弟兄)

好朋友系列: 阿牛

牛牛又係我中學入面d同學, 不過, 係Form2 同班先識, 講真當年同佢都係一般熟, 講熟, 當然係家陣熟好多好多啦, 依家仲時不時成日"貢"上佢屋企食飯添, 最鍾意上佢屋企食飯之餘, 仲可以同牛爸爸 & 牛媽媽一齊傾下計, 之前去新年攝太歲呀, 牛媽媽都有叫我去呀...haha///而阿牛, 亦係我唯一個同佢&佢整個family(因為包括佢2個妹, 牛爸 & 媽, 仲有牛嫲嫲)都咁熟的朋友

其實阿牛中學讀書個時係一個好勤力的學生黎架, 由於佢成日讀書讀到好夜關係, 所以佢中學個時有個超級super勁大勁黑的黑眼圈及眼袋, 不過, 話雖如此, 佢始終敵不過香港考試制度, 未能升讀大學(其實, 當時, 我覺得佢應該有能力升到上去架!!!), 不過有失就必有得, 如果, 唔係因為升唔到大學, 佢就唔會去左讀旅遊, 佢家陣就可能做唔到依家個份工(我個人應為佢依家呢份工真係十分十分之岩佢做~~~)。 係中學時代, 牛好少講野(應該話係我好少同佢講野姐), 好鬼死靜。 到依家"b lee 巴啦"咁, 佢口才都不知幾咁了得, 唔係佢又點成日"呃"到咁多客俾錢佢駛..hehe, 當然啦, 我都覺得佢係一個叻女黎架。

自從畢業出黎做野之後, 我覺得每個人都有一定的變化, 但係我覺得阿牛的變化比較大, 於中學時代佢夜晚出街係要11點前就要返屋企的人, 到10點左右牛爸or媽就會有個"追魂call", 招佢返屋企(招魂), 當時的牛爸&媽(當時同牛爸媽未太熟稔)對佢的管教十分之嚴格。 不過, 自從牛牛出黎社會做事之後, 佢就成個人變晒, 開始飲酒(中學個時都係頂多都係飲jolly sandy, 家陣就係芝華士, black lable....個d喎), 應該係劈酒先岩, 佢又鍾意"千嬅", 我感覺上佢成個"千杯不醉"咁, haha, 又去夜街。 我估都係主要因為細個o個時俾屋企壓迫大得濟, 到有依家有自由個時, 佢概潛意識就會叫佢多d出去玩, 一定係咁....wahhaha(家陣, 我好似變左行為&心理學專家, wahhahaha)

仲有, 佢對牌子的追求都越黎越大, 成日咩日本version, special limited, 我諗呢一切一切都係受"壞孩子"阿達(佢係牛牛讀poly時識的朋友)的影響罷了!!! 不過, 佢地兩個真係好岩key, 成鬼日shopping, 兩條友成個"最愛女人購物狂"入面的張柏芝咁, non-stop, 停不了, 哈!!! 不過亦因為如此, 佢先會咁發奮搵錢, 佢平日都仲有幫人補習架, 做人都係有d目標好, 唔錯唔錯....不過, 亦都係咁概原因, 我先識到阿達, 同佢埋做埋朋友, 又打波, 又唱k, 仲有玩winning, 仲有, 仲有, 阿達教識我(仲有阿牛佢地)打台灣麻雀, 大家一齊出黎玩, 真係好開心。

頭先講開牛牛好鍾意買d名牌子, 不過, 佢發現自己兩年後plan定要結婚之後, 自己都開始忍手, 不過, 有時有d野佢自己都係忍唔到, 尤其是同阿達出街的時候, 真係收唔到手(岩岩同佢傾完電話之麻, 佢又話今晚同阿達出街shopping掃貨), but anyway 我都好期待佢地兩個結婚的時候。

講開佢兩個結婚的事, 係幾年前佢曾經同我講過, 佢同陳生諗過佢地兩個仔女會改咩名(係呀!!! 阿牛有時真係好鬼無聊), 我冇記錯, 當時佢同我講過其中一個叫陳奧雲, 另一個就唔多記得叫咩名啦!!! 又有一次大家出黎食飯時又傾開, 陳生應該要每個月搵幾多錢, 佢先可以唔駛做, 無憂無慮咁生活, o個次大家都好認真咁計一計條數, 得出結果陳生起碼要搵成$50,000一個月, 就岩岩好, 我地計個時make左好多assumption架, 又當佢地有2個仔女, 又要供樓, 供車, 又要俾各自雙方屋企.......陳生一聽到一個月要搵5萬, 當堂塊面都青晒.....haha。

最後, 牛牛, 雖然知妳係我的blog的捧場客, 但未見過妳係度留言, 難得呢篇blog係專講妳的事, 快快係度留言啦!!!! 仲有, 你話要登張特別d的相, 家陣呢家, 夠唔夠特別呀!!!

(下期預告: 堅)

好朋友系列: Jessica

其實在我Form 1 時就認識她到現在, 大大話話都已經有14年多~~~

Jessica給我的印象始於中學時代時開始, 當時的她已經能輕易與任何人都可以打開溝通的橋樑, 亦因此當時有很多人願意跟她交心, 與她分享, 而她亦樂於與你交談並同時作出建議或安慰說話, 絕對是一位極佳之聆聽者或給人作申訴之對象 (這可能與她的宗教信仰有著互相的關係罷!!!), 亦正因如此的性格, 同時從而造就她今天工作上的一個優勢, 樂於結交朋友, 不害羞, 敢言....等等///

自中學經歷人生大變, 她的身形急劇改變, 如果佢中學時的身形是一隻可以坐5-6人座位"橡皮艇"的話, 家陣佢應該係一隻單人座的小飛, 哈, 哈, 不得不佩服佢, 縱然當時未有什麼"廋身堂"等纖體公司, 但佢依然可以進行自我減磅, 滅脂行動, 人地早兩年先追睇"恩兒"減肥血淚史時, 我就已經早人地5年已經有幸見證...haha(講笑, 講笑)

出來社會工作後, 她就開始經常與酒作樂, 她身子健康狀況縱然 不佳, 但她依舊與她的朋友出去玩, 飲酒, 去蒲(現在她已節制多了!!!), 其他與她相熟的朋友們都好言相勸, 對她說應該少d出去浦&出去玩, 理應調理好身子, 朋友的關心她雖然知道, 但她持著一點應『及時行樂』的宗旨, 故此依然係『意見接受, 態度照舊』行事方式去耍樂。雖然依家佢成日都話:『酒唔係我朋友!!!』, 但都見佢有不少場合都經常飲酒....

"工作狂"黎形容佢都不失為過, 不過, 有時真係唔知係佢個工作效率低定係真係咁多野做呢, 成日都聽到佢話好忙。 曾經聽過她說, 有試過經常11:00p.m先收工, 不過, 在眾多朋友當中, 亦只有她的工作, 能令她可以見識得俾其他人多, 眼界亦擴闊不少, 雖然辛苦, 但她亦樂在其中...

性 本善, 亦是她的優點同時是她的缺點, 於一次出黎閒談中得知她深信於社會工作上, 個個都係好人(唔係教大家諗埋一邊), 只不過, 樹大有枯枝, 現今的工作環境中總有一些小人作硬, 放肆, 肆虐, 利用你, 或有機會俾個蕉皮你踩, 但她卻常常認為自己沒有利用價值, 而處於經常被動之位置。 希望佢識得保護自己多一點。

希望, 有機會再一次一齊去旅行...成班人去旅行真係好開心....

(下期預告: 阿牛)

好朋友系列:

從網友 Macy的Blog上睇到此標題, 想借此一用, 其實, 早早已經想寫一些關於朋友的文章, 奈何就係未諗到個標題, 固此, 就久久未開筆(其實係懶至真!!!!)。 之前雖有篇blog都有提及我對朋友們的看法, 唯篇幅太短, 好似唔多夠喉....

如各友人想本人特別寫你先or萬萬不要寫你的話可在先此留言, 等我知道...////仲有, 仲有, 呢個系列, 會不定期刊登....密切留意....