孤獨老人

廚房大戰~~~

老媽自上星期六就跟左阿姨返大陸間屋度休息, 抖下, 話晒之前個兩隻大小不良因為"豬豬"提早放假, 有o個兩隻野係屋企, 老媽自然一齊被"軟禁"係屋企啦!! 廢事一出街就high野, 中招就唔係幾好啦!!所以成禮拜入面, 基本上大部份時間都係留係屋企居多, 頂多頂多都係落樓下既百佳買下餸!! 所以難得阿姨返上去, 順道叫埋老媽上去!! 個兩隻大小不良就叫返家姐照顧住先啦!!! 老媽就可以放陣假休閒一番!!
左上角就係孤獨老人飯盒啦!!

平日3餐冇憂, 返屋企有飯食, lunch有飯帶, 都不知幾爽, 家陣老媽出走之後, 我立即變左個孤獨老人咁!!係, 係可以出街食, 不過, 近排自己趕住寫case, 時間冇多, 再加上Anna咁岩呢幾日自己約左fd出去活動玩, 既然係咁不如自已"賴"返屋企自己煮仲好過!! 所以呢幾日都係食自己, 唉!! 可憐呀!!

呢兩晚自己好似孤伶伶咁, 到時到侯自己走入廚房, 洗米, 拎個電飯煲煮飯食, 而且要keep住自己帶飯既習慣, 夜晚煮飯個時, 仲特製一個"孤獨老人飯盒"俾自己, 等第二日唔駛出街食飯!!

圖

琴日講左, 我轉左新地方, 上圖就係我既新位置, 唔好以為地方好大好闊, 其實基本上係完全冇私隱, 因為我個位背住係一條走廊, 個個行過都可以見到我部電腦做緊D咩, 所以平時都唔會亂咁上網, 最多都係用電腦溫習搵資料!! 不過有個好處就係我背住佢地, 完全唔知係咪有人昅住我(呢D正一係"鴕鳥諗法", 眼不見成止乾淨~~~)

------------------------------------


琴日放工終於去左拎眼鏡...............原來都唔記得, 我本身對眼有少少畸形, 一邊就深近視淺散光, 另一邊就深散光淺近視!!! 所以一戴起副新眼鏡, 有D暈暈地既感覺!!!

近日

由於工作關係, 將會係不同既地盤工作, 岩岩上星期係上環既地盤返工!! 咁岩係呢幾個站都會同一位同學仔一齊返工, 話晒有個伴做咩都開心d!! 原先同同學仔商量過, 難得過黎上環返工, 所以想順道食下上環個邊d美食(sch as: 九記, 蘭香園, Burgar Republic............) , 不過, 事與願違, 每逢Lunch時段, 同事們都熱心邀請一齊食飯, 攬到我地個美食團報銷左啦!!

黎緊下星期就要去屯門返工!! 山長水又遠呀!!

放鬆心情

呢度係旺角警察會隔離個球場, 有時呢度有人玩rugby, 個個都好鬼大隻!!
時間冇多, 日復日, 沉在notes入面, 睇完呢樣又要睇第二樣, 以為日日溫書過日好過癮嗎, 我只可以話你知, 呢d生活, 實在係你睇我好時, 我睇你好, 一個極大考試放係眼前, 而死線同時迫近, 大有中學會考時既感覺一樣, 個考試將決定一生, 除考試外, 其他一切都要棄之如敝屣!!

早陣子, 可能壓力源於此, 有幾晚惡夢連連~~~ 所以有時都要relax下, 每每有人話做運動都係一個放鬆既最佳活動, 岩岩琴日開始暫定一星期一日去跑下步, 一來放鬆下, 兩來減下多餘既膩肉!!

不過發覺, 太耐冇做運動, 琴晚跑完步之後, 今朝成個人好似散晒咁........家陣仲有少少酸添.....救命呀!!!

陰陰濕濕

近日天氣潮濕, 早兩日老媽仲煲埋冬瓜水飲, 我仲以為係大暑定係小暑添, 老媽話冬瓜水可以去濕喎!! 今日係公司望過去對面ICBC大廈仲勁, 大霧到睇唔到個頂樓!! 頭先入去Pantry飲杯咖啡個時, 嘩, 仲勁, 望出去完全睇唔到對面海個d building!! 至憎就係呢d濕淋淋既天氣!!

新年後遺症

新年最多野食既, 唔駛講當然係個d年糕呀, 蘿蔔糕呀, 馬蹄糕呀, 新年之後到家陣都已經初九啦, 屋企個雪櫃仲係塞滿晒幾底咁既野, 屋企人少, 唔係我食就係老媽食, 所以呢幾日朝朝早起身自己煎年糕當早餐食, 蘿蔔糕都還好d, 比較易清!!

但係唔知點解, 個d年糕呀, 馬蹄糕呀, 好鬼抵食個喎, 明明都已經日又食夜又食架啦(我真係試過有日一早餐又係糕, 午餐又係糕到左下午茶又係糕!!), 切極都仲有, 切極都唔完咁既, 新年到依家屋企已經出現過3底年糕, 2底馬蹄糕, 仲有2底蘿蔔糕!!

平安夜斬雞

原封不動既雞~~~ 開工~~
完成~~謝!!

平安夜冇街出, 實情是因為打後個3日(25,26&27號)勁出街, 加上平安夜出街費事同人迫, 所以是夜都係乖乖留係屋企食自己(因為媽媽同阿姨佢地返左大陸玩)!!

今日突然收到原隻白切雞一隻, 原先諗住就咁原隻放係碟度, 用保解紙包好再成舊塞入去雪櫃就算, 不過, 屋企個雪櫃都唔係大, 而且本身入面都塞左好多野, 根本就冇咩可能再塞多舊雞入去!! 把心一橫就索性將隻雞分屍入碟應該會易打理d!!

講真, 平時屋企煮雞斬雞都係由媽媽出手, 自己見佢斬個時都係手起刀落以為好易啦, 自己斬落去個時又係另一回事!! 今次係第一次斬雞, 以為好易, 原來睇同自己落手做真係差天共地!! 一開頭唔駛講當然係劏左對雞臂同雞翼先啦, 再黎就賴野啦, 淨返隻雞既body, 我望住佢, 佢又望住我真係不知如何入手好!! 最後左劈一刀, 右劈一刀, 最終劈到隻雞支離破碎, 上碟, 收工!!

跑

早兩日係信箱收到一封渣打馬拉松拎禮物包既通知書, 諗左一陣, 明明自己都冇報名架, 唔通渣打知我熱愛運動, 珍惜生命, 人又健康, 可以為其他人帶黎健康正面訊息, 特登邀請我去跑, 之後就收到anna電話, 原來係佢私底下靜靜雞幫我報左名跑馬拉松, 當然佢自己都有報名啦, 我地可以一齊跑馬拉松, 好sweet呀, whahahahha!!

記得上次玩渣打馬拉松個時已經係成兩年前既事, 個時屎忽痕同d同事一齊報名玩下, 個時有位同事話, 玩十公里又係咁多錢報名費, 玩全馬又係咁多錢報名費, 好似報全馬抵d喎!! 理論上, 佢咁講都有佢既道理既, 不過問題係, 其實當時既佢只係第一次玩馬拉松, 我地當然係全力咁阻止佢啦, 陣間佢跑完死鬼左咁點算呀!!

講返今次十公里先, 睇返佢個offical web-site話, 今年既十公里既馬拉松只係跑東區走廊, 我記得我早二, 三年參加個時仲有得有得由尖咀起跑, 經西隧再跑上天橋再經天馬艦最後到灣仔運動場!! 死羅, 家陣要晨早流流過對面海係維園起跑, 仲要跑東區走廊, 嘩, 到時應該會大風到嘔!! 不過都好既, 家陣有anna報左名, 咁就要積極d咁練下跑步(我諗都起碼都要一星期一次先得!!), 唔係到時跑跑下頂唔順, 死鬼左點算呀!! o.k, 跑十公里點會咁易死呀麻, 我都係順口講下姐, 冇咩野既!!

施比受更為有福

上星期日為全球義工日, 當日應anna邀請一齊去做義工, 當日既工作就係探訪一d老人家, 兼送一些禮物品包俾佢地, 盡一番心意!! 當日集合時間為下午1點鐘, 當日所見, 除左自己個隊義工隊之外, 仲有其他好多既義工團隊出席! 開頭仲諗住集合一陣就應該會出發去探d公公, 婆婆!! 點知個大會居然要安排一個叫誓師大會, 叫晒成班義工坐係禮堂聽個d主席, 贊助商講埋d廢話, 攪左一大輪, 差不多成3點半先出得發!!

呢個就係禮物包~~

而大會又建議義工們最好就係4點半就"收工", 我地個team人就被派發去探4戶老人家!! 嘩, 得個1個鐘探4戶人, 咪傾得個15分鐘!! 由於我地探訪個d老人家, 多數都可能係獨居老人, 難得有人去探佢, 佢地當然希望有人同佢傾多陣啦!! 所以我諗下次大會再攪呢d義工活動都係留返多d時間俾義工去做野, 好過留係度聽埋d無謂演講, 因為難得咁多義工都抽時間出黎活動, 理應去做義務工作, 唔係浪費d時間係呢d地方上!! 講真個句, 如果係用d時間黎聽呢個主席講野, 聽個位局長發言, 倒不如俾多d時間d義工出去探多d老人家, 或者可以派多幾個禮物包俾人!!

今次義工活動請左3位歌星做義工大使 - 葉文輝、裕美及范萱蔚

講返探訪活動, 我地一team3人, 其中一位係比較資深既義工, 由佢帶領探訪, 其實係探訪之前, 都有個小型既講座, 講下探訪時既說話技巧, 例如, 盡量唔好提到親人, 又或者成自己去應承探訪者一d要求!! 就係我地探第一位老人家中, 同佢傾傾下計, 佢都不其然講到自己既屋企人, 講自己好寂寞, 差d想喊出黎, 好彩, 個位資深義工, 眉精眼企, 立即轉個話題避免講起d傷心事!!

住家男

近日, 開始學人帶飯盒, 一來經濟便宜, 唔駛下下出去食, 係咁e計過, 一日慳過3,40蚊, 小數怕長計, 慳埋慳埋就慳到唔少錢架啦, 二來唔駛下下都行出去食, 因為食飽飯可以黎個午睡, 真係爽到爆, 計過平日如果係office食完飯, 洗埋d食物兜兜, 就只係去到12:45p.m, 仲有大把時間訓覺覺, 如果出街食既話, 就起碼要成1:20p.m先返到去office!! 正所謂"Lunch睡一睡, 輕鬆快樂放工去!!

小朋友

第一位小朋友 - 謙謙

第二位小朋友- Momo

近排係不同既場合見左好多小朋友(屋企個兩件大小不良唔計)!! 有男又有女, 不過佢地唔係我識既, 全部都係Anna既朋友仔!! 當然啦, 經Anna介紹之後, 我呢d小朋友既好玩伴, 我已經同佢地玩得熟稔晒啦!!

散心食飯

餐廳內部~~~黑麻麻
就係呢張剪報, 我地就入左去呢間餐廳食飯啦!!
最好食就係呢個炸鮮魷~~
當我切開晒先記得影相, 佢本身個賣相冇咁差既!!
唔錯既炒飯!!

星期二, 因為Anna心情不佳, 情緒低落需要散散心, 所以原定去做gym既活動就取消左, 散心既最好辦法就係去刷餐好既, 於是入左西貢搵野食, 入到西貢一落小巴就四圍行下, 行左一陣就入左一間"蘇珊娜扒房"食野, 其實原先都冇諗住入去呢間食, 只不過咁岩經過門口時見到佢貼左一張10年前既剪報係門口, 好似介紹得幾好味, 於是就入左去食!!

入面黑蚊蚊咁, 成間餐廳既佈局係舊港式扒房一樣, 之前係門口個張剪報介紹過炸鮮魷&柳眼扒(柳眼扒係一個set - 包餐湯+多士+餐飲+雪糕)好好食, 所以就先叫左呢兩個食先, 雖然係散心要食野, 但係我地都base on唔好食得太肥為大原則, 所以另外只係叫多碟炒飯就算啦!!

落完order過多陣就黎左個炸鮮魷先, 佢個炸鮮魷同旺角街邊個d炸粉做得好唔同, 好明顯佢係做得比較有心機, 炸粉比較簿身, 一口咬落去就好好食, 而d鮮魷都好新鮮, 我諗話晒係西貢區, 海鮮應該會比較新鮮d!! 呢個炸鮮魷本身仲跟埋一個有少少辣既汁一齊上, 點住d汁黎食都幾好味!! 之後就係個主菜 - 柳眼扒, 我地要左個蒜蓉汁, 上個扒個時成塊扒上面全部都係蒜蓉但係冇汁, 開頭以為佢會好似花園餐廳咁另外再加上去啦, 點知等左一陣都唔見佢黎加野, 再望一望隔離張枱, 原來所謂既蒜蓉汁就係塊扒上面加一大part蒜蓉就已經當係!! But anyway, 我地就照食啦!! 味道還可以, 不過咁講, 其實佢個set要成$138, 以咁既價錢d扒我本身估佢都應該會係幾有肉味, 不過味道只係一般貨仔!! 最後仲有上埋個炒飯, 個炒飯都幾好食, 唔錯!!

頭先睇左openrice對呢間餐廳個評價都係一般, 甚至有少少差, 不過我覺得都還可以接受既!! 食飽飯之後就係西貢海旁行下, 吹下風, 傾下計, 其實有時咁樣都幾休閒幾寫意!!

蘇珊娜扒房
地址: 西貢普通道76號
電話: 2792 7163
菜式: 西式、西餐廳

經典

今日早返屋企, 於是係部電視機前面轉黎轉去, 睇下有咩電視好睇, 咁岩居然俾我轉到去明珠台, 原來岩岩佢地重播返"The X File"仲要係season 1既第一集, 嘩, 真係超經典!! 上網check下"X-File"呢套電視劇, 原來Season 1已經係講緊1994年個時既事, 即係14年前既事, 嘩, 真係好耐啦!! 個時, 我諗我應該冇睇到佢既第一集, 今日有機會睇返真係好野!!!

大家可以逢星期一晚上9:30p.m去明珠台睇返呢套經典!!!

好忙呀

今個星期唔知點解除左今日之外, 成個禮拜都差不多係full booking!! 講一講個行程先:

星期二: 去做gym~~
星期三: 夜晚入布袋澳食海鮮(有人請, 純粹去食飯, yeah!!)
星期四: 上牛牛屋企度身做兄弟衫(聽講話要做slim cut, 好驚!!)
星期五: 上朋友屋企打邊爐
星期六: 下午去上堂, 夜晚再拜訪Jaemi新居(幫Jaemi新屋既牆角整返幾"篤"童子尿先)
星期日: 幫舊鄰居搬屋(暫定)

成個星期冇時停!!

雜

呢排冇啦啦, 又係冇事忙, 成個禮拜冇打blog!! 岩岩全世界都望住隻雀隻" 鸚鵡" 打唔打得成黎香港, 好彩佢打得成, 多一日假放下, 真係感覺良好呀!! 原先星期四個晚仲聽天文台講, 清晨時分都未必會掛8號風球, 心諗唔係咁大件事呀, 唔通點都要返半日工先有得放!! 好彩, 晨早7點起身昅一昅個新聞, 佢話8點鐘前就會掛8號風球!! 咁先可以放過long weekend!!

+++++++++++++

星期六, 原先諗住去同Anna行行Megabox過下日晨, 點知去到德福商場個時, 咁岩就見德福個度重新開返左個戲院, 之前就係UA, 家陣就轉左做MCL, 見有新戲院咪走去昅昅有冇位啦, 之前見Anna話想睇Get Smart呢套戲, 又咁岩見佢又有d靚位, 所以就買飛睇戲!! 雖然呢套只係一套無聊笑片, 不過如果想開開心心, relax下, 唔駛用腦去睇戲既, 呢套電影就岩晒, 雖然都預左佢係無聊笑片, 不過未至於去到界枱既電影, 都可以一看!!

仲有, 其實德福個間新開既戲院, 全部都係迷你戲院, 不過座位與座位都好闊落(i mean同前排座位都係), 不過頭先講左呢度全部都係細院, 如果買飛睇戲既話, 一定要買最後個行!!

仲有, 仲有, 佢因為新開張, 家陣有個優惠, 家陣只需要俾$100入會做佢member就可以即時有3張免費飛, 之後做左member仲可以買飛有9折, 計埋條數都有賺呀, 一張飛如果係正場睇個時都講緊$55一張, 家陣送3張(生日o個個月仲會送多張)即係免費入會, 所以都幾抵下!!

+++++

3日長假放完, 聽日又返工, 唉!!!

流水

前排完成左個presentation應該得閒d, 不過, 由於今個星期要陪人溫書(係呀, 我變左做書僮), 所以又停左打blog(好)幾日!! 呢排唔知咩事, 身體差左, 繼上次病完, 呢兩日又病過, 家陣成日都係度流鼻水, 仲要係勁流個隻, 有時搵唔切紙巾個時分分鐘流到落咀唇邊!! (講真架, 有時唔覺意自己條俐都"high" d鼻水!!)

諗左好耐因咩事又病呢!! 我諗到個原因, 可能我為左支持環保, 夜晚訓覺就決定唔開冷氣訓, 咁有時又實在太熱於是就唔著上衫就走去訓覺, 咁隔離都開住把風扇仔既, 而到左清晨5,6點d天氣又會涼返少少, 就係咁既原因, 一個唔覺意就冷親左!!

風雲變色

大家都打得興致勃勃~~點知, 半個鐘後......
落雨前, 突然括起大風~~
成個籃球場都俾突然既大雨淋濕晒!!

星期日約左同學仔們打籃球, 朝早仲係陽光普照, 諗住下午打波實曬死啦!! 我地下午3點左右開始打, 打左唔夠半個鐘, 突然間成個天都黑晒, 之後, 就起勢咁吹起大風, 咁岩我地球場隔離正正係一個地盤, d風吹起晒d沙石, 攪到成個籃球場都塵土飛揚, 個個都要擋住塊面!! 隔多晒仲落埋場大雨!! 攪到大家都好掃興冇得打波!!

返到屋企睇新聞先知, 原來呢次係一個突發極端天氣現象, 全香港都係咁!! 呢排d天氣真係令人難以捉摸, 一係落雨落到狗屎, 再唔係就曬到阿媽都唔認得!!

周身骨痛

作病中~ 喉嚨痛 + 周身軟"賴賴"+ 骨痛

會唔會係我第3度發育, 想標高呢!!!

食左d藥, 希望唔好真係病啦~~~

早來的生日禮物

新電話 Sony Ericsson - W901i是也~~

嘩, 嘩, 嘩, 勁啦, 我9月生日依家已經有生日禮物收, 邊個對我咁好, 唔駛講都知當然係我位靚靚女朋友啦!! 話說近日我部手提電話大大話話都用左3-4年, 家陣已經去到人生既盡頭, 唔知係咪佢厭世既關係, 近排佢時不時都會自動熄機, 又或者係自我re-start!!! 細心既女朋友有見及此, 既然係咁, 就將生日禮物推前2個月送, 於是我部新既手提電話就此誕生啦, yeah!! Thank you so much!! 多謝妳份生日禮物, 我好鐘意呀~~~

免費娛樂

平日出街返工放工返屋企都係搭巴士出入, 搭巴士一上車, 唔係訓覺就係望下街, 再唔係就係睇下雜誌, 再唔係既就好自然會昅下巴士上面既小螢幕Road Show睇下有咩睇下啦!!

近排見到有個廣告就係成班小朋友不斷係度講:『I"粒""Gra媽", I"粒""Gra媽"!!』(仲要係高音幾度講出黎, 而且仲重複左好幾次!!!), 第一次睇呢個廣告個時咁岩就係巴士度恰埋眼訓緊覺, 聽到呢班細路講野之後, 真係成個人都彈起左, 究竟呢班細路講緊d咩, 睇返d字幕, 原來佢地係度講緊:『I love grammar』, 係一間教小朋友學習英語既中心, 嘩, 如果俾著我係d小朋友既家長, 真係唔會俾佢地入去呢間學校上堂, 什麼I"粒""Gra媽"都講 得出既, 咁都叫教得好, 真係是但搵人故都得羅!!

另外, 如果大家都有睇Road Show, 都有睇過由"爛gag王"高浩正做主持既"手機音樂排行榜"(冇記錯好似係咁叫!!), 佢每介紹一首歌都用好多形容詞又或者用一段說話去介紹o個首歌, 每每當中都夾雜住好多爛gag, 其實我唔知係個節目個編劇玩佢定係高浩正自己真係咁敬業樂業, 成日見到佢講d爛gag個時又真係幾natural high!!