十五週年大旅行(長隆篇) (Day 3)

一朝早起身準備出發!!!

臨離開酒店前黎張大合照 ~~~

到左第三日, 我地決定落返去深圳消費, 由於Jaemi的智慧齒"篤"左出黎, 正所謂牙痛慘過大病, 佢決定先返香港睇醫生, 唔跟我地落深圳玩!! 所以我地團友由7位變左做5位啦!!! 我地係祺福新村既直通車站搭車落深圳繼續玩, 由於o個間旅遊巴既終站係去旺角, 所以我地就會係中途站既深圳落車, 而Jaemi同阿譚就會繼續返香港去!!

浩浩蕩蕩遊深圳, 第一站 - 萬象城!!

深圳就多既連鎖式餐廳 - 面點王, 比美香港既大快活, 大家樂!!!

我地同Jaemi分手之後, 都已經3:30 p.m左右, 我地第一站就係去醫肚, 因為最後一日, 我地冇book到酒店早餐食!! 好彩我之前個晚食左兩個杯麵落肚, 所以就冇佢地咁肚餓, 佢地已經餓到手軟腳軟, 輝仔就立即介紹大家去深圳好很出名既連鎖式快餐店 - 面點王食野!! 我上過深圳幾次, 見到呢間餐廳更有一間係左緊!!! 仲更過7仔!!不過, 食就真係第一次入去食!! 原來入面都有好多野食下, 又餃子, 又小籠包, 包羅萬有!! 最重要都唔貴, 幾抵食下!!

第一次係深圳搭地鐵的牛牛!!

原來牛牛係第一次係深圳搭地鐵, 所以對地鐵覺得好特別!!! 去到深圳既活動其實都不外乎, 行下書城!! 由於, 牛牛, Jessica, 堅, 同輝仔都未去過新書城, 所以我地就去新書城行下!! 唔係講笑大家都有不少斬獲, 果然係書中自有黃金屋呀!!!

$98 - 八道菜!! 抵!!

我覺我最好食就係呢個 - 焗烤磨菇

主菜 - 菲力牛排

行完書城都已經7:00又係時候食dinner, 夜晚輝仔約左朋友食飯, 所以就離我地而去, 最後又係剩返我地4個鐵膽去食飯!! 原先諗住去小肥羊(抵食呀麻!!!), 不過牛牛對打邊爐不太感興趣, 所以我地就轉左去食其他野! Jessica就係旅遊書上面搵到一間餐廳食法國餐 - $98就可以食到8道菜, 我就覺得o.k啦!! 唔係特別好食!! 不過又係幾丁友食野, 呢間餐廳既環境都算係唔錯!!

食完之後, 就返香港, 完成左我地3曰2夜大旅行啦!!

十五週年大旅行(長隆篇) (Day 2)

太唔好彩, 我地太遲先落去食早餐, 所以d靚位都俾人坐晒, 我地呢個位雖然都係近玻璃, 不過係corner位, 白老虎好少行埋黎!!

煙肉"鞋"口, 薯餅勁硬, 炒蛋冇味~~~~

第二日一早, 牛牛為我地book左長隆酒店自家buffle早餐, 本身間酒店房係唔包早餐架, 係要另加$90大元先有, 而牛牛話點解咁貴都同我地book呢, 主要係因為呢間餐廳既隔離就正正係白老虎生活既小天地, 所以間餐廳都叫做白老虎餐廳, 我地係呢間餐廳可以食住早餐近距離望到佢, 所以牛牛話可以一試!! 講真, d野食, 真係一般過唔一般, 如果唔係隻白老虎, 我諗佢都唔敢叫價叫得咁高, 佢d野食, 同我上次去泰國食個d buffle早餐真係差幾皮!! > o < 題外話, 一直主張話去水上樂園既jessica, 被眾人否決左之後, 死心不息, 佢話點都要游一次水, 即使係酒店泳池都好!! 係第二日既一朝早, 即係早上既7點鐘已經起左身, 噪生晒!! 點知後尾佢又話, 原來一早起身發現天氣好涼所以就唔鬼落去游水!! 好彩佢冇落去游水, 因為後來我地發現左呢間五星級酒店既泳池係要俾錢架, 每次需付$50, 我都係第一次聽, 係酒店游水要俾錢!!! 成班友on居居俾人老點, 行左半粒鐘以上先到動物園!!!

食完早餐, 我地就決定去長隆野生動物園, 開頭我地見遊樂場同馬戲團都係係酒店隔離(唔駛5分鐘既路程就到), 所以我地懶醒咁, 問都冇問就咁衝出酒店行去動物園, 一開始, 我地見到個工作人員陰陰咀笑住咁指住一個方向, 老點我地行, 佢話行15min左右就到, 我地就行啦, 大家一開始個時都行得浩浩蕩蕩開開心心!! 點知行下又15min, 行下又15min, 頂!! 仲未到既, 我地又見到一個工作人員, 又問佢點行啦, 佢話: 『嘩 ( ! ), 呢度行去好遠個喎, 你地行返出大街, 搭巴士啦!!!』妖......都唔知係唔係d內地人平時行得多, 所以行慣左就唔覺遠, 當然啦, 到最後我都終於都行得到個動物園!!! 不過, 有一點係肯定, 就係我地唔止行左15min!!! *o*

似入左森林, right!!!

個動物園, 可以用一個字黎形容 - 大, 好很大!!! 大到呢!!! 根本就唔係俾人行, 佢應該一入門口就租單車俾人踩入去參觀, 大到有d痴線, 基本上, 除左恐龍之外, 你講得出既動物係呢個"山頭"(係呀, 我地似行山多過去行動物園)都可以搵到!!

就係呢隻係北極熊, 我feel到佢真係好熱!!!

一入門口就見到北極熊, 雖然個牌係寫住北極熊, 但係唔知點解佢住緊一個露天既地方( ! ) 係, 你冇聽錯, 我冇打錯! 我都唔明點解一隻住係北極既熊要住係一個冇冷氣既露天地方!! 唔通, 動物園想話我地知, 地球暖化, 北極熊都要適應下呢d熱辣辣既天氣先!! 除此之外, 我差d想入去同隻北極熊剃鬼晒d毛佢, 我見到佢, 我自己都即刻標多幾滴汗出黎!!

近距離見到d鴕鳥都幾得意!! 突然間諗起一套卡通片, 有隻狼成日追住隻鴕鳥, 而鴕鳥就跑得好鬼快!!

去到其中一個zone係專俾人餵食物俾d動物, 當然個d飼料要俾錢買啦! 動物們好多時見到有人餵野食都會一窩峰擁上黎餵食野, 而我地呢班cheap友就襯呢個機會去影相, 企係人地前面借位同d動物影合照, hehe!!!

大家睇清楚, 譚兄後面係有人餵緊野食!!! 我地就襯呢一刻去影相, wahahhaha~~

嘩!! 呢個就標準示範~~~~

係呢個公園, 大大話話都有十幾廿個品種既馬騮, 真係各式其式!! 而好明顯, 我地係由人猿進化而成, 我地睇馬騮呢一part都睇得好入神!!! 當中, 見到有一種馬騮好特別, 唔知點解呢種馬騮 d pat pat會係咁大舊, 如果大家放大張相近睇, 見到佢地係用個屎忽黎當墊坐!! 而且佢地真係好有階級觀念, 我見住其中一隻, 應該係大王既馬騮好悠然自得咁俾另外兩隻馬騮服侍!!!

呢隻"忽忽"真係忽忽地架! 佢自己食完隻蕉之後, 嘔返出黎自己再食過, 前後嘔左兩次, 兩次都係自己食返!

頭先我講緊就係中間個隻馬騮大王, 型爆!! 棟高腳, 有人服侍, 威, 威!!!

去到中段, 由於實在太悶, 阿譚提議不如一齊影張有動感既合照, 就係叫:『1, 2, 3, 跳!!』捕捉最動感個一刻!!! 以下就係我影既連環快拍, 好攪笑!!! 出黎旅行最重要係大家relax, 玩得開心麻!!!@o@

1

2
3, Jump
4

5

行左差不多1個鐘左右, 再望一望個地圖, 發現我地只不過係行左個動物院既山腳, 頂!! 加上天氣超悶熱, 真係想死!! 終於行到去一個有得坐車近距離接觸d動物, 開頭以為連獅子, 老虎個d都會放出黎, 原來都要隔住一個大坑黎睇!!! 不過, 原來近距離睇d長頸鹿又真係幾得意, 佢地條頸長到呢, 細心既動物園, 特別為佢地加裝一條橫條, 俾佢地可以托住個下巴, 唔駛全日都吊住個頭四圍走!!!

我地就係坐呢d車去近距離接觸啦!!

長.....長......長頸鹿呀!!!

放大張相有野睇....hehe!!!

鹿仔飲水!!!!

行左大半日, 我地由11:00a.m行到差不多3點幾!!! 終於行完返酒店, 其實, 今日仲有輝仔join埋我地一齊玩, 佢原來係2:00p.m左右已經到左酒店, 不過外於佢唔駛用漫遊既關係, 牛牛打俾佢, 佢又接唔到, 佢又打唔到俾牛牛, 所以佢就係酒店呆坐左成粒鐘!! 輝仔等唔到我地, 個人就慌起黎, 個人一慌就肚餓, 佢傻下傻下去左酒店度用左成舊水食左個焗豬扒飯, 好可憐呀佢!! 好在最後, 我地都搵到輝仔返黎!!

可憐既輝仔!!! 終於有得玩~~~

呢個比海洋公園勁一百倍既滑浪飛船, 不過, 我地冇玩到!! 咪癲啦, 未濕過咩!!

高速滑行中拍攝! 右下角 - 堅 & 牛牛!!

大家休息左一陣就重整旗鼓, 接住就去左長隆機動遊樂場玩!!^O^Yeah!!! 呢個遊樂場話大唔大,大話細唔細, 不過對於我地黎講, 就唔係太岩玩, 因為太刺激既機動遊戲, 我地又唔太敢玩, 太兒戲既機動遊戲我地又冇興趣玩, 所以我地都只係玩左兩至三款機動遊戲就算.....

我地去左祺福新村個超級市場掃貨!!

可能朝早行左個動物園, 大家d energy用左一大半, 所以行多一陣頂唔順就離開左遊樂場!! 我地(基本上係得我同牛牛)發覺去旅行夜晚係酒店冇零食, 冇杯麵食唔似去旅行, 所以就決定係臨食dinner之前去左超級市場入貨先!!! yeah!! 我同牛牛各自入左兩個大杯麵, 原先我諗住買3個杯麵, 不過有人大我, 話我邊有可能食得晒, 所以最後都只係買左兩個就算數!!! 係內地消費真係好, 我地買左好多野, 最後夾埋都係$140左右!!!

食飽晚飯就酒店沐浴更衣!!! 之後就開始我地係酒店入便既活動啦!!

好多野食呀!!!

查實我地早在3個鐘前已經食完飯~~不過我同牛牛, 唔理, 照食!!

玩返之前, jessica教落既遊戲!!!

大家臨訓前既眼訓大合照!!!

待續~~

十五週年大旅行(長隆篇) (Day 1)

呢個大頭就係牛牛既頭頂, wahahhaha~~

我地一行6人直踩番禺長隆黎個"十五週年大旅行"!! 原先大家難得有機會相約一齊搭飛機去旅行, 不過礙於大家資金所限所以最後都決定返長隆既遊樂場玩, wahahha!! 其實, 最重要係成班人一齊玩, 去邊樹都冇咩所謂~~~

星期六朝早, 我地已經約定12:30p.m係中港城集合, 而Jessica一早就同我講話會去飲茶, 咁我好淡定咁早餐都唔食就一心諗住去飲茶啦!! 點知準時12:30p.m去到, 就只得jessica到左, 而其他人仲未到, 咁就唯有我地兩個人開住位等~~ 時光飛逝, 我同jessica一等就等左半粒鐘(1:00p.m), 最快到既Jaemi同阿譚一坐低就話佢已經食左野, 唔駛叫咁多野食, 唉!! 可憐既我, 一早叫左籠叉燒包做點心, 點知黎到之後, jessica先話原來佢唔食叉燒包, 妖...攪到我一個人食晒成籠叉燒包, 真係火都黎~~~

5星級真係5星級, 個lobby都大過人...

嘩...我地2點鐘船, 由坐船到再轉shutter bus去到酒店都已經成4,5點, 嘩, 好耐呀, 牛牛話本身應該會快d不過可能隻船行得慢姐!! 今次我地去o個個長隆大酒店, 係一個五星級既大酒店, 呢度有好攪笑架, 係大堂兩邊都有個位置, 特別放左d動物做裝飾 - 有白老虎同紅鴆 ( ! ) , 係堅野黎架, 生勾勾的, 勁呀!! 5星級真係5星級呀~~~

我諗d白老虎, 唔駛點做野, 成日都係行行企企食飯兩味, 所以肥左dd~~ 如果放你入去, 你分分鐘跑羸佢都唔出奇!!

攪笑的我們, 定晒神咁望住d紅鴆睇下佢地係唔係真係單腳企係度訓覺!!!

房間唔錯, 我地其中兩間房係打通, 好好玩, 兩邊d人四圍走

就係左手面個度門, 打通左兩間房架!!

上房放低左d行李之後, 就去搵野食醫肚, 由於夜晚諗住睇馬戲團關係, 我地就廢事搭車出去食野(因為聽d 酒店 staff講出去食野車程都要15-20min), 陣間一來一回費時失事!! 終是我地就係酒店既Bar食左我地呢次旅程既第一餐!! 又係個句5星級就真係5星級, 食係貴過人, 一碟印尼炒飯之麻, 你估幾多錢??? $80呀, 我地唔係冇錢, 只不過覺得唔抵姐, 返到內地食咁貴既野, 唔化算!! 所以我地都係係咁e叫左個飯, 加兩個公司三文治share就算, 睇完馬戲團先刷餐飽!!!

等野食中~~~
唔係講笑, 呢個飯------$80大元!!!

食飽飽(查實得個半飽!!)就出發去霸位睇馬戲團啦!! 之前聽去過長隆玩既朋友講, 呢個馬戲團值得一睇, 而且要早d去霸位, 所言非虛, 成場馬戲團都冇冷場, d場面都幾好睇, 雖然人人都話好睇, 但係點解冇人提到, 個度係超多蚊, 而且係冇冷氣添!! 我地去個日, 簡直係熱爆!! 而且d蚊好似之前俾人送左去非洲未吸過血咁, 成日飛黎飛去咬人, 好在我本人唔多"野"蚊, 唔係就死硬!!

成個場都好大下, 聽講可以容納到8000人!!

又有空中飛人睇, 都唔野小!!!

Last, 所有馬戲團d人出黎show off~~~

睇完馬戲團, 拿拿臨出去搵野食醫肚, 堅媽媽早我地一星期前已經上黎長隆玩左一次, 所以今次堅兄就提議由佢媽媽推介既中菜館食我地既Dinner!! 呢間酒家都幾特別, 係冇大廳, 我地一黎到就塞左我地入去d房度, 不過d野食就一般唔係特別好食, 但都唔算差, 不過大家都餓到死, 個個都起勢咁食, 所以味道自然加左分!!!

我地差唔多成10點先去到, 人地11點收工, 所以四周圍都冇咩人氣, 都幾恐怖下!!

又係等食~~~

今次終於可以食飽飽, 原先想去d士多地方買d零食, 杯麵返酒店當消夜食(咩喎, 11點食完, 唔可以食消夜咩!!)咁就唯有執埋野, 之後就各自訓覺, 完成左第一日既行程!!

待續~~~