鄉下仔出城(3)

黎到第三日, 原先諗住可以去一去廣州比較出名既白雲山行一轉, 不過由表妹屋企去白雲公園又係要成粒鐘車程, 再行一行, 都講緊要幾粒鐘時間, 而且唔想太晏先返落香港, 因為怕太晏返香港, 到時係深圳關口塞死晒!! 所以就同表妹&佢男友仔一齊係廣州入面既大型商場四圍行下就算做!!

我地去左市中心既大型商場行下, 睇下d野, 唔好以為係內地買野就會好平, 其實如果係個d大牌子個d such as: Nike....基本上價錢同香港係完全一樣, 可能分分鐘價過香港都唔定, 因為家陣d人仔都係對得好貴!!

廣州既書城!!

行左一陣商場, 實在太悶, d野又唔係特別平, 所以表妹就帶左我地去左廣州既書城行下, 咁都好, 因為原先都諗住路經深圳個時, 都會係深圳書城個兜圈, 家陣係廣州行埋, 仲好唔係深圳轉黎轉去!! 雖然廣州既書城都有返咁上下大, 不過感覺上都係深圳書城好行d同埋舒服d, 又或者我背住個大背囊鬼咁重, 又又加上成鬼日都怕有扖手光顧, 所以行都行得唔係太自在!! 當然, 一場黎到, Anna都有少少既斬獲, 買左幾隻VCD返香港做紀念品!!

行到大約4:00pm都係時間到火車站買飛返香港啦!! 多謝表妹及表妹男友仔照顧左我地兩日, 呢兩日都玩得幾開心, 聽講表妹黎緊暑假可能會黎香港玩, 到時就要做返導遊帶佢地去玩啦!!

鄉下仔出城(2)

從表妹屋企望出去既街景!!

到左第二日先係成個旅程既戲肉, 因為今日我地會去長隆動物園+夜間馬戲團, 由於一早就plan左去呢兩個地方, 上網睇過話如果係中旅個度買飛可以有得平, 而且當Anna去到中旅買飛個時, 職員仲同佢講動物園+馬戲團直頭可以當係套票咁買, 即係可以平上再平!! 冇記錯Anna話套票就應該係大約$250/人, 如果去到現場walkin買飛應該要$300/人, 家陣每人平左$50, 4個夾埋就2舊水, 真係幾好呀!!

係華潤買野食!!
$9.9, 雞一隻!!

由於入左動物園之後, 基本上都唔會有咩食, 應該話係動物園入面食野真係貴夾唔飽, 都唔會諗住係入面食野, 所以我地係出發前去左超級市場買d野食先再出發, 我地係超級市場度買左2隻雞, 真係兩隻完整烤雞, 價錢都好平, 只係$9.9一隻, 當然啦, 一分錢一分貨, d雞就唔係真係咁多肉啦, 不過味道都還可以!! 除左d烤雞外, 另外都買左d零食!!

巴士上~~

是日交通工具為巴士是也, 係表妹屋企坐巴士到長隆都要差不多成粒鐘既車程!!! 人生路不熟, 為怕坐過龍過左站, 所以全個車程都唔敢訓覺, 再加上表妹再三叮囑係廣州都時不時有人偷野, 都係小心為上!! 搭左大半個鐘車程左右終於黎到動物園入口, 因為我地係香港買套票既, 所以入場前要係售票處換飛先可以入去!! 由於知道Anna同表妹男友都未黎過動物園, 所以就特別推介佢地去坐火車近距離接觸動物, 因為呢個係全動物園最好玩既活動之一!!

雖然今次係第二次黎玩, 不過可以咁近距離接觸到d動物, 感覺都好得意!! 坐完火車睇動物之後, 緊接就有白老虎表演!
白老虎表演!!
雀仔表演!!

對上一次同牛牛佢地黎玩, 我地都冇睇過呢度d動物表演, 原來d動物表演都幾精彩, 接住落黎仲有鳥類表演同埋大苯象表演, d時間真係岩岩好一個接一個, 每個表演都會有大半個鐘左右, 斎睇返呢d表演都已經值回票價!! 正如頭先所講, 每個表演都有成半個鐘,再加上成個動物都真係幾大下, 最後我地都未行得晒, 動物園就要關門, 其實大家咁行法, 基本上都已經有d攰!! 再加上, 夜晚我地仲要去睇馬戲團, 而且大家成日流流只係係lunch個時食左隻"冇肉雞", 大家個肚都餓到死, 所以就快手係出返去附近既地方食野啦!!

要用飲管飲入面d骨~~~


根據上次同牛牛佢地黎長隆玩既經驗, 最近長隆有野食既地方應該係祁福新村既"食街", 於是就立即係動物園門口搭車出去食野, 今次我地去左一間專食骨既餐廳, d野食都ok既, 不過, 可能我地叫得太多肉既關係, 個個都食到好鬼飽!! 食飽飽就再搭的士返去長隆馬戲團啦!! Anna同表妹男友都未睇過呢個馬戲團, 所以佢地都比較興奮, 雖然我之前都睇過一次, 不過今次再睇個時, 佢地既表演當中都加插左一d新既玩意!! 表演總算精彩, 令人讚不絕口!! 睇完馬戲團又係時候返屋企啦!!

(待續)

鄉下仔出城 (1)

食住d生菜魚肉....頂住肚先!!!

岩岩星期五, 六, 日, 同Anna去左一個短trip, 就一齊返左廣州探Anna表妹是也!! 原先諗住係年初二, 三先上去, 不過一來怕新年時段返落黎既時候人多, 兩來新年流流上到去, 照理好多舖頭都關門大吉多, 而且表妹個男友仔又咁岩呢幾日係廣州渡假, 難得可以一齊玩, 所以就決定早d上去一齊玩啦!!

唔同時間會到唔同既月台上車!!
其實車廂內都幾乾淨下!!

因為唔想太夜先上到廣州, 於是放工之後,係旺角食少少野, 是但篤串魚蛋食碗生菜魚肉頂住肚先, 最多陣間上到廣州再食野!! 快快手坐火車去到深圳, 就立即再行過去深圳火車站買廣州火車飛, 原來上廣州個d火車係開得好密, 基本上差不多10分鐘就開一班, 密到你唔信!! 由於小弟鄉下仔出城, 未去過廣州, 今次都係由Anna做領隊帶住, 家陣第一次坐廣州火車上去真係大開眼界, 之前仲以為深圳個d火車一定係鬼咁污穢, 原來家陣並唔係咁! 家陣個d火車都好靚仔&乾淨下, 人地仲要叫個d火車攸"和諧車", 好勁呀!!!

係深圳坐火車出發到廣州, 大約1個鐘多少少就到, 由於之前已經約定表妹係火車站出口等, 所以一出火車站就已經見到佢同佢男友仔等候, 原先諗住8:15pm左右就上到去廣州, 最後都要差不多9:00p.m先上到去, 足足遲左成粒鐘, 要表妹久等真係唔好意思!!

李先生個樣都幾似老夫子入面個位秦先生

我個香菇雞脾飯~~ok好食架!!

由於我地夜晚放工個時只係食左生菜魚肉+燒賣&魚蛋, 其實邊樹夠飽呀, 而且表妹為左等我地, 佢地都未食晚餐, 所以就係火車站附近既餐廳食野!! 我地去個間叫做"李先生"既餐廳食野, 李先生呢間餐廳係食d咩既呢?? 根據佢個menu所知, 佢最出名係美國加州牛肉麵, 而且係全國有成350間分店, 好似好勁呀!! 呢度除左麵食之外都有d飯餐, 其實佢個格局都幾似KFC個d連鎖店, 不過佢就有d唔同, 只要你坐低之後, 就會有人幫你落order同埋會拎埋過黎俾你, 唔駛自己動身去counter買野食!! 雖然話出名牛肉麵, 不過, 我同Anna都冇食到, 反而食左佢個雞絲麵同埋香菇雞脾飯, 食落都幾好食, 好入味!! 每個餐都係太約20人仔都駛, 都幾抵食!!

食飽飽都已經夜啦, 係時候歸家, 呢兩晚我地就會寄宿係表妹屋企住!! 咁就可以慳返d住宿費用!!! 表妹住o個個屋苑都幾大下, 四周圍都係d大樹, 見到d人放狗都幾過癮!! 不過由火車站坐巴士到表妹屋企都要差不多成45min車程, 後尾聽表妹媽媽講, 原本車程只需要30min就得, 不過, 由於交通阻塞, 而且內地d人唔太守紀律, 唔睇交通燈指示, 左穿右插, 影響交通, 所以就攪到咁慢!!

(待續)