日本中部之旅(番外篇) - 其餘精華片刻(2)

去旅行個時是但影出黎d景都特別靚~~
捧球場上既櫻花!!
高山市既小溪係好出名架!!
流水好清~~
d水乾淨到d小朋友會落水玩, 如果係香港個d, 應該一早變左糞河!!
d人會好休閒咁係河邊休息曬太陽!!
近鏡既合掌屋!!
其他既合掌屋~~
我地住既合掌屋"大田屋"是也!!
我地住既合掌屋門前有棵好大既櫻花架!!
唔係講笑, 真係好大雪, 好彩我大難不死!!
真係好大雪架, 仲好大風添~~
行行重行行~~
雪地既路, 平時就係靠佢摌出黎!!
摌呀, 摌!! 衝緊落黎啦!!

(待續)

日本中部之旅(番外篇) - 其餘精華片段(1)

今次既旅程足足有8日之多, 影既相當然都不少啦, 足足影左成7G既相返黎, 大約都有成2800張相架, 相雖然係多, 不過, 當然係冇可能曬晒所有既相出黎啦!!! 難得有機會, 係呢度同大家再分享一下今次旅程其他既片段呀!!

係名古屋街中, 冇端端有個大廈度都有個摩天輪~~
酒店影出去既夜景!!
同一個位置既日景!!
松本城賞櫻!!
松本城~~
松本城多面睇~~
好靚既櫻花
真係好靚既櫻花
真係好鬼靚既櫻花
係揸車中途發現既第一個雪景!!
牛肉刺身是也~~
日本蘋果
日本士多啤梨
在汽車行駛時由Anna所拍攝既藝術照~~
高山祭車台
高山祭車台(2)
高山祭車台(2)
車台上有d小朋友坐晒係度架!!
高山祭車台(3)

(待續)

日本中部之旅(番外篇) - 後感

● 今次既旅程感覺蠻特別, 雖然自己唔係第一次自由行去旅行, 不過係第一次自己揸車四圍走, 自由行已經覺得夠free架啦, 原來自己揸車四圍既感覺仲爽!! 話去邊就去邊, 鍾意係邊樹停就邊樹停, 更重要係唔係拖住個喼四圍走!! 手信就更加可以暫時塞晒入車尾箱唔駛理住, 唔駛揪住一袋二袋!!

○ 今個日本之旅, 其實, 好多事都係岩岩遇著剛剛, 如果唔係撞岩國泰機票做緊優惠, 都唔會有今次既旅程!! 而咁岩係呢次既旅程又撞岩係4月, 而係呢個4月又咁橋遇上1年只得2次既高山祭, 又咁橋可以雪の大谷重新開放既第一日就去探訪, 更加可以係松本城一睹櫻花盛放之美!!

● 如果唔係4月起行, 而轉左去3月或者5月去, 根本就未必睇到高山祭、雪の大谷、櫻花狂爆!! (早兩日探訪友伴朋友, 佢地遲左我地一個星期先去雪の大谷, 個時既雪牆都已經冇咁高、冇咁壯觀!!)

○有好多樣都係第一次係呢次旅程中體驗, 第一次揸車自由行, 第一次住民宿, 第一次係一日內狂浸溫泉(一日最多浸過3個不同既溫泉), 第一次睇櫻花, 第一次去睇日本人既祭典, 第一次以非shopping為目標既旅程, 第一次係雪山行走並遇上強大風雪!!

● 日本既廁所真係好鬼乾淨, 基本上佢地全部都係電動式馬桶, 即係去完大/小, 只要按個制就會有小水柱出黎為你清潔, wahahaha, 我玩過呀, 不過基本上呢個function係冇咩用, 因為只為攪到四周圍都濕晒!! 仲有既就係, 佢個廁板係會暖住, 所以係冬天去既時候, 就一定唔怕會冷親個pat pat啦!! 不過, 話雖如此, 每一次我坐落去個時, 成日凝住係岩岩有人坐完, 所完個廁板先會咁暖, wahahhaha~~~

○暫時黎講, 尚未衝出亞洲既我, 之前去既地方最多都係5日貨仔行程, 今次一去就去8日, 可以話係去旅行最長既日數!! 仲有因為讀書既關係, 對上一次去旅行, 原來已經係2年前既事!!

● 感謝領隊Henry為我地作出一個非常完美既行程安排, 由尋找資料, 安排行程, 決定行車路線, 酒店/民宿訂房, 一一包辦!! 成個行程領隊Henry可以話居功厥偉, 感謝萬分!!

○ 今次既旅程係第一次同友伴出國遊樂, 仲要係一去就去8日, 實在有紀念價值, 實在太幸福的, 實在太開心的啊!!! 當然, 彼此既感情都加深了啦, 因為經歷比一切黎得更重要!!

日本中部之旅(番外篇) - 住宿篇

根據領隊Henry所講, 民宿既地方未必咁先進會有電腦又或者d民宿主人可能係d老人家, 未必曉用電腦, 所以我地大部份所住既民宿都係透過日本一個民宿協會send e-mail去訂房!! 簡單黎講其實就似係一個搵個agent幫手咁解, 咁當然可能有d地方未必有agent幫到手, 咁就可能需要自己打電話去做booking!! 另外, 由於係住民宿既關係, 基本上就唔駛指意有得"碌card", 所以就要帶備返相對既現金作結帳之用!!

可以透過下面幾個web-site去訂酒店或者民宿!!

1. 宿・ホテル予約-じゃらんnet
2. ～Yado～宿-
3. 飛騨高山民宿協同組合

Day 1 - 榮
~ナゴヤプラザイン(Nagoya Plaza Inn)
地址: 愛知県名古屋市中区錦３－８－２１
￥7,700/人 (素泊朝食)

Day 2 - 乘鞍
~湖藤莊
地址: 長野県松本市安曇3878-15
￥7,700/人 (一泊二食)

Day 3 - 高山
~ お宿新三
地址: 岐阜県高山市西之一色町3-829
￥3,000/人 (素泊朝食)

Day 4 - 平湯溫泉
~ ひらゆの森
地址: 岐阜県高山市奥飛騨温泉郷平湯温泉７６３－ 1
￥8,000/人 (一泊二食)

Day 5 - 白川鄉
~ 大田屋
地址: 岐阜県大野郡白川村荻町１８０７番地
￥8,400/人 (一泊二食)

Day 6 - 立山黑部(室堂)
~ 雷鳥莊
地址: 室堂再行路入去
￥8,400/人 (一泊二食)

Day 7 - 郡上八幡
~ 奧美濃莊
地址: 岐阜県郡上市八幡町　五町263-3
￥6,800/人 (一泊二食)

日本中部之旅(番外篇) - 行程簡介

首先要感謝由領隊Henry作出是次日本中部之旅既行程安排, 因為領隊用左不少既時間&精神, 做左不少既準備工功夫!! 如果冇佢, 今次既旅程都未必有咁精彩及豐富!!

Day 1: 香港 --> 名古屋( 名古屋中部国際空港) --(名古屋鉄道)-> 金山 --> 榮(嚴格d黎講呢度先係我地第一晚住既地方!!!)

Day 2: 榮 --> 松本(松本城) --> 乘鞍

Day 3: 乘鞍 --> 白骨溫泉(泡の湯旅館 + 丸永旅館) --> 新穗高温泉(水明館佳留宣山莊) --> 高山

Day 4: 高山 --> 平湯温泉

Day 5: 平湯溫泉 --> 新穗高温泉(深山莊) --> 白川鄉

Day 6: 白川鄉 --> 室堂 --> 立山(雪の大谷)

Day 7: 立 山 --> 室堂 --> 飛驒古川 --> 郡上八幡

Day 8: 郡上八幡--> 榮--> (名古屋鉄道)(名鉄)-->名古屋( 名古屋中部国際空港) --> 香港

日本中部之旅(十八)【19/4 - Day 8】曲終人散

返屋企啦!!

開心既時間過得特別快, 8日既旅程終於去到尾站, 係時候要返香港啦!! 首先我地先揸車出返去名古屋度交還返我地坐左7日既旅遊車!! 之後, 見到仲有少少時間, 所以一行4人就先去附近既大型商場shopping作最後衝線, 友伴本身既目的除左想shopping行街街之外, 其次係想將餘下既散銀一口氣做埋佢, 唔係到時成袋散銀拎到返香港要對都好麻煩!! 我見大家都拖住一喼二喼, 如果拖住個大喼係個商場度四圍行, 一來好似好異相, 二來就好似好阻街, 所以我地就係個商場既corner位, 咁岩個度又有地方坐, 於是我就做住呢個暫時行李管理員!!! 咁大家就可以輕輕鬆鬆行街街!!

買左飛就入閘上車啦!!
我地坐中間個架"中部國際空港"個架火車!!
由於我地架車主要目的地係機場, 所以都唔係好多人坐!!

最後大出血完, 其實都唔係買左好多野姐, 只不過係旨在做鬼埋d散銀就踏上我地回程之路!! 正所謂點樣黎就點樣走, 我地再一次搭明鉄出返去機場, 一如之前, 其實唔太多人, 各人上車後都有少少眼訓, 加上車程需時, 大家都不其然訓著左覺!!! 由於我地搭個架明鉄既尾站就係機場, 所以即使訓過龍都唔怕會miss左個站!!!

到機場啦!!
大家shop到忘晒形, 我地係last call先入閘上機, wahhahah~~

去到機場唔駛講就當係去check-in先啦!! 唔係講笑, 領隊Henry & Daisy佢地實在買得太多野(包括一包兩公斤既日本米), 所以過磅個時唔駛講肯定係over-weight啦!! 不過精明既領隊Henry, 二三下手腳就好快將本身極重既手信(包括米一包)抽左出黎, 左執下右執下, 再過一過磅, 岩岩好!!! check-in完見仲有時間去得機場仲有咩做呀, 又係shopping again!! 可能大家真係對今次日本依依不捨, 係機場入面shoppong到差不多唔記得上機時間, 我地差不多係最後last call先入閘上機!! wahhaha~~

以為係最後的晚餐~~

其實係最後一程飛機我地都遇上奇遇呀!! 因為, 原來我返黎香港之前個日(即係18號), 香港已經掛左個3號風球, 雖然而且我地返黎香港個段時間, 正正就掛緊黑色暴雨警告, 所以天氣係非常之惡劣, 所以我地架飛機臨到香港既上空個時, 機師都話因為天氣既關係要係上空盤旋等到適合既時候先可以著陸, 機師唔講又止可, 一講, 成架飛機就好似過山車咁突然間係冇重力下急降左幾下, 哈, 突然間急降個下真係有少少離心架!!

架飛機就係上空左兜兜右兜兜, 我仲以為唔通可以原機折返返去日本, 哈, 咁就爽羅, 如果返唔到日本, 去台灣都好呀!! 不過, 癡心妄想如我, 邊樹有咁著數既野呀, 其實我都唔知係應該讚個機師好定係鬧佢好, 因為佢技術好, 所以我地先可以安全降落, 但係就係因為佢技術太好, 我地先失去左一個原機折返既機會, 唉!! 最後我地好似比起原定既時間遲左太約一個鐘左右既時間先抵達機場!! 返到屋企之後, 睇返電視新聞話好多班航機正正因為今次颱風而需要取消折返!!

<<完>>

日本中部之旅(十七)【19/4 - Day 8】

晨早起來清新開朗快樂無限美.....wahahahah~~~終於黎到最後一日啦!! 今日行程比平日更加迫切, 因為一來我地要係郡上八幡呢個地方行一轉, 再之後要揸車出返去名古屋度還車, 再之後, 仲要搭返明鉄出去機場check-in, 所以時間係非常非常緊迫!! 由於要善用我地有限既時間, 所以一朝早, 晨咁早6:00a.m就起身刷牙洗面, 執行李, 拿拿臨7:00a.m食埋個早餐, 拖埋d行李落車尾箱, 再之後同民宿主人道別之後, 就出發逛一逛郡上八幡啦!!!


呢個就係宗祗水啦!!

郡上八幡其實係一個小型村落, 全部都係低層樓房, 唔會見到任何高於3層樓既屋出現, 唔會有可屎森林既壓迫感, 加上係附近有條大河, 望住d清澈既水濤濤不斷既湧出黎, 休休閒閒既感覺非常舒服, 係地圖上show左個幾個名勝出黎, 一場黎到就去昅一昅啦!! 第一個去既地方就係叫"宗祗水", 根據資料所講呢個泉係全國可以話係數一數二既名湧泉, 唔睇唔得!! 資料講就係咁講, 可能我唔識欣賞掛, 基本上我就覺得冇咩特別!! 我諗都係d日本仔自己"吹"到咁大!!

舞獅助興~~
打鼓個d全部都係小朋友黎架!!
表演個時四周都有好多人圍觀架~~

行完呢個名勝之後, 我地再係其他地方四圍行下, 突然間聽到d鼓聲, 樂器聲!! 原來我地又咁岩遇到今日係郡上八幡既春祭, 佢地又會好似高山祭咁有d人四圍打鑼打鼓, "舞獅"為各人祈福!!

製造食物工場!!

由於時間有限, 我地只係睇左一陣表演就走人去其他地方, 另一個係呢度比較出名既就係一間專做假野既舖頭(i mean係個d仿造食物)(さんぷる工房), 其實大家成日係日本餐廳門口個櫥窗度成日都見到d假既拉麵呀, 假既定食呀, 假既天婦羅等等, 咪就係個d羅!!

其實佢呢度有個工場, 係可以俾人參加實際體驗一下點樣製造仿造食物, 原先我都係前一晚都諗住打電話預約試玩下, 不過見時間太過緊迫, 所以就打消左個念頭!! 係門口入到去一眼望到全間舖都係d食物, 而且仿真度更高!! 如果有時間去玩下點樣整天婦羅, 其實應該會係幾好玩架!!

由於時間關係, 本先想上埋去郡上八幡城既, 最後都冇去唔到!! 最多就係遙遠咁望過去就算!! 行完郡上八幡, 我地又要開車返名古屋啦!!

(待續)