年又過年

好有新年氣氛, 度度都掛晒揮春!!

身為迪迪尼尊貴既全年票既持票人("尊貴既會員"呢個term黎自Macy!!), 早前新年既大節日, 當然又係時候去一去迪迪尼啦!! 家陣仲係做緊新年兼情人節既promotion, 所以通街通行都係d著住唐衫既米奇mouse呀, 仲有高飛呀....

好多人, 好迫呀!!


一朝早就坐MTR出發, 心諗係平日去迪迪尼, 照理應該都唔會太多人既姐, 點知一去到迪迪尼門口就知賴野!! d人多到呢, 誇張得很~~~ 平日只係供我地呢d專貴既全年票閘口, 照之前去過咁多次既情況, 都係唔駛排隊, 點知今次去就要排陣先入到去, 攪到我地呢d專貴既會員downgrade左!!

米奇同高飛都著住唐服~~~

其實每一次入迪迪尼玩, 主要都係因為佢有d special function, 所以先特別抽時間去玩, 由於之前都去過幾次迪迪尼, 所以基本上都唔會特別同人迫&排隊去玩個d機動遊戲!! 今次就特別去睇下新年special 遊行同埋米奇大屋新年版!!

係等候同人影相既空檔期間, 布魯圖係度自己擺post俾人影相!!!

黎左好幾次, 每一次都冇去過個"動畫藝術教室", 原來呢個地方係教你用好簡單既方法(等如畫o丁o當咁 - 圓圈加一點...........), 畫出迪迪尼既公仔人物, 今次我地學左點樣畫"唐老鴨", 可能我本身畫畫既技術不堪, 畫完出黎之後, 完全係兩回事, 不過Anna就唔同呢, 可能佢平時自己都有畫開畫, 畫出黎之後, 又真係幾似樣!! 如果大家去開迪迪尼, 不妨可以去呢度學下點畫畫!!!

有人鍾意搵佢地簽名, 最好笑就係佢地簽名個時, 將本簽名簿放係個鼻上面先簽到名!!

今次去迪迪尼, 咁岩見到林嘉欣出現!!


另外, 我發覺, 係迪迪尼入面扮迪迪尼公仔人物既演藝人員, 有時真係要nature high, 自娛先可以做到呢份工!! 有時, 咁岩見到d迪迪尼人物行出黎同人合照既時候, 有時見到佢地都幾喜歡自娛, 例如, 係空檔時間, 佢地每每都會自己擺下d無聊post, 逗下d小朋友玩, 不過逗人歡喜, 都係佢地呢份工作既範圍之一!! 之前睇左好幾次煙花啦, 所以今次都冇特別留係度睇!! 仲有, 係大約5點過後, 公園入面既人流開始少左, 我諗大致上可能旅行團個d遊客要跟領隊出去食飯, 所以到咁上下時間就要走人啦!!

瘋狂瘋狂玩樂六, 日, 一 （3）

玩左頭兩日, 終於黎到最後一日!! 今次我就同Anna到迪迪尼玩啦, 我地呢d圓左全年票既人, 係呢d大時大節唔入場玩返夠本點對得住自已呀!! 所以就襯依家迪迪尼有special function就入黎玩一玩啦!!


今次我地就放左工先入黎玩, 所以入到黎都有少少夜, 不過都唔緊要, 因為今次入黎主要都唔係要玩機動遊戲, 主要入去係睇個"睡公主閃亮舞會"同埋睇下其他特別野!! 咁好彩一入場岩岩就開始做緊巡遊表演, 由於依家既主題係"christmas"既關係, 所以所有既表演者都會戴晒d聖誕帽, 增加返D聖誕氣氛, 仲有仲有, 係入場個時仲會每人派一幅特製眼鏡, 只要你望住d燈泡, 你就可以睇到d一個個雪人圖案出現, 其實係上年聖誕都已經同anna去過迪迪尼, 個時都派過呢副眼鏡, 不過聽講, 今年仲有另一款圖案就係"天使", 原先諗住問下D工作人員有冇啦, 點知佢話要派"雪人"個款眼鏡先可以派另一款, 哎呀, 真係太孤寒啦!!


講返先, 佢今年多左個"睡公主閃亮舞會", 迪迪尼係城堡前面搭左個舞台表演歌舞, 呢個表演主要都係一班迪士尼人物同埋公主&王子一齊跳舞, 由於燈光加上音樂, 跳起上黎都真係幾好睇架, 仲要佢地跳到最後仲有d煙花放出黎成個景都好靚!!
當然, 除左個跳舞表演就仲有既就係米奇大屋啦!! 係呢個聖誕時節就特登整間大屋, 入面放晒d super大size既用米奇用品, 大家可以隨意影相, 最後, 仲可以同米奇佢合照添!!

Hello喂

正門口有阿jack既公仔佈置~~~
入左場之後, 就見到好多呢d南瓜頭四圍嚇人~~

重新講多次, 我同Anna買左迪迪尼既全年通行證架麻, 唔用返夠本點得架, 所以上星期就再去一次迪迪尼啦, 今年去既目的就係家陣全城熱爆既"Hello喂"啦, 作為一個尊貴既會員, 我地又點會錯過呢!!

第一個重點遊戲 - 大街酒店
第二個重點遊戲 - 森魔鬼域

我地今日提早小半日黎到呢個迪迪尼, 由於迪迪尼既全年票係包埋夜場架(聽聞隔離個海洋公園係唔包夜場, 如果想玩夜場, 佢地就要另外再買過飛), 所以我地就可以真正由朝玩到黑, 抵到爛!! 入到場之後, Anna話趁家陣仲係日光日白, 不如走去玩左鬼屋先啦, 唔係陣間夜麻麻先入去玩, 好似好恐怖咁喎, 既然佢又驚驚地, 而入黎個時個guidebook都話, 6點前去玩鬼屋唔駛排咁耐(因為6點後就會連埋d夜場既人, 所以就可能要排好耐下!), 所以就急急腳走去玩個"大街酒店"先, 起先仲以為迪迪尼專俾D小朋友去玩, d野恐怖極都有限啦, 點知原來都唔係個喎, 入到去d鬼屋, 入面d環境就暗到爆, 伸手不見五指, 行行下, d鬼又會鍾意得閒冇事就彈出黎, 再唔係就追你兩條街, 心血少既Anna俾佢地嚇到只係識得大叫!!! 當然啦, 一路沿路都聽到其他人都大聲呼叫啦!! 所以驚嚇程度都唔講得笑!! 由於時間好早就去左排鬼屋遊戲(每個game都排成45min左右), 所以都算一早玩晒主要既夜埸game!!

夜晚既小小世界. 幾都靚下架!!

夜場"Hello喂"係夜晚有兩場夜遊show!(即係巡遊個d!!!) 當然夜晚個d就會多左d特別既角色, 都係一d奸角啦, 我都唔多識, 夜晚既巡遊比日頭o個個短d, 夜晚既節目好緊湊呀, 7:30pm就做巡遊, 之後緊接8:30pm就再放煙花, 所以好多人睇完巡遊之後, 就立即再去搵定位再睇煙花!!

睇埋放煙花, 於是拿拿臨立即去space mountain, 因為係巡遊之前拎左張fast pass, 睇完巡遊&煙花, 岩岩好就去玩, GOOD 晒!! 玩完之後, 路經鬼屋個邊, 聽到d工作人員話如果依家去排隊, 大約需要個半鐘既時間先排到你, 嘩, 好彩我地一早玩左姐, 如果唔係真係有排等!! 我地最後都玩到岩岩好11點迪迪尼關門先走!!

生日大典

開心時刻開始啦!!
我既全年通行證 + 生日章
迪迪尼工作人員係掃地期間, 用枯葉砌左個米奇老鼠個logo出黎!!

上星期918乃本人生日, Anna早在成個月前已經提議係我生日正日個時去迪迪尼慶祝我生日, 仲話到時會買全年通行證, 咁遲D我地得閒就可以去迪迪尼玩啦!! 原先諗住18號當日到迪迪尼門口先買全年通行證, 就係搭緊地鐵去迪迪尼途中, Anna突然拎左份全年通行證送俾我, 原來Anna好有心思, 佢早在前一日已經去左香港站既迪迪尼專櫃買左呢set套票, 特登俾個驚喜我, 哈, 實在太開心啦!!

之後, 我地當然係浩浩蕩蕩咁入去迪迪尼啦, 其實朝早個時臨出門口個突然落好鬼大雨, 仲要有行雷, 幾驚今日開心之旅去唔成, 我驚死仲特登拎把大傘出街, 好彩天公做美, 出左門口之後, 個天都算慢慢放晴, 雖然係有少少熱, 不過起碼唔駛怕落雨呀!! 好啦, 講返今次生日之旅先, 原來買左全年通行證既話, 首次使用既時候, 要係入閘機個度用手指模黎確認身份, 咁以後即使有人執到你個張通行證都用唔到啦!!
合手恭喜~~
再黎攬頭攬頸!!

既然係我生日正日黎到迪迪尼就當然要去拎返個生日章出去威威啦, (只要你係正日生日到迪迪尼玩, 只要出示証明你係當日生日, 迪迪尼就會送你一個生日章, 只要你扣住呢個章係迪迪尼入面玩, 入面既工作人只就會同你講生日快樂, 當然啦, 其他既迪迪尼主角都會同你打招呼祝你生日快樂)!! 拎完生日章之後, 咁岩隔離就有隻唐老鴨同人影緊相, 我地見人少少咪立即上去排隊影相羅, 哈, 到我地影相個時, 唐老鴨見到我個生日章就立即彈後幾步, 即刻向我合手作恭喜手勢, 又大大力攬實我, 真係好攪笑, 不過後尾自己諗諗下, 其實套唐老鴨衫入面o個個人應該係麻甩佬黎架, 點解我俾個麻甩佬攬住仲可以咁開心!!

好景不常, 就係同唐老鴨影完相之後, 發現自己部相機居然冇電, 枉我一世聰明, 我明明已經係前日, 特登過晒D相入電腦, 而且再差爆電, 點知天意弄人, 居然突然間冇電, 幸好呢個世界上有手機就等於有相機, 雖然同相機影出黎既相係就差咁d, 不過總算係聊勝於無!! 收拾心情, 再一次出發玩羅, 由於當日係閒日既關係, 基本上都唔係特別多人, 所以呢我地就可以好快咁玩左幾款機動遊戲, 仲係講緊完全係唔駛排隊個隻喎, 一行入去就有得玩, 又唔駛拎定d fastpass, 完全超good, 平日去果然係有平日去既好處!! 話咁快就玩完"明日世界"個幾款遊戲!! 其中有個係同"史迪仔傾計"既遊戲, 我不嬲都幾欣賞佢既工作人員既即時反應, 如果大家都玩過都知佢會係同現場既人傾下計, 講下笑, 今次我同Anna入去, Anna有幸可以同佢做到傾計對象, 哈, 個史迪仔居然當住咁多人面前話佢愛Anna, 仲叫Anna飛左我, 真係好好笑!!

小小世界, 其實入面都幾光下, 不過我部相(手)機都係影唔到!!
腸仔三文魚撈麵~~
三文治+蛋x2+馬仔

玩完之後, 我地就去"小小世界", 上次黎個時都仲未開, 依家開左, 就當然要去昅一昅啦!! 第一次黎小小世界, 原來係坐係個船仔度睇下全世界既特色風景, 加上去到不同既國家就播用返當地既語言唱返首"世界真細小", 即係去到泰國就會聽到泰文版既"世界真細小", 都幾得意下, 不過聽Anna講, 佢之前去過法國個迪迪尼, 佢話對比香港既"航程"就會短左少少!!! 玩完肚餓係時候食lunch, 今次我就自己準備左兩盒午餐盒, 係朝早起身prepare, 咁就唔駛係入面食埋d貴又唔好食既野啦!!

巡遊~~
High school表演~~

之後再睇下巡遊呀, 再睇埋獅子王, 再出黎睇埋另一個high school既跳舞表演, 之後, 我地就去迪迪尼酒店食飯餐啦, 今次就book左迪迪尼酒店既"翠樂庭"度食buffle, 由於之前睇過openrice話係呢間餐廳食buffle, 會時不時有d迪迪尼主角出黎同大家影下, 所以就係成個月前book定, (因為之前有人話呢度d位都幾難book, 所以就早少少book定!!)

好多野食下~~

呢度d野食種類好多下, 基本上行5, 6轉先可以試得晒所有食物!! 而且d食物源源不絕咁供應, 魚生又keep住出!! 真係幾好, 甜品款式就相對弱左少少, 不過有(黑,白)朱古力噴泉, 又有軟雪榚機俾人玩都算係幾好, 今次食buffle, 由於係有全年通行證既關係, 所以係有8折優惠, 不過埋單都要幾7舊水(兩位), 不過野食多, 又有迪迪尼主角出黎同你影相都幾係唔錯, 幾好!! 講開d迪迪尼出黎同你影相, 其實隨後佢地仲有個攝影師係後面, 佢地會用佢地既專業相機同你地又影返幾張相, 之後就會print返set靚靚既相出黎俾你, 如果你有興趣就可以幫襯佢買, 當然啦, 價錢都唔平啦, 好似都要成$120 - 5"x 7"既相, 又或者係$150/兩個有相既鎖匙扣!! 當然, 難得黎到, Anna就話買返個返去!!

就係咁盡情日開心玩完一整日, 多謝Anna俾我既驚喜及各樣既安排, 好開心!! 我會同史迪仔一樣對妳咁好, 仲係過之而冇不及!! 黎緊我地仲要去迪迪尼萬聖節夜場, yeah!!!