生活每一天

每日朝早, 基本上一早房門都會見到呢個情景, 大不良就係度默緊書(因為一個星期就起碼要默中文&英文), 而眼訓既小不良就著晒校服之後, 因為頂唔住睡魔急call攤左係sofa度繼續小睡片刻!!!

成長的代價

兩隻牙都冇晒!!!

小不良是也!!

好似好耐冇提過大小不良, 大既返緊小1, 細既返緊低B1, 大不良家陣考試中, 成日都埋頭苦幹咁係個廳度溫習溫習再溫習!! 岩岩星期日, 大B係屋企溫習過度, 於是小休一會, 唔知係咪溫習溫得太耐, 成個人都癲癲傻傻, 佢冇啦啦係個廳度自娛跳黎跳去, 由於佢自己著住對毛毛鞋, 本身毛毛鞋鞋底都係滑dodo, 大B一個唔小心成個人向前一仆, 由於佢本身係插住個袋黎跳, 一失重心, 當然係頭先落地啦, 其中一隻門牙頓時飛脫出黎, 唔駛講佢當然係即刻喊到拆天咁啦, 再細心望清楚, 原來佢另一隻門牙都係度吊吊fig當中, 可想而知真係幾痛下!!

其實本身佢個兩隻門牙都係處於換牙狀態中, 今天意外順手同佢一次過剝晒個兩隻牙, 唔駛煩!!

工作時工作, 遊戲時遊戲

兩隻野就埋頭苦幹係度打機, 我就.....係度做野!!唉!!!

上星期三, 正正括起8號風球, 突然多左個假期, 咁岩第二日又有個presentation要做, 多日假, 多d時間準備, 真係天助我也!! 雖然說話係咁講, 但係凡事都係有d阻滯, 一心諗住起身休息一陣就開工做野, 個兩隻大不不良一句"唔該"都冇, 兩隻野"把"一聲已經衝左入我間房, 玩左一陣之後, 就拎起部NDS坐係我張床就係咁打, 可憐既我就唯有望住佢地打機, 自己就只好望住疊notes係度做powerpoint!!

星期六的我

就係咁, 俾小不良霸左張床訓啦!!
訓左冇耐, 又爬起身, 拎埋d公仔入黎叫我同佢玩~~

之前講過, 逢星期六想訓晏d都冇咩可能, 成日都係8點半左右就俾人噪醒, 今個星期六如是, 老媽帶小不良返學之後(上校車)就返黎, 小不良一返到屋企就即刻打開我房門就爬上我張床叫我起身!! 唉, 難得星期六都冇得訓多陣, 真係慘不忍睹!!!

大小不良近照

好似好耐冇post過佢兩隻野d相出黎, 大不良就肥左好多, 大家睇相都望到, 佢成個肚腩都突左出黎, 雖然佢逢星期日都會去學芭蕾舞做運動, 咪就係一星期先做個一次運動羅, 家陣咪就變左肥妹仔咁, 依家佢媽媽(即我家姐)成日同佢講, 你有冇見佢靚女係咁肥架!! 唉, 咁細個就教佢d咁既野, 遲d攪到佢有厭食症就知死!!

小不良冇咩特別啦, 不過就成鬼日都扭計, 有事冇事都扭一餐, 所以就成日俾老媽打鍋甘既佢!! 可能成日同大不良一唱一和, 所以佢家陣講野都算係幾流利!!! 黎緊佢就快上幼稚園, 老媽就應該會輕鬆好多啦!!

我的床呀!!

眨下眼就俾人攻佔左啦!!

我的兩位好甥女, 每逢星期六都會晨早流流噪醒我, 俾我訓多陣都唔得!! 正如上面個張相一樣, 大家都有眼睇到, 只要個朝我一起身走去刷牙洗面, 轉個頭返房就會見到自己張床就會變成咁既樣, 什麼圖書, 公仔, 煮飯仔玩具.........統統都已經霸佔左我張床, 想攤返床恰多陣都唔得!!! 佢地就玩得過癮, 最慘就係星期六我都要陪佢地都樣咁早起身先訓呀麻!!

講開又講, 唔知係咪凡小朋友都係咁既呢, 平日返學既日子, 要個兩隻野起身簡直係難過登天, 要鍋摌先摌得到佢地起身, 但係一到星期六&日, 佢地就會自自然然, 自動自覺咁起身!! 其實我細個讀小學個時都係咁, 一旦個日唔駛返學, 個朝早就自自然然會好鬼早自己彈左起身, 完全唔會話想訓多陣賴床!! 其實個時都諗過點解, 好可能係一來知道個日唔駛返學, 兩來星期六&日既朝早都會有好多卡通片, 一星期得個一次所以條件反應會自動自覺自己會早d起身都唔定!!

大小不良近況

老媽獨家泡製 - 菊花茶包去消腫!!

好似好耐冇提過呢兩隻野既情況, 其實黎緊大B就會升上小一, 岩岩上星期六原先係小一派位公佈結果, 不過就咁岩就撞正黑雨, 要順延到星期日先放榜, 好好彩, 總算係入到第一志願!! 都o.k啦!! 早幾日, 唔知大不良攪乜鬼, 左眼冇啦啦生左粒大瘡, 得返半隻眼睇到野, 嚇到老媽立即同佢睇醫生, 點知個醫生講d野仲離譜, 嚇到老媽一身汗, 當然最後就再轉去睇第二個醫生啦!! 依家總算係慢慢消左腫!!

好啦, 講完大不良就要講下小不良, 黎緊9月佢就會讀幼稚園低班, 讀既, 當然係跟返佢家姐一樣"又一村幼稚園"啦!! 兩隻野都算係返晒學, 老媽總算係可以休息下羅!!

老媽生日

人材濟濟~~~賀生日

小不良與表妹是也~~

上星期五為老媽提前慶祝生日, 於之前同友人們吃過晚飯的北京酒樓可一次食飯!! 由於北京酒樓的位置與什麼"豔x花夜總會"同一入口, 其他親戚到樓下時, 都先再三打電話俾我, 問清楚間酒樓係邊, 廢事到行錯d咩地方就唔好啦!! 哈, 真係冇辦法, 食好野就唯有行下d特別地方, 呢d真係正宗"柳暗花明又一村"~~~

係坐低食飯之前, 有小插曲發生左, 原先都知呢度多人, 所以都已經一早打電話黎book位, 去到酒樓之後, 佢居然同我講話冇我個booking record, 哎呀, 我明明已經係星期一打左黎book位, 點會冇呢!! 家陣我約晒成班親朋戚友黎食飯, 家陣唔係玩野呀!! 好彩, 我同佢講左一輪之後, 佢都馬上執到個位俾我食, 如果唔係就真係掃興!! (事後食完飯走左之後, 酒樓打返俾我, 話佢地將我個booking mark錯左係17號唔係7號!!!)

由於我地全部夾埋有大有細都16個人, 一張枱坐唔晒既情況下, 唯有分開兩張枱坐!! 由於分開左兩張枱, 兩張枱人數又不大同, 一邊10個, 一邊6個, 唯有叫不同既套餐各自食(套餐叫好似係抵d)!! 感謝各位親朋戚友到場賞面食飯~~ 飽飽~~~

First Show

最左手面就係大不良啦!!

成班小朋友走黎走去, 幾得意下!!

跳完之後, 係後台有禮物派!!

女仔天生就係鍾意擺post, 呢d係天性!!

家陣d小朋友, 細細個已經要學好多野, 我識得個小朋友, 細細個已經學游水, 空手道兼英文, 實行多方面發展!!! 我屋企個大不良當然唔執輸啦, 點都要去學下野先得, 家陣佢逢星期日都會去琴行學芭蕾舞!! 琴日, 大不良於將軍澳中心首次進行公開表演, 平日係屋企叫佢撚兩手芭蕾舞黎睇下, 佢都死都唔肯, 但係琴日係商場見佢同成班小朋友一齊跳個時, 又跳得頭頭是道喎!!

不過, 琴日眼見大不良本身都有少少肉地(略肥!!), 著起件芭蕾舞衫都o都左個肚腩仔出黎, 正宗baby fat, 都係時候叫佢唔好食咁多野先得, 唔係佢實變大肥妹!!

藥煲

枱面d藥都係佢地!!! 真誇張~~~

呢幾日天氣轉變得幾大下, 再加上上星期日因為大不良生日既關係, 去左迪迪尼玩左一日慶祝, 從而感染到風寒, 前晚兩位大小不良終於頂唔順要一齊去睇醫生!! 前晚一返屋企就見到係枱面一袋二袋, 嘩, 全部都係藥黎架!! 咁鬼多既, 唔講以為佢地生Cancer, 兩隻野夾埋食咁鬼多藥, 呢一代d小朋友真係誇張, 病兩下就要食咁鬼多藥!!

另, 開頭講過大不良於上星期日去迪迪尼玩, 老媽都有去, 聽老媽講, 佢前前後後已經去過迪迪尼玩過3次啦!! 我真係比較out啦, 除左近日因為工作關係, 坐車入去愉景灣時路經迪迪尼門面之外, 真係一次都未去過, 不過都係算罷, 家陣香港的迪迪尼咁鬼死細, 都係等佢擴大左之後先去啦!!! (果然吃不到的葡萄是酸的~~~)

每個星期六的早上

好慘 T_T !! 每個星期六既一朝早, 基本上都會俾個兩隻大小不良嘈醒, 有時即時我關上房門訓覺, 只要佢地一起身就會立即跑黎我間房拍門, 之後就用好哀怨既聲音, 即係好似個d被人拋棄既貓仔咁叫:『舅父, 起身啦! 舅父, 起身啦!!』唔理佢咩, 佢就照拍, 再唔理佢咩, 佢就自己開門, 爬上我張床度, 就係咁每個星期六, 我起碼都要同佢地一樣9點左右就起身, 換言之俾平時返工都係訓左1個鐘多d!!! 大好既weekend就被個兩隻大小不良破壞晒, 一個朝早訓得唔好, 之後就冇精神做其他野!!!

兩個地方

就是這裡~~

因為工作關係, 未來的日子會進出一些特別的地方, 今日就去左呢度辦permit手續!! 以後有野好玩啦!! 大開眼界呀!!!

+++++++++++++++++

西貢海鮮街 - 全記!!

魚, 蝦, 蟹樣樣有~

今晚既主角, 佢就著住份禮物出黎, 小不良走性感路線, 露肩的.....hehe

今日小不良生日, 佢既爺爺麻麻夜日就話入西貢食海鮮當同小不良慶祝生日, 有人代我送左份禮物俾小不良, 我又代返小不良講聲多謝先!!!

哈......哈......哈囉喂

近日, 小不良好鍾意做鬼臉, 完全符合Halloween即將來臨, 夠應節!!!

sir滑梯

上星期六, 見老媽係屋企冇野做, 佢平日成日留係屋企照顧個兩隻大小不良, 甚少出去行街, 咁就做下孝順仔同佢 & 大小不良&表妹(佢黎我屋企過一星期暑假)去九龍灣新商場MegaBox行下, 正所謂扶老攜幼就當然係用最方便, 最直接既交通工具去啦, 由屋企搭的士去都係$100有找, 又ok喎!! 其實, 之前都諗住同老媽黎行下, 不過之前岩岩開幕, 多人到呢!! 所以, 今日有機會就同佢地黎行下!! 個小不良唔知係唔係俾佢地縱得多, 成日都唔肯行路, 成日就要我抱, 我差不多抱足成日, 手都差不多就快斷咁濟!!

小不良是也~~後面是老媽!!!

大不良是也~~

係MegaBox每一層都有個主題, 其中9樓就係叫"兒童天地"入面有條滑梯俾d小朋友玩, 大小不良一見到好似癲左咁, 走上走落, 跑黎跑去, 起勢咁玩, 佢地玩左好耐都唔肯走!!

循環再用

早陣子, 無記明珠台力播史力加1, 2集, 由於係第二日係星期一關係, 老媽一早就叫大不良上床訓覺, 大不良係10萬個唔願意之下, 爬左上床, 又係我呢個舅父仔出馬, 其實事情好易解決, 我只要用部DVD錄影機錄起套卡通片, 留返第2日放學返黎咪可以慢慢睇羅, 就係咁, 事情圓滿解決!!!

早兩日, 準時放工6:15p.m左右返到, 望一望電視, 估唔到大不良又拎返之前錄起既史力加再睇一次!! 老媽話, 呢幾日, 日日放學返屋企都會播下岩岩錄起個隻史力加既DVD出黎睇下, 佢話又幾好喎, 連埋d廣告, 慢慢睇, 咁就過左2個鐘!! 哈..咁又幾好喎, 每次如果無記or明珠播下呢d卡通片, 咁就可以慳返d錢, 唔駛去DVD舖頭買碟!! 睇完又睇, 再翻睇~~~

講開史力加, 戲院依家上緊第三集, 基本上冇咩意欲去睇第3集, 因為之前睇第2集個時, 已經悶到有少少抽筋, 其實佢只不過係<<搞乜鬼奪命雜作>>既卡通版!! 係呢套卡通片入面我比較鍾意"驢友"呢個角色, 我諗主要原因係因為由張衛健配音既關係, 令到呢個角色更加突出, 鮮明~~

下星期已經約左人去睇"Harry Porter - 5", so great, Jessica快d去買飛呀~~~~

力有不逮

小不良是也~~~

話說小不良平日係飲好少既水, 所以身體水份就相對都比較少, 需則知道平日痾便便, 係需要水份既幫助, 排便先會暢通!! 由於缺乏水份既關係, 小不良佢既便便都相對地硬 & 乾!! 聽老媽講呢幾日小不良已經冇排毒, 家陣成日都放屁屁, 咁就証明佢應該有好多既廢物囤積係體內!! 所以今晚老媽就捉住小不良進行"清腸大行動"~~~

老媽一手就捉住小不良, 將佢大腿一開, 好明顯係佢個"門口"已經隱約見到便便既存在, 可能舊便便真係太硬, 再加上幾日冇排毒, 要佢一下子將舊超大既便便釋放出黎都唔係一件易事!! 我只係見到佢喊住口係到大叫:『唔好呀..........唔好呀......冇呀......冇呀!!!!』就知佢係幾咁辛苦, 唔講真係以為佢係去生仔!!! 大家唔好以為, 我係側邊就可以袖手旁觀, 老媽叫我拎起張紙巾, 提起我無比既勇氣, 伸手去幫佢係門口既囤積物挖出黎, 大家試想想, 一個小如一亳子既門口, 要排放半條冰條咁大既便便, 係何其令人慘不忍睹!!!

唉!!! 我呢個做舅父既都算唔話得, 係食飯之後, 仲要攪埋d咁既野!!! 幸好, 晚餐d飯餸一早落晒格, 唔係佢排毒時, 我都一齊排~~~

milk, milk, milk

兩隻野各據一方~~

好似好耐冇提過大小不良!!! 等我講下佢兩個既生活習慣!! 基本上平日佢兩隻野臨訓前, 就算個晚既晚餐食到好飽都好, 佢兩隻野點都要嘆返支奶先可以訓得著!! 我冇講錯, 你冇聽錯~~ 大不良已經到左幼稚園中班, 到家為止都仲要用奶樽飲奶!!! 細個隻都已經去到歲半啦, 其實都應該係時候介奶!! 你睇佢兩個訓係sofa度個時, 好似成個道友咁食緊鴉片嘆緊世界咁款, 爽呀, ~~~

仲有, 話說早排, 復活節其間家姐 & 家夫同佢兩隻野跟團去左上海玩, 唉, 家陣d小朋友真係幸福, 舊時我都好似去到中三先有機會搭飛機, 仲要係用自己儲左好多年既利是錢去架!!!

撞鬼羅, 諗下諗下, 原來, 復活節期間, 我係香港冇人冇物架, 老媽同人返左大陸玩, 家姐佢地又舉家去左跟團旅行, 好在我冇事冇幹姐, 如果唔係一條友係屋企有咩事, 死左都冇人知! 一條友係屋企又冇人理, 好慘, 好可憐呀~~~ 我諗係時間睇下係唔係需要申請"平安鐘"!!! 唉!!!

人日 - 團拜 - 逗利是

前排新年"人日"o個時, 成個Big Family(都成廿幾人架!!)去左酒店食buffle順道團拜, 我地呢d做細既當然係想逗返封利是啦!! 好似好耐冇提過屋企個兩隻大小大良既狀況俾大家知, 當日就同佢兩隻野影左唔少相(唔係我影, 係我家姐影), 整兩張相俾大家睇下佢地家陣變左咩樣!!!

自從小不良曉行曉走之後, 成日見佢拖住肚腩仔四圍走~~(呢張相正面影唔覺有肚腩, 不過打側佢個人, 就知佢個肚腩有番咁上下份量)

呢個就係得閒無事病一病既大不良, 佢近排好似好返dd~~

呢個小不良, 家陣除左識叫:『媽咪!!』呢兩粒字之外, 其他咩都唔識講, 痾屎又係叫『媽咪!!』, 飲milk又係叫『媽咪!!』, 仆親又係叫『媽咪!!』, 見到我都係叫『媽咪!!』總之佢有理冇理都係叫左『媽咪!!』先~~

攪攪震

唔好以為佢怕羞面紅, 查實係天氣乾燥, 佢皮膚爆拆至真~~

去完黃金就返屋企, 一入屋, 全屋黑晒(當時9:30p.m左右), 如無意外都係老媽係時候迫大小不良訓覺, 因為大不良朝朝都要成7:15a.m左右起身(仲早過我), 因為朝早又要同佢換校服又要紮辮, 攪完佢又要攪小不良, 所以唔早d訓, 兩隻野第2日實唔願起身。 過左一陣聽聲, 大不良就應該訓著左, 老媽見小不良仲未訓得著, 於是就抱埋佢出黎, 事關老媽平日有追開亞記既"義無反顧", 聽佢講今個星期大結局, 幾大都要追。


小不良佢兩三下手勢就由小sofa跳左上去大sofa, 大sofa坐著者, 正是老媽~~

之後, 老媽就坐定定睇電視, 坐唔定既小不良就成晚係度走黎走去, 冇時停~~


玩到冇野好玩既小不良, 就開始玩埋佢如廁既道具~~ 最終, 照頭笠(唔駛驚, 佢個頭仲細, 未塞得住個口)

10:30p.m電視劇做完, 老媽捉埋小不良一齊入房訓, 我終於可以獨佔部電視機啦!!!

行行重行行

今朝起身, 一望出房門就見到有隻野飛奔閃過, 哈, 原來小不良已經唔駛再四腳爬爬, 曉得用兩隻腳自己四圍走, 聽老媽講原來小不良係岩岩今個星期初先學識雙腳行路, 不過, 可能呢排我都留係office or返左學校, 太夜返屋企, 返黎個時佢地都訓晒覺, 所以先唔知姐。

今日, 見小不良行路個時, 左搖右擺成個醉酒佬咁, 行個時兩隻手仔又要撐開, 我諗佢主要係想好似行平衡木咁balance返自己。起身打開房門之後, 佢話咁快就入左黎我間房度, 攪左兩攪見冇野玩, 佢自己就走返出個廳度~~~