故地重遊

蘇屋村 - 係我住左接近25年既地方!! 上星期六, 因為一位老鄰居黎我屋企作探訪時, 話自己屋企部電視機壞左-有畫冇聲, 所以就順道跟佢返去望下有冇整!!!

自從早兩年搬左去新居之後, 自己都好耐冇返過黎呢個地方, 呢個應該有接近50年歷史既屋村係不久既將來就會拆卸!! 今次難得返黎就影返兩張相作為記念~~

唔好睇少呢個蘇屋村呀, 呢度可以話係靜中帶旺, 係一個好好既地方, 而且我住個座樓, 仲可以睇到維港放煙花架!! 之前, 睇報紙個時都話蘇屋村如果拆左之後, 放返出黎俾d Developer出黎起樓的話, 呢求分分鐘變地王!!

溫暖

感動的是在寒風中送上多一份既溫暖；
感動的是不分晝夜的趕製；
感動的是突如其來的驚喜；
感動的是細心的挑選柔軟的材料；
感動的是內裡背後的心意及心思；
被妳感動的是------我^ ^

蔡魏聯婚

出門口時, 個天仲係黑麻麻~~

出左地鐵站後, 嘩, 天光啦!!

岩岩的星期日為小燕子的大好日子, 眾姐妹們(包括本人, wahhahaha!!)晨早流流就要出門口, 唔係講笑, 我個朝早5:45a.m就起左身, 天都未光!!!我彈起身個下, 我用左2,3秒時間諗一下, 究竟我係唔係真係要咁早起身出門口, 幸好我既理性係呢個刻話我知 :『你再唔起身, 你一定仆x, 肯定遲大到!! 』於是, 我終於以為我要突破呢個嚴寒衝入去洗手間梳洗, 好彩, 洗完面之後成個人都算醒神晒!!!

6:15a.m出門口, 唔講以為係夜晚, 實際已經朝頭早, 原來, 6:15a.m呢個時間都已經有唔少人上班, 查實佢地係要做咩既呢, 點解要晨早流流出門口返工呢?? 小燕子book左Habour Plaza酒店作為接新娘子的地方, 我地姐妹們就要一早過對面海會合(全部都係九龍人)! 我一出地鐵口, 嘩, 天都光齊!! 拿拿臨, 搵埋Lingling佢地食大家樂食埋早餐上去酒店做perparation!!

新娘子化妝中!!

閹人攪攪震中~~~

轉眼間, 靚靚新娘子都化好妝!!!

上到酒店, 姐妹們就要化妝扮靚靚, 我呢d閹人唔駛化妝set頭, 準備"玩弄新郎哥"遊戲道具既工作就當然係包係我身上啦!! 姐妹眾多, 化妝set頭時間都用多左, 再加上攝影師要先上黎酒店為新娘子攝返幾相靚靚相!! 故此將原定既run-down時間都推遲晒, 不過話雖如此, 玩新郎既節目都不能馬虎了事 - 照玩是也!!

型爆的街頭舞獅!

笠絲襪係必玩既環節!!!
順利接到新娘子啦!!

一開始就要新郎哥及眾兄弟舞獅上去酒店, 話晒都係酒店, 沿途當然引得一班外國遊客駐足圍觀及影相, 難得新郎哥及一班兄弟出行力舞獅!! 勁!! 上到房, 雖然遊戲照玩, 但係原定run-down已經遲左, 為免一遲再遲, 所有遊戲都化為簡單版, 希望係呢d位追返d時間出黎!! 哈, 當然新郎哥亦順利接到新娘子啦!!

女家完成, 就要去男家, 不過由於實在太多兄弟姐妹親友既關係, 我同其他兄弟都冇地方企, 唯有走左出去偏廳(電梯走廊)企企!! 新郎新娘奉完茶, 我地兄弟姐妹就落左去酒樓食lunch, 時間都已經2:00p.m!! 好客的新郎哥爸爸, 叫左好多餸呀, 款款都好好味, 仲有條魚(應該係星斑), 好大條呀!!! 真係多謝uncle既招呼, 感謝!!

新娘子 & 新郎哥都換上另一套衫!!!

食飽飽就去另一個地方 - 香港公園是也!! 去香港公園當然係影相啦!! 今次新郎哥著左套好有型既衫出場, 勁呀!!! 不過由於之前d時間實在遲左好多, 所以影得唔得太多相就要去酒樓!!

好靚的場景佈置~~~

今晚蔡魏聯婚宴開29席, 場面之大, 何其壯觀, 由於酒樓的新娘房位於酒樓的頭同尾, 所以作成跑腿既我成晚時不時都要兩邊走, 唔係講笑, 都幾攰下!! 不過, 我個d都唔算得d咩啦, 都係一班姐妹同埋新娘子辛苦, 個個都著住對高跟鞋走黎走去!!

29席 - 唔係一個小數目, 係咁e講一講, 新娘哥同新娘子差不多要同300幾人影相, 雖然唔係要遂個影, 但係都要影好多張相先影得完, 人地一場黎到又冇理由唔同人影, 真係多d黎就密d手!!

出場了!!!
感動是也!!

影左一大輪, 終於到左律師見證簽署結婚儀式! 簽署完就切蛋糕, 祝酒等! 第一個感動位出現, 由新郎及新娘子向自己既父母講返兩句說話, 新郎哥講左兩句之後, 都忍唔住滴左幾滴淚出黎, 感謝父母如何養育, 雖然我望唔到新郎哥的父母親, 但我諗佢地都應該開心到喊!!不過, 新郎哥母親向佢祝福個時講左句好攪笑:『估唔到個傻仔都娶到個咁靚既老婆!!!』感性既新娘子更加不在話下, 都係喊到巴巴聲啦!!

已經流緊眼淚啦~~~

成晚既高潮既都係"超感動"位所在, 就係新郎哥俾左一個好有誠意既驚喜俾新娘子!!!

首先MC將新娘子蒙起雙眼並且請佢坐係大堂中間, 就係呢個時候, 新郎哥就慢慢咁出場行到新娘子既側邊, 慢慢咁用saxophone演奏出王力宏的"Forever Love", 原來新郎哥用左短短一個月既時間秘密苦練saxophone演奏"Forever Love", 最重要係佢本身係完全係唔識吹saxophone!!

佢真係單單靠一個月既有限時間學習+苦練, 雖然出黎效果係有少少斷斷續續, 但係個一刻一切都唔重要, 因為新娘子聽到saxophone聲之後, 慢慢咁將自己既蒙眼布放落黎, 見到新郎哥已經企係佢側邊, 正演奏"Forever Love"個時, 簡直係淚如泉湧!!! 感動到(死羅, 我打打下blog都有少少眼濕濕添!!)........ 新娘子聽完首歌之後, 都向新郎哥講左一句好sweet既一句說話:『爺!! 都叫左你今日唔好成日整喊我架啦!!!』話雖如此, 哈, 呢d喊位, 小燕子都不知幾恨要多幾個!!! 又或者咁講, 好多其他既新娘子都不知幾羨慕妳有呢d咁既喊位!!

除此之外, 一班兄弟用DV幫新郎哥拍低佢苦練saxophone既過程, 仲播埋出黎俾大家睇, 段片仲要有好多個景點, 由夜晚既街頭, 到天橋, 甚至樓下既公園都有, 總係見到新郎哥拎住支saxophone練習!! 攪笑得黎, 見到佢既誠意, so cool!!!!

黎到呢度, 其實都已經去到尾聲!!!

最後, 再一次祝福William & Jackie白頭到老, 永結同心!!! 仲有, 仲有, 新年派利是呀!!!

牛, 牛, 牛

上星期五, 校友余弟兄生日, 一眾好友當然義不容辭為佢慶生啦!! 今次由Jessica發板提議去"盛八", "盛八"是一間日式烤肉店, 其出名主食和牛, 當然除左牛肉之外, 仲顧及到唔食牛肉既朋友, 都有雞肉 & 豬肉既選擇, 不過, 係Menu入面接近8成既食物都係以牛肉為主角啦!!

環境暗暗的~~不過, 唔多油煙!!!

趁朋友未到齊, Jessica就叫左個沙律食住等, 個沙律都係一堆菜啦, 不過, 佢個sourse就好好味, 亦都好特別! 朋友們都陸續到齊, 就開始叫野食, 基本上我地一行9人, 叫左幾多野下, 貴就唔係好貴, 大約約$60-70一碟左右, 不過, 佢個d份量感覺上好似少左d, 好似得6-7片左右, 諗諗下一塊咁既野圍埋都要成$10 /塊, cool!!!!

咪就係得個幾塊羅~~~

我地最威威叫左個$250既日式和牛(一碟都係6塊左右!), 開頭個時大家都唔知佢咁貴(因為Jessica點菜的!!), 呢碟和牛一上, 余弟望一望個Menu就大聲叫左一聲:『嘩, 呢塊野, $250架!!! 大家小心d燒呀!!』哈, 於是大家都小心翼翼好好處理呢幾塊貴價牛!!

唔知係唔係我對食物既要求唔高呢, 呢度d野食感覺上都係一般, 冇咩特別, 好好食, 又唔叫得係, 但又未至於唔好食, 頭先個句 - 一般啦!! 不過黎呢度食過, 總算知道咩叫日式烤肉店!! 特別一提, 尖沙咀呢間分店d抽風做得唔錯, 開頭以為會好似韓燒個d煙霧迷漫又怕d大褸會吸到d油煙味, 哦, 原來即使整間舖都坐滿人係度燒烤都唔覺好大煙, 唔錯, 唔錯!!

頭先講左, 碟碟食物都係得個幾塊, 我地邊樹會食得飽呀, 大家諗諗下咁叫都唔係辦法, 再叫起碼叫多幾十碟先夠!! 而咁岩Jaemi講開老麥新出既"椒財板燒牛肉飽"幾好味, 於是就提議不如埋單去老麥食多餐, 平、靘、正!! 以塞飽個肚為大原則, 坐言起行, 於是, 大家拿拿臨執拾行裝轉架部, 轉個彎就到老麥, 再開餐, 個包, 一般啦, 大家可以唔需要特別去試, 因為都唔係特別好味, 簡單一句, 黑椒牛肉飽羅!!
咪講笑, 有相為証, 真係食多餐~~~

"椒財板燒牛肉飽"

食完之後, 大家都各自散水, 余弟兄, 過多幾年就要叫你做余老兄架啦, wahahah, 生日快樂, 仲有, 你份禮物, 快d諗, 唔係我地就cut左你架啦!!

盛八

地點: 尖沙咀亞士厘道23-25號雅士利中心3樓

電話：2366 8866

菜式: 日本菜 (日式西餐廳, 燒烤)

仙藥

琴日講過, 有時d集中力不足既時候, 怎麼辦?? 冇得走去訓覺, 就唯入"對"返罐咖啡提提神, 都唔係講笑, 咖啡呢家野, 係我枱長期都有罐咖啡坐陣, 一旦出現集中力失調既時候, 就會立即開黎飲, 真係萬試萬靈!!! 勁呀!!!

雖然話就話萬試萬靈, 不過有時都唔係好掂(失靈!!!), 死啦, 你睇下我呀, 又做做下野走黎打blog啦, 都係做野先~~~

有精力, 冇集中力

近日唔知咩事, 人就好精神下(都係一時時), 不過, 梗係集中唔到精神!!!

返工個時成日都做做下野, 個人有時會突然間雲遊太空, 唔知飛左去邊, 所以有時一旦集中到精神做野, 就要快快手一口氣做晒去, 如果唔係, 真係唔知幾時個人先可以回返魂!!! 有"集中力"做野, 同冇"集中力"做野個feel真係唔同d架!!! 成個人都會積極起黎, 有問題個腦都可以轉得好快咁解決到!!!

究竟發生咩事呢???

我要做model

攝影師正示範動作俾model睇, 如何示演動感~~~

話說, 上星期友伴的好好好好朋友結婚, 友伴順理成章做埋伴娘, 做得伴娘自然有件伴娘衫架啦, 友伴見租左套伴娘衫用得唔好"晒", 所以就係第2日約埋佢位鍾意攝影既朋友, 同佢影set沙龍!!

星期日, 我地一行4人就由攝影師帶領, 去左一個唔講唔知, 講左都唔知既好地方影相 - 鯉魚門, 開頭以為鯉魚門真係得海鮮食姐, 原來再左轉右轉入到去之後, 又發現一個新景象, 個度環境尚算優美, 一大篇空地, 再加上幾座廢置左既屋仔, 最重要既係冇咩人去, 成個地方我地玩晒!!

正式開始, 當日我既工作, 除左係model既媬姆之外, 同時要兼任拎住塊反光板"打燈"!! Model既工作就係不斷擺post, 笑, 笑, 笑.......哈, 唔係講笑, 查實就咁淨係睇住佢不斷咁做呢動作, 擺post, 都真係有d攰!!! 唔覺唔覺, 影影下都影左3個鐘都有! 嘩, 影完之後, 返屋企先發覺原來成日都暴曬係陽光底下, 不自覺咁塊面同對手都曬傷左~~~ 依家個鼻有少少甩皮!!!

攪一大輪

黎緊個星期日, 小燕子Jackie終於嫁得出, 我地一班姐妹傳統上係個朝早新郎接新娘既時候, 少不免都要玩下d遊戲, 繼上年小狗結婚"愛的宣言"由本人親自度出黎之外, 今年, 再一次encore由本人度橋!

哈, 人大了老啦, 一下子d急材迫唔到出黎, 幸好有奶奶同主人家幫手! 上星期, 運用資訊發達既互聯網作溝通既橋樑, 我地三條友係office hour既時候, 不斷咁各自作完一段就send e-mail俾大家, 等大家comment, comment又再修改, 修改完再comment, comment完又再修改................重重復復, 幾日之間, 大家互send左最少20-30封e_mail, 幸好最後終於定到副愛的宣言對聯出黎, 仲有奶奶特別搵人製作左一副特別版version俾jackie(上圖)!!! 當然啦, 正式當日, 唔會用特別版出黎~~~~~

我真係咁攪笑咩???

唔知係唔係我個人真係咁似曉攪笑呢, 成日都有人冇神神突然間彈一句同我講:『喂, 講個笑話黎聽下呀!!!』, 前日同琴日都有不同既人用一個語氣黎同我講左同一句野!

前日係Lunch既時候, 同同學仔們一齊食飯, 食食下飯, 突然間Mandy講:『Gary, 講個笑話黎聽下呀!!』

到左琴晚, 與友伴傾電話途中, 友伴又突然講:『講個笑話黎聽下呀!!』

其實係我記憶中, 都唔係第一次有人咁同我講呢句說話, 曾幾何時, 有d朋友無聊打黎搵我吹水(佢地通常都係等緊車又或者坐緊車冇野做, 搵人kill time), 有時都會第一句打黎又係講呢句!! 但係又唔知點解, 有時本人腦筋轉得快, 又有貨交喎, 當然啦, 有時都會因為呢句而dead air啦!!

不過, 總括黎講都唔會令人太失望既, 同時感謝各朋友, 咁睇得起我, 如果我真係可以為大家帶來歡樂, 何樂而不為呢, 身邊的朋友及友伴啊, 我希望你們都可以開開心心生活的啊, 如果有咩唔開心, 隨時搵我啦!! 我會時不時都儲定d貨等你地架, whhahahahaha!!!

昆蟲大格鬥

日本仔無其不有, 真係咩都玩一餐, 岩岩上網睇到個web-site, 日本仔將d不同既昆蟲放入一個透明玻璃箱入面, 之後就由得佢地打生打死, 螳螂, 蜘蛛, 蜈蚣, 蠍子, 大蜂, 大甲蟲, 草蜢咩野都有, 個感覺好似好耐之前d阿伯爺年代個時玩鬥蟀一樣, 睇開就繼續想埋落去, 睇下邊隻昆蟲可以打贏!!! 真係開始明白, d伯爺點解咁鍾意玩鬥蟀!! 睇落又真係幾好睇!!!

http://www.japanesebugfights.com/rules.htm

睇牙醫, 有錢賺

話說本人之工作福利之一就係可以免費去睇牙醫, 於是book今日去睇牙啦!!

講開睇牙醫, 我記得對上個次已經係係大學讀書既時候, 大大話話都已經係6年前既事, 再再對上一次睇, 應該要數到去小學既牙科保健!!! wahahhahaha~~~ 真係好耐都唔睇一次啦, 即使生左智慧齒, 見唔痛, 都費事走去睇牙醫!!

原先想book其他就腳d既醫院既, 不過其他方便d既醫院已經排期排到差不多需要大半年之後(嘩, 做牙醫真係好, 真係咁多人去睇個喎!!!), 而呢間就只需2個月時間就有得睇, 所以就快快book左葵涌醫院呢間!!! 其實book落左之後, 又開始有少少驚, 冇咩人book, 會唔會係呢度d人有問題, 又或者有d野先冇咩人book~~ 唉, 既然都book左, 只好"既來之, 則安之!!!"

今朝晨早流流起身梳洗完(查實都已經係9:00 a.m)就出發去葵涌醫院, 好彩係booking時間前去到(book左9:45a.m), 時間岩岩好!! 成間牙科珍所, 真係冇其他病人等緊, 唔係真係咁恐怖呀!!! 護士姑娘叫我入去, 幸好, 醫生都好nice, 首先, 幫我initial checking, 之後就好似同d小朋友口吻講野同我講:『d牙都刷得唔錯, 但係其實可以仲好d, 刷牙個時...............』於是佢就三言兩語, 好清楚簡單地解釋如何正確刷牙!!

真係咩人都冇架!!!

牙醫話見我第一次去睇牙, 就順手幫我做一次X-ray, 過程亦十分好笑, 話說, 原來牙醫間房除左係睇牙之外, 同時都係一個小型既X光室, 當佢叩我坐定定個時, 聽到佢同個護士講;『出去出去!!!』, 就見到佢兩條友雞咁腳走左出房, 出去之後仲要關埋房門!!

醫生房是也!!

於是, 就開始洗牙步驟, 係佢洗牙既同時, 又同我講我隻智慧齒頂住左其他d牙, 問我剝唔剝, 好明顯係洗緊牙個一刻我就冇咩可能講到野, 如是佢就一路同我洗牙, 就一路同我解釋, 剝又有咩好處, 唔剝又有咩唔好處!! 洗完牙之後, 我終於可以講到野, 佢就問我考慮成點, 我就只係問左一句:『剝一隻要幾多錢架???』, 佢話:『唔駛錢!!!』, wahahhahahah, 我諗都唔駛諗就同佢講:『好, 剝晒佢呀, 唔該!!!』

Hehe, 就係咁, 我就book左黎緊3月去剝我既智慧齒啦, wahahahhaha!!! 發達, 唔晒俾錢剝牙, 仲要剝智慧齒, 賺左!! (O.K, 我係咁婆仔架啦!!! 不過, 話晒呢d係錢黎架麻, 用呢舊錢去旅行都不知幾爽呀!!)

公司窗外環境

這就是公司窗外的環境, 當然唔係自己個位對住既窗口位咁爽啦!!! 不過, 呢d就係所謂既靜中帶旺!!!

一路帶動生活(再追加)

有讀者要求要part3, 一向盡聽讀者意見既我, 當然冇問題啦, 立即再去搵俾大家!!! 爆笑香港人, 自上次加埋上上次之後, 其實keep住仲有人不斷咁upload新野上去, 依家個fourm仲已經去到part2, 香港乃創意工業, 真係唔講得笑呀!!

以下內容涉及不雅用語, 敬請留意:

1.) 良景
　太子
荃灣西
　　恆安
　　博覽館
　　調景嶺

2.) 青衣
　牛頭角
　灣仔
　　九龍
　　恆安　　
　　上環
烏溪沙
尖沙咀
　第一城
　　黃大仙
　　九龍
　天后 　　
元朗
　　中環
　友愛
　荔枝角　
　　調景嶺
落馬洲
　柴灣
　　佐敦

3.) 又一城
　　青松
　　　調景嶺
　　　元朗
　　　沙田
　　　鑽石山
　　　黃大仙
　　　長沙灣
　　葵興
　　天后
　　杏花村
濕地公園
　　太和
　　　洪水橋
　　　金鐘
　　　寶琳
　　羅湖
　　景峰
　西灣河
　　　紅磡
　　　新墟
　　　北角
　　　安定
　　　荃灣
　油麻地
　　兆麟
　　　鐘屋村
　　　欣澳
　　　銅鑼灣