高質素住家菜

計分板是也!!! G - Gary, J- Jessica & Jaemi, T - Thomas, A - Alan, B - Bear
主人家Jaemi~~~

其實都已經係一篇好耐既日誌, 因為又係忙於左溫書, 右睇notes, 前去寫log book, 後去寫case, 真係幾十萬樣野等住去做, 再加上腦筋緩慢, 做起事上黎真係事倍功半!!!

不過, 都要講一講呢一篇日誌先得!!! 話說早早早上上上星期六, 正正為jessica慶生, 原先一早plan左話上去jaemi屋企整野食(當然, 實際上係jaemi整, 我地食啦!!!) Jaemi一早為我地book左佢club house既保齡球場, 先黎一場熱身先去食野, 但係有部份人因事忙未能出席, 所以就得Jessica, Jeami & Tam, Thomas, Bear & Me作大比併, 唔駛講我地呢d運動熱愛份子, 當然係可以輕易勝出啦, 可憐既主人家Jaemi同埋壽星女Jessica完全成為炮灰, 慘敗係我地手上, 一早名言輸者要請其餘勝方食雪糕!!
聖鬥士星矢 ~~~~~~~~
大家興高采烈睇住星矢~!
辛苦晒男主人&女主人, 當然仲有壽星女同場顯技啦!!

打完"保零"就拿拿臨上返屋企, 因為主人家仲有好多野食仲係"烹調中" 如果再唔上去整既話, 分分鐘十點都未有得食呀!!! 不過人多唔一定係好辦事, 知書識禮既我地完全深明呢個道理, 所以一上到屋企之後, 大家都兩話不說坐定定係sofa前面乖乖地睇電視, 由得主人家(阿譚&Jaemi)&壽星女係廚房大顯身手!!
好多野食呀!!

經主人家一輪大作戰之後, 係9:00PM左右既時間終於有得食啦, 大家唔好以為真係一般既家庭住家菜, 講起黎都勁啦, 今餐既食物既美味, 款式程度完全可以比得上坊間一般既餐廳!! 先講一講有d咩食先: 芝士煙肉焗薯皮 o 白汁火腿蘑菇意粉 o 日式咖哩薯仔蔔白配白飯(白飯另上) o 清酒煮蜆 o 清蒸白灼海蝦 o 印尼牛肉串燒(另配秘製醬汁) o 灼時令菜蔬 o 入味鹵水雞中翼!!!
最後, 大家食飽飽之後, 仲走去一齊睇"林海峄 - 是但大合唱"

Wahahahha, 係唔係只係睇呢個食物材單已經覺得好勁呢, 唔止單單睇表面勁, 實際連內裡既味道都確實係一流!!! 最難得既係係最後埋單個時, 原來位位只需要夾$67大元, 嘩, 呢d野, 好明顯真係食功夫, 我地都話架啦, 食咁多野都係$70都唔駛, 真係抵到難, 不過就真係辛苦晒主人家Jaemi & Alan, 除左借個屋企咁樣俾我地反之外, 仲要你地動手動腳整野食俾我地, 真係唔話得呀!!!

齊齊整整

Wahahahaha!!! 上星期四同Jessica係尖沙咀Outbreak慶生, 難得今次蘇生都抽到時間出席, 我諗對上一次齊人都唔知係幾時既時啦!! 我諗大大話話都係年幾前既時, 平時蘇生往往因為工作關係, 時常都要係世界各地四圍走, 加上佢有少少天生放飛機性格,好多時我地d大型活動佢都未必能應邀出席!! 幸而, 岩岩佢就轉左新工, 依家就唔駛周遊列國四圍走, 可以出席到大型活動, so great!!

Outbreak不外乎都係一d American Food, 冇咩特別, 主要係大件頭取勝, 不過, 唔知係唔係家陣d美金疲弱, 連帶d野食size感覺上都好似縮水左!!

當晚, 成班人唔駛講又係嘻嘻哈哈, 講東講西, 暢談一番!!!

今年起各人各有各忙:

- 牛牛&堅, 仲有Jaemi & 阿譚今年年尾就舉行你地既人生大事, 你地黎緊4月就一齊去台灣影相!! 總之, 你地有咩事要幫手, 唔駛客氣隨時出聲, 幫到就盡量幫, 幫唔到都會出力幫!!!

- Jessica今年有兩大事, 今年到你大學畢業, 可以同你影畢業相啦, 仲有既就係六月大旅行, 最緊要係玩得開開心心!!

- 余弟兄, 今年重新返回校園, 努力!!

- 蘇生, 今年轉新工, 新工作新環境, 希望你一切順利!!

各校友, Jessica早前提議5月去海洋公園大鬧一番, 未知各位意下如何, 有時間, 請留言!! 謝!!

Jaemi + 校友開年飯

上星期五, 同Jaemi慶祝生日之餘, 順道為今年校友會舉行開年飯盛典!!! whahahah, Jaemi事前已經講明想今年生日係佐敦既北京酒樓食佢個Birthday宴!!! 我地大家都未去過, 食過呢間酒樓, 開頭個個都係佐敦四圍搵, 原來佢個門口好鬼穩閉, 係同o個d什麼"夜桃花"夜總會同一個入門口, 唔講俾人知既話, 人地以為你上去個d夜總會都唔定呀!!!


成間酒樓d裝修都係幾古色古鄉, 一般老酒家d裝飾格局, 同鳳城酒家差不多~~ 不過, 講鳳城酒家既話, 呢度d位就比較逼d啦, 枱與枱之間既位置基本上都只係剩返好小位置, 簡單一句:逼!! 不過, 咁講啦, 咁大家坐得埋d就可以close d啦!!!

頭盤 - 冷盤雜錦

炒海蜇頭

賽螃蟹xx松魚 - 全名唔記得, 不過炸到成條魚d骨都可以食埋!! 好脆!!

炒蝦仁 - 好多蝦, 同埋d蝦都好鬼大隻下架!!

北京填鴨

講返d野食, 今次活動我地都有8位出席, 而侍應見我地有8位, 就俾左張8-10人食既套餐俾我地, 睇一睇, 個套餐都已經包左我地想食既野(北京填鴨!), 仲好, 唔駛慢慢諗叫咩好, 於是我地就叫左個8-10人既套餐食啦!!! 唔知係唔係套餐關係, 叫完冇耐, d野食都已經好快咁上, 咁都好事關, 大家都遲左黎, order得黎個時已經8:30p.m左右, 餓得很呀!!

頭兩道都係冷盤&小炒, 個雜錦冷盤都幾好味喎, 佢個d雞好滑好入味!!! 而之後個炒海蜇頭就失色左少少, 味道較為淡味, 賣相一般, 成晚幾乎碟碟清, 唯獨呢碟炒海蜇頭仲有剩~~

再黎一道菜就係賽螃蟹, 呢道好足料, 牛牛食完之後話入面真係有蟹肉混左入去, 真係好足料而且都幾大碟下, 食食下諗起, e, 賽螃蟹唔係應該跟飯混埋一齊食既咩, 就係有呢個諗法, 差d令我地跌入左個深淵, 當時我地好聲咁大叫7碗白飯個時,

侍應阿姐大大聲問:『 真 - 係 - 要 - 7 - 碗 - 白 - 飯 ! 食得晒先好喎!!』
我地依然係理直氣壯咁話:『得, 冇問題!! 食得晒!!』
突然間, 有位侍應阿叔話:『你地個套餐入面仲有個北京填鴨, 仲有個炒拉麵喎! 仲有個雲吞雞喎!!』
頂, 俾佢講一講個心當堂虛左一虛, 即刻龜縮, 之後我地轉叫返4碗飯算!!

好彩有呢位醒目侍應提一提, 因為之後我地d野食都好足料, 幾大碟下, 尤其是個d包北京填鴨個d包皮好鬼厚, 食兩, 三塊都已經飽到嘔!! 中間仲有一道菜炒蝦仁, 雖然普通菜式, 不過勝在佢份量十足, 蝦又多又大隻, 正!!

食到中段個時, 有碟小籠包送左上黎, 大家都不以為意, 就食啦, 食完之後, 隔左一陣, 個位侍應叔叔行過黎同我地講: 『今日送左一碟小籠包俾你地!! 頭先上錯左俾你地, 應該係隔離枱, 你地個套餐係冇架!!』wahhaha, 發達, 我地賺左一碟小籠包~~~

上埋個砂鍋雲吞雞之後, 大家都停晒手, 飽到食唔落野, 大家你眼望我眼, 望住碟炒拉麵冇人有意欲去夾!! 除此之外, d北京填鴨就係呢個時候, 我地既救星出現, Jaemi既未來老公 - 阿譚放工過黎食野, 有佢呢個高人出手, 我地即刻放心晒!!


砂鍋雲吞雞 - 好重金華火腿味, 隻雞都好滑!!

拔絲蘋果 - good!!!

最後, Jaemi將本身套餐入面個甜品(高力豆沙)轉做拔絲蘋果, 佢話呢個甜品係呢間酒樓好出名, 果然唔係小野, 平時都係食開拔絲香蕉, 原來拔絲蘋果都有!!

食完之後, 真係個個都飽到上心口!!


北京酒樓
地址: 佐敦彌敦道227號1樓
電話: 2735 1316
菜式: 北京菜

牛, 牛, 牛

上星期五, 校友余弟兄生日, 一眾好友當然義不容辭為佢慶生啦!! 今次由Jessica發板提議去"盛八", "盛八"是一間日式烤肉店, 其出名主食和牛, 當然除左牛肉之外, 仲顧及到唔食牛肉既朋友, 都有雞肉 & 豬肉既選擇, 不過, 係Menu入面接近8成既食物都係以牛肉為主角啦!!

環境暗暗的~~不過, 唔多油煙!!!

趁朋友未到齊, Jessica就叫左個沙律食住等, 個沙律都係一堆菜啦, 不過, 佢個sourse就好好味, 亦都好特別! 朋友們都陸續到齊, 就開始叫野食, 基本上我地一行9人, 叫左幾多野下, 貴就唔係好貴, 大約約$60-70一碟左右, 不過, 佢個d份量感覺上好似少左d, 好似得6-7片左右, 諗諗下一塊咁既野圍埋都要成$10 /塊, cool!!!!

咪就係得個幾塊羅~~~

我地最威威叫左個$250既日式和牛(一碟都係6塊左右!), 開頭個時大家都唔知佢咁貴(因為Jessica點菜的!!), 呢碟和牛一上, 余弟望一望個Menu就大聲叫左一聲:『嘩, 呢塊野, $250架!!! 大家小心d燒呀!!』哈, 於是大家都小心翼翼好好處理呢幾塊貴價牛!!

唔知係唔係我對食物既要求唔高呢, 呢度d野食感覺上都係一般, 冇咩特別, 好好食, 又唔叫得係, 但又未至於唔好食, 頭先個句 - 一般啦!! 不過黎呢度食過, 總算知道咩叫日式烤肉店!! 特別一提, 尖沙咀呢間分店d抽風做得唔錯, 開頭以為會好似韓燒個d煙霧迷漫又怕d大褸會吸到d油煙味, 哦, 原來即使整間舖都坐滿人係度燒烤都唔覺好大煙, 唔錯, 唔錯!!

頭先講左, 碟碟食物都係得個幾塊, 我地邊樹會食得飽呀, 大家諗諗下咁叫都唔係辦法, 再叫起碼叫多幾十碟先夠!! 而咁岩Jaemi講開老麥新出既"椒財板燒牛肉飽"幾好味, 於是就提議不如埋單去老麥食多餐, 平、靘、正!! 以塞飽個肚為大原則, 坐言起行, 於是, 大家拿拿臨執拾行裝轉架部, 轉個彎就到老麥, 再開餐, 個包, 一般啦, 大家可以唔需要特別去試, 因為都唔係特別好味, 簡單一句, 黑椒牛肉飽羅!!
咪講笑, 有相為証, 真係食多餐~~~

"椒財板燒牛肉飽"

食完之後, 大家都各自散水, 余弟兄, 過多幾年就要叫你做余老兄架啦, wahahah, 生日快樂, 仲有, 你份禮物, 快d諗, 唔係我地就cut左你架啦!!

盛八

地點: 尖沙咀亞士厘道23-25號雅士利中心3樓

電話：2366 8866

菜式: 日本菜 (日式西餐廳, 燒烤)

禮賢會2007年活動最後一擊

我地係包場 - 打邊爐的啊!!

成晚聽得蕉兄既一句: 乾左佢!!!

已經遠離酒場既牛牛, 是晚都破戒 - 飲勝!!!

繼上次12月1日既BBQ大會動之後, 蕉兄提議於2007年之前再一次舉行大活動, 希望可以約同一d上次活動因事未能出席活動既同學仔, 兼順道慶祝聖誕節, 雖然已經過左聖誕節但都只係希望多個藉 口約大家出黎玩, 兼兼順道可以有藉口提議玩交換禮物既活動!!!

係2007年12月入面連續舉辦左兩次中學聯歡大活動, 大大的感謝各位同學仔既出席, 當然啦, 尤其是我個一班鐵膽朋友(Jessica, 牛牛, 堅, Camus, Jamie, Jackie, Ling & 奶)出席, 其他有份出席的同學仔都相當有心啦!!! 雖然今次活動最終只有16人出席, 比我預期中的少, 不過, 都有三位多年冇見既同學仔可以應邀出席, 感動萬分!!



今次活動選址於尖沙咀"正冬火鍋"打邊爐, 其實本身我地想去尖東既德興火鍋打邊爐, 但係book位個時, 佢話已經有人擺酒冇得打邊爐, 咁唯有只覓新地方, 最後就去左"正冬火鍋"作為我地活動地方, 都幸好我地去左"正冬"食野, 因為當晚成個舖頭都冇咩客人黎食野, 我地一圍16人差不多成為佢地成間舖頭唯一一枱食容, 我地當晚每人只付出左$135就已經包地成間舖頭, 勁爆呀!!


我本身係抽中兩隻杯, 根據遊戲rule, 我有權搶人地份禮物, 嘻!! 我搶左人地份100蚊cash禮物, wahaah!!

醒目如余弟兄 - 一早就選定我份禮物為目標, 醒爆呀!!

講到成晚既高潮, 當然係我地交換禮物既時候, 大家都好緊張拆佢地抽到既禮物同時, 又好緊張咁搶人地份禮物, 哈, 唔好講笑, 我當晚都搶左人地份禮物100蚊cash, wahhahaha!! 有人歡喜有人愁, 有人被人搶左份好野, 換左份"10蚊店福盒"返黎, 好在我冇事姐!!! 最後, 大家都係一片開心既氣氛下完結, 感謝!!


食飽飯後, 我地各位好朋友, 去左cafe度再坐低飲杯野, 傾下計, 繁忙到嘔的Thomas兄終於可抽到些少時間見下我地, 總算係2007年前可以見到佢一面, 哈!!!

禮記15週年BBQ大會

人材濟濟~~~~

開爐準備中~~

燒呀燒~~~燒呀燒~~~
當晚兩位大廚師是也(LINGLING都有當大廚), 大大感動兩位整晚為人民服務, 辛苦晒!!!

後面三條友仔, 只係咁岩路過, 是但拎住支夾影相, 唔係幫手燒野食!!! 攪事之徒是也~~

安坐座位中影影相!!

食飽, 散水, 下次再約!!!

Cool, 經過兩個星期既招集, 係上星期日終於可以完成今次"15週年禮記好友BBQ聚會", 多謝各界支持, 雖然有好些人事因有事在身未能應邀出席, 不過, 今次聚會總算見返d好耐冇見既朋友, 又可以大家傾下計, 大家都好開心, 今次舉行活動既選址為西貢BBQ King燒烤場, 選擇西貢呢個BBQ場既主要係為左方便各同學們(因為大部份既人士都係住係九龍城或將軍澳一帶), 不過, 如果大家仲可以有其他選擇的話, 其實可以唔駛去西貢呢間自助BBQ場, 因為某程度上佢就真係好似貴左dd($118/person), 不過提供d食物既質素又真係...........麻麻地!!! 一般啦, 只可以係咁講, 唔難食, 不過唔見有咩咁特別!!! 話晒俾左$118當然係有d期望啦!!

講返今次聚會先, 之前都提及過因為Facebook既原故, 可以搵返部份好耐冇見既中學同學仔, 有人提議襯今年15週年, 不於就約埋大家一齊BBQ聚一聚, 就因為咁所以就出現左今次BBQ聚餐活動!!! 本人早前用e-mail約各人5:00p.m係旺角集合, 點知係約會前一日, 有部份人事因為各種事宜及理由話自己入西貢燒烤場, 所以總數15人, 最後cut左一半得返7個人係旺角集合!!

到左7, 8點所有人終於都到整, 哈, 有好耐冇見既同學仔, 大家一路食野一路傾計!! 哈, 話明係同學舊生聚會, 少不免都係講返中學軼事, 大家既回憶一下子去返中學時代, 跌跌碰碰, 講下其仔人既是非, 整晚大家都傾得不亦樂乎!! 雖然, 所以事情大家每次出黎聚會既時候都會提, 但係每一次提到既時候, 大家都會好自然都開心大笑!! 感覺良好!!!

其實今次出席既人數唔算好多, 仲有其仔人事尚未出席, 希望下次約會有機會可以再約多更加多既中學同學仔出山, 見見面!!!


BBQ King燒烤大王
地址: 西貢海灣渡假酒店大網仔路
電話: 2792-0683

第二把交椅

琴晚因為有d事, 要將整間房既櫃翻箱倒籠地要搵野, 無意間, 俾我發現到一張紙係中學時代既"風紀崗位表", (咁岩今年正值我同班中學同學仔相識15週年(由中一起計)就post d舊野出黎, 大家懷念下)!

嘩, 估唔到呢d咁咸豐年時代既野仲係度, 望一望, e, 曾幾何時, 我都威水過, 小弟曾經係學校身居"要職", 可以繼4位"風紀長"之後, 做到呢個"助理風紀長"post, wahhaha!! 不過, 依家諗諗下都唔係好明, 當時個位訓導主任因乜解究叫我做呢個位, 小弟係校內課外活動方面又唔係特別活躍, 成績更加唔係好個隻(中中庭庭啦!!! 未至於好差既~~)! 係! 小息個時可能見唔到我係走廊或者操場度走黎走去四圍玩, 不過我諗最主要原因都不外乎係課室埋頭苦幹地抄緊功課! 先唔得閒出去玩姐!!

"助理風紀長"個名就好似好威, 不過呢d都係表面風光, 一般既職責當時都係不外乎係條走廊度, 叫人唔好跑; 小息完結時, 又好似趕羊仔入返羊棚咁, 趕佢地返入課室(點解講到自己好似一隻牧羊狗咁既!!), 放學之後, 又要留係學校開"O.T.", 因為有d同學仔朝早返學遲到就要即日被罰留堂, 而我又係好似d牧羊狗咁睇實佢地, 家陣講返起我d生活又真係幾似d牧羊狗喎!!

p.s: 考眼力, 各中學同學仔, 俾機會你地自己睇下你自己守過d咩位~~

2007年度校友會資訊(5)

2007年度校友會資訊(5)

出席者: Cow, Gary, Ivan, Jessica, Jaemi
半出席者: Thomas
缺席者: Camus

於2007年8月24日慶祝牛牛大壽既活動已經完滿結束, 是此活動人材淍零, 有人因事未能出席, 有人因工作關係未能趕及到達會場!! 即使有份出席人仕連埋主人家之內都帶病出席是日活動, 再一次感謝大家!! 將嫁入陳家的牛牛, 決意夫唱婦隨, Ivan未諗到禮物, 佢又一樣未遇到心儀禮物, 故此禮物就先行擱置!!

先行同各校友詳細講解一下有關"如何正確使用禮物金"事宜:
1.) 禮物金額不能對換成現金, 否則就會失去某程度上的紀念性, 整件事因而變質!!
2.) 可能各校友一時之間, 未必諗到大家心儀之禮物, 禮物可於生日之後半年內行使禮物金使用權, 否則禮物金將會被扣除!!
3.) 禮物金不能額累積至下一年度!! (即今年唔買住, 留返下一年, 一口氣夾埋用$2,400-)


在此亦先作總結各人之禮物價值換算表:
Thomas: $600 - $100 = $500
Camus: $1200 - $200 = $1000

(Thomas原先承諾會出席是此生日慶祝活動, 唯當晚因臨時需要OT, 未能由內地趕返回港, 雖則"放飛機", 但誠意可嘉及有交帶, 故只扣減半數)


其他人仕之生日禮物金額維持不變~

2007年度校友會資訊(4)

2007年度校友會資訊(4)

出席者: Camus, Cow, Gary, Ivan, Jessica, Jaemi, 譚
半出席者: Thomas

缺席者: -

首先, 先提出第一點(亦是重點), 於2007年8月4日舉行慶祝Ivan大壽已經完滿結束, 感謝各位抽空去到新界區据扒(好彩唔係扒王之王!!), 由於Ivan兄尚未見到心水之禮物, 所以有關之禮物將會順延!!

值得一提既, 就係Thomas由於事前已經約左其他人食飯, 所以就未能出席是次晚間聚會! 不過, Thomas自己知自己事, 再唔出席活動既話, 佢份生日禮物只會淪落到可能買個sony耳筒都要自己貼錢都唔定!! 所以佢於飯席後再相約Ivan, 牛, Gary, Jessica再到"西貢滿記甜品屋"舉行飯後甜品聚餐!! 其餘等人因第2日有事, 故自行回家作休!!

在此亦先作總結各人之禮物價值換算表:
Thomas: $600

(雖則Thomas遲到出席"正場"慶祝活動, 但由於Thomas誠意可嘉, 今次就免除扣減金額 )

其他人仕之生日禮物金額維持不變~

未來活動預告表:

August

24/8/2007 (Fri) - 牛之生辰

September

1/9/2007(Sat) - 15週年大旅行(Local)

15-17/9/2007(Sat - Mon) - 15週年大旅行(Oversea)

(感覺好似回歸十週年咁, 有一連串活動安排!!!)

2007年度校友會資訊(3)

2007年度校友會資訊(3)

出席者: Camus, Cow, Gary, Ivan, Jessica, Jaemi, Judy

缺席者: Thomas

早陣子由於私事繁忙, 對遲遲未能刊出資訊(3), 深感抱歉!!! 本會於短短3個月已經為Camus(27/1/07), Jaemi(6/3/07) & Jessica(23/3/07)舉辦了3個生日活動, 各人亦各自得到自己喜歡的生日禮物!!! 感覺良好!!! 對於本校友會設立的『我為人人, 人人為我生日禮物籌備基金』亦運行自如, 多謝各member之合作~~

在此亦先作總結各人之禮物價值換算表:

Thomas: $1200 - (3x $200)=$600

其他人仕之生日禮物金額維持不變~

2007年度校友會資訊(2)

2007年度校友會資訊(2)

出席者: Camus, Cow, Gary, Ivan, Jessica, Jaemi, Melody

缺席者: Thomas

為對上次校友會資訊(1)提及的新措施作公平原則, 由Jessica動議一新補充方案, 內容如下:

於每次活動完畢前, 大會將會為各出席者影一張大合照, 用以証明各人是否有出席/早退該次活動, 並由本常任秘書處作報告, 以便準確地記錄各人是否如實出席該次活動, 以示公正!!

各人之禮物價值換算表:

Thomas: $1200 - (2 x $200)=$800

Jessica: $1200 - $100= $1100(上次你遲到早退, 已經紀錄在案!!!)

其他人仕之生日禮物金額維持不變~

溫馨提示, Thomas如果你再缺席多兩次, 我諗遲d你既生日禮物錢, 恐怕只足夠去朗豪坊買個 LeSportsac 散銀包, 你自己小心d啦!! 仲有, 仲有, 你已經拖欠Camus & Jaemi既生日錢尚未繳交, 如果你出席到下次既生日活動既話, 煩請你盡快繳交過期款項! 如果你真係出到黎既話!!

p.s: 由於本人正忙碌於功課中, 下次生日活動, 活動主辦人將由Jaemi負責!! 特此通告~~

2007年度校友會資訊(1)

2007年度校友會資訊(1)

出席者: Camus, Cow, Gary, Ivan, Jessica, Jaemi, Melody
缺席者: Thomas

為了增強及刺激校友會各校友活動出席率, 由Gary動議一新方案, 內容如下:

根據非正式統計, 一般各校友的生日禮物籌金約$200/位(+ /-$50), 而校友總人數為7人, 根據此計算$200 x 6=$1,200, 各校友每年所獲送贈之生日禮物約為$1,200-(原來我地咁富貴!!), 在此, 為整體和諧氣氛下提議, 如缺席者, 則將其生日禮物之總額每次扣$200, 換言之, 如缺席一次者, 該年度之生日禮物之總值將由$1,200減至$1,000, 如此類推, 此機制完全符合"我為人人, 人人為我"之精神!!!
終由Camus, Cow, Gary, Ivan, Jessica, Jaemi和議並一致通過, 即時生效, 並由Melody作見證人為証!!!

另為各校友更熱衷校友舉辦之活動, 避免有人遲到早退, 破壞整個活動和諧氣氛, 故此, 早退者亦視缺席者論, 但罰款為缺席者一半($100), 除非有充足理由, 並早於活動一個月前書面申請, 則可免此責~~~Example: 活生生例子一個, Jessica為體現犧牲小我既精神, 於Camus生日宴會上已為廣大校友示範, 遲到兼早退!!! 好開心, Jessica你已經成功左, 你既生日禮物總額亦由$1,200趺至$1,100.


特此通告