冬游

近日因為事忙, 發覺好似好耐冇去做運動, 早幾日心血來潮, 屎忽痕走去上網check下邊度有室內泳池游下水, 發現原來係旺角大角咀個邊有個室內泳池冬天都會開!!

於是今日就走左去游水, 下午點半左右去到泳池, 嘩, 好鬼多小朋友, 原來大角咀個泳池只係得一個嬉水池+半標準池, 成個泳池範唔係好大! 一心以為室內泳池一定係提供暖水俾人游架啦, 點知行近泳池邊個時都心知不妙, 腳尖伸一伸落d水度試一試d水溫, 頂, 果係係凍水黎既!!! 唉, 都俾左19蚊入場, 冇理由唔游架, 都要游返十幾廿個塘先走人啦, 唔係蝕俾佢!! 不過, 唔係講笑, 呢個大角咀泳池真係超多小朋友, 佢唔係黎玩水咁簡單, 而係黎學游水(私人教練教個隻), 我坐係泳池邊粗略見到一個泳池入面大大話話有成6-7個私人教練係度教游水, 有d教2-3個, 有d就開班授徒咁, 一條友帶 住6-7個小朋友!!!

我游完一輪之後, 真係頂唔順, 唔係body頂唔順, 而係實在太多小朋友係前面頂住d位, 佢地又游得唔快, 但又爬唔到頭(左右都好多人), 每次我都要睇定邊度有多d位先好去游, 唔講, 我以為自己係魚缸入面游緊水, 幾十條魚仔係自己身邊游黎游去!!! 最怕, 一個唔覺意撞到佢地就唔係幾好啦!!! 下次, 都係搵個第二度游過先得!!!