大刷特刷(2)

由Anna係Jaemi新居露台影出黎既夜景!! 相當之靚!!
食物準備中~~

正所謂一不離二, 星期五打完邊爐, 緊接第二日星期六晚上Jaemi新屋再下一城, 再打邊爐是也!! 但係星期六朝早Anna同我講佢前一晚打邊爐可能食錯野, 有皮膚敏感出現, 再加上前一晚既打邊爐d肥牛味仲係個胃度, 於是就決定照上Jamei新居, 但係就唔打邊爐!!

由於下午時分各人都各自有活動, 所以就約到差不多6:30p.m先上到Jaemi屋企, Jaemi新居有個小露台企出去望住個夜景都真係幾靚下, 不過由於家陣係夏天關係, 家家戶戶都開行冷氣, 企係個露台一陣就真係熱到巴巴聲, 縱然係更靚既景都係拿拿淋入屋嘆冷氣算罷!!

唔好睇落好少野食, 食食下都食唔晒, 而且仲有鮑魚仔食添呀!! 勁呀!!
"現化塵世美"播放中!!

由於新屋都只係落成左2年左右, 所有設備都好新淨, 而且成間屋都冇咩大型家俬, "簡單就是美"呢個感覺就更加舒服!!! 由於當日正正係中國國家隊到香港表演, 而當日既電視節目就起勢咁直播, 重播, 轉播, 錄播中國國家隊既表演情況, 我地望住個個台都係做呢d節目, 有人就忍唔住拎左隻碟出黎睇, 原來jaemi之前錄起左由Eason做介紹澳洲既旅遊特輯"現化塵世美", 之前係無線做個時只係係咁e望過幾眼, 就特別去追黎睇, 嘩, 當晚睇落原來呢個旅遊特輯真係幾好睇!! 值得推介, 一來Eason就生鬼, 二來佢去d地方又幾特別!!

壽星仔、女既生日蛋糕!!

其實當晚除左慶祝Jaemi新居入伙, 同時都係慶祝牛牛, 堅 & 阿譚既生日!! 好彩Jaemi為一個精明既師奶, 明知打完邊爐之後, 大家都會飽到嘔, 所以買蛋糕個時都買個細size d既蛋糕, 師奶果然係精打細算!!!

大刷特刷(1)

prepare晒d食物, 但係得個望字, 要等到10點先有得食!!

星期五晚上左alan屋企打邊爐, 其實間屋就唔係alan兄既, 間屋係佢既親戚, 只不過佢親戚一早已經移左民, 一年只係返黎一次(只係住幾日), 所以alan兄就索性借左間屋黎住, alan兄於是就邀請我地一齊上去打下邊爐, 玩下!! 有得玩故言開心, 不過, 原先諗住放工就入大埔(alan家在大埔)係咁e買下d野食, 再上去屋企洗刷下d食物就應該可以開爐食野, 殊不知我地真真正正認識到一條麻甩佬既生活係幾咁腐爛!! 一上到去, 佢既煮食爐具&食具, 上至煮食爐下至碗碟係完全缺乏!! (其實有爐頭既, 只不過係未開封姐!!) 我諗大家都應該試過係屋企打邊爐既經驗, 咁d菜呀, 丸類呀洗乾淨之後就要搵d碗碟or筲箕裝住, 頭先講左啦, alan屋企係乜叉都冇, 幸好佢既真正屋企只係係隔離座, 於是佢就要過返自己真正既屋企偷野過黎呢邊用!!

唉! 個爐.....睇得唔用得!!

其實, 我地放工之後再入大埔, 兼再去買野食, 前前後後上到alan屋企已經係8點既事, 之後再要等alan返屋企偷野過黎都已經差不多成9:00p.m, 大家都開始由原先好肚餓既情況下已經開始冇意欲去打邊爐(因為大家已經"餓過饑"), 但係不如意事十常八九, 就係呢個時候, 大家以為可以開始打邊爐既時候, 個電磁爐突然間停左, 頂, 原來佢個萬能插"燒"左, (佢個電磁爐係兩個插頭, 所以要用萬能插), 唉, 再一次証明一個麻甩佬既屋企真係乜叉都冇既事實, 搵晒成間屋都搵唔到有第2個萬能插既出現, 於是麻甩alan唯有硬住頭皮再一次走落街去買個新既萬能插返黎啦!!

實在係忍唔住, 走去直接煲滾d野食就當係打邊爐!! 正宗係"火滾"~~哈!!
有得食啦, 時間係晚上10點鐘!! 你睇d人, 即使d野食好熱都照隊入口~~可想言之, 佢地係幾咁餓!!

時間一分一秒過去, 我地終於忍唔住走入廚房開左人地未開封既爐頭, 放晒d食物入個爐入面直接滾熟佢就算!! 終於, 我地係10:00p.m終於可以食到第一round既食物, 成班友好似餓鬼咁伸個頭入去食野, 而就係呢個時候麻甩alan就返到黎, 原來佢去左一個好遠既地方買左個萬能插, 雖然係就係遲左d, 不過遲到好過冇到呀, 於是可以正正式式我地既打邊爐活動!! 係等麻甩alan其間, 膽哥講左一句話:『頂, 落去d酒樓打邊爐仲好, 家陣9:30p.m仲要有特價添呀!!』呢句係我等食個時覺得真係幾岩聽!!!

小朋友

第一位小朋友 - 謙謙

第二位小朋友- Momo

近排係不同既場合見左好多小朋友(屋企個兩件大小不良唔計)!! 有男又有女, 不過佢地唔係我識既, 全部都係Anna既朋友仔!! 當然啦, 經Anna介紹之後, 我呢d小朋友既好玩伴, 我已經同佢地玩得熟稔晒啦!!

散心食飯

餐廳內部~~~黑麻麻
就係呢張剪報, 我地就入左去呢間餐廳食飯啦!!
最好食就係呢個炸鮮魷~~
當我切開晒先記得影相, 佢本身個賣相冇咁差既!!
唔錯既炒飯!!

星期二, 因為Anna心情不佳, 情緒低落需要散散心, 所以原定去做gym既活動就取消左, 散心既最好辦法就係去刷餐好既, 於是入左西貢搵野食, 入到西貢一落小巴就四圍行下, 行左一陣就入左一間"蘇珊娜扒房"食野, 其實原先都冇諗住入去呢間食, 只不過咁岩經過門口時見到佢貼左一張10年前既剪報係門口, 好似介紹得幾好味, 於是就入左去食!!

入面黑蚊蚊咁, 成間餐廳既佈局係舊港式扒房一樣, 之前係門口個張剪報介紹過炸鮮魷&柳眼扒(柳眼扒係一個set - 包餐湯+多士+餐飲+雪糕)好好食, 所以就先叫左呢兩個食先, 雖然係散心要食野, 但係我地都base on唔好食得太肥為大原則, 所以另外只係叫多碟炒飯就算啦!!

落完order過多陣就黎左個炸鮮魷先, 佢個炸鮮魷同旺角街邊個d炸粉做得好唔同, 好明顯佢係做得比較有心機, 炸粉比較簿身, 一口咬落去就好好食, 而d鮮魷都好新鮮, 我諗話晒係西貢區, 海鮮應該會比較新鮮d!! 呢個炸鮮魷本身仲跟埋一個有少少辣既汁一齊上, 點住d汁黎食都幾好味!! 之後就係個主菜 - 柳眼扒, 我地要左個蒜蓉汁, 上個扒個時成塊扒上面全部都係蒜蓉但係冇汁, 開頭以為佢會好似花園餐廳咁另外再加上去啦, 點知等左一陣都唔見佢黎加野, 再望一望隔離張枱, 原來所謂既蒜蓉汁就係塊扒上面加一大part蒜蓉就已經當係!! But anyway, 我地就照食啦!! 味道還可以, 不過咁講, 其實佢個set要成$138, 以咁既價錢d扒我本身估佢都應該會係幾有肉味, 不過味道只係一般貨仔!! 最後仲有上埋個炒飯, 個炒飯都幾好食, 唔錯!!

頭先睇左openrice對呢間餐廳個評價都係一般, 甚至有少少差, 不過我覺得都還可以接受既!! 食飽飯之後就係西貢海旁行下, 吹下風, 傾下計, 其實有時咁樣都幾休閒幾寫意!!

蘇珊娜扒房
地址: 西貢普通道76號
電話: 2792 7163
菜式: 西式、西餐廳

經典

今日早返屋企, 於是係部電視機前面轉黎轉去, 睇下有咩電視好睇, 咁岩居然俾我轉到去明珠台, 原來岩岩佢地重播返"The X File"仲要係season 1既第一集, 嘩, 真係超經典!! 上網check下"X-File"呢套電視劇, 原來Season 1已經係講緊1994年個時既事, 即係14年前既事, 嘩, 真係好耐啦!! 個時, 我諗我應該冇睇到佢既第一集, 今日有機會睇返真係好野!!!

大家可以逢星期一晚上9:30p.m去明珠台睇返呢套經典!!!

好忙呀

今個星期唔知點解除左今日之外, 成個禮拜都差不多係full booking!! 講一講個行程先:

星期二: 去做gym~~
星期三: 夜晚入布袋澳食海鮮(有人請, 純粹去食飯, yeah!!)
星期四: 上牛牛屋企度身做兄弟衫(聽講話要做slim cut, 好驚!!)
星期五: 上朋友屋企打邊爐
星期六: 下午去上堂, 夜晚再拜訪Jaemi新居(幫Jaemi新屋既牆角整返幾"篤"童子尿先)
星期日: 幫舊鄰居搬屋(暫定)

成個星期冇時停!!

雜

呢排冇啦啦, 又係冇事忙, 成個禮拜冇打blog!! 岩岩全世界都望住隻雀隻" 鸚鵡" 打唔打得成黎香港, 好彩佢打得成, 多一日假放下, 真係感覺良好呀!! 原先星期四個晚仲聽天文台講, 清晨時分都未必會掛8號風球, 心諗唔係咁大件事呀, 唔通點都要返半日工先有得放!! 好彩, 晨早7點起身昅一昅個新聞, 佢話8點鐘前就會掛8號風球!! 咁先可以放過long weekend!!

+++++++++++++

星期六, 原先諗住去同Anna行行Megabox過下日晨, 點知去到德福商場個時, 咁岩就見德福個度重新開返左個戲院, 之前就係UA, 家陣就轉左做MCL, 見有新戲院咪走去昅昅有冇位啦, 之前見Anna話想睇Get Smart呢套戲, 又咁岩見佢又有d靚位, 所以就買飛睇戲!! 雖然呢套只係一套無聊笑片, 不過如果想開開心心, relax下, 唔駛用腦去睇戲既, 呢套電影就岩晒, 雖然都預左佢係無聊笑片, 不過未至於去到界枱既電影, 都可以一看!!

仲有, 其實德福個間新開既戲院, 全部都係迷你戲院, 不過座位與座位都好闊落(i mean同前排座位都係), 不過頭先講左呢度全部都係細院, 如果買飛睇戲既話, 一定要買最後個行!!

仲有, 仲有, 佢因為新開張, 家陣有個優惠, 家陣只需要俾$100入會做佢member就可以即時有3張免費飛, 之後做左member仲可以買飛有9折, 計埋條數都有賺呀, 一張飛如果係正場睇個時都講緊$55一張, 家陣送3張(生日o個個月仲會送多張)即係免費入會, 所以都幾抵下!!

+++++

3日長假放完, 聽日又返工, 唉!!!

好堅

今朝起身睇奧運, 咁岩睇到男子100m蝶泳決賽, Phelps果然係好勁, 最先轉池個時都係隔離線個位仁兄帶住個頭, 即使係去到最後個25m, Phelps依然係落後緊少少, 即使即使係去到最後掂池個下, 大家都諗住Phelps都應該完成唔到8金美夢, 轉個頭, 出黎既成績居然係Phelps贏左, 仲要係贏0.01秒, 嘩, 真係睇到眼都突!!!

流水

前排完成左個presentation應該得閒d, 不過, 由於今個星期要陪人溫書(係呀, 我變左做書僮), 所以又停左打blog(好)幾日!! 呢排唔知咩事, 身體差左, 繼上次病完, 呢兩日又病過, 家陣成日都係度流鼻水, 仲要係勁流個隻, 有時搵唔切紙巾個時分分鐘流到落咀唇邊!! (講真架, 有時唔覺意自己條俐都"high" d鼻水!!)

諗左好耐因咩事又病呢!! 我諗到個原因, 可能我為左支持環保, 夜晚訓覺就決定唔開冷氣訓, 咁有時又實在太熱於是就唔著上衫就走去訓覺, 咁隔離都開住把風扇仔既, 而到左清晨5,6點d天氣又會涼返少少, 就係咁既原因, 一個唔覺意就冷親左!!

下水禮

太陽油+泳鏡當然唔少得啦!!

星期六見天氣好, 於是就再去泳池游下水, 身體健康又可以廋下身, 最重要係定家陣市政局公共泳池係唔駛錢入場呀麻, good晒!!(呢個優惠去到9月尾架!!) 其實早係兩個星期前已經落左水啦!! 今次就再接再勵游多幾個池, 最緊要係呢個唔駛俾入場費既時刻, 游多d, 抵返好多!!! 唔知點解, 今次去泳池游水就唔係好多人, 可能之前一晚個個去睇奧運開幕太夜訓, 又或者係奧運第一日於是就留係屋企睇下奧運賽事掛, 感覺上成個泳池都唔算係太多人!! 出門口個時見天氣良好陽光普照, 一心諗住去曬下太陽, 有d健康膚色見下人, 點知去到泳池一坐低成個天都陰陰地, 唉, 破壞晒個計劃添, 差勁!!

游完水, 接住下一個節目就係去剪剪髮, 一入到salon, James(髮型師)就同我講:『你個朋友仔黎左喎!! 過去打個招呼呀!!』, 我心諗一諗究竟係乜水呢, 離遠望一望有位細細粒成個小學生既人坐左係度做緊負離子, 原來係Macy, James後尾仲問我地係唔係約埋一齊黎剪, 咁當然唔係啦, 哈, 真係咁岩得咁橋就真, 識左Macy都一段時間, 知個有位男朋友, 一直聽其名不見真人, 今次咁岩撞到Macy同時又見埋佢位男朋友, 真係有緣!!! 嘩, 原來Macy佢係salon坐左已經差不多成四個鐘, 有時女仕整頭, 原來真係要花成半日時間先攪得完, 真係唔講得笑!!

大家係8, 9月多多去游水, 一來身心健康, 兩來係唔駛錢(i mean係去公共泳池游水)!!

Wall E

上星期四, 終於攪掂左個presentation, 當然要去輕鬆下啦!! 手上又有兩張百老匯電影中心免費贈卷(其實係anna), 於是就同Anna走去百老匯電影中心睇下戲relax下啦, 原先諗住睇"特務S o麥", 不過張贈卷於電影首映日不適用, 而咁岩個套"特務S o麥"就正正係o個日係第一日放映, 所以只好另覓第二套電影睇, 望一望成間戲院有四套戲播放緊, 其中兩套電影係個日首映就已經唔駛諗, 得返兩套選擇, 一係"Mummy 3", 另一套就係"Wall E", Mummy 3就睇左, 咁就當然係睇Wall E啦!!

之前都係咁e聽人講呢套Wall E頭個30min都係冇對白, 只係Wall E一個"人"獨腳戲, 而且人人都話呢頭30min亦都係最精彩一幕!! 睇完之後真係所言非虛, 雖然係全無對白, 但係在場位位都睇得好入神, 故事雖然簡單但係表達意義明確, 而且對於小朋友黎講, 佢地未必會明白當中既意思, 作位一套有娛樂性既卡通片亦係非常之好睇!!

另外, Wall E呢個名唔係一個普通名, 更加唔係隨便作咁簡單, 呢個名其實係一個英文名縮寫"Waste Allocation Load Lifter Earth-Class", 而片中另一主角EVE都係一個short term黎架, 而全名係"Extraterrestrial Vegetation Evaluator"!! 呢個真係心思獨到!!

工作時工作, 遊戲時遊戲

兩隻野就埋頭苦幹係度打機, 我就.....係度做野!!唉!!!

上星期三, 正正括起8號風球, 突然多左個假期, 咁岩第二日又有個presentation要做, 多日假, 多d時間準備, 真係天助我也!! 雖然說話係咁講, 但係凡事都係有d阻滯, 一心諗住起身休息一陣就開工做野, 個兩隻大不不良一句"唔該"都冇, 兩隻野"把"一聲已經衝左入我間房, 玩左一陣之後, 就拎起部NDS坐係我張床就係咁打, 可憐既我就唯有望住佢地打機, 自己就只好望住疊notes係度做powerpoint!!

玩足全日

琴日一朝早就去左睇早場, 睇既當然係新鮮熱辣既Mummy3啦!! 早場既賣點唔駛講就係因為佢夠平, 只係$35就可以睇到一場正場戲, 真係抵到爛!! 講返套戲, 今次雖然加入左中國東方元素入去, 但係感覺上佢成個故事都唔係好完整, 始終同對上個二集相比真係差好多, 首先一來女主角原來係今集轉左另一位去演出(我都係入到場先知!!), 失去左親切感, 二來, 今集已經講到男主角Brendan Fraser已經有個好大既仔, 講真, 上集都仲係講緊佢個仔係細佬, 家陣搖身一變就變左個廿幾歲既大人, 感覺就更加怪, 因為完全唔知點解d野會無端端推前得咁快!! 其實要講成套戲既不是仲有好多, 不過, 有一個就真係非講不可, 就係係最後楊紫瓊要叫返醒d長城兩側個d死者起身幫拖, 正常諗咒語應該係諗國語(因為佢拎住既係中國既竹簡書!!), 唔知點解佢又會冇啦啦諗英文既咒語, 完全九唔搭八!!

另外今集有梁洛施, 大家都話佢演得好好, 其實, 我只係覺得佢普普通通冇咩特別, 不過要讚一句既就係佢既英文對白又真係講得好流暢就真!! 呢套戲, 我覺得大家都係可以等佢係無線播個時先去睇都可以, 唔駛咁心急特登入場去睇呢套戲, 如果拎佢同Batman兩套大片比較, Batman就真係好睇好多多多多多多多多!!
新鮮菠蘿腸仔~~
芒果布丁~~
小狗帶埋BB黎一齊玩!!
Lingling屋企對住既景!! 雖然只係內園景, 不過因為係高層, 所以都好好陽光!
晚餐準備中~~
豐富的晚餐啊!!

睇完早場, 我地就約左小燕子佢地一齊上Lingling新居參觀!! 未上去之前我地就先去飲茶, 醫下個肚, 食飽飽先上去!! Lingling新居位於黃大仙, 交通方便而且佢地單位係高層十分之好, 最重要係屋企都唔會有多餘既傢俱, 由於傢俱唔多, 所以成個屋企都非常簡潔, 我就最鍾意呢d style!! 簡單就是美!! 感謝Lingling為我地準備左各式小食同甜品 - 腸仔菠蘿(係新鮮菠蘿喎!!)、滷水雞翼、芒果布丁、親手既士多啤利蛋糕, 好好食好有心機!! 記住多多用我地送俾你既微波爐整野食呀!! 夜晚我地仲叫左Pizza同埋KFC外賣返黎食, 位位只需$40已經可以飽到上心口, 又係抵到爛!! 食飽飽我地就一齊排排坐, 睇住高清電視選港男, 成班人柴娃娃睇電視一路講一路睇, 真係幾開心!!!