玩樂@元朗 (中)

嘩, 食埋個好到底既麵之後, 真真真真真係飽到上頂, 係時候搵單車出發去做做運動消化消化先得!! 對上上一篇講左搵車既經過都唔係度再講多次啦!! 終於俾我地搵到有單車出租, 唔理咁多, 出發先再算!!

其實南生圍路唔係單車徑, 沿途時不時都會有車係你尾, 所以踩個時要非常小心!!

係河上面, 其實只要細心d睇下就可以見到d鴨仔係河入面游水~~

係單車舖一轉出去已經係元朗西鐵站, 隔雜就係新元朗中心, 只要一直踩, 話咁快就會去到博愛醫院架啦!! 過左博愛醫院有理冇理再繼續向前踩, 應該好快就會見到南生圍個指示牌, 跟住轉入去南生圍路就岩架啦!!


開頭因為唔係太識路, 一路踩, 點解踩極都唔到人地成日拍戲, 影相好鬼靚既地方, 唔通自己不自覺咁行錯路, 原來其實只要沿住南生圍路踩一段幾長下既路段, 去到尾就可以去到d人成日話好靚既地方啦!! 我地一場入到黎呢度, 唔駛講就係四周圍影呀影, 起勢咁影, 冇執輸咁!! 當然, 除左我地之外, 其實都仲有好多人係度影相同埋欣賞風景!! 不過, 我地拖住架單車, 有d地方就唔係咁方便行, 所以就係南生圍外邊影下相就算, 冇再特別行入去!!! (其實另一個重點係我地仲有下場, 就係趕住出去再食野!! yeah!!)


過左街渡先影!!! 我地係對面過黎架!!
落左船再踩返出去街口就見到呢個指示牌, 向左轉返出去踩多陣, 就係元朗西鐵站啦!!

再沿住個指示牌有街渡過河, 一場黎到又點唔會放過搭下出名既街渡過河呀!! 位位$5, 兩岸基本上長期都會有人等上船!! 揸船伯伯當然唔會放過任何賺錢機會, 行多兩轉, 快快手賺多幾蚊呀麻!! 落船之後, 再沿路轉返出去, 話咁快就可以到元朗西鐵站啦!!

其實, 大家唔想踩單車(or踩太長路段), 又或者想行入去南生圍, 其實只要係元朗西鐵站後面直接行入去都可以, 先入舊墟路之後, 再轉入山背路, 話咁快就會見到上面個指示牌架啦!!

(再待續.......)

玩樂@元朗 (上)

星期六一朝早就同Anna搭巴士直接入元朗, 對上一篇講過, 人生路不熟, 入到黎開頭個時搵唔到單車租, 所以就四周圍搵下, 入得黎元朗又點會淨係踩單車咁簡單, 當然係順手搵下d好野食啦, 所以又係晨早係openrice度搵定d好野食既資料, 咁岩一路搵單車租既時候, 經過其中一間好野食, 橫掂經過加上又就快到lunch, 拿拿聲入去醫一醫個肚先再搵車先!!
間舖頭既裝修有d"搶"~~~ 掛晒燈籠, 吊扇!!!
十寶丸 + 腩雜十寶
特別呈獻 - 牛之四寶: 牛鞭 o 牛春子o 牛開心 o 牛子

呢間舖叫"嘉麗園潮州粉麵餐廳", 人家出面有咩四寶麵啊, 呢度就勁啦, 四寶就當然有啦, 呢間餐廳連十寶都有呀, 其實一下說穿, 所謂既十寶就只不過係雜丸, 除左呢個十寶之外, 仲有另一款十寶就係"腩雜十寶", 呢個都唔算勁呀, 係我等食期間四圍望下d牌, 突然見到有"堅"野, 呢度居然仲有牛鞭食個喎, 除左牛鞭, 仲有咩牛春子, 牛開心(其實我都唔知咩叫係牛開心!!!), 我於是問anna, 不如我地賣條牛鞭用條竹籤串起佢, 再係條街度食, 都幾過癮, 當然, 佢就彩我都傻, 最後都只係叫左兩碗十寶食就算!!!
好到底~~~
雲吞伊麵~~~

食完兩碗"十寶"基本上都已經飽左7, 8成, 不過, 過左唔夠兩個街口, 我地又見到元朗名物之一: 『好到底』, 雖然頭先個兩碗"十寶"食完已經飽到上喉嚨, 不過一場黎到, 再加上之後應該都唔會再路經此地, 於是, 再入舖頭再食多餐, 其實係"好到底"入面食野, 其實都唔會怕飽得好多, 因為佢地本身個碗麵都係好細碗, 如果係一般未食野入黎既男士, 分分鐘食兩至三碗先夠飽, 所以呢, 我地呢D入黎淺嚐兩碗就足夠啦!!

"好到底", 出名係佢D麵足夠彈牙, 麵冇梘水味, 而且老店都有幾十年歷史, 唔入黎食返一輪, 都對唔住自己, 講到麵, 佢又真係冇咩枧水味, 不過可能頭先食飽左7, 8成攪到D味覺鈍晒, 反而食左佢個伊麵呢, 又真係唔錯喎, anna都讚呢個伊麵整得幾好, 臨走, 佢仲想買返d伊麵返出去做手信添!!

(待續........)

嘉麗園潮州粉麵餐廳
地址: 元朗康景街利景樓5號地下
電話: 2476 6882
菜式: 潮州菜、中菜館、粉麵/米線

好到底
地址: 元朗阜財街67號
電話: 2476 2495
菜式: 港式、粉麵/米線

騰雲駕霧

今朝起身一打開眼就見到窗外面全部霧.......好誇張呀!! 連對面座樓都蒙查查!!

玩樂@元朗(前章)

話說上星期, Anna提議星期六去踩單車, 見天氣晴朗加上上星期六又涼返dd, 襯涼涼地出去玩下都好!!之前踩單車踩黎踩去又係大圍踩到大埔冇黎新意, 於是上網昅昅睇下香港仲有咩單車路線玩下, 有人提議可以到元朗踩下單車去南生圍玩下, 咁都好, 總算係有新玩法!!

話晒第一次入元朗踩單車, 人生路不熟, 臨去之前當然要做足功課啦, 睇下邊樹有單車租, 左搵右搵上網搵極都唔多見元朗有單車租俾人玩(反而賣單車既舖頭就有好多!!), 之前有人話有間叫"昌緯"既單車舖有租單車, 但係咁岩係早兩個月前就開始暫停唔再租車俾人, 攪到我頭都痕唔知邊樹搵單車踩好!!

最後, 左搵右搵幾經辛苦(連yahoo小知識都搵埋)終於搵到有間單車舖租車俾人啦(天豐單車)!! 不過講真, 網上面d人話就話呢間有得租, 其實開頭都幾驚架, 點知到時俾佢地"扇"獲甘既, 仲得了既, 山長水又遠入一心入黎元朗先知冇得租單車, 真係好掃興架麻!! 好彩最後當然係有車租啦, 而且係天豐整單車個位師傅仔都幾好禮貌, 幾nice!!

過左醫院, 再直去, 之後會落個大斜路, 再直去多一陣就會見到南生圍個大牌!!

既然搵到單車, 當然要搵埋路線啦, 講真, 上網睇, 其實又係冇咩人講下條路點去, 我地呢d九龍人士, 十年都唔多入去元朗, 真係鬼識咩!! 查地圖又唔見得有咩明確既路線話你知, 又係另一頭痕點!! 終於最後俾我考究到原來只要過左博愛醫院之後, 繼續向前踩, 過埋條大落斜之後, 再踩多一陣就會有個南生圍既指示牌出現, 跟住轉入去就係南生圍路啦!! 沿住南生圍路踩踩踩到尾(都一段幾長既路程!!), 就會到達平時人地拍戲, 影相, 好鬼靚既南生圍啦!!

天豐單車
地址: 元朗安樂路35號利群樓地下

放鬆心情

呢度係旺角警察會隔離個球場, 有時呢度有人玩rugby, 個個都好鬼大隻!!
時間冇多, 日復日, 沉在notes入面, 睇完呢樣又要睇第二樣, 以為日日溫書過日好過癮嗎, 我只可以話你知, 呢d生活, 實在係你睇我好時, 我睇你好, 一個極大考試放係眼前, 而死線同時迫近, 大有中學會考時既感覺一樣, 個考試將決定一生, 除考試外, 其他一切都要棄之如敝屣!!

早陣子, 可能壓力源於此, 有幾晚惡夢連連~~~ 所以有時都要relax下, 每每有人話做運動都係一個放鬆既最佳活動, 岩岩琴日開始暫定一星期一日去跑下步, 一來放鬆下, 兩來減下多餘既膩肉!!

不過發覺, 太耐冇做運動, 琴晚跑完步之後, 今朝成個人好似散晒咁........家陣仲有少少酸添.....救命呀!!!

生活每一天

每日朝早, 基本上一早房門都會見到呢個情景, 大不良就係度默緊書(因為一個星期就起碼要默中文&英文), 而眼訓既小不良就著晒校服之後, 因為頂唔住睡魔急call攤左係sofa度繼續小睡片刻!!!

大澳遊

當日都有好多人入黎大澳架!!

記得之前到過大澳已經係2-3年前既事啦, 見咁耐冇去, 所以就係情人節當日睇完早場就去大澳行返一轉!! 之前講左, 一早就去左睇Yes Man早場, 之後就再搭MTR入去東涌轉巴士!! 唔係講笑, 唔知係咪咁岩係情人節既關係, 係東涌排隊入大澳既巴士站全部都係雙雙對對, 好在我都有位好情人陪伴在側, hehe!!!

天氣唔多好, 海面都係白茫茫~~~

據船家講, 係側面睇似一個人, 呢度叫"將軍石"喎!!


入大澳首要條件就係要"登"巴士, 唔"登"返成粒鐘都入唔到去, 都好既, 話晒朝早個時晨早流流走去睇早場, 鬼咁眼訓!! 家陣有得休息下, 都不失為一件好事!! 其實, 當日天氣都係一般唔係太好, 仲時不時都有毛毛雨添, 不過呢d都唔會阻礙我倆遊山玩水既興致!! 一入到去, 係門口就有人大叫有船出海中華白海豚, 仲話岩岩仲有十幾隻出現過, 大叫快d上船, 我同Anna於是就急急腳上船啦!! 可能天氣唔多好, 出到去海面, 四周圍望左都係冇咩動靜, 船家都好似好唔甘心咁, 揸住隻船四周圍行, 當然最終都係搵唔到白海豚蹤影啦!!


Anna親手做既麵包卷 - 唔好以為係綠色個d係wasbai, 其實係牛油果黎架!!

呢個係我親既lunch box!!!

入到大澳, 有兩檔小販檔幾出名, 呢個係其中一檔, 專賣烤海鮮!!

由於我地睇完早場先入黎, 其實坐得船黎再四圍行一陣, 都好快天黑!!! 大家都知, 一到差不多6-7點呢段時間, 係搭巴士出去東涌既人潮高峰時間, 橫掂一場入到黎大嶼山呢頭, 不於搭車落去梅窩個邊行下, 順道坐船再出返去!!!

陰陰濕濕

近日天氣潮濕, 早兩日老媽仲煲埋冬瓜水飲, 我仲以為係大暑定係小暑添, 老媽話冬瓜水可以去濕喎!! 今日係公司望過去對面ICBC大廈仲勁, 大霧到睇唔到個頂樓!! 頭先入去Pantry飲杯咖啡個時, 嘩, 仲勁, 望出去完全睇唔到對面海個d building!! 至憎就係呢d濕淋淋既天氣!!

Seven Pounds

Seven Pounds 就已經係上上星期日去戲院睇, 不過忙加懶, 所以遲遲都未寫, 其實到左依家應該已經有好多人睇左呢套電影, 之前一直未入戲院睇呢套戲個時, 成日睇個d簡介, 基本上都係講叫大家唔好學佢係戲入面做既野, 完全冇提到個故事內容, 所以一開始個時都對呢套電影冇咩好感!!

不過好彩最終都入左戲院睇呢套電影, 因為佢都算係一套值得推薦既電影!! 基本上呢套戲都係一套十分dark既電影, 講述Will Smith因為自己引致嚴重車禍導致七人死亡, 因為佢深感內疚覺得需要贖罪, 所以決定搵七個人幫助七人重過新生!! 至於如何重新就正正電影開始前叫大家唔好學既事, 就係自殺再將自己既器具捐予有需要既人 - 患血癌既病人(捐骨髓!!), 心臟病既人, 腎病既人......將自己身上捐得既都捐晒俾人!! 當然當中就有一d情節啦, 呢度都唔多講!! 但係睇咁多套Will Smith既電影都唔試過有一套見到套差不多有八成既時間都係拿口拿面!!

題外話, 係電台既影評度聽返黎, 片名為"seven pounds", 其實當中包含一d意義, 根據莎士比亞既其中一個劇所描述, 古時英國如果有人欠債而又未能償還的話, 個位欠債人就要係身上割下一磅肉以作為還債之作, 所以電影今次起用"seven pounds"之名, 實際有還債之意!!

Yes Man

上星期六情人節, 當然係同情人出街啦, 一朝早我地呢d慳家人仕先走去睇早場, 早場價錢平成半喎, 所以好多時候我同Anna如果要睇戲既話多數都係睇早場居多!! 今次呢套Yes Man係Anna一早點名要睇既!! 既然係咁就先去睇個做早場作為情人節warm up活動先啦!!

Yes Man係一套輕鬆喜劇, 今次Jim Carrey重回喜劇之路, 好多人都好期待, 今次呢套戲, 講Jim Carrey參加左一個會, (其實我覺得類似係異教會個d呢!! 好有宗教狂熱個隻!!!), 凡事都要say yes, 根據該會既宗旨, 只要有yes no question出現既時候, 你一定要答yes, 咁先可以開創人生另一天地!!! 因而Jim Carrey本著呢個宗旨, 當中自然就會有好多趣事發生啦!!

不過Jim Carrey真係老啦, 雖然佢都出力咁做出好多浮誇既表情同埋動作, 但有時真係不復當年勇!! 而且戲入面大部分既笑位基本上係traliar個度都出晒, 話雖如此, 話晒呢套戲始終都係Jim Carrey從返喜劇電影之作, 整套戲出黎既效果都會令好多人抱腹大笑, 如果大家想開心, 而近排又冇咩其他開心喜劇睇既情況下, 呢套戲都不失為一個好既選擇!!

年又過年

好有新年氣氛, 度度都掛晒揮春!!

身為迪迪尼尊貴既全年票既持票人("尊貴既會員"呢個term黎自Macy!!), 早前新年既大節日, 當然又係時候去一去迪迪尼啦!! 家陣仲係做緊新年兼情人節既promotion, 所以通街通行都係d著住唐衫既米奇mouse呀, 仲有高飛呀....

好多人, 好迫呀!!


一朝早就坐MTR出發, 心諗係平日去迪迪尼, 照理應該都唔會太多人既姐, 點知一去到迪迪尼門口就知賴野!! d人多到呢, 誇張得很~~~ 平日只係供我地呢d專貴既全年票閘口, 照之前去過咁多次既情況, 都係唔駛排隊, 點知今次去就要排陣先入到去, 攪到我地呢d專貴既會員downgrade左!!

米奇同高飛都著住唐服~~~

其實每一次入迪迪尼玩, 主要都係因為佢有d special function, 所以先特別抽時間去玩, 由於之前都去過幾次迪迪尼, 所以基本上都唔會特別同人迫&排隊去玩個d機動遊戲!! 今次就特別去睇下新年special 遊行同埋米奇大屋新年版!!

係等候同人影相既空檔期間, 布魯圖係度自己擺post俾人影相!!!

黎左好幾次, 每一次都冇去過個"動畫藝術教室", 原來呢個地方係教你用好簡單既方法(等如畫o丁o當咁 - 圓圈加一點...........), 畫出迪迪尼既公仔人物, 今次我地學左點樣畫"唐老鴨", 可能我本身畫畫既技術不堪, 畫完出黎之後, 完全係兩回事, 不過Anna就唔同呢, 可能佢平時自己都有畫開畫, 畫出黎之後, 又真係幾似樣!! 如果大家去開迪迪尼, 不妨可以去呢度學下點畫畫!!!

有人鍾意搵佢地簽名, 最好笑就係佢地簽名個時, 將本簽名簿放係個鼻上面先簽到名!!

今次去迪迪尼, 咁岩見到林嘉欣出現!!


另外, 我發覺, 係迪迪尼入面扮迪迪尼公仔人物既演藝人員, 有時真係要nature high, 自娛先可以做到呢份工!! 有時, 咁岩見到d迪迪尼人物行出黎同人合照既時候, 有時見到佢地都幾喜歡自娛, 例如, 係空檔時間, 佢地每每都會自己擺下d無聊post, 逗下d小朋友玩, 不過逗人歡喜, 都係佢地呢份工作既範圍之一!! 之前睇左好幾次煙花啦, 所以今次都冇特別留係度睇!! 仲有, 係大約5點過後, 公園入面既人流開始少左, 我諗大致上可能旅行團個d遊客要跟領隊出去食飯, 所以到咁上下時間就要走人啦!!