海角七号

由於之前join左MCL做club member, 係生日月就送左一張戲飛俾我, 有免費戲飛故然好啦, 不過, 唔通戲院覺得佢d member個個都咁寂寞, 只會一個人去睇戲, 既然係送就咪鬼咁孤寒送一張啦, 係就送多張, 兩個人一齊去睇戲先得架麻!!

由於張贈卷去到今個星期五, 所以琴日就走左去睇戲, 呢排都冇咩大戲或者新戲上, 有既都只係個套007, 由於對007興趣不大, 而咁岩見到係台灣大收既"海角七号"又岩岩係上星期上畫! 所以係冇其他選擇又要睇既情況之下就睇左呢套戲!!

如果大家帶住呢套係台灣大收, 一定好好睇既concept入場睇呢套戲既話, 大家可能會有少少失望, 你話呢套戲好好睇, 要睇到要讚不絕口咩, 我感覺上又唔係!! 其實呢套係只係屬於小品類電影, 而且係非常之台(灣), 入面有七成既對白都係講台語, 地道感十足, 不過即使全部係台語都唔打緊, 橫掂都係睇字幕姐!! 電影入面每個人物都有自己唔同既獨特個性, 由馬拉拉桑, 茂伯到有自我一套既小女生大大都有各自既性格面!! 成套戲一開頭, 其實都有少少慢熱, 但去到大家要組織樂團後練習時造出不少笑話, 尤其是戲中的茂伯, 為左要上台表演, 即使最後冇得彈Bass, 都硬要上台的情節尤其好笑!!!

至於電影宣傳舖天蓋地式地形容電影係"漫天感動", 其實就有點兒誇大左電影既感情線情節, 正如Anna睇完之後都話睇唔明套戲, 唔明既就係其實個男主角都冇做過d特別野, 點解個女主角又會無啦啦會鍾意左佢既, 而且都唔知成套戲有咩可以咁感動!! 而當中穿梭中日兩地既感情, 加上日文旁白, 某程度上係成套電影都冇咩太特別(只係本人覺得!!), 係都可以話係可有可冇!! 反而要講既就係係最後成隊本土樂隊上台表演既時候, 個種氣氛就真係十分之好!!

p.s: 戲中茂伯自稱自己係國寶, 上網睇過官方網頁, 原來所言非虛, 佢平時都會出去表演個喎!!

"海角七号"官方網頁~~

對話

上星期同小貞貞佢地係小狗屋企打邊爐兼食大閘蟹, 本人用小貞貞個電話send左個sms俾佢男友, 叫佢覆電話俾小貞貞, 點知等左成個鐘之後, 小貞貞個男友仔先覆電話黎!!

我(係旁邊細細咁講):『嘩, 成個鐘先黎覆我電話, 如果我俾人強姦, 諗住搵你救命仲得了既!!』
William(Jackie男友)(立即代回答):『冇, 諗住俾d時間你冷靜下先之麻!!』

呢句絕呀!! 我都諗唔到呀!!!

超飽

星期日, 上左小狗屋企, 目的有3個, 第一就係慶祝小貞貞生日, 第二就係食大閘蟹, 第三就係探下好冇見一排既小狗BB!!

正所謂各有各忙, 原先約人2點半集合諗住一班人去品下茶, 點知奶奶當日打電話黎話岩岩開完會覺得病病地, 費事感染到小狗B, 所以就缺席, 而主角小貞貞就發揮"有異性冇人性"既功能, 美其名話去買自己個份生日禮物, 實際係同佢位男友仔拍拖!! 最後得返我, Jackie同Lingling, 3條友就索性去茶餐廳食tea就算啦!! 今晚食飯主菜係大閘蟹, 但原先本身有幾位仁兄(包括奶奶)都唔食得蟹, 所以奶奶就提議包餃子!! 問題就係呢度發生啦, 負責買餃子皮既lingling一朝早就係屋企附近買定d餃子皮, 但係突然間收到奶奶缺席消息就大為驚訝, 因為座座各位, 除左奶奶之外, 冇人識整個餃子料!!

已經清潔左既大閘蟹~~

整熟左既大閘蟹~~

既然係咁大家就索性取消唔包餃子, 轉食打邊爐!! 岩晒, 因為, 平時奶奶連打邊爐呢個活動都唔太recommedment，依家佢唔係度, 我地可以名正言順打邊爐啦, yeah!!!

食完蟹~~

再打邊爐~~~訓飽就....

食~~

既然決定左打邊爐, 食完tea, 當然要去街市買打邊爐材料啦, 唔知係唔係岩巳轉冷, 周圍d人都好似我地咁買打邊爐d野食!! 由於怕眼寬肚窄, 加上本身已經有大閘蟹同埋小貞貞個生日蛋糕打底, 所以買打邊爐野食時都唔敢買咁多, 例如去到人地買魚蛋個d舖頭個時, 我地都係每款幾粒幾粒咁買, 哈, 當然咁買, 我地最後岩岩好食得晒d野食, so good!! 講下小狗BB, 嘩, 家陣佢又好似大左幾倍咁呀, 可能佢阿爸阿媽愛護有加既關係啦, 因為我見到BB佢岩岩先訓醒覺, 工人就餵佢食粥仔, 食完粥冇耐就轉頭再食奶, 仲係講緊7安奶喎, 唔怪得之BB咁鬼大隻啦!!

大公司大旅行

話說, 本人公司上星期五舉辦一個名為"Fun Day"既活動, 何謂Fun Day, 其實年年活動都唔同既, 今年就係全公司上下(3百幾人, 當然有d人係冇去啦)去一個叫綠田園既地方活動一番!! 呢個function簡直似秋季大旅行咁呀, 成班人柴娃娃去玩, 大公司就有d大公司特別之處!!

活動之一:自製麵包~~

是日Lunch Box: 吉野牛肉飯~

大家冇睇錯呀, 我地去Fun Day個日係星期五黎架, 閒日唔駛返工之餘, 仲可以到郊外玩下, 呢d就係正宗既Happy Friday!! 講番當日行程先, 首先, 我地當日部分同事就係九龍塘火車站等, 有旅遊巴送我地到目的地, 話晒綠田園係粉嶺個頭, 如果冇車接送, 要大家自己坐車去, d人真係啋你都有味!! 係 九龍塘上車之後, 坐左大概一個鐘左右既車程就到左目的地!!

活動之一: 農場參觀!!

玩完, 收工!!

一踏入綠田園既範圍就見到四周圍都係d綠悠悠既草呀, 葉呀, 真係好似回歸大自然咁!! 我地當日當然唔止係參觀綠田園咁簡單啦, 係綠田園入面仲會安排一d活動俾我地一齊玩下, 例如: 整下麵包呀, 整再造紙呀, 農地實習呀, 由朝玩到大約3點左右, 之後就再坐返旅遊巴出去, 成日既行程就完晒!!

出返市區都只係大約4點左右, 由於時間尚早(因為平時大家既放工時間為七點至八點, 所以覺得4點放工, 真係好早), 所以就決定成team人一齊去唱k, 成班人唱k好開心, 最重要係第一次join佢地成班人一齊去玩, 真係幾好, 難得大家係office hour之外既時間一齊去玩, so cool!!!

路.........一起走

2009

今日老媽不知何處拎左個年歷返黎, 同我講一講, 下年新年提早左好多, 一月尾已經係新年啦!! 再望一望個年歷, 嘩, 死羅, 下年既2, 3, 6, 8, 9 & 11月, 係呢幾個月份入面, 整整成個月入面係一日紅字都冇!! 可能上年同前年用左d紅字假期quota(因為我記得上兩年都有好多紅色連假), 今年就要受返冇假期既痛苦, 下年11月就係大日子, 話時話, 時間好似過得特別快, 有時真係幾矛盾, 有時又想時間過得快D(因為荷包到糧尾), 但係又唔想太快(因為要考牌, 好多野都未prepare好)!! 煩惱, 煩惱!!!

新地方

自己個位就係咁啦!!
成間公司都係冇partition, 用一望無際黎形容, fit晒!!!
自己個位背面就係對住呢個景啦, 都算唔錯!!

岩岩又去左新地方 - 私人公司是也, 邊間就唔開名啦, 依家公司位置係金鐘, 金鐘即係甲級寫字樓集中地, 再加上新地方為一間國際大公司, 所以依家返工都要著得整整齊齊, 要著恤衫西褲打呔加埋西裝褸, 之前返工都係是是但但, 求求其其唔駛咁整齊, 家陣要著成返工咁都唔係咁慣, 不過家陣著左幾日, 感覺上好似著校服咁, 著慣左都幾咁啦, 冇咩特別!!

呢幾日基本上同事們都忙自己野多, 都唔係分到太多野俾我做, 有時, 就唯有自己睇下自己d notes, 呢度有樣好既就係有電腦, 有電腦既最好就係上下網啦, 當然就唔可以日又上夜又上啦, 不過係悶個時, 可以上下網都係一個幾好既消磨時間既好辦法!!

除左係大公司有自己既電腦同埋可以上網之外, 呢間公司可能有太多老外同事, 所以係pantry既雪櫃入面有好多罐各口味既汽水 - 可樂, 雪碧, 新其士橙汁, 西柚汁, 各式各樣都有, 完全係唔駛錢架!! 隨便拎黎飲都冇問題!!

兄弟

唔係講笑, 終於有機會做人兄弟啦! 上星期六, 牛牛同堅結婚, 結束佢地13年既愛情長跑, 13年都真

係唔講得笑!! 由於牛牛佢地一早叫我幫佢地做結婚統籌(好明顯牛牛都係想煩少一樣野姐), 既然牛牛叫到, 又咁睇得起我, 再加上十幾年朋友又點會托佢手肘呀, 由一開始既draft schedule到最後終極schedule, 前前後後都改左8次先完成得到, 好彩到最後都攪得掂!!

係星期六之前個3日, 咁岩撞正幫人考牌, 晚晚都成2,3點先訓真係冇左半條人命, 好彩星期五(即牛牛結婚前一晚), 1點半(零晨)就有得放工, 如果唔係, 我第二日肯定成日遊魂!!

食個靚早餐先去做野!~~
成班兄弟幫手佈置花車!!
養到佢咁大, 臨結婚前都仲要幫手打埋呔!!!

由於牛牛既要求所有兄弟一朝早8點半係男家屋企, 等人齊先出發, 所以一朝早七點鐘, 訓得o個4個鐘又要起身, 呢一下真係比死更難受! 好彩星期六個時岩岩開始起北風, 所以成日著住套西裝都唔會覺得好熱!! 9點鐘所有兄弟到齊, 所有人先浩浩蕩蕩去附近既茶餐廳食個早餐先, 食飽個肚先夠力幫新郎哥搶到新娘返黎架麻!! 食飽就主花車先到, 唔駛講就當然係要佈置下架花車啦, 其次既當然係唔少得由攝影師同新郎哥影下相, 又拍下佢同d兄弟合照呀!!!
成班兄弟係女家樓下既合照!!

臨上樓玩遊戲前, 睇新郎哥幾緊張!!

影完相之後, 就係時候出發到女家, 其實今次schedule既都算係幾鬆動下, 因為牛牛話出門既好時辰係下午既1點鐘, 所以即使11點上到去女家既時候, 都仲有大把時間同班姐妹玩遊戲兼新人敬茶!! 女家重點節目當然係班姐妹同兄弟玩遊戲啦, 不過講開又講, 班姐妹對我地都尚算不俗啦, 玩既遊戲都唔係好變態, 只係一般普通既game!! 所以我地話咁快就過關, 順利幫新郎哥搶到新娘子啦!!

真係餓到飽, 由朝早既早餐到差不多成2點幾先有得食LUNCH!!
姐妹們幫手準備夜晚既工作~~

由於時間要係1點鐘好時辰先出門, 所以接完新娘之後仲有好多時間留係女家度影下相!! 等到1點鐘出門, 我地就直接上酒店房啦, 由於牛牛係酒店擺酒, 酒店送左一晚房俾佢地, 而順理成章, 費時新人走黎走去, 男家敬茶環節都係留係酒店都攪埋!! 新人敬茶, 我地呢班兄弟姐妹可以暫時休息一下, 到酒樓食下野又再醫下肚!! 食得野黎都已經差不多3點左右, 食完成班兄弟姐妹冇所事事, 於是就走返上酒店房度休息下, 順便為夜晚既婚廷作準備!!

4:30p.m交到個場~~

酒店準時4:30p.m交場, 達達就負責同d backdrop工作人員聯, 阿文就負責酒水個方面!! 而其他兄弟姐妹都有各自工作係身, 真係辛苦晒羅!! 而我呢個大打雜都係走黎走去啦, 可以話係冇野做, 但係又好似好多野做, 係今次既婚宴上, 我明白到朋友既重要性, 如果冇個班兄弟姐妹幫手, 真係未必攪得成一個咁大型由朝到晚既大型活動!!

大家都玩得好high, 不過我就攰到爆, 坐左係度睇佢地唱K就算!!

最後, 當然係順利完成個婚宴啦, 之後, 堅&牛牛就請一班兄弟姐妹就一齊落去左卡拉OK作慶功之用!! 當中除左班兄弟姐妹之外, 仲有部份係D中學同學仔, 雖然已經係2點幾3點, 不過成班人都玩得好開心, 而且仲點埋D快歌, 成班人又跳又叫, 開心到爆!!

最後, 祝堅&牛, 再一次永結同心, 白頭到老!!!

No Music No Dream

呢個係漫畫, 再對比返電影做型真係扮到十足十!!

今日去左睇"爆粗BAND友", 之前係d漫畫店度都睇過呢本漫畫既其中一, 二期, 以佢既畫風就真係.....不堪入目, 不過, 個時已經聽過呢套漫畫係日本已經係好好買, 銷量極高, 所以即使佢係畫得唔好睇都睇左二, 三期!! 開頭都冇諗過松山研一扮得傳神, 之前見佢係"死神筆記"扮L個時都已經覺得好勁, 點知黎到呢一套爆粗BAND友扮得仲似!! 今日同Anna睇呢套戲個時勁笑, 平時佢睇d笑片都冇笑得咁勁, 今日佢真係可以用"笑爆咀"黎形容, 可想而知, 呢套戲真係幾好睇!!

小食會

多豐富~~

上星期四晚, 萬聖節前夕, 原先諗住係STUDY GROUP, 不過mandy話不如大家整d野食返去, 可以一邊溫習一邊食野, 當係順道慶祝萬聖節, 雖然我都未聽過有人因為慶祝萬聖節而整野食, 不過我諗當係大家聯誼下都不足為過呀!!

所以係星期三晚個時, 去睇完"雷霆喪星"之後, 就拿拿臨去超級市場買d食材, 今次我就被委派整"白汁芥末炒烏冬", 一來本身之前炒過同類食物, 只不過係由烏冬轉左做意粉, 一樣米養百樣人, 所以我就照做可也!! 講下套"雷霆喪星"先, 講真呢套笑片, 比較慢熱, 係頭大半part既劇情推得好慢, 可以話係有少少悶既感覺, 但係當講到佢到入到去人地既營地個時, 要救返賓史迪拿個時, 劇情就開始進入高潮, 但係個時成套戲都已經過左差不多一大半, 後半part既笑料都算係相當不俗, 我諗如果大家想睇既話都可以留返出碟先去睇都冇所謂~~


原材料是也~~
製作進行中
食材準備, 待用!!
製成品, YEAH!!

夜晚, 返得屋企, 沖埋涼, 開火整野食個時都已經12點, 所以要快快手要整野食, 好在之前都整過, 唔會太拿手唔成勢!! 而且屋企有兩個爐頭, 所以整起野食都可以左右開弓, 話咁快只係用左15min就整起左兩兜炒烏冬啦, 而且味道不俗, 唔錯唔錯!! 係study group個時, 都好豐富呀, 除左我既炒烏冬之外, 仲有人整蜜糖雞翼, 蒜蓉炒雜丸, 有人唔得閒整野食既就買左d蛋撻, cookie, 同埋砵仔糕, 哈, 當然啦, 最後大家都食到飽飽咁返屋企啦!!