[中文字幕] 英國星光大道 Susan Boyle 感人演唱 驚艷全場 I Dreamed a Dream

今朝聽"晴朗的一天"(家陣朝早出門口, 多數都係聽住手電個收音機返工), 林海峰介紹岩岩係外國既星光大道出左一位一夜成名既女仕, 佢年已47歲但係依然有佢既夢......終於俾佢實現到!!!

大家可以去youtube睇下, 真係幾好睇!!

http://www.youtube.com/watch?v=izucgB-lBaI

近日

由於工作關係, 將會係不同既地盤工作, 岩岩上星期係上環既地盤返工!! 咁岩係呢幾個站都會同一位同學仔一齊返工, 話晒有個伴做咩都開心d!! 原先同同學仔商量過, 難得過黎上環返工, 所以想順道食下上環個邊d美食(sch as: 九記, 蘭香園, Burgar Republic............) , 不過, 事與願違, 每逢Lunch時段, 同事們都熱心邀請一齊食飯, 攬到我地個美食團報銷左啦!!

黎緊下星期就要去屯門返工!! 山長水又遠呀!!

仙樂飄飄

岩岩係網上見到呢段片, 好得意, 成班人係火車站聞歌起舞!! 香港唔知會唔會有d咁既情況出現呢!!

看海

岩岩個星期日, Anna話想出去散心, 散心好去處當然係去海邊聽下海聲relax一番啦!! 原先一心就諗住去大浪灣, 一去到筲箕灣巴士總站個時咁岩有架巴士, 佢就岩岩開, 我就問司機係唔係去大浪灣, 點知佢話個日冇車開去大浪灣, 如果要去最多就係係石澳行過去羅, 都只不過係十零分鐘姐!!! 既然一場黎到, 又冇奶油去架!!

去到石澳落車之後, 就跟返條車路行返轉頭, 司機叔叔所言非虛, 果然係15min就行得到去!! 由於家陣仲係初春, 仲係有少少陰陰涼, 所以係沙灘度都唔係特別多人, 記得之前同阿牛阿達佢地係夏天個時黎過呢個沙灘一次, 全場爆滿, 真係插針都插唔入!!! 今次黎到都係d鬼鬼多, 不過係我同Anna舖好地"席"之後, 突然間俾我眼尾望到係距離我大約十米既地方, 有兩位外籍人士係度抱抱攬攬咀咀, 咁呢d動作係外國人黎講都係好正常, 不過問題係個兩位係男人黎架!! GAY我可以接受, 不過, 最好唔好係公眾場所做d太親暱既行為!!! 佢地真係訓左係沙灘度攬得好實, 其中一個仲要爬左係另一位男士身上攬得好實!!

咁當然我同Anna都只係係咁e望左兩眼就算, 不過, 當隔左冇耐之後, 我地諗住再昅下佢地咩情況(根本就係八掛!!), 佢地已經唔係度走左人, 我諗佢地係咪已經情不自禁已經去左"乾瑤柱"..........不過, 事實証明左一點就係, 港島區既沙灘真係開放過九龍區既沙灘!!!

草蜢忘我演唱會

海南雞飯 + 叻沙 + 串燒(雞+牛+豬)

草蜢演唱會依家好似仲係做緊, 不過早係上星期四, 我同Anna已經一早睇左佢地既首場, 呢一場係加場, 不過由於紅館檔期爆得也, 所以呢個所謂既加場就加左係正場既前一日!! 未入場前當然係要去食飽飽先啦, 之前係openrice見, 係尖沙咀呢間好時沙嗲長期排No.1位置, 既然咁岩黎開呢頭就順道去呢間野食下試下味啦!!

先講一講呢間餐廳, 佢既位置係好時商場, 好明顯, 就咁講個名你根本就唔覺尖沙咀原來有間咁既商場, 其實呢個商場本身人流已經係少到無論, 即使行到入去你都唔覺入面有咩野可以行同埋買, 所以入得去呢個商場既人, 大部份都係去呢間餐廳食野!! 呢一間餐廳, 個個話好食既都係個海南雞飯, 不過, 就我而言, 個海南雞又唔係人地講到咁滑, 個油飯都唔係想像中咁好味, 而個d串燒更加係溫溫吞吞咁, 好明顯應該係已經一早整定, 仲要係冇熱住佢!!! 反而最好味既就係個喇沙, 平時d喇沙都係有少少辣辣地, 呢度個喇沙就唔係喎, 除左唔辣之外, 佢仲有種好濃既椰汁味, 個味道好香滑!!! 埋單3樣夾埋$130左右, 兩個人黎食, 總算不錯!!!
路經紅館時睇到草蜢的大型海報是也~~
眼利既Anna一眼到個帳幕就已經估到今次演唱會主題以馬戲團為主, 勁呀!!!
蔡一傑跑左上觀眾席度, 行左大半個圈!!

食飽出發, 第一場, 當然多人啦, 不過再正確d黎講, 應該係七場都爆晒!! 不過眼望四周都冇咩後生仔女(i mean 十零年歲個d!!), 咁都係既, 黎得聽草蜢都係上一輩既人, 聽既都係情義結!!! 岩岩講左, 黎得聽既都係因為情義結, 所以草蜢係演唱會度除左一至兩首係新歌之外, 其餘都係舊歌, 講真, 如果你唔唱舊歌, d人真係未必會黎聽佢地唱歌!!

全晚主力分左幾part, 其中一part慢歌一part, 快歌當然又有一part啦, 中間仲有一part就係返唱梅姐既歌, 其實係呢一part入面d歌真係幾好聽!! 雖然對上一次佢地開演唱會個時已經係兩年前, 不過話時話, 我感覺上佢地好似每一年都會開幾場咁, 感覺上好似成日都開, 都幾密下!!

好時沙嗲
地址: 尖沙咀麼地道63號好時中心144-148號舖
電話: 2739 9808
菜式: 星馬菜

高質素住家菜

計分板是也!!! G - Gary, J- Jessica & Jaemi, T - Thomas, A - Alan, B - Bear
主人家Jaemi~~~

其實都已經係一篇好耐既日誌, 因為又係忙於左溫書, 右睇notes, 前去寫log book, 後去寫case, 真係幾十萬樣野等住去做, 再加上腦筋緩慢, 做起事上黎真係事倍功半!!!

不過, 都要講一講呢一篇日誌先得!!! 話說早早早上上上星期六, 正正為jessica慶生, 原先一早plan左話上去jaemi屋企整野食(當然, 實際上係jaemi整, 我地食啦!!!) Jaemi一早為我地book左佢club house既保齡球場, 先黎一場熱身先去食野, 但係有部份人因事忙未能出席, 所以就得Jessica, Jeami & Tam, Thomas, Bear & Me作大比併, 唔駛講我地呢d運動熱愛份子, 當然係可以輕易勝出啦, 可憐既主人家Jaemi同埋壽星女Jessica完全成為炮灰, 慘敗係我地手上, 一早名言輸者要請其餘勝方食雪糕!!
聖鬥士星矢 ~~~~~~~~
大家興高采烈睇住星矢~!
辛苦晒男主人&女主人, 當然仲有壽星女同場顯技啦!!

打完"保零"就拿拿臨上返屋企, 因為主人家仲有好多野食仲係"烹調中" 如果再唔上去整既話, 分分鐘十點都未有得食呀!!! 不過人多唔一定係好辦事, 知書識禮既我地完全深明呢個道理, 所以一上到屋企之後, 大家都兩話不說坐定定係sofa前面乖乖地睇電視, 由得主人家(阿譚&Jaemi)&壽星女係廚房大顯身手!!
好多野食呀!!

經主人家一輪大作戰之後, 係9:00PM左右既時間終於有得食啦, 大家唔好以為真係一般既家庭住家菜, 講起黎都勁啦, 今餐既食物既美味, 款式程度完全可以比得上坊間一般既餐廳!! 先講一講有d咩食先: 芝士煙肉焗薯皮 o 白汁火腿蘑菇意粉 o 日式咖哩薯仔蔔白配白飯(白飯另上) o 清酒煮蜆 o 清蒸白灼海蝦 o 印尼牛肉串燒(另配秘製醬汁) o 灼時令菜蔬 o 入味鹵水雞中翼!!!
最後, 大家食飽飽之後, 仲走去一齊睇"林海峄 - 是但大合唱"

Wahahahha, 係唔係只係睇呢個食物材單已經覺得好勁呢, 唔止單單睇表面勁, 實際連內裡既味道都確實係一流!!! 最難得既係係最後埋單個時, 原來位位只需要夾$67大元, 嘩, 呢d野, 好明顯真係食功夫, 我地都話架啦, 食咁多野都係$70都唔駛, 真係抵到難, 不過就真係辛苦晒主人家Jaemi & Alan, 除左借個屋企咁樣俾我地反之外, 仲要你地動手動腳整野食俾我地, 真係唔話得呀!!!

玩樂@元朗 (下)

我地叫呢款係牛奶味既綿綿冰, 上面再淋上葡萄糖醬 + 底層舖左梅子魔豆 + 蘆薈粒 + 椰果!!

坐完街渡出返去元朗市中心, 我地係附近踩多幾個圈就拿拿臨去還車啦, 因為元朗仲有大把野食待緊我地架麻, yeah!!!! 踩到身水身汗, 成身熱辣辣, 最好當然係去食返個冰凍野食cool down下成個人先啦!! 首先我地先去離單車舖不遠既地方食個"綿綿冰"先, 係呢間舖頭入面除左平時食既普通甜品之外, 佢仲有款好特別既甜品食, 就係綿綿冰!! 千萬唔好以為綿綿冰就等同一般既刨冰, 當你食落去個時, 同平時一般既硬卜卜碎冰式刨冰係完全兩回事!! 由於陣間仲有好多野等住我地去食, 所以我地只係叫左一款綿綿冰share黎食就算!!! 如果大家有機會入去食, 大家記住要試個d魔豆, 佢d魔豆既口感好得意, 你一咬佢就會爆開!!

其實呢間舖頭位置就係B仔涼粉隔離~~~
係menu上面寫"滑雞排" - 其實係指有雞皮既雞排就稱為"滑雞"是也!!

食完甜品warm up, 於是就再去食多樣小食再熱熱身先得, 我地行到去大坑渠個邊, 聞說呢度有間食大大塊雞排間小食舖, 又係個句啦, 一場入到黎又點會唔試下先得架!! 由甜品舖行到黎呢度先發現呢間小食店既位置正正就係B仔涼粉既隔離!! 開頭諗住佢以台灣大大塊雞排作賣點, 難食極都有個限度呀, 點知.......唉!! 一去到舖頭, 見到佢岩岩新鮮熱辣炸起左幾塊雞排, 我地諗住今次有運行啦, 平時呢d炸物, 唔係新鮮食落去, 味道真係差一截!! 等如你將老麥d薯條放係度一陣淋晒先去食既情況完全一樣!! 當我滿懷期待咁咬落品嚐呢件美食, 頂, 一件完全冇味既雞排, 雖然上表面已經灑左一d味粉, 不過個d雞本身係完全冇味道, 嘩, 自己講真, 都唔知咬緊件咩野黎!! 所以大家都冇需特別入去搵呢間野食!!

超大碗既蟹子沙律~~~當麵食都得呀!!
點左大約12件壽司~~~件件都份量十足, 飯底足料, 上面件刺身又新鮮兼大件!! 左上角個碟係响螺刺身+右上角個碗就係食極都食唔完既大大碗蟹子沙律!!!
天婦羅炸蠔~~

之後, 我地就去左間隔街食日本野啦, 呢間酒泉係之前anna提過話要黎食, 因為佢地d野食非常大件夾抵食, 當然都係好好食啦!!! 我地大約5:15pm入到去, 待應話, 六點前仲有得叫下午茶優惠野食, 望一望d下午茶menu, 嘩, 真係好抵食喎!! 尤其係個蟹子沙律, $19之麻, 平時係出面d日本料理食都係得個細細碗, 但係呢度就唔同啦, 分分鐘仲同碗拉麵既分量有得fight!!

之前都上過open rice見到其他人都講過呢度d野食都好大件, 分量好多, 不過人總係貪心, 原先我地已經叫左12件唔同款既壽司 + 大大碗蟹子沙律 + 仲有個响螺刺身!! 不過, 待應臨六點前再行過黎話, 特惠下午茶last order啦, 問我地仲叫唔叫野, 哎呀, 就係咁我地就口多多手多多咁點多一樣野食 - 就係天婦羅炸蠔(menu話得5件, 唔知點解送到黎有成6件)!! 就係咁, 我地又再一次食到頂頸頂喉嚨!!! 兩條友, 食左咁多野, 埋單其實講緊都係$200多少少, 呢度仲要係免收加一, 如果我地唔叫咁多野食, 分分鐘百零蚊落樓都得呀!!

食飽飽之後, 就係元朗附近行下, 消化消化!!! 一天既元朗遊係不斷食不斷食既情況下完結啦!!

(完)

綿綿冰甜品屋
地址: 元朗建業街59號慶年大廈3號地下
電話: 2470 9083
菜式: 港式、果汁、甜品/糖水

大雞大超級雞排
地址: 元朗金輝徑金禧樓地下5號鋪
菜式: 台灣菜

酒泉日本料理
地址: 元朗教育路81號元達樓地下
電話: 2479 8618
菜式: 日本菜、壽司/刺身

玩樂@元朗 (中)

嘩, 食埋個好到底既麵之後, 真真真真真係飽到上頂, 係時候搵單車出發去做做運動消化消化先得!! 對上上一篇講左搵車既經過都唔係度再講多次啦!! 終於俾我地搵到有單車出租, 唔理咁多, 出發先再算!!

其實南生圍路唔係單車徑, 沿途時不時都會有車係你尾, 所以踩個時要非常小心!!

係河上面, 其實只要細心d睇下就可以見到d鴨仔係河入面游水~~

係單車舖一轉出去已經係元朗西鐵站, 隔雜就係新元朗中心, 只要一直踩, 話咁快就會去到博愛醫院架啦!! 過左博愛醫院有理冇理再繼續向前踩, 應該好快就會見到南生圍個指示牌, 跟住轉入去南生圍路就岩架啦!!


開頭因為唔係太識路, 一路踩, 點解踩極都唔到人地成日拍戲, 影相好鬼靚既地方, 唔通自己不自覺咁行錯路, 原來其實只要沿住南生圍路踩一段幾長下既路段, 去到尾就可以去到d人成日話好靚既地方啦!! 我地一場入到黎呢度, 唔駛講就係四周圍影呀影, 起勢咁影, 冇執輸咁!! 當然, 除左我地之外, 其實都仲有好多人係度影相同埋欣賞風景!! 不過, 我地拖住架單車, 有d地方就唔係咁方便行, 所以就係南生圍外邊影下相就算, 冇再特別行入去!!! (其實另一個重點係我地仲有下場, 就係趕住出去再食野!! yeah!!)


過左街渡先影!!! 我地係對面過黎架!!
落左船再踩返出去街口就見到呢個指示牌, 向左轉返出去踩多陣, 就係元朗西鐵站啦!!

再沿住個指示牌有街渡過河, 一場黎到又點唔會放過搭下出名既街渡過河呀!! 位位$5, 兩岸基本上長期都會有人等上船!! 揸船伯伯當然唔會放過任何賺錢機會, 行多兩轉, 快快手賺多幾蚊呀麻!! 落船之後, 再沿路轉返出去, 話咁快就可以到元朗西鐵站啦!!

其實, 大家唔想踩單車(or踩太長路段), 又或者想行入去南生圍, 其實只要係元朗西鐵站後面直接行入去都可以, 先入舊墟路之後, 再轉入山背路, 話咁快就會見到上面個指示牌架啦!!

(再待續.......)

玩樂@元朗 (上)

星期六一朝早就同Anna搭巴士直接入元朗, 對上一篇講過, 人生路不熟, 入到黎開頭個時搵唔到單車租, 所以就四周圍搵下, 入得黎元朗又點會淨係踩單車咁簡單, 當然係順手搵下d好野食啦, 所以又係晨早係openrice度搵定d好野食既資料, 咁岩一路搵單車租既時候, 經過其中一間好野食, 橫掂經過加上又就快到lunch, 拿拿聲入去醫一醫個肚先再搵車先!!
間舖頭既裝修有d"搶"~~~ 掛晒燈籠, 吊扇!!!
十寶丸 + 腩雜十寶
特別呈獻 - 牛之四寶: 牛鞭 o 牛春子o 牛開心 o 牛子

呢間舖叫"嘉麗園潮州粉麵餐廳", 人家出面有咩四寶麵啊, 呢度就勁啦, 四寶就當然有啦, 呢間餐廳連十寶都有呀, 其實一下說穿, 所謂既十寶就只不過係雜丸, 除左呢個十寶之外, 仲有另一款十寶就係"腩雜十寶", 呢個都唔算勁呀, 係我等食期間四圍望下d牌, 突然見到有"堅"野, 呢度居然仲有牛鞭食個喎, 除左牛鞭, 仲有咩牛春子, 牛開心(其實我都唔知咩叫係牛開心!!!), 我於是問anna, 不如我地賣條牛鞭用條竹籤串起佢, 再係條街度食, 都幾過癮, 當然, 佢就彩我都傻, 最後都只係叫左兩碗十寶食就算!!!
好到底~~~
雲吞伊麵~~~

食完兩碗"十寶"基本上都已經飽左7, 8成, 不過, 過左唔夠兩個街口, 我地又見到元朗名物之一: 『好到底』, 雖然頭先個兩碗"十寶"食完已經飽到上喉嚨, 不過一場黎到, 再加上之後應該都唔會再路經此地, 於是, 再入舖頭再食多餐, 其實係"好到底"入面食野, 其實都唔會怕飽得好多, 因為佢地本身個碗麵都係好細碗, 如果係一般未食野入黎既男士, 分分鐘食兩至三碗先夠飽, 所以呢, 我地呢D入黎淺嚐兩碗就足夠啦!!

"好到底", 出名係佢D麵足夠彈牙, 麵冇梘水味, 而且老店都有幾十年歷史, 唔入黎食返一輪, 都對唔住自己, 講到麵, 佢又真係冇咩枧水味, 不過可能頭先食飽左7, 8成攪到D味覺鈍晒, 反而食左佢個伊麵呢, 又真係唔錯喎, anna都讚呢個伊麵整得幾好, 臨走, 佢仲想買返d伊麵返出去做手信添!!

(待續........)

嘉麗園潮州粉麵餐廳
地址: 元朗康景街利景樓5號地下
電話: 2476 6882
菜式: 潮州菜、中菜館、粉麵/米線

好到底
地址: 元朗阜財街67號
電話: 2476 2495
菜式: 港式、粉麵/米線