我的床呀!!

眨下眼就俾人攻佔左啦!!

我的兩位好甥女, 每逢星期六都會晨早流流噪醒我, 俾我訓多陣都唔得!! 正如上面個張相一樣, 大家都有眼睇到, 只要個朝我一起身走去刷牙洗面, 轉個頭返房就會見到自己張床就會變成咁既樣, 什麼圖書, 公仔, 煮飯仔玩具.........統統都已經霸佔左我張床, 想攤返床恰多陣都唔得!!! 佢地就玩得過癮, 最慘就係星期六我都要陪佢地都樣咁早起身先訓呀麻!!

講開又講, 唔知係咪凡小朋友都係咁既呢, 平日返學既日子, 要個兩隻野起身簡直係難過登天, 要鍋摌先摌得到佢地起身, 但係一到星期六&日, 佢地就會自自然然, 自動自覺咁起身!! 其實我細個讀小學個時都係咁, 一旦個日唔駛返學, 個朝早就自自然然會好鬼早自己彈左起身, 完全唔會話想訓多陣賴床!! 其實個時都諗過點解, 好可能係一來知道個日唔駛返學, 兩來星期六&日既朝早都會有好多卡通片, 一星期得個一次所以條件反應會自動自覺自己會早d起身都唔定!!

聊勝於無

琴晚睇天文台仲以為今朝已經要返工, 好彩7:45a.m起身個時仲掛緊8號風球, 睇多陣"香港早晨"就拿拿臨入房再訓過, 訓到頭先11:00a.m擦完牙, 洗完面, 上網昅一昅, 話咁快就轉返去3號風球, 咁都好, 總算放左個半日假!!

你睇d樹都歪晒!!

轉頭就要返工, 不過頭先望一望落街好似仲係好鬼大風!! 好彩既就係冇咩雨, 如果唔係拎住把傘都冇用, 肯定濕鬼晒!! 我諗依家都應該有好多人著緊衫準備返工, 仲有既就係一陣肯定係全世界都搭車返工, 四周圍既交通工具都大排長龍!!

深宵劇場

之前講過, 家陣夜晚12:15重播返經典劇集"衝上雲霄", 家陣劇情講到全劇我覺得最好睇亦都係最精彩既一部份, 就係成班後生仔女去左澳洲training, 一來可以睇下澳洲既風景, 兩來呢d成班後生柴娃娃奮鬥努力讀書, 其實不嬲我都幾buy呢d劇情!!

不過如果要成個禮拜都keep住睇到成點鐘先訓, 第二朝肯定死硬, 所以都係一個星期睇2,3次就算!!

12:15 a.m又係睇電視既時間啦!!yeah!!

揸流攤

開頭明明就話打唔成, 點知一個屈尾十又轉返過黎!! 大家都知我係office係冇電腦架啦, 出面街係咩情況真係唔多知, 而且自己個位又係d死角位唔多近窗口, 出面行雷閃電又或者曬到嘔, 如果唔係落到街個一刻真係唔多知!! 就係臨放工之前聽到位同事話就打緊三號風球, 但係今晚要去另一邊office上堂, 都係要拿拿聲走去上堂先!!

去到另一邊office之後, 立即借部電腦上去天文台個web-site昅一昅, 見到個風好似會打埋黎, 仲要係應一應個隻, 今次心諗實冇死啦, 聽日肯定唔駛返工!! 頂, 頭先返到黎屋企就聽到電視機話天文台11:00p.m左右就會掛8號風球, 一聽到呢個消息, 心諗 - 賴屎, 咁早就掛, 肯定捱唔到去聽二朝啦!! 即係第二朝都係要返工! 果然上網再昅一昅個天氣圖, 個風到第二朝應該已經遠離左本港, 唉, 今晚都係早d訓, 聽朝都係疊埋心水返工罷啦!!

食飯唔知米貴

家陣d人成日都係度講通漲, 由於自己唔係家庭煮婦唔駛成日走去街市買餸, 真係唔太知家陣d野貴成點!! 星期五放工, 早左返屋企, 老媽叫我落樓下百佳買返兩袋米返屋企入貨, 開頭佢同我講:『買8公斤金象米 -特價 $88.9, 好彩唔係上星期買, 上星期買要成$90幾蚊一包!!』, 嘩, 我聽一聽, 唔係呀, 家陣一袋8公斤米要成接近$90架, 仲要係講緊特價左個隻!!

我記得之前我早半年前買米好似都係大概只係$70零蚊左右, 家陣咩事, 突然間升得咁誇張!! 跟住就再走過去隔離間酒樓昅下d燒味又有冇加價啦, 嘩, 仲勁!! 家陣d叉燒要$36/半斤, 又, 我舊時去燒味檔買叉燒, 多數都係話廿蚊叉燒就足夠拎返屋企加餸, 依家咁講, $20咪最多得o個1/4斤叉燒, 份量我諗咪最多可以俾我用黎煮公仔麵做餸就差唔多, 如果當斬料加餸, $20叉燒可能只係得個幾塊, 夾兩野都已經冇晒鬼成!!

何等天氣

沿路行去球場個時都已經好鬼好太陽!!

落左成兩個禮拜雨, 即係成兩個禮拜都打唔到波, 難得星期五個天終於開始好返d天氣, 一班朋友仔餓波餓左咁耐就立即約左琴日出黎打波, 原先係攪手提議2:30pm先開始打波, 不過有人提議不如約早d打, 最後我地達成協議就係11:00a.m就係旺角花墟打波, 就係咁, 我地呢班熱血青年就係太陽最當曬既時候出去打波!!

熱到呢!! 差d想死!!

準時既我就當然11:00a.m就去到球場啦!! 不過就有人仲早過我到球場, Kim and Vicent兩位已經一早到左球場射緊波, 其他人都遲左少少先到! 其實係琴日咁曬既天氣低下打左一兩場波, 大家都被個熱烘烘既太陽曬到體力急速下降, 我地每每打完一場波之後, 都要立即走返入去一個瓦遮涼亭度起碼休息返10 min先可以再打第二場!! 我地環觀球場四周, 哈, 原來得我地呢批熱血青年係咁熱既情況下去打波!! 雖然天氣係曬同熱左d, 不過最後我地都打左成3個鐘先走人!! 就係咁, 家陣我個膊頭就曬傷左啦!! wahahahaha!!

不過, 做運動出返身汗都真係唔錯!! 希望快d想約出黎再打波!! 不過最好就打夜晚, 打日頭波, 真係有d辛苦!!

NBA Champion 2008

今年NBA Playoff Final終於完結, 由三位超級球星Paul Pierce, Ray Allen & Kevin Garnett帶領既Boston Celtic總場數4-2贏左LA Laker, 呢個結局非常好, 開頭都有少少擔心呢三位明星級球員, 因為係1st & 2nd round都要同對手打足7場先可以進級, 好明顯係怕佢地3條友體力頂唔順!! 其實一直都希望佢地可以贏到今年既總冠軍, 因為頭先講左, 佢3個年紀唔細, 如果今年都拎唔到, 下年就真係好難講啦, 而且Kobe仲後生, 下年又或者遲多年拎, 都仲有大把本錢同機會!!

最衰今日要出去做野, 如果唔係實留係屋企睇直播, 仲有讚一讚今年無線, 今年NBA Final全部場數都有做直播, 唔錯, 做得幾好!!

生態夜攝

近日時不時都落雨, 係友伴歸家既路途中, 往往都會發現一d蝸牛係度慢慢, 慢慢咁行!! 今晚友伴興之所至, 隨手拎起相機, 同1大1中1小影左相大合照!!!

大小不良近況

老媽獨家泡製 - 菊花茶包去消腫!!

好似好耐冇提過呢兩隻野既情況, 其實黎緊大B就會升上小一, 岩岩上星期六原先係小一派位公佈結果, 不過就咁岩就撞正黑雨, 要順延到星期日先放榜, 好好彩, 總算係入到第一志願!! 都o.k啦!! 早幾日, 唔知大不良攪乜鬼, 左眼冇啦啦生左粒大瘡, 得返半隻眼睇到野, 嚇到老媽立即同佢睇醫生, 點知個醫生講d野仲離譜, 嚇到老媽一身汗, 當然最後就再轉去睇第二個醫生啦!! 依家總算係慢慢消左腫!!

好啦, 講完大不良就要講下小不良, 黎緊9月佢就會讀幼稚園低班, 讀既, 當然係跟返佢家姐一樣"又一村幼稚園"啦!! 兩隻野都算係返晒學, 老媽總算係可以休息下羅!!

波濤洶湧

家陣日頭就有NBA Final, 夜晚又有歐洲國家杯!!(好彩我對足球麻麻地姐!!) 仲有, 仲有, 夜晚無線仲重播經典劇集"衝上雲霄"!! 要睇真係由朝睇到晚!!

生日快樂

沿路都有人陸陸續續入去沙灘
真係幾多人下架!!

星期一為Anna既大壽辰, 原先諗住去海洋公園大玩一番, 主要係諗住生日者當日正日去會係免費, 想試下查實係唔係真係有呢個優惠!! 不過, Anna話已經約左一位小朋友遲d會去海洋公園玩, 既然係咁就唔好去住!! 生日麻! 就應該悠悠閒閒的罷, 去沙灘休息一下合乎理念, 於是我地就去左港島南區過左一個輕鬆生日!!

免費太陽傘一把~~
雖然係有把免費太陽傘, 不過天生都係愛白, 所以友伴都係擔返把傘!!
一把刀仔切, 切, 切.....

首先我地先去淺水灣, 由於之前成個禮拜都keep住落雨, 仲試過有日係黑雨添, 所以今日天氣晴朗, 加上陽光普照(甚至乎去到有d曬既感覺!!), 所以成個沙灘都突然間湧左好多人, 好彩我地算係早黎到, 一早就搵到個靚位, 我地頭頂之處剛好有棵小樹可以作擋太陽之用, 唔駛租把沙灘傘, 攤開張沙灘席係沙灘度, 坐下休息下傾下計, 小睡一番, 休息一番, 不亦樂乎!! Anna一向主張出外郊遊都係少肉多菜, 鍾意食下生果接近大自然, 所以係出發前先去街市買左個哈密瓜去沙灘食!! 個哈密瓜既味道一般, 如果可以將整個哈密瓜放落d水度冰鎮一下, 應該會有種透心涼既感覺!!

小徑沿海而建, 慢慢行, 別一番味道!!
見到隻小狗----大事進行中!!

訓到差不多4:00p.m係時候執野走人, Anna提議由淺水灣旁有條小徑, 沿海而建, 可以慢慢悠閒散步到深水灣, 提議唔錯, 慢慢行下, 見到有人帶住d狗散步, 又見到有d人係度吊魚, 呢d生活悠悠閒閒, 唔錯, 唔錯!!

就係呢間Jenny Bakery~~
呢盒係細盒裝(4 mix), $60~~大約有40件左右!!

之後, 我地去係深水灣就搭程巴士入去赤柱, 之前成日聽聞呢度有間曲奇餅店好好食, 好出名, 好多人買, 難得咁岩入到黎, 就順道買盒返屋企孝敬媽媽!! 有心買呢間餅店曲奇既朋友, 其實係銅鑼灣都有佢既分店, 就係銅鑼灣糖街1-5號銅鑼廣場1樓1047室, 唔駛特登入到赤柱買!! 講返個曲奇, 入口即溶(應該係用鬆化黎形容會貼切d), 口感唔錯, 牛油味好香!!

赤柱夜景幾靚下!!

原先諗住同友伴係King Ludwig Beerhall食返個大餐慶祝一番, 該餐廳係食德國餐, 以食咸豬手比較出名!! 但係Anna為著本人荷包著想, 加上佢又唔係太肚餓, 所以就隨便係百佳個superstore買左盒壽司食作填肚之用!!

最後再一次祝妳生日快樂, 抱歉未能係正日送上生日禮物及安排特別既生日行程!! 希望遲d到妳收到份生日禮物個時妳會鍾意啦!!

Jenny Bakery
地址: 赤柱新街11號1/F
電話: 2813 8568

龍舟日

落船啦!!
十年如一日既長洲碼頭!!

龍舟日冇去龍舟水, 不過就同Anna入左去長洲逛逛, 原先只係諗住入黎行下街, 悠閒一番, 點知岩岩遇著剛剛, 原來係長洲入面都有舉行龍舟比賽, 一場入到黎就順道欣賞下, 因為平時都係係電視機上面睇既多, 好少可係現場睇!!

就係呢條冰凍生果串串~~($13/串)
係d咁熱既天氣下, 當然係多人買啦!!

一入到都未算係人頭湧湧要湧既話, 我諗d人應係係太平清醮個時已經湧飽左, 所以家陣d人就唔係好多, 一貫假期既人數左右啦!! 一落船就諗住搵龍舟睇下啦, 行左兩行發現, 行錯反方向, 唔怪得之越行越靜勾勾啦!! 好彩本身入黎都係一心諗住四周圍行下, 當係逛逛先啦(完全係自我安慰既說話!!)行返去碼頭作起點就再行過, 係行到碼頭附近突然間見到有人拎住支冰凍生果串串, 好似好好味(其實係我地行到身水身汗, 所以睇上去感覺上好似好好食!!), 原來該售賣冰凍生果串串既檔口就係不遠處, 唔駛講當然上去買返串黎食下先啦, 講真個句, d生果可以俾你雪成咁就真係咩味都冇架啦, 不過, 可以解你一時既暑氣就真既!!


食完冰凍串串就繼續行, 係不遠處就已經聽到d鼓聲此起彼落!! 龍船已經係我地眼前, 其實當日既比賽只係去到4:30p.m就結束, 所以我地當時2:15p.m去到既時候, 各賽事都差不多去到決賽階段!! 反而係現場睇d龍舟比賽都唔及係個度現場聽個司儀旁述個比賽仲好, 個司儀只係一味講個隊名, 邊隊行先就講邊隊個隊名好攪笑, 完全冇其他形容詞配合入去!! 由於是夜, Anna因有事要出返去做, 所以就冇係長洲食野就走左啦!!

賤物鬥窮人

嘩, 真係人都癲, iPhone本身已經hit爆, 今日Steve Jobs (Apple’s CEO)出黎宣佈iPhone出3G機, 其實呢個都唔係咩大新聞, 因為之前不嬲都有人傳過, 同時亦都相信iPhone會推出3G機, 因為呢個係市場需求, 大勢所趨!!

不過最重要一點既係, 家陣佢只係售 US$199(8G version), 即係約HKD$1,600, 平到呢, 家陣平時d Nokia, SonyErrsion, 好樣個d閒閒地都要過二千銀, 家陣iPhone先係買$1,600, 呢d咪就係叫"賤物鬥窮人"!!

仲有呀, 家陣佢會係全球性發售, 唔會獨沽一味, 只係美國本土出售, 實行賺盡全世界既人d錢落袋, 係7月11日就會作公開發售, 不過, 我諗一開始都係大把人搶, 朋友們, 如果咁岩電話壞左, 又想換機, 呢個都不失為一個好選擇!! 在我角度又好似唔係咁急, 通常新野出, 除左多人爭之外, 新批既機好多時都會有d問題, 如果忍得手就可以忍一下先, 等d人買左之後, 睇定d有冇咩特別問題先買, 咁就最好!!

Apple Official Website

難得一聚

上上星期六, 去左小菲屋企嬉戲, 我地呢班莊員成日都話約出黎玩, 次次話約都要係起碼用上大半年時間先約得到人, 皆因大家各有各忙, 唔係你要考試就係佢要交功課, 唔係佢已經約左人, 就係有另一個要去飲!! 所以呢, 今次個gathering都已經係兩個月前同大家做定booking!!

基於大家都屬於文靜既一群(言下之意係唔多想出外曬大太陽做運動!!), 而難得小菲終於聽取我既勸告, 由本身堅決唔買Wii到依家已經廣邀各大好友上去佢屋企玩佢部Wii, 我地諗都唔駛諗就上去佢屋企開行冷氣玩Wii啦!! 哈...哈!!

玩Wii都係一個好需要energy既活動, 所以我地lunch先行去飲個茶, 食飽飽先去做運動(打Wii)!! 我地就勁羅, 冇間斷地由下午2:30開始打呀打, 打呀打, 打到成夜晚7:30叫pizza食, 先肯收手!! 嘩, 原來唔經唔覺我地都打左成5個鐘!!

由於之前一直顧住打Wii, 所以就係食Pizza個時就一路食一路傾下計, 吹下水!! 人大啦!! 大家都開始多左好多野諗要plan, 大家好耐冇見一場見面唔會因為太耐冇見而變得生疏, 反而因為耐唔見就講下大家各自所見所聞, 話題真係越講越有!!

感謝小菲是日既招待, 多得你買部Wii同埋俾我地上黎攪攪震, 唔駛左諗又右諗去邊度玩!! 最重要係, 我都話買部Wii係好架啦!!

p.s: 小菲, 麻煩將我係你部Wii既icon影張相send俾我做record, 我個Wii look著實唔錯!!wahahahh~~

環"南丫"島行

上船啦!!

上上星期日一干人去左南丫島(唉! 冇電腦真係慘, 攪到依家先有得打返上上星期既事!!), 行左個輕鬆環島行, 順道食海鮮!! 其實, 廿幾年黎去開南丫島多數都係係榕樹灣個邊玩下, 頂多都係落埋洪聖爺灣個邊玩下沙, 游下水!! 甚少去索罟灣個邊, 今次, 輕鬆環島行就由索罟灣個邊行過去榕樹灣, 成日聽人講由索罟灣行去榕樹灣只需要2個鐘都唔駛既時間已經行得晒!! 所以我地個日就約左下午12:45p.m係碼頭集合!! 搭1:10p.m個班船出發!!

索罟灣全景!!

正所謂一大班人攪下呢d活動, 唔駛下下都只係食夜晚飯聯誼真係身心都健康d!! 其實自己之前就未行過索罟灣, 唔知個邊係咩樣子, 不過, 都上網check過, d人話去南丫島, 最好就係係榕樹灣玩完就行過去索罟灣食海鮮, 不過, 問過今次其中一位團友奶媽(佢自稱自己試過係南丫島又係咁行山, 再食海鮮!!), 佢提議係榕樹灣個邊多野食d, 佢話索罟灣個邊得個二, 三間海鮮檔!! 既然有人試過, 自己又唔識, 當然係信佢啦!! 點知就係咁樣就賴左野!!(容後再談!)

明明就係有成十幾檔海鮮, 奶媽玩野又話得個2, 3檔!!

我地搭完船之後, 係索罟灣碼頭一落船就見到成個碼頭都係d海鮮檔, 仲要連綿不絕個隻, 頂, 奶媽玩野, 又話明明得個2,3檔, 家陣就係咁e數都唔止啦!! 好明顯係呢邊d海鮮檔真係多過榕樹灣個邊好多!! 不過都開左個頭都要繼續行落去, 可能係星期日既關係, 呢度都真係幾多人下, 人頭湧湧!!


其實由索罟灣行過去榕樹灣個邊d山路, 其實係好易行, 而且又有指示牌, 一定唔會唔識行!! 應該咁講, 你有冇聽過有人係南丫島行山會盪失路呀!! 道理就係咁簡單!! 雖然係易行不過我地行下, 休息下, 吹下水, 涼下風, 慢慢咁行都行左2個幾鐘先去到洪聖爺灣!! 正所謂身水身汗, 最她行去呢度最出名既阿婆豆腐花食返個冰涼豆腐花!!

就係呢位婆婆賣到出晒名既阿婆豆腐花!!
yeah!! 滑雪雪既豆腐花!!

食完豆腐花, 我地就走左去南丫島上唯一既風力發電機上面參觀下, 唔係講笑, 以為行上去好易行, 原來大熱天時, 行上去條斜路都係幾係野!! 幾經辛苦終於上到去, 上面果然係好風好多呀, 涼下d天然風, 呢度果然係供風力風車既好地方!! 大家其實可以行到去風車下面感受下佢既轉動, 感覺真係好得意, 因為成日都會凝住成架風車會冇啦啦跌左落黎!!


黎得呢邊榕樹灣食海鮮都預左俾人軟到一頸血, 話晒呢邊得四, 五間海鮮檔, 競爭冇咁大, 自然價錢都有返咁上下啦!! 既然間間都差不多, 我地就是但搵一間近碼頭既去食啦!! 今晚呢餐差不多位位$220左右, 不過我地唔係叫左好多海鮮食, 只係叫左個瀨尿蝦, 肉蟹焗糯米飯, 其餘都係d小菜, 所以感覺上好似唔多抵食!! 不過講真, 成班人一齊坐埋傾計, 食野, 真係此刻無價!!