RSS Feed (xml)
琴日一朝早就去左睇早場, 睇既當然係新鮮熱辣既Mummy3啦!! 早場既賣點唔駛講就係因為佢夠平, 只係$35就可以睇到一場正場戲, 真係抵到爛!! 講返套戲, 今次雖然加入左中國東方元素入去, 但係感覺上佢成個故事都唔係好完整, 始終同對上個二集相比真係差好多, 首先一來女主角原來係今集轉左另一位去演出(我都係入到場先知!!), 失去左親切感, 二來, 今集已經講到男主角Brendan Fraser已經有個好大既仔, 講真, 上集都仲係講緊佢個仔係細佬, 家陣搖身一變就變左個廿幾歲既大人, 感覺就更加怪, 因為完全唔知點解d野會無端端推前得咁快!! 其實要講成套戲既不是仲有好多, 不過, 有一個就真係非講不可, 就係係最後楊紫瓊要叫返醒d長城兩側個d死者起身幫拖, 正常諗咒語應該係諗國語(因為佢拎住既係中國既竹簡書!!), 唔知點解佢又會冇啦啦諗英文既咒語, 完全九唔搭八!!
另外今集有梁洛施, 大家都話佢演得好好, 其實, 我只係覺得佢普普通通冇咩特別, 不過要讚一句既就係佢既英文對白又真係講得好流暢就真!! 呢套戲, 我覺得大家都係可以等佢係無線播個時先去睇都可以, 唔駛咁心急特登入場去睇呢套戲, 如果拎佢同Batman兩套大片比較, Batman就真係好睇好多多多多多多多多!!
新鮮菠蘿腸仔~~
芒果布丁~~
小狗帶埋BB黎一齊玩!!
Lingling屋企對住既景!! 雖然只係內園景, 不過因為係高層, 所以都好好陽光!
晚餐準備中~~
豐富的晚餐啊!!睇完早場, 我地就約左小燕子佢地一齊上Lingling新居參觀!! 未上去之前我地就先去飲茶, 醫下個肚, 食飽飽先上去!! Lingling新居位於黃大仙, 交通方便而且佢地單位係高層十分之好, 最重要係屋企都唔會有多餘既傢俱, 由於傢俱唔多, 所以成個屋企都非常簡潔, 我就最鍾意呢d style!! 簡單就是美!! 感謝Lingling為我地準備左各式小食同甜品 - 腸仔菠蘿(係新鮮菠蘿喎!!)、滷水雞翼、芒果布丁、親手既士多啤利蛋糕, 好好食好有心機!! 記住多多用我地送俾你既微波爐整野食呀!! 夜晚我地仲叫左Pizza同埋KFC外賣返黎食, 位位只需$40已經可以飽到上心口, 又係抵到爛!! 食飽飽我地就一齊排排坐, 睇住高清電視選港男, 成班人柴娃娃睇電視一路講一路睇, 真係幾開心!!!
2 comments:
真係多謝大家賞面上黎我嘅新居,仲有你地送比我嘅入伙禮物-微波爐,下一次你地上黎,我會攪個特色叮叮餐招呼各位~
其實個電視送左黎2-3星期,我都無咩時間坐抵睇,果晚真係好開心,可以咁warm地食下飯睇下電視,仲有bb玩,不過下次我一定會置多幾張"登",因為驚你下次又破紀錄,八個人坐一張sofa :p
lingling: 岩啦, 其實張sofa根本就應該係得我同anna坐就已經o.k架啦, 都唔知點解奶媽同莊貞或者係jackie因乜解究係都要塞入黎坐!!
不過都唔駛買"登"啦, 地下乾淨坐地下咪仲舒服!!! 何況, 下次我會一野踢晒佢地落地下架啦, 你唔駛擔心張sofa會overload!!!
嘩!!勁呀, 下次一口氣買晒supermarket入面d "o丁o丁"點心, 又燒賣, 山竹牛肉, 蝦餃, 糯米雞, 叉燒包, o丁o丁粥/意粉/飯系列, 7仔o丁o丁雞脾, 小籠包, 波仔o丁o丁系列.......係咁意講下都有咁多款, 夠食羅!!
希望下次玩o個個唔係小狗個BB, 係你個BB就好啦!!
Anyway, 新居入伙, 生活愉快!!
Post a Comment