大澳遊

當日都有好多人入黎大澳架!!

記得之前到過大澳已經係2-3年前既事啦, 見咁耐冇去, 所以就係情人節當日睇完早場就去大澳行返一轉!! 之前講左, 一早就去左睇Yes Man早場, 之後就再搭MTR入去東涌轉巴士!! 唔係講笑, 唔知係咪咁岩係情人節既關係, 係東涌排隊入大澳既巴士站全部都係雙雙對對, 好在我都有位好情人陪伴在側, hehe!!!

天氣唔多好, 海面都係白茫茫~~~

據船家講, 係側面睇似一個人, 呢度叫"將軍石"喎!!


入大澳首要條件就係要"登"巴士, 唔"登"返成粒鐘都入唔到去, 都好既, 話晒朝早個時晨早流流走去睇早場, 鬼咁眼訓!! 家陣有得休息下, 都不失為一件好事!! 其實, 當日天氣都係一般唔係太好, 仲時不時都有毛毛雨添, 不過呢d都唔會阻礙我倆遊山玩水既興致!! 一入到去, 係門口就有人大叫有船出海中華白海豚, 仲話岩岩仲有十幾隻出現過, 大叫快d上船, 我同Anna於是就急急腳上船啦!! 可能天氣唔多好, 出到去海面, 四周圍望左都係冇咩動靜, 船家都好似好唔甘心咁, 揸住隻船四周圍行, 當然最終都係搵唔到白海豚蹤影啦!!


Anna親手做既麵包卷 - 唔好以為係綠色個d係wasbai, 其實係牛油果黎架!!

呢個係我親既lunch box!!!

入到大澳, 有兩檔小販檔幾出名, 呢個係其中一檔, 專賣烤海鮮!!

由於我地睇完早場先入黎, 其實坐得船黎再四圍行一陣, 都好快天黑!!! 大家都知, 一到差不多6-7點呢段時間, 係搭巴士出去東涌既人潮高峰時間, 橫掂一場入到黎大嶼山呢頭, 不於搭車落去梅窩個邊行下, 順道坐船再出返去!!!

陰陰濕濕

近日天氣潮濕, 早兩日老媽仲煲埋冬瓜水飲, 我仲以為係大暑定係小暑添, 老媽話冬瓜水可以去濕喎!! 今日係公司望過去對面ICBC大廈仲勁, 大霧到睇唔到個頂樓!! 頭先入去Pantry飲杯咖啡個時, 嘩, 仲勁, 望出去完全睇唔到對面海個d building!! 至憎就係呢d濕淋淋既天氣!!

Seven Pounds

Seven Pounds 就已經係上上星期日去戲院睇, 不過忙加懶, 所以遲遲都未寫, 其實到左依家應該已經有好多人睇左呢套電影, 之前一直未入戲院睇呢套戲個時, 成日睇個d簡介, 基本上都係講叫大家唔好學佢係戲入面做既野, 完全冇提到個故事內容, 所以一開始個時都對呢套電影冇咩好感!!

不過好彩最終都入左戲院睇呢套電影, 因為佢都算係一套值得推薦既電影!! 基本上呢套戲都係一套十分dark既電影, 講述Will Smith因為自己引致嚴重車禍導致七人死亡, 因為佢深感內疚覺得需要贖罪, 所以決定搵七個人幫助七人重過新生!! 至於如何重新就正正電影開始前叫大家唔好學既事, 就係自殺再將自己既器具捐予有需要既人 - 患血癌既病人(捐骨髓!!), 心臟病既人, 腎病既人......將自己身上捐得既都捐晒俾人!! 當然當中就有一d情節啦, 呢度都唔多講!! 但係睇咁多套Will Smith既電影都唔試過有一套見到套差不多有八成既時間都係拿口拿面!!

題外話, 係電台既影評度聽返黎, 片名為"seven pounds", 其實當中包含一d意義, 根據莎士比亞既其中一個劇所描述, 古時英國如果有人欠債而又未能償還的話, 個位欠債人就要係身上割下一磅肉以作為還債之作, 所以電影今次起用"seven pounds"之名, 實際有還債之意!!

Yes Man

上星期六情人節, 當然係同情人出街啦, 一朝早我地呢d慳家人仕先走去睇早場, 早場價錢平成半喎, 所以好多時候我同Anna如果要睇戲既話多數都係睇早場居多!! 今次呢套Yes Man係Anna一早點名要睇既!! 既然係咁就先去睇個做早場作為情人節warm up活動先啦!!

Yes Man係一套輕鬆喜劇, 今次Jim Carrey重回喜劇之路, 好多人都好期待, 今次呢套戲, 講Jim Carrey參加左一個會, (其實我覺得類似係異教會個d呢!! 好有宗教狂熱個隻!!!), 凡事都要say yes, 根據該會既宗旨, 只要有yes no question出現既時候, 你一定要答yes, 咁先可以開創人生另一天地!!! 因而Jim Carrey本著呢個宗旨, 當中自然就會有好多趣事發生啦!!

不過Jim Carrey真係老啦, 雖然佢都出力咁做出好多浮誇既表情同埋動作, 但有時真係不復當年勇!! 而且戲入面大部分既笑位基本上係traliar個度都出晒, 話雖如此, 話晒呢套戲始終都係Jim Carrey從返喜劇電影之作, 整套戲出黎既效果都會令好多人抱腹大笑, 如果大家想開心, 而近排又冇咩其他開心喜劇睇既情況下, 呢套戲都不失為一個好既選擇!!

年又過年

好有新年氣氛, 度度都掛晒揮春!!

身為迪迪尼尊貴既全年票既持票人("尊貴既會員"呢個term黎自Macy!!), 早前新年既大節日, 當然又係時候去一去迪迪尼啦!! 家陣仲係做緊新年兼情人節既promotion, 所以通街通行都係d著住唐衫既米奇mouse呀, 仲有高飛呀....

好多人, 好迫呀!!


一朝早就坐MTR出發, 心諗係平日去迪迪尼, 照理應該都唔會太多人既姐, 點知一去到迪迪尼門口就知賴野!! d人多到呢, 誇張得很~~~ 平日只係供我地呢d專貴既全年票閘口, 照之前去過咁多次既情況, 都係唔駛排隊, 點知今次去就要排陣先入到去, 攪到我地呢d專貴既會員downgrade左!!

米奇同高飛都著住唐服~~~

其實每一次入迪迪尼玩, 主要都係因為佢有d special function, 所以先特別抽時間去玩, 由於之前都去過幾次迪迪尼, 所以基本上都唔會特別同人迫&排隊去玩個d機動遊戲!! 今次就特別去睇下新年special 遊行同埋米奇大屋新年版!!

係等候同人影相既空檔期間, 布魯圖係度自己擺post俾人影相!!!

黎左好幾次, 每一次都冇去過個"動畫藝術教室", 原來呢個地方係教你用好簡單既方法(等如畫o丁o當咁 - 圓圈加一點...........), 畫出迪迪尼既公仔人物, 今次我地學左點樣畫"唐老鴨", 可能我本身畫畫既技術不堪, 畫完出黎之後, 完全係兩回事, 不過Anna就唔同呢, 可能佢平時自己都有畫開畫, 畫出黎之後, 又真係幾似樣!! 如果大家去開迪迪尼, 不妨可以去呢度學下點畫畫!!!

有人鍾意搵佢地簽名, 最好笑就係佢地簽名個時, 將本簽名簿放係個鼻上面先簽到名!!

今次去迪迪尼, 咁岩見到林嘉欣出現!!


另外, 我發覺, 係迪迪尼入面扮迪迪尼公仔人物既演藝人員, 有時真係要nature high, 自娛先可以做到呢份工!! 有時, 咁岩見到d迪迪尼人物行出黎同人合照既時候, 有時見到佢地都幾喜歡自娛, 例如, 係空檔時間, 佢地每每都會自己擺下d無聊post, 逗下d小朋友玩, 不過逗人歡喜, 都係佢地呢份工作既範圍之一!! 之前睇左好幾次煙花啦, 所以今次都冇特別留係度睇!! 仲有, 係大約5點過後, 公園入面既人流開始少左, 我諗大致上可能旅行團個d遊客要跟領隊出去食飯, 所以到咁上下時間就要走人啦!!

謝謝!!

今日Anna俾左個好大既驚喜我呀, 之前自己一直都戴住隻G-shock(屋企唯一一隻表)出街, 基本上都冇咩特別問題, 不過近日因為工作關係去左私人公司做野, 日日都係老西返工, 著住老西, 但係就手戴G-shock感覺上唔多襯, 所以呢排返工既時候基本上都唔戴表出街, 因為兩者有點兒格格不入!!

Anna 可能見我呢排都唔戴表, 所以係琴日就送左隻名表俾我, 太好啦, 其實自己好耐好耐之前都有過一隻鋼帶表, 都係SEIKO, 不過自從佢爛左之後, 我就再冇買過鋼帶表!! 家陣有新表用, very good!! 以後我一定會可以日戴夜戴住呢手表!!

敗犬女王

近排無聊時係youtube睇下野, 咁岩俾我click到個"敗犬女王"呢套台劇睇, 睇完第一集之後, 都覺得ok好睇個喎, 再睇真d, 原來呢套台劇都係幾新鮮熱辣架, 只係今年年頭1月首播, 家陣應該只係做到第5集!!

如果大家無聊想搵野睇下, 可以上youtube打"敗犬女王"就可以search到, 而且仲有高清version俾你選擇睇!!

全城動起來

屋企樓下仲係天黑黑, 鬼影都冇隻!!

一年一度既渣打馬拉松係上星期日完美結束!! 我地呢d十公里組別要成6點組起跑, 而且起跑起點係對面海既維園, 言下之意即係要起碼4點起身, 刷牙, 洗面, 食早餐, 之後4點半出門口, 咁就可以係5點半就去到維園做熱身第起跑, 不過, 永遠講係無敵做就有心無力, 本身都怕自己4點鐘起唔到身, 所以就一早教定鬧鐘起身, 但係事與願違, 頂, 個鬧鐘居然唔識得響, 好在有老媽出手, 係4點3既時候叫醒我, 於是就拿拿臨起身刷牙洗面!!

唔好講人, 車都冇呀!!

係呢個時候搭得地鐵既都係跑馬拉松既人啦!!

經過一輪急趕, 話咁快用左15min時間就出左門口啦!! 4點半既時候, 唔駛講當然仲係天黑黑啦!! 因為一早約左Anna 5點半係銅鑼灣MTR等, 為怕遲到, 所以跑住去搭地鐵, 但係跑到去地鐵都冇用, 淨係等地鐵都已經等左差不多成15分鐘, 我諗地鐵一定係諗住班車慢d, 可以一次過儲多d人, 咁佢就唔駛開得咁密!!

由維園到起點前需要係行一段路, 由於有部分地方冇封路, 所以大家都要等交通燈過馬路~~

全部人行緊去起點處!!

終於, 5點8左右黎到銅鑼灣MTR見到Anna, 由於我地係6點鐘起跑, 所以又要急急腳走去維園放低行李, 好彩終於都趕得切攪掂晒一切, 正式踏上我地十公里之旅!! 唔係講笑, 真係好鬼多人呀, 今年已經要分3組黎跑, 就咁眼見都有好多好多好多人!!


由於我地係6點鐘第二組起跑, 跑緊個時, 都已經開始見第一組d人返緊黎!!!

跑到中段既時候, 天都開始光啦!!!

好多人係天橋跑步!!

咁樣睇就見真係好多人呢!!



終於到終點啦!!

我早兩年跑十公里既時候都係跑西隧, 今年跑東區走廊明顯係舒服好多!! 沿途所見, 真係有好多人已經開始帶埋d小朋友一齊去跑, 我覺得呢個都係一個唔錯既親子活動, 一來可以訓練下佢地體能, 而且仲可以培訓下佢地d意志, 呢d野由小培養就實冇錯架啦!! 除左小朋友之外都有d公公, 婆婆一家大細去玩, 都真係幾好, 果然係配合到渣打今年既主題"全城投入, 動起來!!"

好, 如果下年有心有力, 走去報半馬先!! 橫掂舊時聽人講過, 半馬又係咁多錢(報名費), 十公里又係咁多, 咁跑半馬好似抵d喎!!!

新年後遺症

新年最多野食既, 唔駛講當然係個d年糕呀, 蘿蔔糕呀, 馬蹄糕呀, 新年之後到家陣都已經初九啦, 屋企個雪櫃仲係塞滿晒幾底咁既野, 屋企人少, 唔係我食就係老媽食, 所以呢幾日朝朝早起身自己煎年糕當早餐食, 蘿蔔糕都還好d, 比較易清!!

但係唔知點解, 個d年糕呀, 馬蹄糕呀, 好鬼抵食個喎, 明明都已經日又食夜又食架啦(我真係試過有日一早餐又係糕, 午餐又係糕到左下午茶又係糕!!), 切極都仲有, 切極都唔完咁既, 新年到依家屋企已經出現過3底年糕, 2底馬蹄糕, 仲有2底蘿蔔糕!!

Are You Ready!!

有人話我幾襯呢個紙版公仔!!




話咁快黎緊個星期日就要去跑渣打馬拉松, 之前成日都話要去跑步練習, 最終最後都係跑左兩次左右就收工, 做唔到一個星期跑一次既目標, 真係有d失敗!!!

渣打馬拉松對於香港黎講都開始成為一年一度既盛事!! 家陣越近開跑日, 電視就越多節目講下跑馬拉松既準備情況, 佢地話跑十公里既都要有8-9星期做預備功夫, 8-9星期前, 我都有呀, 不過只係做左心理準備, 身理準備就.....哈....哈!!

琴日去左維園拎下星期既渣打馬拉松行李包, 都唔算係好多人, 話咁快就拎完行人!! 拎完行李之後, 話就話係公園入面有個馬拉松party, 其實所謂既party就只不過係d sponser係度買下野, 冇咩特別, 睇返今年個件tee, 十年如一日, 都係咁難睇, so ugly!!!

雖然到家陣為止都冇咩點練習到, 不過滿有自信既Anna就話:"嗱, 到時你自己跑先, 唔駛等我架啦!! 唔駛驚喎, 慢慢行, 兩粒鐘, 咩都行得晒啦!! 唔會有事個喎!!"

哈, anyway希望唔會跑跑下, 冇啦啦猝死就得啦, 正所謂"留得青山在, 那怕無柴燒"