孤獨老人

廚房大戰~~~

老媽自上星期六就跟左阿姨返大陸間屋度休息, 抖下, 話晒之前個兩隻大小不良因為"豬豬"提早放假, 有o個兩隻野係屋企, 老媽自然一齊被"軟禁"係屋企啦!! 廢事一出街就high野, 中招就唔係幾好啦!!所以成禮拜入面, 基本上大部份時間都係留係屋企居多, 頂多頂多都係落樓下既百佳買下餸!! 所以難得阿姨返上去, 順道叫埋老媽上去!! 個兩隻大小不良就叫返家姐照顧住先啦!!! 老媽就可以放陣假休閒一番!!
左上角就係孤獨老人飯盒啦!!

平日3餐冇憂, 返屋企有飯食, lunch有飯帶, 都不知幾爽, 家陣老媽出走之後, 我立即變左個孤獨老人咁!!係, 係可以出街食, 不過, 近排自己趕住寫case, 時間冇多, 再加上Anna咁岩呢幾日自己約左fd出去活動玩, 既然係咁不如自已"賴"返屋企自己煮仲好過!! 所以呢幾日都係食自己, 唉!! 可憐呀!!

呢兩晚自己好似孤伶伶咁, 到時到侯自己走入廚房, 洗米, 拎個電飯煲煮飯食, 而且要keep住自己帶飯既習慣, 夜晚煮飯個時, 仲特製一個"孤獨老人飯盒"俾自己, 等第二日唔駛出街食飯!!

寶麗萊

唔知大家有冇一部寶麗萊呢? 冇, 唔緊要, 依家上網有個software可以將你d DC相轉化為寶麗萊相, 都幾似架, 而且佢仲會將你原本個張相會執一執d色, turn完之後, 完全有寶麗萊feel, 仲有仲有, 佢仲要你當真相咁, 要慢慢慘d色出黎~~
Web-site : http://www.poladroid.net/

墾丁

相片來自:五個背包的廿七天練習曲

早排無聊(偷懶唔溫書!!), 上網search下有咩好睇, 睇睇下, 搵到個blog, 係講佢地5個女子岩岩畢業就自己攪左個畢業大旅行(其實都講緊係07年既事!!), 係一共27DAY既台灣環島遊, 當中佢地去左好多特別既地方, 阿里山, 墾丁, 花蓮等等.......而且佢地全程都係住係d民宿度, 而且d民宿各有特色, 一路睇落去都覺得幾得意幾好玩!! 再睇落去之後, 原來佢地仲將呢個咁特別既經歷出埋書, 真係好厲害呀!! 回想當年我既畢業旅行都係去左台灣架, 不過就冇佢地咁勁, 只係得3日2夜, 不過個次旅行可以同最好既好朋友去玩, 真係好開心!!! 自個次旅行之後, 都開始愛上自由行~~~ Jessica更加愛上左台灣, 開始佢一年去3-4次台灣既紀錄!!

相片來自:五個背包的廿七天練習曲

另外, 之前都聽過人地講墾丁係一個好靚既地方, 即使之前有睇"海角七號"個時, 都冇特別留意到, 點知係睇完呢個BLOG之後, 見到佢地影墾丁既相, 真係好靚, 藍天白雲, 黎緊係旅行計劃當中, 墾丁將會成為我其中一個目的地!!!

五個背包的廿七天練習曲

你又用左幾耐呀!!

這是我的~~~

MSN打敗ICQ, 到家陣成立已經十週年, 依家Window -Live有個Web-site俾大家上去, 只要用msn a/c登入佢個web-site, 佢就就會顯示返你本身係何年何月何日成為MSN用家, 我本身係比較遲一批用MSN既人, 不過睇返原來都不經不覺用左MSN成6年!!

其實係未用MSN之前, 我都一直鍾情用ICQ, 不過後尾實在太多人用MSN, 攪到ICQ個"on-line" list長期都冇咩人, 所以就唯有跟大勢一齊去用MSN!!

http://10.msn.com.cn/

拋書包

上星期六, 同Anna搭小巴入西貢遊船河之際, 突然間係車上佢冇啦啦講左一句:

Anna: 『人係一條會思考既蘆葦!!!』,
我:『妳講咩呀??? 』
Anna:『拋緊書包!!』
我:『咁呢句即點解呀???』
Anna:『唔知喎, 不過成日都聽到d人係咁講, 你未聽過咩???』
我:『咁點解係蘆葦, 唔係其他野呢??』
Anna:『你自己上網查下啦~~~』

Anyway, 屎忽痕既我都上網查下呢句野出自何處, 原先仲以為係中國個d詩人發表出黎既名句, 原來係法國哲學家、科學家 帕斯卡所提及:
"人不過是一根蘆葦，它是大自然最脆弱的東西。不過，人卻是一根會思考的蘆葦"(原句)

係另一篇文章搵到佢大約既含意:
"人生的意義就在於人有自由的意志去作出選擇, 人雖然極其脆弱有如蘆葦般, 但柔弱的蘆葦偏偏是最堅韌持久的强者; 風中勁草, 獨蘆葦一支, 就正如巴斯卡所說: 人是會思想的蘆葦. 人的思想可以使人容易在不同環境中適應, 使人居於狹地而能遨遊於廣寬的宇宙無限中!!"

出海

Sunshine~~~yeah!!

好耐冇出外活動活動, 岩岩星期六同Anna join左佢教會入面d friend出去遊船河!! 今日都算出師不利, 一朝早就聽到天文台話掛一號風球, 雖然話就話一號風球, 之前都睇個天文台網頁, 見到個颱風都係吹唔正我地呢邊, 所以都應該冇咩問題既!!

豐富既車仔麵~~午餐

今次出海活動, 比起我之前去開既遊船河都晏左好多出發, 可能要就返某部分人要星期六上午返工, 所以就約左係2點先出船!! 由於約得比較晏, 所以我同Anna早d入西貢閒逛一下!! 出發前, 我同Anna就先到西貢出名既車仔麵醫一醫個肚先!! 食飽再行多陣, 再順手買返個大水泡, 時間就岩岩好2點到集合時間!!

西貢新碼頭是也!!
出發啦, 出發啦!!

嘩, 好耐冇入過西貢, 原來佢入面起左個新既碼頭, 咁都好既, 起碼到左夏天出海旺季, d遊艇唔駛下下都爭碼頭上岸, d人又唔駛得到頸都長!!
人家自製Cheesecake, 好好味呀!!

遠睇好似浮係海上面既垃圾咁!!

準時2點開船, 船家都識做, 只係駛去比較近既水域就停船俾大家落水玩, 如果唔係去到老蓮咁遠既話, 肯定得返好少時間落水!! 今次一程船大約20人左右, 一開始有部份人就出去玩wakeboard, 有d人就落水, 再有部人乾煎(曬太陽), 原先都諗住曬下太陽, 不過天氣比較一般, 而且多雲, 所以都係落水玩下就算!!

第一轉玩完wakeboard既人終於返黎, 跟手就到我地出去玩蕉船啦!! 呢次位師傅開隻快艇比較安全(即係慢!!), 我都係第一次玩蕉船坐到有點兒悶, 所以真係忍唔住叫佢開快d, 不過, 唔知係咪開慢d可以慳油d呢, 佢死都唔肯加速, 頂多係咁e轉個"彎仔"拋你落海就算, 真係少左份快感!!

大家冇睇錯, 冇發雞盲~~~呢個真係我呢架, WAHAHHAHA~~~

我地玩完之後, 再返大船, 睇時間尚有少少, 於是再問下有冇人想出去玩wakeboard啦, 點知成船廿個人, 冇咩人鍾意玩水上活動, 既然錢又俾左, 冇理由浪費架麻, 於是再叫師傅再出去玩多轉wakeboard, 由於之前都玩過下wakeboard, 所以基本上起水都冇咩困難, 而且好好彩都可以keep住係水面行都一段時間都唔跌落水, 成績尚算不俗!! Anna人生第一次玩wakeboard, 不過佢玩左一次起唔到水就放棄左啦, 原因係佢一跌落水就飲左一大啖水入口, 其實佢本身就唔係好識游水, 所以佢話試過玩下就算!!

落船後, 去左運動場沖身~~

玩wakeboard基本上玩玩下都會玩到忙晒形, 完全唔記得d時間, 攪到成船人係度等我地返去開餐, 仲要勞煩到師傅老婆用對講機召我地返去先得!! 哈, 哈!! 我地一路回程一路食野, 差不多6點9就返到去碼頭!!

圖

琴日講左, 我轉左新地方, 上圖就係我既新位置, 唔好以為地方好大好闊, 其實基本上係完全冇私隱, 因為我個位背住係一條走廊, 個個行過都可以見到我部電腦做緊D咩, 所以平時都唔會亂咁上網, 最多都係用電腦溫習搵資料!! 不過有個好處就係我背住佢地, 完全唔知係咪有人昅住我(呢D正一係"鴕鳥諗法", 眼不見成止乾淨~~~)

------------------------------------


琴日放工終於去左拎眼鏡...............原來都唔記得, 我本身對眼有少少畸形, 一邊就深近視淺散光, 另一邊就深散光淺近視!!! 所以一戴起副新眼鏡, 有D暈暈地既感覺!!!

近 o 況 o

好耐好耐好耐冇打個blog, 由於家陣多數都係深居簡出, 生活上都係冇咩特別, 所以都冇咩野好寫!!

家陣已經係6月中, 黎緊9月就考mock, 11月頭就正式考試, 唉, 頭痛, 頭痛, 都係個句, 時間太少, 溫既野太多, 仲有好多野要prepare!! 一諗起就好緊張!!! 好頭痛!!!

-----------------------------

眼鏡用左都已經有5,6年, 上星期終於打柴!! 逼住去配眼鏡(正確觀念, 每年驗眼, 隔2-3年換眼鏡!!), 原先諗住戴左咁多年膠眼鏡框, 既然係咁不如繼續維持呢個形象, 因為自己實在未接受到自己戴返金絲眼鏡, 不過Anna提議話轉下形象, 話晒遲d考牌, 都要俾個professional d既image人地睇下, 如是者就四周圍開始試玩眼鏡啦!! 哈, 最後去左幾間眼鏡舖玩完一輪, 終於去到一間眼鏡舖(之前配開個間)坐定定, 又再試左廿幾三十副, 終於搵到一副比較好既!! 不過一路試一路問Anna意見既時候, finally, 佢對呢副新眼鏡有呢一句comment:『呢副比較"平易近人"!!!』

下次 ,有機會見大家個時, 大家就會見到我"平易近人"既樣啦, wahhahaha~~~
-------------------------------

近日, "豬豬"通街都係, 細b都冇可幸免high左野!!! 其實細b就唔係感染"豬豬", 只不過係發燒姐, 不過都幾大件事啦, 因為佢已經係醫院度訓左幾日, 個燒忽高忽低, 有時有發燒有時退燒, 而最嚴重既係成日食完野都嘔返出黎, 攪到家陣要吊鹽水, 佢已經由上星期五入院到依家都未出黎黎, 真係慘情!!

大b雖然冇high野, 不過, 家陣佢唔駛返學, 日日都係屋企on on居居咁, 有電視都睇唔到咁多啦!! 而最重要既係岩岩臨宣佈停課前, 佢就正正開始考試既第一日!! 家陣佢仲有3日試未考, 到左兩個禮拜後, 小朋友既短暫記憶真係好短暫架麻, 到時佢肯定唔記得晒!! 到時又要重新溫過晒!! 一樣咁慘!!
-------------------------------

另外, 岩岩又再轉左去第二個地方返工, 家陣係何文田返工, 總算係十分方便!! 最最最重要既地方, 呢度有電腦用!! 呢一站將會係我最後一站!!

除左有電腦用之外, 我發現呢度有個小pantry有人賣野飲, 好鬼死抵架, 熱飲(咖啡, 奶茶個d), 都只係賣$2.5, 凍飲都係賣$4, 所以家陣有時眼訓都會去呢個pantry幫襯下!!

[中文字幕] 英國星光大道 Susan Boyle 感人演唱 驚艷全場 I Dreamed a Dream

今朝聽"晴朗的一天"(家陣朝早出門口, 多數都係聽住手電個收音機返工), 林海峰介紹岩岩係外國既星光大道出左一位一夜成名既女仕, 佢年已47歲但係依然有佢既夢......終於俾佢實現到!!!

大家可以去youtube睇下, 真係幾好睇!!

http://www.youtube.com/watch?v=izucgB-lBaI

近日

由於工作關係, 將會係不同既地盤工作, 岩岩上星期係上環既地盤返工!! 咁岩係呢幾個站都會同一位同學仔一齊返工, 話晒有個伴做咩都開心d!! 原先同同學仔商量過, 難得過黎上環返工, 所以想順道食下上環個邊d美食(sch as: 九記, 蘭香園, Burgar Republic............) , 不過, 事與願違, 每逢Lunch時段, 同事們都熱心邀請一齊食飯, 攬到我地個美食團報銷左啦!!

黎緊下星期就要去屯門返工!! 山長水又遠呀!!

仙樂飄飄

岩岩係網上見到呢段片, 好得意, 成班人係火車站聞歌起舞!! 香港唔知會唔會有d咁既情況出現呢!!

看海

岩岩個星期日, Anna話想出去散心, 散心好去處當然係去海邊聽下海聲relax一番啦!! 原先一心就諗住去大浪灣, 一去到筲箕灣巴士總站個時咁岩有架巴士, 佢就岩岩開, 我就問司機係唔係去大浪灣, 點知佢話個日冇車開去大浪灣, 如果要去最多就係係石澳行過去羅, 都只不過係十零分鐘姐!!! 既然一場黎到, 又冇奶油去架!!

去到石澳落車之後, 就跟返條車路行返轉頭, 司機叔叔所言非虛, 果然係15min就行得到去!! 由於家陣仲係初春, 仲係有少少陰陰涼, 所以係沙灘度都唔係特別多人, 記得之前同阿牛阿達佢地係夏天個時黎過呢個沙灘一次, 全場爆滿, 真係插針都插唔入!!! 今次黎到都係d鬼鬼多, 不過係我同Anna舖好地"席"之後, 突然間俾我眼尾望到係距離我大約十米既地方, 有兩位外籍人士係度抱抱攬攬咀咀, 咁呢d動作係外國人黎講都係好正常, 不過問題係個兩位係男人黎架!! GAY我可以接受, 不過, 最好唔好係公眾場所做d太親暱既行為!!! 佢地真係訓左係沙灘度攬得好實, 其中一個仲要爬左係另一位男士身上攬得好實!!

咁當然我同Anna都只係係咁e望左兩眼就算, 不過, 當隔左冇耐之後, 我地諗住再昅下佢地咩情況(根本就係八掛!!), 佢地已經唔係度走左人, 我諗佢地係咪已經情不自禁已經去左"乾瑤柱"..........不過, 事實証明左一點就係, 港島區既沙灘真係開放過九龍區既沙灘!!!

草蜢忘我演唱會

海南雞飯 + 叻沙 + 串燒(雞+牛+豬)

草蜢演唱會依家好似仲係做緊, 不過早係上星期四, 我同Anna已經一早睇左佢地既首場, 呢一場係加場, 不過由於紅館檔期爆得也, 所以呢個所謂既加場就加左係正場既前一日!! 未入場前當然係要去食飽飽先啦, 之前係openrice見, 係尖沙咀呢間好時沙嗲長期排No.1位置, 既然咁岩黎開呢頭就順道去呢間野食下試下味啦!!

先講一講呢間餐廳, 佢既位置係好時商場, 好明顯, 就咁講個名你根本就唔覺尖沙咀原來有間咁既商場, 其實呢個商場本身人流已經係少到無論, 即使行到入去你都唔覺入面有咩野可以行同埋買, 所以入得去呢個商場既人, 大部份都係去呢間餐廳食野!! 呢一間餐廳, 個個話好食既都係個海南雞飯, 不過, 就我而言, 個海南雞又唔係人地講到咁滑, 個油飯都唔係想像中咁好味, 而個d串燒更加係溫溫吞吞咁, 好明顯應該係已經一早整定, 仲要係冇熱住佢!!! 反而最好味既就係個喇沙, 平時d喇沙都係有少少辣辣地, 呢度個喇沙就唔係喎, 除左唔辣之外, 佢仲有種好濃既椰汁味, 個味道好香滑!!! 埋單3樣夾埋$130左右, 兩個人黎食, 總算不錯!!!
路經紅館時睇到草蜢的大型海報是也~~
眼利既Anna一眼到個帳幕就已經估到今次演唱會主題以馬戲團為主, 勁呀!!!
蔡一傑跑左上觀眾席度, 行左大半個圈!!

食飽出發, 第一場, 當然多人啦, 不過再正確d黎講, 應該係七場都爆晒!! 不過眼望四周都冇咩後生仔女(i mean 十零年歲個d!!), 咁都係既, 黎得聽草蜢都係上一輩既人, 聽既都係情義結!!! 岩岩講左, 黎得聽既都係因為情義結, 所以草蜢係演唱會度除左一至兩首係新歌之外, 其餘都係舊歌, 講真, 如果你唔唱舊歌, d人真係未必會黎聽佢地唱歌!!

全晚主力分左幾part, 其中一part慢歌一part, 快歌當然又有一part啦, 中間仲有一part就係返唱梅姐既歌, 其實係呢一part入面d歌真係幾好聽!! 雖然對上一次佢地開演唱會個時已經係兩年前, 不過話時話, 我感覺上佢地好似每一年都會開幾場咁, 感覺上好似成日都開, 都幾密下!!

好時沙嗲
地址: 尖沙咀麼地道63號好時中心144-148號舖
電話: 2739 9808
菜式: 星馬菜

高質素住家菜

計分板是也!!! G - Gary, J- Jessica & Jaemi, T - Thomas, A - Alan, B - Bear
主人家Jaemi~~~

其實都已經係一篇好耐既日誌, 因為又係忙於左溫書, 右睇notes, 前去寫log book, 後去寫case, 真係幾十萬樣野等住去做, 再加上腦筋緩慢, 做起事上黎真係事倍功半!!!

不過, 都要講一講呢一篇日誌先得!!! 話說早早早上上上星期六, 正正為jessica慶生, 原先一早plan左話上去jaemi屋企整野食(當然, 實際上係jaemi整, 我地食啦!!!) Jaemi一早為我地book左佢club house既保齡球場, 先黎一場熱身先去食野, 但係有部份人因事忙未能出席, 所以就得Jessica, Jeami & Tam, Thomas, Bear & Me作大比併, 唔駛講我地呢d運動熱愛份子, 當然係可以輕易勝出啦, 可憐既主人家Jaemi同埋壽星女Jessica完全成為炮灰, 慘敗係我地手上, 一早名言輸者要請其餘勝方食雪糕!!
聖鬥士星矢 ~~~~~~~~
大家興高采烈睇住星矢~!
辛苦晒男主人&女主人, 當然仲有壽星女同場顯技啦!!

打完"保零"就拿拿臨上返屋企, 因為主人家仲有好多野食仲係"烹調中" 如果再唔上去整既話, 分分鐘十點都未有得食呀!!! 不過人多唔一定係好辦事, 知書識禮既我地完全深明呢個道理, 所以一上到屋企之後, 大家都兩話不說坐定定係sofa前面乖乖地睇電視, 由得主人家(阿譚&Jaemi)&壽星女係廚房大顯身手!!
好多野食呀!!

經主人家一輪大作戰之後, 係9:00PM左右既時間終於有得食啦, 大家唔好以為真係一般既家庭住家菜, 講起黎都勁啦, 今餐既食物既美味, 款式程度完全可以比得上坊間一般既餐廳!! 先講一講有d咩食先: 芝士煙肉焗薯皮 o 白汁火腿蘑菇意粉 o 日式咖哩薯仔蔔白配白飯(白飯另上) o 清酒煮蜆 o 清蒸白灼海蝦 o 印尼牛肉串燒(另配秘製醬汁) o 灼時令菜蔬 o 入味鹵水雞中翼!!!
最後, 大家食飽飽之後, 仲走去一齊睇"林海峄 - 是但大合唱"

Wahahahha, 係唔係只係睇呢個食物材單已經覺得好勁呢, 唔止單單睇表面勁, 實際連內裡既味道都確實係一流!!! 最難得既係係最後埋單個時, 原來位位只需要夾$67大元, 嘩, 呢d野, 好明顯真係食功夫, 我地都話架啦, 食咁多野都係$70都唔駛, 真係抵到難, 不過就真係辛苦晒主人家Jaemi & Alan, 除左借個屋企咁樣俾我地反之外, 仲要你地動手動腳整野食俾我地, 真係唔話得呀!!!

玩樂@元朗 (下)

我地叫呢款係牛奶味既綿綿冰, 上面再淋上葡萄糖醬 + 底層舖左梅子魔豆 + 蘆薈粒 + 椰果!!

坐完街渡出返去元朗市中心, 我地係附近踩多幾個圈就拿拿臨去還車啦, 因為元朗仲有大把野食待緊我地架麻, yeah!!!! 踩到身水身汗, 成身熱辣辣, 最好當然係去食返個冰凍野食cool down下成個人先啦!! 首先我地先去離單車舖不遠既地方食個"綿綿冰"先, 係呢間舖頭入面除左平時食既普通甜品之外, 佢仲有款好特別既甜品食, 就係綿綿冰!! 千萬唔好以為綿綿冰就等同一般既刨冰, 當你食落去個時, 同平時一般既硬卜卜碎冰式刨冰係完全兩回事!! 由於陣間仲有好多野等住我地去食, 所以我地只係叫左一款綿綿冰share黎食就算!!! 如果大家有機會入去食, 大家記住要試個d魔豆, 佢d魔豆既口感好得意, 你一咬佢就會爆開!!

其實呢間舖頭位置就係B仔涼粉隔離~~~
係menu上面寫"滑雞排" - 其實係指有雞皮既雞排就稱為"滑雞"是也!!

食完甜品warm up, 於是就再去食多樣小食再熱熱身先得, 我地行到去大坑渠個邊, 聞說呢度有間食大大塊雞排間小食舖, 又係個句啦, 一場入到黎又點會唔試下先得架!! 由甜品舖行到黎呢度先發現呢間小食店既位置正正就係B仔涼粉既隔離!! 開頭諗住佢以台灣大大塊雞排作賣點, 難食極都有個限度呀, 點知.......唉!! 一去到舖頭, 見到佢岩岩新鮮熱辣炸起左幾塊雞排, 我地諗住今次有運行啦, 平時呢d炸物, 唔係新鮮食落去, 味道真係差一截!! 等如你將老麥d薯條放係度一陣淋晒先去食既情況完全一樣!! 當我滿懷期待咁咬落品嚐呢件美食, 頂, 一件完全冇味既雞排, 雖然上表面已經灑左一d味粉, 不過個d雞本身係完全冇味道, 嘩, 自己講真, 都唔知咬緊件咩野黎!! 所以大家都冇需特別入去搵呢間野食!!

超大碗既蟹子沙律~~~當麵食都得呀!!
點左大約12件壽司~~~件件都份量十足, 飯底足料, 上面件刺身又新鮮兼大件!! 左上角個碟係响螺刺身+右上角個碗就係食極都食唔完既大大碗蟹子沙律!!!
天婦羅炸蠔~~

之後, 我地就去左間隔街食日本野啦, 呢間酒泉係之前anna提過話要黎食, 因為佢地d野食非常大件夾抵食, 當然都係好好食啦!!! 我地大約5:15pm入到去, 待應話, 六點前仲有得叫下午茶優惠野食, 望一望d下午茶menu, 嘩, 真係好抵食喎!! 尤其係個蟹子沙律, $19之麻, 平時係出面d日本料理食都係得個細細碗, 但係呢度就唔同啦, 分分鐘仲同碗拉麵既分量有得fight!!

之前都上過open rice見到其他人都講過呢度d野食都好大件, 分量好多, 不過人總係貪心, 原先我地已經叫左12件唔同款既壽司 + 大大碗蟹子沙律 + 仲有個响螺刺身!! 不過, 待應臨六點前再行過黎話, 特惠下午茶last order啦, 問我地仲叫唔叫野, 哎呀, 就係咁我地就口多多手多多咁點多一樣野食 - 就係天婦羅炸蠔(menu話得5件, 唔知點解送到黎有成6件)!! 就係咁, 我地又再一次食到頂頸頂喉嚨!!! 兩條友, 食左咁多野, 埋單其實講緊都係$200多少少, 呢度仲要係免收加一, 如果我地唔叫咁多野食, 分分鐘百零蚊落樓都得呀!!

食飽飽之後, 就係元朗附近行下, 消化消化!!! 一天既元朗遊係不斷食不斷食既情況下完結啦!!

(完)

綿綿冰甜品屋
地址: 元朗建業街59號慶年大廈3號地下
電話: 2470 9083
菜式: 港式、果汁、甜品/糖水

大雞大超級雞排
地址: 元朗金輝徑金禧樓地下5號鋪
菜式: 台灣菜

酒泉日本料理
地址: 元朗教育路81號元達樓地下
電話: 2479 8618
菜式: 日本菜、壽司/刺身