終於等到啦!!

4年時間的確係長左d, 不過, 都唔算係白過, 依家終於等到呢一日(其實之後仲有漫漫長路仲要行) , 下星期一就去行畢業禮!!

仲有, 約左最最最熟個班朋友黎緊星期六一齊影相, 好緊張, 因為有好多人, 好耐都未試過一口氣約齊兩班朋友出黎!! 蒙大家既寵幸, 各人都一口答應, 均應邀出席, 感謝萬分!!!

細菌小子

自從, 琴日我開始咳起上黎, 唔知係我"野"到office其他人, 定係咁橋

office d同事都一齊病呢, 大家都一齊起勢咁咳........咳........

咳........咳........咳........咳........咳........咳........大家都不斷

咁咳!!! 家陣我咳到個肺就快爆!! 好想死呀!!! 有冇人救我呀!!!

圖片來源: http://www.kuyoki.com/

此起彼落

頂, 早前咳完, 以為好返, 點知病痛呢家野往往殺你一個措手不及!!!

家陣又咳.......咳.......咳.......咳過添!!!

遙望青山綠水美如畫

季節限定, 除左食大閘蟹之外, 當然就係去行山旅行啦!! 今日見秋高氣爽, 最好就當然係去行下山啦!! 今日去既地方, 其實早在兩年前都已經同Jackie佢地行過一轉, 就係"海下灣" , 選擇行呢條路線, 主要都係貪佢簡單易行, 冇難度, 平路多過斜路, 起碼唔會行到嘔先!!

起點是也~~~

計計下, 對上個次行山都已經係成年前既事, 個次同達達佢地成班人去鹽田個邊既camp site行山, 今日行一行都算係身心舒暢!!!

黎到大自然, 做下運動, 鬆下筋骨~~~爽呀!!

這就是我的午餐啊!! wahahahha!!!

其實今次都唔算係行畢全程, 因為去到灣仔其中一個camp site見到有船可以搭返去黃石碼頭, 而之前自己都未似過搭船出返去, 而且仲要咁橋就岩時間(個度係每一個鐘頭先開一班船), 所以就搭船出返去黃石碼頭!

由灣仔坐船出去黃石碼頭, 只需$15~~

唔係講笑, 之後係黃石碼頭坐返巴士出去鑽石山, 前前後後足足用左差不多成個鐘有多既時間先出到去呀!! 原來坐巴士有時仲辛苦過行路!!

今日一行, 很開心啊!!! ^ ^

每個星期六的早上

好慘 T_T !! 每個星期六既一朝早, 基本上都會俾個兩隻大小不良嘈醒, 有時即時我關上房門訓覺, 只要佢地一起身就會立即跑黎我間房拍門, 之後就用好哀怨既聲音, 即係好似個d被人拋棄既貓仔咁叫:『舅父, 起身啦! 舅父, 起身啦!!』唔理佢咩, 佢就照拍, 再唔理佢咩, 佢就自己開門, 爬上我張床度, 就係咁每個星期六, 我起碼都要同佢地一樣9點左右就起身, 換言之俾平時返工都係訓左1個鐘多d!!! 大好既weekend就被個兩隻大小不良破壞晒, 一個朝早訓得唔好, 之後就冇精神做其他野!!!

有著數

撕低下面個張便條就應該可以拎野飲!!!

早兩日係屋企個信箱見到呢張傳單, 查實家陣d股市係唔係真係咁好景呢???? 依家冇人肯做野呀, 個個去晒炒股票呀, 大集團依家居然要出動到呢d招數引去見工 ( ! ) 去見工, 就有熱飲送, 仲要係有得撰奶茶或者咖啡!!!

邊位有興趣既朋友可以係度留言, 我可以寄呢張傳單俾你, 唔係叫你真係去見工, 係叫你去拎熱飲!!

季節 - 限定

蒸蟹中~~~~
又Pizza, 又壽司, 當然仲有主腳 - 大閘蟹啦!!

狂風掃落葉式 - 食晒!!

完全失控的達達, 佢食任何野已經唔再用筷子刀叉, 最原始風味 - 用手!!

大家都話食蟹會好寒, 所以堅媽媽就煲左d薑茶俾大家享用, d薑茶好正!! 一絕!!!

又係一年一度食大閘蟹既日子!!! 呢個活動已經開始成為我地係秋天10月頭既必然活動之一!!! 上年就係達達屋企, 今年則移師同堅兄屋企, 話晒堅兄屋企過千尺, 可以容納相當既人數!! 今年既陣容同上年差不多, 我諗之後既大閘蟹活動都應該keep住呢個班底!!

由於堅兄屋企路途遙遠, 所以佢都開車, 同一齊去拎大閘蟹!! 嘩, 我地呢晚食蟹, 除左我地之外, 仲有加埋堅兄既屋企人, 所以大大話話都買左成廿幾隻蟹返去!! 夜晚就咁食蟹當然係唔會夠飽啦, 所以我地除左食蟹之外, 就另外叫左外賣壽司同埋pizza!!! 真係好多野食!! 食到頂住個肚呀!! 最後玩到差不多3:00 a.m, 堅媽媽好好地"命令"堅兄車我地返屋企, 真係麻煩晒堅兄, 打攪晒!!

文化

早陣子, 有朋友邀約一齊去睇一套歌劇, 哈, 我咁大歌仔, 真係未睇過呢d野!! 所以有興趣去睇下, 見識下都好!! "阿伊達"呢套歌劇根據網頁介紹乃係意大利歌劇史上規模最宏偉、最受歡迎、且在世界各地上演不輟的經典劇目之一, 而另一賣點就係位男主角係莫華倫先生, 淨係講莫華倫就知成套歌劇都係個d高位準, 低音勁個d好野!!

由於呢套劇係意大利既歌劇, 所以全場都係以意大利文演唱, 再配以中英文字幕, 第一次睇, 真係有d緊張, 但係可能個環境黑黑暗暗再加上歌劇係意大利文, 往往要睇住台側既字幕先明白佢地唱緊咩, 非常用神, 去到中間有d時間, 自己不其然進入左昏迷狀態, 真係失禮, 好在, 都係對眼合左一合姐, 冇真係訓著!!

而且大會係每一個間場時間都會有10min小休, 可以俾人去下toliet同埋企起身休息下, 當然都係冇佢地換佈景同埋俾d演員休息下, 成個歌劇, 前前後後都有成3個鐘架!!! 今次第一次去睇歌劇真係大開眼界!!

+++++++++++++++

都有好多個表演項目, 時間由3:30 - 6:30p.m

西班牙舞~~~



琴日因事而路經尖沙咀, 見到文化中心有個台搭左起黎, 所以就過去湊下熱鬧, 原來咁岩, 呢排係地中海藝術節, 所以康文署就係琴日(19, 20號)係文化中心對出既廣場舉行演藝表現俾公眾一齊欣賞, 主要都係一d舞蹈表演為主, 由於係open to public再加上琴日係假期, 所以都有好多人去睇!! 我自己就坐左粒幾鐘之後就走左, 唔係話佢d跳舞唔好睇, 只不過就咁坐係文化中心出面個條大樓梯睇, 個屎忽住左係個可地度成粒鐘, 頂唔順, 好痛, 所以都係走先!!

有的未必好!!!

成張枱都係野, 亂到嘔!!

時間係8:00p.m, 其他同事都走晒, office部份既燈都熄埋!!

全部走晒, 連走廊都熄埋燈, 真係伸手不見五指!!

之前曾經提過係office冇電腦用, 早陣子有同事走左, 有個位可以讓出黎, 家陣有電腦用, 而且仲有個20"既LCD mon用, 太好啦!! 由於工作關係, 係新地方, 真係咩都唔識, 又要睇PNAP(Pratice Notice for AP), 又要睇BO(Buildings Ordinance) , 又要睇Code of Pratice, 真係睇到人都癲!! 所以有時放左工, 而又冇街出既話, 多數都會留係office睇下file, 順道溫下書!! 要睇既野實在太多, 如果唔係公餘時間睇下書, 溫習下, 真係好容易俾人拋離!! 而且係呢度只會逗留5個月, 而係呢個section係最多野學, 所以要係臨走前學晒d野為止先得!!!

家陣係office, 日日都有好多野做, 所以即使有個20"LCD mon係我面前, 基本上我都好少用到!!! 真係有件玩具擺係前面, 你又唔得閒玩, 個種感覺真係幾難受, 好慘呀!!! 仲有, 呢個office好衰, 到左6:05 p.m就會好準時咁熄埋個冷氣, 由於係中央冷氣, 所以係冇得開返個冷氣, 好彩黎緊係冬天姐, 即使屈係office都唔會太焗, 唔係既話真係會缺氧而死!!

挑戰極限

由於有時出街, 所以唔係成日都可以安坐家中睇味分高下!! 呢個綜合節目又真係幾好睇, 起碼好睇過之前個套咩"最緊要進步", 完全九唔搭八, 我真係睇過半集咁大把!!

今日Facebook有人send左段youtube短片俾我, 真係好好笑, 如果大家miss左呢段片, 依家可以重溫下, 真係勁到爆!!

咳....咳....咳

秋風起, 好似四周圍d人都起勢咁咳.....咳.....咳.....咳.....咳.....咳.....咳.....




咳.....咳.....咳.....咳.....咳.....咳.....咳......咳.....咳......




包括我在內~~~~~~~咳.....咳.....咳.....咳.....咳.....咳.....咳.....咳.....

十五週年大旅行(長隆篇) (Day 3)

一朝早起身準備出發!!!

臨離開酒店前黎張大合照 ~~~

到左第三日, 我地決定落返去深圳消費, 由於Jaemi的智慧齒"篤"左出黎, 正所謂牙痛慘過大病, 佢決定先返香港睇醫生, 唔跟我地落深圳玩!! 所以我地團友由7位變左做5位啦!!! 我地係祺福新村既直通車站搭車落深圳繼續玩, 由於o個間旅遊巴既終站係去旺角, 所以我地就會係中途站既深圳落車, 而Jaemi同阿譚就會繼續返香港去!!

浩浩蕩蕩遊深圳, 第一站 - 萬象城!!

深圳就多既連鎖式餐廳 - 面點王, 比美香港既大快活, 大家樂!!!

我地同Jaemi分手之後, 都已經3:30 p.m左右, 我地第一站就係去醫肚, 因為最後一日, 我地冇book到酒店早餐食!! 好彩我之前個晚食左兩個杯麵落肚, 所以就冇佢地咁肚餓, 佢地已經餓到手軟腳軟, 輝仔就立即介紹大家去深圳好很出名既連鎖式快餐店 - 面點王食野!! 我上過深圳幾次, 見到呢間餐廳更有一間係左緊!!! 仲更過7仔!!不過, 食就真係第一次入去食!! 原來入面都有好多野食下, 又餃子, 又小籠包, 包羅萬有!! 最重要都唔貴, 幾抵食下!!

第一次係深圳搭地鐵的牛牛!!

原來牛牛係第一次係深圳搭地鐵, 所以對地鐵覺得好特別!!! 去到深圳既活動其實都不外乎, 行下書城!! 由於, 牛牛, Jessica, 堅, 同輝仔都未去過新書城, 所以我地就去新書城行下!! 唔係講笑大家都有不少斬獲, 果然係書中自有黃金屋呀!!!

$98 - 八道菜!! 抵!!

我覺我最好食就係呢個 - 焗烤磨菇

主菜 - 菲力牛排

行完書城都已經7:00又係時候食dinner, 夜晚輝仔約左朋友食飯, 所以就離我地而去, 最後又係剩返我地4個鐵膽去食飯!! 原先諗住去小肥羊(抵食呀麻!!!), 不過牛牛對打邊爐不太感興趣, 所以我地就轉左去食其他野! Jessica就係旅遊書上面搵到一間餐廳食法國餐 - $98就可以食到8道菜, 我就覺得o.k啦!! 唔係特別好食!! 不過又係幾丁友食野, 呢間餐廳既環境都算係唔錯!!

食完之後, 就返香港, 完成左我地3曰2夜大旅行啦!!

十五週年大旅行(長隆篇) (Day 2)

太唔好彩, 我地太遲先落去食早餐, 所以d靚位都俾人坐晒, 我地呢個位雖然都係近玻璃, 不過係corner位, 白老虎好少行埋黎!!

煙肉"鞋"口, 薯餅勁硬, 炒蛋冇味~~~~

第二日一早, 牛牛為我地book左長隆酒店自家buffle早餐, 本身間酒店房係唔包早餐架, 係要另加$90大元先有, 而牛牛話點解咁貴都同我地book呢, 主要係因為呢間餐廳既隔離就正正係白老虎生活既小天地, 所以間餐廳都叫做白老虎餐廳, 我地係呢間餐廳可以食住早餐近距離望到佢, 所以牛牛話可以一試!! 講真, d野食, 真係一般過唔一般, 如果唔係隻白老虎, 我諗佢都唔敢叫價叫得咁高, 佢d野食, 同我上次去泰國食個d buffle早餐真係差幾皮!! > o < 題外話, 一直主張話去水上樂園既jessica, 被眾人否決左之後, 死心不息, 佢話點都要游一次水, 即使係酒店泳池都好!! 係第二日既一朝早, 即係早上既7點鐘已經起左身, 噪生晒!! 點知後尾佢又話, 原來一早起身發現天氣好涼所以就唔鬼落去游水!! 好彩佢冇落去游水, 因為後來我地發現左呢間五星級酒店既泳池係要俾錢架, 每次需付$50, 我都係第一次聽, 係酒店游水要俾錢!!! 成班友on居居俾人老點, 行左半粒鐘以上先到動物園!!!

食完早餐, 我地就決定去長隆野生動物園, 開頭我地見遊樂場同馬戲團都係係酒店隔離(唔駛5分鐘既路程就到), 所以我地懶醒咁, 問都冇問就咁衝出酒店行去動物園, 一開始, 我地見到個工作人員陰陰咀笑住咁指住一個方向, 老點我地行, 佢話行15min左右就到, 我地就行啦, 大家一開始個時都行得浩浩蕩蕩開開心心!! 點知行下又15min, 行下又15min, 頂!! 仲未到既, 我地又見到一個工作人員, 又問佢點行啦, 佢話: 『嘩 ( ! ), 呢度行去好遠個喎, 你地行返出大街, 搭巴士啦!!!』妖......都唔知係唔係d內地人平時行得多, 所以行慣左就唔覺遠, 當然啦, 到最後我都終於都行得到個動物園!!! 不過, 有一點係肯定, 就係我地唔止行左15min!!! *o*

似入左森林, right!!!

個動物園, 可以用一個字黎形容 - 大, 好很大!!! 大到呢!!! 根本就唔係俾人行, 佢應該一入門口就租單車俾人踩入去參觀, 大到有d痴線, 基本上, 除左恐龍之外, 你講得出既動物係呢個"山頭"(係呀, 我地似行山多過去行動物園)都可以搵到!!

就係呢隻係北極熊, 我feel到佢真係好熱!!!

一入門口就見到北極熊, 雖然個牌係寫住北極熊, 但係唔知點解佢住緊一個露天既地方( ! ) 係, 你冇聽錯, 我冇打錯! 我都唔明點解一隻住係北極既熊要住係一個冇冷氣既露天地方!! 唔通, 動物園想話我地知, 地球暖化, 北極熊都要適應下呢d熱辣辣既天氣先!! 除此之外, 我差d想入去同隻北極熊剃鬼晒d毛佢, 我見到佢, 我自己都即刻標多幾滴汗出黎!!

近距離見到d鴕鳥都幾得意!! 突然間諗起一套卡通片, 有隻狼成日追住隻鴕鳥, 而鴕鳥就跑得好鬼快!!

去到其中一個zone係專俾人餵食物俾d動物, 當然個d飼料要俾錢買啦! 動物們好多時見到有人餵野食都會一窩峰擁上黎餵食野, 而我地呢班cheap友就襯呢個機會去影相, 企係人地前面借位同d動物影合照, hehe!!!

大家睇清楚, 譚兄後面係有人餵緊野食!!! 我地就襯呢一刻去影相, wahahhaha~~

嘩!! 呢個就標準示範~~~~

係呢個公園, 大大話話都有十幾廿個品種既馬騮, 真係各式其式!! 而好明顯, 我地係由人猿進化而成, 我地睇馬騮呢一part都睇得好入神!!! 當中, 見到有一種馬騮好特別, 唔知點解呢種馬騮 d pat pat會係咁大舊, 如果大家放大張相近睇, 見到佢地係用個屎忽黎當墊坐!! 而且佢地真係好有階級觀念, 我見住其中一隻, 應該係大王既馬騮好悠然自得咁俾另外兩隻馬騮服侍!!!

呢隻"忽忽"真係忽忽地架! 佢自己食完隻蕉之後, 嘔返出黎自己再食過, 前後嘔左兩次, 兩次都係自己食返!

頭先我講緊就係中間個隻馬騮大王, 型爆!! 棟高腳, 有人服侍, 威, 威!!!

去到中段, 由於實在太悶, 阿譚提議不如一齊影張有動感既合照, 就係叫:『1, 2, 3, 跳!!』捕捉最動感個一刻!!! 以下就係我影既連環快拍, 好攪笑!!! 出黎旅行最重要係大家relax, 玩得開心麻!!!@o@

1

2
3, Jump
4

5

行左差不多1個鐘左右, 再望一望個地圖, 發現我地只不過係行左個動物院既山腳, 頂!! 加上天氣超悶熱, 真係想死!! 終於行到去一個有得坐車近距離接觸d動物, 開頭以為連獅子, 老虎個d都會放出黎, 原來都要隔住一個大坑黎睇!!! 不過, 原來近距離睇d長頸鹿又真係幾得意, 佢地條頸長到呢, 細心既動物園, 特別為佢地加裝一條橫條, 俾佢地可以托住個下巴, 唔駛全日都吊住個頭四圍走!!!

我地就係坐呢d車去近距離接觸啦!!

長.....長......長頸鹿呀!!!

放大張相有野睇....hehe!!!

鹿仔飲水!!!!

行左大半日, 我地由11:00a.m行到差不多3點幾!!! 終於行完返酒店, 其實, 今日仲有輝仔join埋我地一齊玩, 佢原來係2:00p.m左右已經到左酒店, 不過外於佢唔駛用漫遊既關係, 牛牛打俾佢, 佢又接唔到, 佢又打唔到俾牛牛, 所以佢就係酒店呆坐左成粒鐘!! 輝仔等唔到我地, 個人就慌起黎, 個人一慌就肚餓, 佢傻下傻下去左酒店度用左成舊水食左個焗豬扒飯, 好可憐呀佢!! 好在最後, 我地都搵到輝仔返黎!!

可憐既輝仔!!! 終於有得玩~~~

呢個比海洋公園勁一百倍既滑浪飛船, 不過, 我地冇玩到!! 咪癲啦, 未濕過咩!!

高速滑行中拍攝! 右下角 - 堅 & 牛牛!!

大家休息左一陣就重整旗鼓, 接住就去左長隆機動遊樂場玩!!^O^Yeah!!! 呢個遊樂場話大唔大,大話細唔細, 不過對於我地黎講, 就唔係太岩玩, 因為太刺激既機動遊戲, 我地又唔太敢玩, 太兒戲既機動遊戲我地又冇興趣玩, 所以我地都只係玩左兩至三款機動遊戲就算.....

我地去左祺福新村個超級市場掃貨!!

可能朝早行左個動物園, 大家d energy用左一大半, 所以行多一陣頂唔順就離開左遊樂場!! 我地(基本上係得我同牛牛)發覺去旅行夜晚係酒店冇零食, 冇杯麵食唔似去旅行, 所以就決定係臨食dinner之前去左超級市場入貨先!!! yeah!! 我同牛牛各自入左兩個大杯麵, 原先我諗住買3個杯麵, 不過有人大我, 話我邊有可能食得晒, 所以最後都只係買左兩個就算數!!! 係內地消費真係好, 我地買左好多野, 最後夾埋都係$140左右!!!

食飽晚飯就酒店沐浴更衣!!! 之後就開始我地係酒店入便既活動啦!!

好多野食呀!!!

查實我地早在3個鐘前已經食完飯~~不過我同牛牛, 唔理, 照食!!

玩返之前, jessica教落既遊戲!!!

大家臨訓前既眼訓大合照!!!

待續~~