木馬

公司部電腦無啦啦中左隻"木馬"毒, 家陣係office開唔到電腦, call左IT黎整, 佢又話我部機係特別d, 要遲d先整得到, 之後, 轉個頭就走左去, 唉, 家陣日日對住部開唔到既電腦, 開又開唔到, 開到都冇用, 佢會自動60秒熄機, 其實呢種毒係早幾年已經出現, 之後已經好多人解釋過點樣解決, 好幾年前自己屋企部電腦都中過呢款毒, 不過話咁快就自己解決左, 原先諗住今次公司部腦"賴"左野, 應該自己好快攪得掂啦!! 頂, 都唔知係唔係公司部腦本身已經都係中左好多毒, 攪到原先都係虛虛地, 依家仲加埋隻木馬上去, 死上加死!! 完全死晒!!

家陣真係望住台腦係度, 但係又用唔到, 真係學人地咁話:『O晒嘴!!!』家陣又回復返冇電腦時代!!

認識基本法

星期六, 去左九展度考CRE(Common Recruitment Examination)(綜合招聘考試), 就係考中文運用 + Use of English + Aptitude Test + Basic Law, 呢四大項目, 基本上, 如果係想諗住申請去做公務員既人先會去考呢個試, 如果唔係其實呢個試實際對你出去搵工, 作用性應該係唔係好大, 不過對我黎講, 最重要既一點係, 去考呢個試係唔駛錢, 免費架, 哈, 即係去考左, pass固然係好啦, 不過, 即使係肥左都冇咩損失!! 所以我就報名去考!!

基本法呢一項, 係今年新增既item!! 係呢四個item入面, 有得真係溫下書既就得返呢科, 其餘既中文呀, 英文呀, 主要都係靠自己平時既修練, 根本就唔存在溫幾日就突飛猛進, 所以係臨考前一, 兩日就快快手, print左個基本法出黎睇睇!! 我呢一代, 基本上都係對政治比較冷感, 家陣一開始就由最基本既基本法睇起!!

原來入面既內容唔深, 每一條法例, 一句起, 兩句止, 有時, 真係要靠你自己了解入面既意義!! 雖然自己唔係深入去研究入面係講d咩, 而且今次都係因為為左考試先去睇, 不過, 在個人而言, 睇完成個基本法就對香港入面個整體架構多左少少認識!! 尤其是我呢d對而政治觸覺唔大既人!! 什麼行政機關, 立法機關, 司法機關, 行政會議..........好多野, 係基本法用最基本既說話解釋俾你知, 等你知道最社會上最基本既事情!! 大家得閒可以上網睇睇, 對大家了解呢個特區政府都有d幫助!!

基本法official site

快過食杯麵

上星期五一朝早就走左去剝牙, wahahhaha, 係呀, 上次講過啦, 襯家陣唔駛錢剝埋上面個兩隻智慧齒呀麻!! 上次唔知咩事, 可能有得俾我剝個兩隻牙就興奮到自己, book時間都book到short左, 自己居然話左朝早8:15a.m時間走去剝牙, 8:15a.m喎, 平時自己先係呢個時候出門口啦, 家陣仲要8:15a.m去到醫院剝牙, 真係想死!!!

既然都book左時間就要準時上去啦, 幸好醫院係我屋企附近, 大約半個鐘車程就會到, 其實開頭都懷疑同我book時間條友有冇寫錯時間, 8:15a.m喎, 百佳, 惠康都未開門啦!!(定係8:00a.m已經開??) 另一方面又擔心, 咁早就要醫生同我剝牙, 會唔會佢未訓醒又或食完個早餐, 飽到有少少眼訓, 一個唔覺意出事又再或者剝錯左第二隻咁點算呀!!

上到去醫院, 嘩, 原來牙科真係好早就開診, 門口個牌好似話係8:00a.m已經開始, 真係辛苦醫生要晨早流流就做野!! 8:15a.m, 唔駛講我當然係開診第一人啦, 唔駛等, 登記完就轉頭入得去!! 醫生第一句就同我講:『今次剝埋另外個兩隻呀??』係3個月內剝3隻牙, 連埋剝牙之後要覆診拆線, 大大話話見左醫生都有6次, 好明顯醫生都覺得我知剝牙係咩一回事, 今次咩都冇解釋, 只係快快手叫我張大個口, 打左支麻醉針, 等左1分鐘左右(我諗係等麻醉藥發作), 醫二話不說就隊支野入我個口度, 整左兩下就已經俾我剝左隻牙!! 快到呢>>>>> 成個過程完全唔過3分鐘!!

之後, 醫生仲俾左張假紙我話俾我放日假休息下, 實在太好啦!! 不過因為公司仲有野做, 剝完牙就返屋企休息左半fday, 下午都已經返office再做野!!

預告: 6月2日再剝, 剝埋最後一隻智 0 慧 0 齒, yeah!!!

日本中部之旅(番外篇) - 其餘精華片刻(2)

去旅行個時是但影出黎d景都特別靚~~
捧球場上既櫻花!!
高山市既小溪係好出名架!!
流水好清~~
d水乾淨到d小朋友會落水玩, 如果係香港個d, 應該一早變左糞河!!
d人會好休閒咁係河邊休息曬太陽!!
近鏡既合掌屋!!
其他既合掌屋~~
我地住既合掌屋"大田屋"是也!!
我地住既合掌屋門前有棵好大既櫻花架!!
唔係講笑, 真係好大雪, 好彩我大難不死!!
真係好大雪架, 仲好大風添~~
行行重行行~~
雪地既路, 平時就係靠佢摌出黎!!
摌呀, 摌!! 衝緊落黎啦!!

(待續)

日本中部之旅(番外篇) - 其餘精華片段(1)

今次既旅程足足有8日之多, 影既相當然都不少啦, 足足影左成7G既相返黎, 大約都有成2800張相架, 相雖然係多, 不過, 當然係冇可能曬晒所有既相出黎啦!!! 難得有機會, 係呢度同大家再分享一下今次旅程其他既片段呀!!

係名古屋街中, 冇端端有個大廈度都有個摩天輪~~
酒店影出去既夜景!!
同一個位置既日景!!
松本城賞櫻!!
松本城~~
松本城多面睇~~
好靚既櫻花
真係好靚既櫻花
真係好鬼靚既櫻花
係揸車中途發現既第一個雪景!!
牛肉刺身是也~~
日本蘋果
日本士多啤梨
在汽車行駛時由Anna所拍攝既藝術照~~
高山祭車台
高山祭車台(2)
高山祭車台(2)
車台上有d小朋友坐晒係度架!!
高山祭車台(3)

(待續)

Windows Live Messenger 彩虹行動

由現在開始至5月31日, MSN HK將會有一個另類捐款行動, 只要係msn用戶係自己個a/c度掛上一個彩虹logo, msn就會捐出$0.1俾四川作振災之用, 只需要click幾下按鈕就可以幫到其他人, 何樂不為~~~ 唔好睇少個1分1毫, 積小成多, 集腋成裘, 根據MSN HK官方網頁提到, 香港有成200萬既MSN用戶, 只用少少時間又可以多一筆捐款!!

"一方受難, 八方支持", 呢句係琴晚係電視度聽返黎, 感受良多!!

只要跟住以下步驟就可以, 簡單非常, 非常簡單:
Step 1. 拉下你的名字，並點選「選項」。

Step 2. 在「顯示名稱」一欄上，輸入
「(r) 支援汶川」，那就會得到如上圖的效果。
那個 (r) 必須是半型字體。

詳情可以登入此web-site: Windows Live Messenger 彩虹行動

刻不容緩

四川大地震黎到今日已經去到第6天, 回想上星期一既時候下午2點幾既時候正正和朋友們打緊籃球, 當時既我當然唔會感受到任何地震既感覺啦, 縱然電話公司當時透過sms通知四川有7.8級地震都不以為然, 以為係好少事!! 一返到屋企, 透過新聞報導既採訪, 所有慘不忍睹既影像一一盡入眼簾, 方知事情去到如此惡劣!!

今次既天災, 相比起過往的黎得突然, 來得嚴重!! 今日係城市論壇當中, 其中一位講者為"宣明會" 的副領司講到, 其實, 大家都好熱心捐款, 不過重建過程唔係一時三刻, 可能呢一刻大家都會好湧躍捐款, 不過可能係一年後, 大家開始淡忘有關既事情, 捐款從而少左, 所以希望各位除左呢一刻要盡心捐獻, 之後大家都keep住繼續為世界各地災民捐款~~ 幫助更多既人!!!

~ 紅十字會
~ 聯合國兒童基金會
~ 宣明會
~ 樂施會
~ 救世軍

Sharing

自從去完日本之後, 好耐冇見過牛牛他們, 一來我去完日本之旅, 緊接就到牛牛, 堅, jamei & 阿譚到台灣影婚紗相! 加上各人事忙, 終於係上星期五晚約到出黎食餐飯聚一聚, 正所謂"冇事常相見", 係我地呢d識左十幾年既朋友相處方式!! 繼牛牛佢地去完台灣, 黎緊6月又到Jessica會去澳洲"覓食"!! 所以呢排再唔約出黎食飯, 可能個飯局就要推遲到6月尾or7月頭先有得食啦!!!

星期五, 我地就去左新世紀既"湘川滬"食飯, 食其實都唔係一個重點, 志在既係成班朋友坐低傾下計, 講下大家近況!! 我, Anna, 牛牛, 堅, Jaemi & 阿譚都各自出國去完旅行返黎, 黎緊又到Jessica出走澳洲, 真係咁岩坐埋一枱人都係岩岩去完旅行又或者將會去旅行, 大家一齊坐埋一枱傾下各自去旅行既事 or 經歷, 一大班人, 談天說地不亦樂乎!! 尚心樂事也~~

日本中部之旅(番外篇) - 後感

● 今次既旅程感覺蠻特別, 雖然自己唔係第一次自由行去旅行, 不過係第一次自己揸車四圍走, 自由行已經覺得夠free架啦, 原來自己揸車四圍既感覺仲爽!! 話去邊就去邊, 鍾意係邊樹停就邊樹停, 更重要係唔係拖住個喼四圍走!! 手信就更加可以暫時塞晒入車尾箱唔駛理住, 唔駛揪住一袋二袋!!

○ 今個日本之旅, 其實, 好多事都係岩岩遇著剛剛, 如果唔係撞岩國泰機票做緊優惠, 都唔會有今次既旅程!! 而咁岩係呢次既旅程又撞岩係4月, 而係呢個4月又咁橋遇上1年只得2次既高山祭, 又咁橋可以雪の大谷重新開放既第一日就去探訪, 更加可以係松本城一睹櫻花盛放之美!!

● 如果唔係4月起行, 而轉左去3月或者5月去, 根本就未必睇到高山祭、雪の大谷、櫻花狂爆!! (早兩日探訪友伴朋友, 佢地遲左我地一個星期先去雪の大谷, 個時既雪牆都已經冇咁高、冇咁壯觀!!)

○有好多樣都係第一次係呢次旅程中體驗, 第一次揸車自由行, 第一次住民宿, 第一次係一日內狂浸溫泉(一日最多浸過3個不同既溫泉), 第一次睇櫻花, 第一次去睇日本人既祭典, 第一次以非shopping為目標既旅程, 第一次係雪山行走並遇上強大風雪!!

● 日本既廁所真係好鬼乾淨, 基本上佢地全部都係電動式馬桶, 即係去完大/小, 只要按個制就會有小水柱出黎為你清潔, wahahaha, 我玩過呀, 不過基本上呢個function係冇咩用, 因為只為攪到四周圍都濕晒!! 仲有既就係, 佢個廁板係會暖住, 所以係冬天去既時候, 就一定唔怕會冷親個pat pat啦!! 不過, 話雖如此, 每一次我坐落去個時, 成日凝住係岩岩有人坐完, 所完個廁板先會咁暖, wahahhaha~~~

○暫時黎講, 尚未衝出亞洲既我, 之前去既地方最多都係5日貨仔行程, 今次一去就去8日, 可以話係去旅行最長既日數!! 仲有因為讀書既關係, 對上一次去旅行, 原來已經係2年前既事!!

● 感謝領隊Henry為我地作出一個非常完美既行程安排, 由尋找資料, 安排行程, 決定行車路線, 酒店/民宿訂房, 一一包辦!! 成個行程領隊Henry可以話居功厥偉, 感謝萬分!!

○ 今次既旅程係第一次同友伴出國遊樂, 仲要係一去就去8日, 實在有紀念價值, 實在太幸福的, 實在太開心的啊!!! 當然, 彼此既感情都加深了啦, 因為經歷比一切黎得更重要!!

身歷其境耀保良

由於相機拎左去維修, 冇得影相, 只可以係報紙度add d相落黎!!

前晚, 友件買左"星光熠熠耀保良"既飛請我去紅館一齊睇, 哈, 我咁大個仔以黎係電視機就成日睇燿保良呢d show, 琴晚就真係第一次買飛去紅館現場睇!! 精明既友伴, 係網上訂飛, 雖然唔係最貴個隻飛, 但係都唔係最平個隻, 係$250個中間個隻, 而且仲係$250既最前個排, 換言之再貴我地一級既飛就坐係我地前一排, 哈, 某程度上, 真係好似抵左!! 因為相隔一行之差, 大家既價錢就差一截!!

正因為坐得比較近台, 所以就可以近距離睇到d明星呀, 唔駛下下望住個大電視, 現場睇show既感覺幾好呀!! 不過, 有一點就唔係好明, 點解有d人一坐低就要起勢咁 un腳, un un un, 不停咁un, 由開場到散為止就不斷咁un, 我真係想同佢講, 保良局好似有門診部, 睇完呢個show你可以可排隊輪行症, 又或者拎張飛尾可能有8折優惠, 成晚就坐係我隔離un過不停!!

又, 坐係友伴隔離個位師奶成晚拎住個望遠鏡睇show, fine, 冇問題, 不過, 都唔駛一路睇一路係度講野架, 我諗佢以為自己做左節目旁述, 煩到爆!! 去睇戲都知, 唔好成日講野騷擾人呀麻, 講唔係唔俾你講, 不過, 咪鬼咁大聲!!

講開睇現場, 同係屋企睇又唔同個喎, 話晒都有現場氣氛, 個種氣氛感染力係屋企感受唔到!! 如果你俾我係屋企望住部電視機睇"耀保良", 我可以好肯定話你知, 我唔夠一陣一定會走左去轉台睇其他野!! 但係睇現場又唔同喎, 反而會期待下一位歌星出黎表演!!

同大家講件事, 原來係賣廣告既時間, 係現場, d人並唔係咩都唔做架!! 當然台上面就會有工作人員set下個舞台啦, 而台下就會有d童軍走去同樓下d有錢佬sell下d福袋(所謂既福袋, 其實咪只係人地d sponsor送出黎d垃圾, such as四洲既紫菜, 舊街市既奶茶包, 奇華蛋卷......., 再將佢地塞埋入去一袋, 個d就所謂既福袋啦!!)

唔知點解成晚見到不少歌星, 唔知係唔係佢地好忙冇時間食飯定係家陣真係興減肥呢?? 個個都係瘦到成條柴咁, 係瘦得好誇張個隻喎!! 即係你行過去, 是但拎起佢地d手手腳腳, 係咁e就應該可以"拍"得斷個隻~~

最後嗚謝友伴帶我去睇呢個show, 好好睇呀!! yeah!!!

至理名言

今朝係屋企起身之後冇所事事睇下電視啦!! 左轉右轉, 突然間轉左去睇到亞視做緊一個節目"香港人的驕傲", 係一個專訪香港一些成功人士既節目, 今日節目既訪問既對象係

其中, 節目主持人問佢, 有咩勸告俾一些新既創業家, 佢就講到:『現今既社會係一個知識型社會, 只有知識先可以助你更上一層樓!! 所以必須抱住Hungry for knowledge!!』『同時, 除左要work hard之外, 仲要work smart!!! 成日埋頭苦幹, 係冇用架!!!』

Work hard & work smart~~有意思, 有意思!!!

日本中部之旅(番外篇) - 住宿篇

根據領隊Henry所講, 民宿既地方未必咁先進會有電腦又或者d民宿主人可能係d老人家, 未必曉用電腦, 所以我地大部份所住既民宿都係透過日本一個民宿協會send e-mail去訂房!! 簡單黎講其實就似係一個搵個agent幫手咁解, 咁當然可能有d地方未必有agent幫到手, 咁就可能需要自己打電話去做booking!! 另外, 由於係住民宿既關係, 基本上就唔駛指意有得"碌card", 所以就要帶備返相對既現金作結帳之用!!

可以透過下面幾個web-site去訂酒店或者民宿!!

1. 宿・ホテル予約-じゃらんnet
2. ～Yado～宿-
3. 飛騨高山民宿協同組合

Day 1 - 榮
~ナゴヤプラザイン(Nagoya Plaza Inn)
地址: 愛知県名古屋市中区錦３－８－２１
￥7,700/人 (素泊朝食)

Day 2 - 乘鞍
~湖藤莊
地址: 長野県松本市安曇3878-15
￥7,700/人 (一泊二食)

Day 3 - 高山
~ お宿新三
地址: 岐阜県高山市西之一色町3-829
￥3,000/人 (素泊朝食)

Day 4 - 平湯溫泉
~ ひらゆの森
地址: 岐阜県高山市奥飛騨温泉郷平湯温泉７６３－ 1
￥8,000/人 (一泊二食)

Day 5 - 白川鄉
~ 大田屋
地址: 岐阜県大野郡白川村荻町１８０７番地
￥8,400/人 (一泊二食)

Day 6 - 立山黑部(室堂)
~ 雷鳥莊
地址: 室堂再行路入去
￥8,400/人 (一泊二食)

Day 7 - 郡上八幡
~ 奧美濃莊
地址: 岐阜県郡上市八幡町　五町263-3
￥6,800/人 (一泊二食)

日本中部之旅(番外篇) - 行程簡介

首先要感謝由領隊Henry作出是次日本中部之旅既行程安排, 因為領隊用左不少既時間&精神, 做左不少既準備工功夫!! 如果冇佢, 今次既旅程都未必有咁精彩及豐富!!

Day 1: 香港 --> 名古屋( 名古屋中部国際空港) --(名古屋鉄道)-> 金山 --> 榮(嚴格d黎講呢度先係我地第一晚住既地方!!!)

Day 2: 榮 --> 松本(松本城) --> 乘鞍

Day 3: 乘鞍 --> 白骨溫泉(泡の湯旅館 + 丸永旅館) --> 新穗高温泉(水明館佳留宣山莊) --> 高山

Day 4: 高山 --> 平湯温泉

Day 5: 平湯溫泉 --> 新穗高温泉(深山莊) --> 白川鄉

Day 6: 白川鄉 --> 室堂 --> 立山(雪の大谷)

Day 7: 立 山 --> 室堂 --> 飛驒古川 --> 郡上八幡

Day 8: 郡上八幡--> 榮--> (名古屋鉄道)(名鉄)-->名古屋( 名古屋中部国際空港) --> 香港

功夫之王

話說上星期, 有人俾左兩張"功夫之王"既換票証Anna, 一來見好耐都冇去睇過戲, 兩來又唔駛錢(呢個先係個主因!!), 見琴日得閒加上又怕佢會好快會落畫, 所以就拿拿聲去戲院睇啦!! 開頭仲驚唔知會唔會好快冇飛賣, 又冇靚位坐, 你知啦, 話晒都係兩位武打巨星首次合作, 理應應該會有好多人睇架麻, 所以就特登早一日前去戲院買定飛, 點知, 去買飛個時個陣, 居然一張飛都未賣過(一個都冇!!) 好彩, 我都估到成龍d戲都係麻麻地, 不過, 我就冇諗到個情況居然可以壞到咁既地步!! 我自己都好慶幸自己呢張飛係唔駛錢姐!! 所以即使唔好睇, 最多都係冇左d時間姐, 咪當入戲院涼下冷氣都好呀, wahahahha~~~

我地去左睇6:05p.m個場, 係琴日Lunch之前都特登上去戲院個web-site度睇下, 仲有冇人買飛去睇啦, 哎呀, 真係仲未有, 我見到個screen仲係show得兩個人買大左飛, oh, so cool!!! 放工準時走人去睇戲, 去到戲院幸好都見到仲有其他人買左飛, 不過照我睇, 好大程度上佢地可能都係同我一樣有d免費既換票証先會去睇!!!

哈, 正所謂, 冇期望既野, 失望既程度就冇咁大!! 你話套戲好睇, 我就覺得一定唔係啦! 不過, 你話佢爛到嘔, 我只能夠講佢未至於差到咁誇張, 不過要俾錢入場既話, 唔, 大家就真係要諗諗!! 雖然成套戲有兩大武打巨星 - 成龍 + 李連杰, 仲有, 李冰冰 & 小龍女劉亦菲, 仲要加上由袁和平做武術指導, 以咁既班底拍出黎既戲理應相當不俗, 不過睇落去成套戲反而有點兒悶悶地既感覺!! 首先成套戲既故事劇本薄弱, 加上兩個武打巨星同場對打既場口卻做唔出緊張既戲份, 反而出兩年既"英雄", 由李連杰同甄子丹對打個場反而仲好睇好多!!! 一句講晒, 再睇既話, 睇下有邊個傻仔會走去買佢既VCD再問佢借啦, 如果唔係既話, 唔睇都唔會有咩損失!!