豐盛人生

小貞貞畢業啦, SO GOOD~~

岩岩個星期六好忙呀, 由朝出街出到晚, 一朝早就要到香港仔個邊拎cert, 皆因之前係CITA個度讀左個短course, 讀完就有返張cert俾你, 最衰既就係要你親自去返佢香港仔center度拎, 而上星期六就係拎cert既deadline, 攪到唔去唔得!!

係屋企9點出唔門口搭巴士去香港仔, 要成粒鐘車程! 攪掂拎完cert, 就要趕住到官塘啦, 因為約左人傾下d保險既野, 約左11點半, 係香港仔出返黎又一個鐘頭車程, 原先諗住香港仔有官塘小巴出去啦, 點知問人佢地話10點鐘呢個鐘數冇架啦, 唯有轉折d, 先出旺角再轉小巴入官塘, 岩岩好11點半前趕到出黎!!

呢個Miffy係唔係好靚呢, 唔駛估佢買幾多錢啦, 因為佢係jackie自己勾出黎架!! 好勁呀!!
Poly半日遊~~

到左2點半又約左小貞貞影畢業相, 於是又去poly等人, 好明顯家陣d後生既時間觀念都唔係幾好呀, 大部分既人都遲到, 差不多成3點鐘先齊人, 我地呢d係poly人, 之前都影過唔少畢業相, 所以我就充當導遊帶大家係一個咁細既學校搵景點影相, 左又影右又影, 起勢咁影, 正所謂poly話大唔大話細唔細, 影影下都影到成5點半左右, 天到黑啦, 所以就收工啦!!

地點係舊嘉利大廈~~
因為我地6點半就黎到所以就仲未有人~~ 不過之後都爆場!!
煎蠔餅~~
蜜汁煎藕餅

辛苦左成日, 我地決定去食素, 等大家可以清下腸胃, 由奶媽介紹去左佐敦個邊既"三德素食館", 開頭入去個時冷清清咩人都冇, 原來我地只不過係早到姐, 我地差不多成6點半已經去到, 星期六邊有咁早有人開餐!! 不過講真, 呢度d野食都係齋口唔齋心 - 蜜汁煎藕餅, 炸海鮮卷, 五柳魚, 煎蠔餅....雖然係齋口唔齋心, 不過d味道又真係唔錯個喎, 尤其是蜜汁煎藕餅就最好味, 食落去又真係唔錯!! 最重要既係, 呢度食個d野都唔係貴!! 最攪笑我地食到其中一道餸既時候, 想問下d材料係d咩, 個侍應就答呢d係黃豆製成品....哈....黎得食齋都知全部都係黃豆製成品架啦, 仲以為佢會俾個專業d既名俾我地添!! 不過, 總括而言, d野食都算係唔錯既!!

三德素食館
地址: 佐敦彌敦道233-239號 JD Mall 地下及4樓
電話: 3622 1888

Hello喂

正門口有阿jack既公仔佈置~~~
入左場之後, 就見到好多呢d南瓜頭四圍嚇人~~

重新講多次, 我同Anna買左迪迪尼既全年通行證架麻, 唔用返夠本點得架, 所以上星期就再去一次迪迪尼啦, 今年去既目的就係家陣全城熱爆既"Hello喂"啦, 作為一個尊貴既會員, 我地又點會錯過呢!!

第一個重點遊戲 - 大街酒店
第二個重點遊戲 - 森魔鬼域

我地今日提早小半日黎到呢個迪迪尼, 由於迪迪尼既全年票係包埋夜場架(聽聞隔離個海洋公園係唔包夜場, 如果想玩夜場, 佢地就要另外再買過飛), 所以我地就可以真正由朝玩到黑, 抵到爛!! 入到場之後, Anna話趁家陣仲係日光日白, 不如走去玩左鬼屋先啦, 唔係陣間夜麻麻先入去玩, 好似好恐怖咁喎, 既然佢又驚驚地, 而入黎個時個guidebook都話, 6點前去玩鬼屋唔駛排咁耐(因為6點後就會連埋d夜場既人, 所以就可能要排好耐下!), 所以就急急腳走去玩個"大街酒店"先, 起先仲以為迪迪尼專俾D小朋友去玩, d野恐怖極都有限啦, 點知原來都唔係個喎, 入到去d鬼屋, 入面d環境就暗到爆, 伸手不見五指, 行行下, d鬼又會鍾意得閒冇事就彈出黎, 再唔係就追你兩條街, 心血少既Anna俾佢地嚇到只係識得大叫!!! 當然啦, 一路沿路都聽到其他人都大聲呼叫啦!! 所以驚嚇程度都唔講得笑!! 由於時間好早就去左排鬼屋遊戲(每個game都排成45min左右), 所以都算一早玩晒主要既夜埸game!!

夜晚既小小世界. 幾都靚下架!!

夜場"Hello喂"係夜晚有兩場夜遊show!(即係巡遊個d!!!) 當然夜晚個d就會多左d特別既角色, 都係一d奸角啦, 我都唔多識, 夜晚既巡遊比日頭o個個短d, 夜晚既節目好緊湊呀, 7:30pm就做巡遊, 之後緊接8:30pm就再放煙花, 所以好多人睇完巡遊之後, 就立即再去搵定位再睇煙花!!

睇埋放煙花, 於是拿拿臨立即去space mountain, 因為係巡遊之前拎左張fast pass, 睇完巡遊&煙花, 岩岩好就去玩, GOOD 晒!! 玩完之後, 路經鬼屋個邊, 聽到d工作人員話如果依家去排隊, 大約需要個半鐘既時間先排到你, 嘩, 好彩我地一早玩左姐, 如果唔係真係有排等!! 我地最後都玩到岩岩好11點迪迪尼關門先走!!

2008年最後一份生日禮物

呢部機好勁架, 有成600G架!!

太好啦....我份生日禮物終於到手啦, 大大的感謝各位, 哈.....哈.....今年除左Anna同媽媽呢兩份最重要既生日禮物之外, 仲有既就係一班好好好好好既好朋友送既生日禮物, 今年既就係新電腦一部, 琴日新鮮滾熱辣送到黎, 其實仲要多謝既就係堅兄, 辛苦佢啦, 因為今年既生日禮物想要部新電腦, 所以就要麻煩佢幫我砌機,由買零件到完成品都由佢一手包辦, 仲要仲要佢幫我格價, 所以呢部新電腦只係需要$2900左右就可以攪得掂!! 仲要有送貨服務, so cool~~~

我依家打緊呢篇blog都係用緊部新電腦打架, 真係好爽快呀, 之前部機都用左差不多6-7年啦, 真係差不多夠時間退役, 由呢部新機接棒!! 有部新電腦以後用野都方便,快捷好多啦, 唔駛下下開機都要成個字, 之前部機, 我通常按著左power電制之後就行出個廳度睇陣電視先返入房, 因為個段時間都要run一陣機先開得著, 家陣終於唔駛再等佢咁耐啦....whahahah

秋季大旅行(二)

飲飽食醉, $40一餐有咁多野食, 抵呀!!

今次既秋季大旅行, 另一主題就係去揼骨按摩, 經阿奶同Jackie既介紹, 大家決定去"皇室假期"揼骨, 佢地話個度可以有5星級既享受, 雖然係比其他既骨場貴dd, 不過, 佢話試過之後就覺得值得!!! Anyway, 我地離開左華橋城之後, 就要走去搭返架巴士先出得返去深圳市區個邊(華橋城座於鹽田!!), 出到去深圳, 我地一早就定左夜晚去食海鮮, 聽聞係樂園路食海鮮平, 所以我地一行十二人就去食海鮮, YEAH!! 點解原先得個10個人, 家陣無啦啦走多左兩個人出黎呢, 其實就係jackie媽媽同佢個姪仔都有興趣去揼骨, 所以佢地兩個就join埋我地一齊食野, 再之後就出發去揼骨按摩啦!!! 係啦, 講下今餐飯先, 我地叫左d咩呢, 兩碟蝦(一碟清蒸, 另一碟就鼓油煎), 雞一隻, 炒聖子, 腐炒通菜, 古老肉(唔記得點寫!!), 蒜蓉炒菜心, 蒜蓉蒸帶子, 焦鹽九肚魚, 炒蜆, 釀豆腐, 一共11道菜, 大家估下最後埋單幾多錢!! 只係需要$450左右, 我地一行12人, 即係每位$40就攪掂呢餐, 抵到爛, 抵到你唔信~~~

我地4個麻甩佬就訓埋係一間VIP房入面啦!! 每個位都有獨立電視機架!!
大家揼完骨訓到第二朝10點先起身, 攪下呢樣攪下個樣, 成12點先出到門口!!
走個時影既, 成座都係"皇室假期"~~

好啦, 正所謂飽暖思床褥, 大家食左餐好野, 就立即去揼返個靚骨先啦!! 由於小狗第二日要返屋企照顧BB, 所以佢同佢老公就冇緣去揼骨, 只可以食飽飽之後就走去搭火車返香港啦!! 根據好耐之前同Jackie一齊上去揼骨既經驗都知去到既情況係點, 今次我偷偷地拎埋部相機入去係咁e影左幾張相出黎(當然啦, 話晒個個入去都係relax揼骨按摩, 入面當然係唔俾影相架啦!!), 一如以往, 先按腳後按身, 攪攪下都已經攪到成2點鐘, 點知大家仲未攰, 諗住第2日都仲係放假可以訓晏d, 所以夜麻麻, 2點半仲話走去食消夜(係皇室假期入面有餐廳, 仲有得打邊爐添, 不過我地冇咁癲, 零晨2點幾走去打邊爐, 痴線既咩!!), 不過我地都食左唔少野, 我地叫左個煲仔飯+4碗公仔麵+1碗雞粥+4個叉燒飽仔, 嘩, 呢D就正宗"飽暖思床褥, 食飽飽去訓覺!!

東門~~
係東門入面, 隔個街口就有一檔"重慶酸辣粉", 好鬼heat!!!

由於第2朝奶媽約左人係東門個邊修甲, 所以攪到我地都要一齊早起身, 雖然話就話10點鐘起身, 不過, 唔好唔記得之前個晚, 我地食埋消夜, 差不多成3點半先走去訓覺, 實際上, 我地都只係訓左6個半鐘左右, 所以大家都係超攰!! 我地埋左張單之後, 就走左去附近既港式茶餐廳食個早餐!! 食完之後就各有各自由活動, 其實應該係大家當玩完晒成個秋季旅行, 因為原定既行程已經完晒!! 所以我同Anna就同Lingling佢地一齊出發去東門逛逛, 東門平時就真係聽得多, 不過, 去就真係第一次!! 東門基本上就似係女人街一樣, 咩都有, 反而有一樣野最吸引Anna同Lingling既就係仍地既"兩蚊店", 係香港Anna對十蚊店已經係愛不釋手, 家陣仲有個平佢5倍既"2蚊店", 佢仲唔開心到死呀!!

由於都係2蚊店既關係, 即使係狂買十幾廿件都只係講緊$20-$40左右, 真係幾抵玩架!! 當然野就有, 不過就只係買左幾件就算!! 可能大家之前一晚訓得唔夠, 所以行行下大家都好似死狗咁!!! 行完東門之後, 我地就去左行"購書中心"行下, Anna都大有斬獲!! 最後行埋書城之後, 就差不多返香港啦!!

總結一下今次秋季大旅行, o個個華橋城東部, 大家如果想去既話, 我可以用過來人身份話你知, 你快d打消去華橋城呢個諗法, 再唔係既, 就plan定係3-4年後先好去, 到時既話, 我諗入面既設備都會好過依家好好好好好好多倍!! 千萬唔好俾d旅行社d廣告點你呀, 唔係你就實後悔!!!

秋季大旅行(一)

老套大合照一張!!

上星期六&日, 同Jackie佢地成班人一齊去個秋季大旅行, 原先諗住係報團參加d 3日2夜既大陸團, 不過大部份人d時間就唔到, 就只好退而求其次, 係咁e返深圳玩兼按摩2日1夜之旅就算啦!! 今次人才濟濟呀, 全部夾埋有10個人出發, 實在太好啦, 好耐冇試過成班人出去玩啦, 實在難得!!

上車去!!

今次我地第一日既行程就係先去深圳新開發既主題公園 - 華橋城東部, 夜晚就會去食海鮮, 之後就去今次行程既大主題(亦都係最高消費既地方) - 去皇室假期按摩!! 我地早一星期就係永東訂左車票及華橋城東部入場券!! 一朝晨早流流8:15am就要係九龍塘地鐘站個邊集合上車, 嘩, 好耐冇去過九龍塘個邊, 原來家陣係九龍塘地鐵站出口, 已經變左一個巴士、小巴站另加一d返大陸既旅遊巴集腳點!! 由於奶媽話巴士會準時8:15am開車唔會等人, 所以大家都好準時到達, 上車之後, 由於大家都過度早起床, 各人吹左兩句之後, 就各有各訓覺, 我地架車係由香港到皇崗之後再轉車入去華橋城東部, 唔係講笑, 係咁e, 坐下轉下車, 大大話話用左個半鐘即係差不多10:00左右先返到上去深圳!!!

第一關先過竹林
第二關轉火車仔到吊車站!!
第三關轉吊車!!
(纜車冇影到)再轉另一款火車


除左小狗之後, 全部人都係第一次去華橋城玩, 我個人對呢個華橋城既感受就得4個字:『大而冇當!』, 個地方係就係好大呀, 足足佔左兩個大山頭, 我諗真係同海洋公園有得鬥!! 不過冇用呀, 大咁又點姐, 最衰既就係呢個地方基本上可以話係未完全開發得晒, 因為我地去到發現好多設置都放左個"維修中"既牌出黎, 根本就冇得入去玩or參觀!!

講一講入到去之後個情況先, 其實佢呢個華橋城主要就分左兩個大山頭玩, 我地就先係正門入閘, 係入閘個邊既山頭, 基本上就完全係冇野玩, 因為佢所有既設備仲係"工程進行中"似地盤多過似玩既地方, 入左閘之後, 我地要先行一大段路去到另一個地方, 再轉火車仔, 再之後轉吊車, 再再之後轉纜車, 再再再之後轉火車, 先去到我地真正可以有野玩既地方!!

唔值呢個價既lunch buffle~~

大家唔好以為左轉右轉, 話咁快就到呀, 我計過, 我地10點鐘入閘, 左轉右轉, 再加上每一次轉"交通工具"既時候又要排隊, 我地大約用左3個鐘先去到另一個山頭, 即係差不多1點鐘左右先去到有野玩既地方!! 頭先講左我地成點鐘先去到, 咁我地當然係要醫肚先啦, 可能大家都已經餓過龍既關係, 大家有理冇理是但入左一間餐廳食野, 大家見到話食buufle好喎, 就拿拿臨就入左, 就係咁就賴左野, lunch buffle位位$110仲要加一, 但係就得好少野食, 唉, 我都冇諗過要返大陸食成舊水一餐(每位計喎!!), 仲要係冇咩野食個支, 好明顯我地就俾人呃左啦!!

食完之後, 就開始四圍行, 成個華橋城主要就係俾人影下相, 望下風景, 所以其實都冇咩特別, 大就係大羅, 得個行字!! 成班友, 無無聊聊行下影下相, 仲要最衰個日冇啦啦又熱返, 攪到成個人都身水身汗!!

講開之前每逢轉車個時都要排隊, 我諗中國人(應該內地人先岩)就真係要自我反醒下, 我地排隊個時, 佢地好鬼鍾意打尖, 插隊, 仲要係打完尖之後, 俾人發現, d人話佢鬧佢, 佢都可以若無其事當你講野係發o翁風, 好厚面皮咁轉塊面望去第二邊當聽唔到你講野, 繼續企係度打尖, 呢個情況唔止發生一兩, 仲要係keep住有發生!! 終於Jackie忍唔住啦, 當佢見到有人打尖個時, 佢除左同工作人員講之外, 仲大大聲用好流利既國語係度話:『你自己都尊重下自己係中國人, 都不要臉子!! 』 所以話呢, 女人有時真係唔得罪得~~

秋涼

秋涼既感覺很好!!! 一個字"爽"~~~

生日飯聚

生日蛋糕是也!!

早係上上星期, Lingling一干人等為本人慶祝生日, 感謝萬分, 今次我地去左九龍城既隆姐泰國菜館食飯, 呢間餐廳係由奶媽親自推介, 雖然平時佢介紹親多數都係乃野, 好在今次呢間野總算係不過不失啦!! 但係想講既就係, 呢間餐廳地方淺窄, 如果真係太多人去既話, 我就都唔係太建議, 坐得唔係太舒服, 話雖如此, 如果只係三五知已既話, 呢間餐廳都可以一試!! 不過睇openrice話, 其實係九龍城係有兩間"隆姐", 反而另一間係好似比較好食d, 不過個邊間舖既size又再細dd!!

其實今次食飯慶祝我生日之餘仲係要大家商討一下我地黎緊10月既秋季旅行, 原先諗住報一d大陸團, 玩返3日2夜過下癮, 不過大家公私事都十分繁忙, 各人都難抽到時間, 所以今次我地暫時只係返深圳玩下就算!! 哈, 期待黎緊10月11 &12日既秋季旅行呀!! Yeah!!


隆姐泰國美食館
地址: 九龍城衙前塱道2A-B地下
電話: 2383 5382

腳指尾拉西

今日同牛牛傾開電話, 佢話今日黎緊會打風 我話唔係呀, 明明都冇聽過黎緊會打風, 之後佢話原先都唔會既, 不過, 個風突然間好似碧咸咁黎個腳指尾拉西, 一野就轉返黎我地呢邊, 風就打得成呀, 不過冇用呀, 星期日先黎打風, 唉, 好打唔打, 星期日先黎打風, 如果係星期一先打, 你話幾好呀, 連放四日假, so good>....<

好中秋慶生日

行行重行行, 趕路是也!!
新屋外觀都幾靚下, 二層樓高, 有後花園!!
外圍既landscape 都做得唔錯!!
姨丈係後花園自己設計左一個BBQ爐出黎, 幾好!!
是日既第一餐, 內地KFC~~

今年的中秋節, 姨姨誠邀我地全家人上佢大陸既新居一齊玩下, 中秋時節因為係長假期, 預左會有好多人上去返大陸玩, 所以我地就等d人潮過左去先上過關, 我地大約係下午5點先出發, 我諗人潮應該算係散咁d, 所以用左好少時間就過到關!! 去到羅湖之後, 我地仲要坐成粒鐘既車程先可以去到阿姨新屋度, 嘩, 去到都已經差不多成8:00p.m左右, 正所謂係大陸置業既香港人通常都有個通病, 多數都係係大時大節或者有長假期先會返上去新屋度, 所以屋企平時多數都冇人住!! 所以我地一去到新屋, 首要既工作就係幫間屋企黎個掃除先, 表妹吸塵就我掃地, 阿姨執野就媽媽拖地!!

大掃除中~~~
大屋真係幾大下!!

攪掂晒所有野都已經10點, 大家辛苦完一輪就沖個靚涼就去訓覺, 我呢d熱血青年又點會咁易訓得著呀, 我就走左去睇"江山美人"(Kelly同黎明做個套呢!!), 睇完就已經2點左右, 係時候訓, 等第2日既活動!!
各人都各自做功課中!!! 表弟做又表妹又做大B又做!!
去餅店, 買蛋糕!!

第二日一早, 各位小朋友都忙住要做中秋節既功課, 所以一朝早大家都只可以留係屋企各自各做功課!! 到左中午, 我地就出去算係市中心既地方食飯, 食飯之餘, 姨丈話今次上黎玩, 順道同我慶祝生日, 於是就去左一間餅店為我買左個生日蛋糕, 內地餅店效率都幾快, 呢頭話訂蛋糕, 個頭就話3個鐘之後就有得拎, 果然係有d料到!! 食飽飽, 拎埋蛋糕就返歸, 夜晚我地就係姨丈個後花園BBQ, 不過, 聽阿姨講原來係大陸買d BBQ野食, 唔係好似係香港咁易, 係佢個d超越市場唔係有咁多BBQ食物買!! 所以我地夜晚BBQ咁得雞翼, 雞腿同香腸食, 不過好彩天氣唔算太熱, 所以都燒得幾自在!! 原先個生日蛋糕諗住係BBQ完之後食, 不過, 大家實在太過飽, 所以就留返係最後一日先食!!
哈..好耐冇試過屋企人買蛋糕同我慶祝生日!!

到左最後一日, 又係個句, 香港人既通病, 好日都唔會再上黎, 所以所有既床單被舖拎晒去洗衣機去清洗兼掠乾, 就咁攪攪下又攪左一大朝早, 之前買左個生日蛋糕就係呢個時候大派用場, 今日就用呢個蛋糕作為午餐之用!! 食完之後, 就拿拿臨早d搭車返去香港, 因為費事同人迫!!