師奶格價網

師奶格價網
http://www.c9web.com/price.php

其實早兩日係人地個blog度已經見到呢個web-site, 見到佢呢個web-site都幾good架, 因為佢四周圍睇下d日常用品或者d食品格下價, 睇下d野邊樹平d!! 大家就可以去個度買野, 唔駛野野係超市捱貴價貨!!

點知咁橋今日"星期二檔案"又做緊呢個"格價"呢個topic, 而無線新聞組亦都已經訪問呢個網主!! 原來呢個web-site只係開左個零禮拜左右!! 大家得閒可以上去昅下邊度有平野買!!

風雲變色

大家都打得興致勃勃~~點知, 半個鐘後......
落雨前, 突然括起大風~~
成個籃球場都俾突然既大雨淋濕晒!!

星期日約左同學仔們打籃球, 朝早仲係陽光普照, 諗住下午打波實曬死啦!! 我地下午3點左右開始打, 打左唔夠半個鐘, 突然間成個天都黑晒, 之後, 就起勢咁吹起大風, 咁岩我地球場隔離正正係一個地盤, d風吹起晒d沙石, 攪到成個籃球場都塵土飛揚, 個個都要擋住塊面!! 隔多晒仲落埋場大雨!! 攪到大家都好掃興冇得打波!!

返到屋企睇新聞先知, 原來呢次係一個突發極端天氣現象, 全香港都係咁!! 呢排d天氣真係令人難以捉摸, 一係落雨落到狗屎, 再唔係就曬到阿媽都唔認得!!

所見所聞

柴灣 - 羅屋
東涌 - 大炮台
因為要入去燈籠洲時, 船隻曾駛經青馬大橋橋底
燈籠洲- 燈塔
尖沙咀- 天文台

由於新工作既關係, 近日接觸到好多古蹟! 部份古蹟, 如果唔係因為係呢個部門工作既話, 基本上都未必會去到, 曾經去過一個係燈籠洲既燈塔, 全香港有好多個燈塔, 唯獨燈籠洲, 鶴咀及橫瀾島被列為古蹟, 燈籠洲呢個除左歷史攸久之外, 佢整座燈塔都由生鐵骨架所鑄成, 平時根本就冇可能會冇啦啦會有船去到呢個地方, 今次都係要坐海事處既船先入到去呢個古蹟燈塔!!

另外又到過尖沙咀既天文台, 除左係d學校參觀之外, 基本上都應該係不予對外開放, 難得今次我仲要同佢做個condition survey!!哈!! 有趣, 有趣!! 當然啦, 我係呢個部門仲有3個月時間, 我諗到時都可以參觀到更多古蹟名勝!!

百物騰貴

最新報價消息, 今日冇所事事落去百佳巡視一下d業務, 嘩, 勁啦, 俾我發現家陣d出前一丁已經漲價到$4.4/包!!好恐怖呀!!

舊時就話窮, 所要d人就要留係屋企餐餐都煮個即食麵食姐, 依家食個麵都要咁貴, 我地呢d星斗市民點樣辦好呢??? 特首, 你真係要諗諗佢!!

不亦樂乎

特別設計for 香港既Batman Poster, 可以見到IFC
琴日, 一口氣有兩大活動, 首先下午先同d同學仔一齊去睇戲, 睇"Batman: Dark Knigth", 好耐冇試過成班人柴娃娃去睇戲, 早兩年都有d咁既機會, 多數都係睇d大片, such as: "Harry Portar", "Lord of the Ring"呢d, 不過近年好似少左呢d大片, 所以都好少可再出成班友一齊去睇戲! 我地琴日睇下午3點場, 去到戲院個時見到排隊買飛條龍長到都唔知龍尾係邊, 好彩我地一早買定飛, 可以施施然咁行入去睇戲!!! 可能18號先岩岩上畫, 我地琴日去睇個時好多人, 全院滿座, d人誇張到連頭兩, 三行都唔放過, 照買飛照睇!! 就算我隔離有個單丁位都有位男士自己買飛入場睇戲!!

之前有新聞話呢套戲有Edison有份客串既部份已經俾人cut剩3分鐘(實際出場時間應該得個30秒), 所以當戲份轉移到香港個時, 立即打醒十二分精神昅實Edison係邊度出場, 果然, 佢個客串閒角真係客過唔客, 好在我聚精會神先留意到佢出場, 皆因佢個角色(都唔可以話係咩角色, 只係一個跑龍套!!)真係可有可冇, 而且, 我仲聽到前面個行有人講:『 o下!! 乜Edison出左場啦, 我睇唔到呀!!』

Batman固然好睇啦, 不過對上個幾集, 什麼前傳之類個d都冇睇, 可能睇開再之前個d Batman電影系列一向都係比較漫畫化, 戲情比較誇張, 今次Batman則著重現實多少少!! 感覺上又同之前個d又唔係幾同, 不過, 作為一套大片, 其實都幾好睇!! 今次劇情講Joker既出現令到全市都人心惶惶, 新聞話演繹Joker既主角因為太投入角色, 即使拍完成套戲之後都未能完全抽離最後仲自殺!! 不過講真個句, 佢既演繹又真係幾好, 瘋狂得黎又幾聰明, 仲有少少變態!! 完全可以將整個city攪到一片混亂, 仲有就係估唔到最後, 原來雙面人呢個角色係由Joker引身出黎!! 呢一個關鍵可以話係呢次電影既驚喜!!

個壁球場, 一物二用, 其中一邊可以俾人打乒乓波!! 家陣兩個場, 我地都打晒!!

睇完戲之後就要趕下場, 因為之前Anna早係一個月前就book左夜晚係西貢個邊既壁球場, 琴晚就call埋牛牛, 堅, 同Jaemi一齊做下運動, Yeah, 健康非常, 非常健康!! 由於睇完戲都已經差不多成6:00p.m(成套戲都有2個半鐘架!!), 於是急急腳諗住係旺角搭小巴入西貢, 臨上車前先打俾牛牛, 諗住join埋一齊搭小巴入去, 點知佢話係深水埗屋企個邊, 仲話堅兄有揸車順道兜埋我地一齊入去, 好野, 有車送我地入去, 車錢都慳返!!

以堅兄個手辣車, 由深水埗兜落太子接我地再入西貢都只係用左30min就攪掂, 快得驚人, 我地book左7:30p.m場, 岩岩好夠鐘就到! 去到壁球場發現隔離個乒乓波枱冇人打, 於是我地就順手book埋佢黎打, yeah, 成個壁球場就由我地霸晒黎玩, 記住喎, 家陣book場打book係唔駛俾錢架, 今次真係發達, 唔駛錢就包到場打波, 勁呀!!!

好那渣

呢個位就係我個枱底~~~
近睇咪就係個d曱甴藥粉~~

其實, 一入到黎呢邊新office都已經覺得佢d野好殘好舊, 而且第一日返工個時, 見到有位幫辦同位GR姐姐講
幫辦:『嘩, 頭先係你枱頭見到隻曱甴行過!!』
GR姐姐(表現從容不迫):『咁係大隻定細隻!』
幫辦:『曱甴仔呢姐!!』
GR姐姐:『哦!! 細隻姐!! 成日都見架啦!! 冇事既!!』

我不禁汗顏!!

點知今日仲勁, 通常Lunch食飽飯多數都返office訓個小晏覺, 就係訓晏覺既時候, 突然聽到隔離section有人大叫一聲
女:『嘩!! 好多曱甴呀!!! 走呀, 走呀!!』
男(由遠處行過黎):『咩事呀, 有幾多曱甴呀???』
女:『係個櫃度, 一打開d曱甴就走晒出黎, 有幾多! 多到你見到都會立即走羅!! 快d拎d殺蟲水黎!!』

頂, 原先諗住訓個好覺, 家陣諗諗下, 佢噴完d殺蟲水之後, 谷晒d曱甴過黎我個邊架!!! 攪到我冇覺好訓, 成日昅住個地下有冇曱甴走過黎!!

周身骨痛

作病中~ 喉嚨痛 + 周身軟"賴賴"+ 骨痛

會唔會係我第3度發育, 想標高呢!!!

食左d藥, 希望唔好真係病啦~~~

早來的生日禮物

新電話 Sony Ericsson - W901i是也~~

嘩, 嘩, 嘩, 勁啦, 我9月生日依家已經有生日禮物收, 邊個對我咁好, 唔駛講都知當然係我位靚靚女朋友啦!! 話說近日我部手提電話大大話話都用左3-4年, 家陣已經去到人生既盡頭, 唔知係咪佢厭世既關係, 近排佢時不時都會自動熄機, 又或者係自我re-start!!! 細心既女朋友有見及此, 既然係咁, 就將生日禮物推前2個月送, 於是我部新既手提電話就此誕生啦, yeah!! Thank you so much!! 多謝妳份生日禮物, 我好鐘意呀~~~

寓溫習於娛樂

唔講得笑, 有好多野食架!!
白汁吞拿魚鏍絲粉
蒜蓉炒西蘭花

岩岩星期五重開study group, 一大伙人原先講左話今次除左重開已經冇開一個月既study group之外, 不如順道攪埋個大食會, 起先話每人整一款返去一齊食, 最後, 當然我地三位男生冇人整野食啦, 好在得兩位女生我地先可以食到咁好既野!!

女生們就勁啦~~ 佢地兩位夾埋大大話話都整左6,7款野食出黎, 數一數先: 白汁吞拿魚鏍絲粉2大盆, 白朱古力芝士蛋糕(自製), 豉油雞翼, 蒜蓉炒西蘭花, 蕃茄蛋沙律三文治, 綠茶紅豆鬆餅(自製), 美味曲奇餅(自製)!! 多謝佢地咁俾心機整咁多野食, 令今次既大食會生色不少, 而且聽兩位女生講, 之前一晚仲要整到成點鐘先有得訓, 呢番既心機, 真係將食物味道再加多一點既分數!!

大件事, 下次如果再有大食會就由我地3位男生出手, 到時唔知整咩野食好添!!

Jackass

上次去南Y島行山個時, Jackie同我講佢姪仔前排睇左隻DVD, 隻DVD入面個班友全部都係玩埋d極盡無聊, 變態既遊戲, 不過, 如果你睇落又真係好鬼好笑, 你可以話佢地低能白痴兼痴線, 不過, 如果你一開機睇落去, 就會笑過不停!! 上星期去小狗屋企個時, 佢就順便燒左呢隻碟俾我睇, 琴晚係屋企睇左dd, 頂, 班友真係癲架, 不過又好攪笑, 真係睇到眼水都標出黎!!



其實之前都知有呢隻碟, 不過個時知道要去HMV先有得賣, 平時普通VCD舖未必搵到, 個時自己懶費事特登走去HMV買, 而且知呢套野係超無聊, 更加唔想晒錢去買呢隻碟, 所以即使有次經過HMV兼見到呢隻碟都冇買到!!

2000年已經出左第一隻Jackass the Movie, 206年佢地就出左隻Part Two, Jackie就係燒左隻Part Two俾我, 哈, 超勁!!!

Jackass official website

一聚

好cute既BB~~
近鏡望到佢塊面個兩團肉幾得意!!
眼超超, 望鏡頭!!

琴日, 上左小狗屋企探下狗仔, 之前, 滿月個時見過面之後都好似有好幾個月冇見面( i mean狗仔!!), 不知不覺佢依家已經4個月大(就快5個月大), 今日見佢第一眼就發覺, 嘩, 死肥仔呀, 肥得佢呢, 瞼上個兩團肉好鬼得意, 肥嘟嘟咁, 4個月大已經有成17磅, 佢d手手腳腳好鬼死實淨, 全部都係d肉, 揸上手成條香腸咁, 睇到小狗同BB拍d沖涼短片, 見到佢剝晒衫, 佢真係成個米芝蓮咁, 大脾d肉一截截咁, 而且睇佢沖完涼抹身個時仲有特登揭起得肉抹, 唔係既話怕d水入左去入面, 濕住d肉就唔好啦!! 仲有, 仲有, 佢仲有對大大眼睛, 眼仔碌碌幾得意 望多幾眼佢對眼都幾似佢媽媽!!

全部場都貼晒d菜名!!
xx蒸水蛋
全部叫左8款餸
燒汁鱔球
是夜主角 - 糯米雞是也~~
俾我地睇完個真身之後就幫我地"分屍"~~~

琴日其實除左去探下狗仔之外, 另一個目的就係慶祝奶奶既生日(遲左成個月先去慶祝, 哈!!), 上次去南Y島行山個時, 小貞貞已經提議去鰂魚涌個邊食"糯米雞", 唔係普通茶樓飲茶既糯米雞, 而係一隻去左骨既雞入面釀d糯米入去!!

起先, 我地先到太古城行左陣街先去食飯!! 開頭諗住係太古城個邊行返落去鰂魚涌都應該唔係太遠路, 點知行行重行行, 原來太古城行返落去越鰂魚涌真係都有一段距離(唔怪得之, 地鐵真係會開多個鰂魚涌地鐵站啦!!), 係越行越攰既情況之下, 呢班後生女開始係度"媽"聲四起, :『到未呀, 仲有幾耐先到呀, 好肚餓呀, 就快死啦!!!』好彩係佢地就快斷氣之前就岩岩就行到啦!!

原來呢度係一間小菜館, 仲要係個橫巷入面, 入到去入面一張餐牌都冇, 只可以望住牆上面既菜名落order, 個老闆(我估!!)一開始就飲我地飲咩湯, 我地話諗諗先啦, 佢就一直係度"吹", 問我地飲唔飲湯, 一直係度推介話佢地個杏汁白菜膽紅蘿蔔煲豬肺湯, 既然佢咁落力sell呢個湯, 我地就叫左個湯黎飲下啦!! 之後, 我地就隨隨便便叫左幾個餸食, 栗子排骨煲, 咕嚕肉, 炒通菜, 魚香茄子煲, 蒸水蛋, 當然包括我地特登預訂黎食既糯米雞啦!! 其實, 所有菜式都係一d小菜類, 都唔算係好特別, 味道o.k啦!!

叫餸個時都有個學問, 家陣原來仲有人咁傳統, 叫餸要起雙, 而我地咁岩叫到7個餸(連湯計), 點知Lingling話不如叫多個餸啦, 佢話叫7個餸, 好似食"七"咁, 唔係咁好, 哈, 所以我地最後就叫多個餸, 連埋個湯既話就岩岩好8個, 起雙!! 平時我自己就好少留意呢d野, 總之, 叫到夠食就得, 話知佢起單定起雙!!最後, total8個人, 由於奶奶生日, 唔計佢, 每人都只係$130左右, 唔算貴, 因為都係d小菜類, 貴極都有個限度啦!!

炳記
地址: 鰂魚涌英皇道911號地下
電話: 2561 4351
菜式: 廣東菜、中菜館

星期六的我

就係咁, 俾小不良霸左張床訓啦!!
訓左冇耐, 又爬起身, 拎埋d公仔入黎叫我同佢玩~~

之前講過, 逢星期六想訓晏d都冇咩可能, 成日都係8點半左右就俾人噪醒, 今個星期六如是, 老媽帶小不良返學之後(上校車)就返黎, 小不良一返到屋企就即刻打開我房門就爬上我張床叫我起身!! 唉, 難得星期六都冇得訓多陣, 真係慘不忍睹!!!

新環境

office對出一望無際, 不過, 我個位望唔到!!!

唔講, 係咪以為我坐左係個士多房入面呢!!

今日返新工, 新地點位於土瓜灣個邊, 一朝早返到去, 俾人安排左去Madam隔離個位, 唉, 個位係夠大呀, 大到咪俾人當個士多咁羅, 塞晒一箱二箱入去, 成個士多房咁, 而且, 最重要既就係, 又係冇電腦呀!!! 慘絕人寰~~~~

我又要繼續過d冇電腦既生活, 仲要係呢度渡過漫長既4個月咁多!! 你不如殺左我啦!!

亂糟糟

由於冇咩地方擺野, 所以就是但塞鬼晒落去枱下面頂住先!!

聽日就會轉新工作環境, 所以係office堆積左一大堆既notes、有用既相關information都要係呢幾日分段咁拎返屋企, 拎左幾日終於都拎晒返屋企!! 由於屋企地方淺窄, 所以就只好將佢地塞鬼晒落電腦枱下面, 一箱二箱咁樣!! 家陣d notes都唔錯多, 不過應該陸陸續續只會有多冇少, 真係要諗諗辦法睇下點樣重新整理一下呢d notes先得!!

望就望, 部電腦唔好冇啦啦熱到彈d火花出黎一野燒著晒d紙, 唔係到時我肯定會第一個燒死或者煙死!! 記得係電視節目睇過("職安健"個d), 係自己坐既位置下面不宜放太多雜物, 如果唔係對腳冇得伸展, 對腳屈埋屈會好易有d職業病, 唔知我會唔會係屋企冇啦啦有個咁既職業病呢!!!

大小不良近照

好似好耐冇post過佢兩隻野d相出黎, 大不良就肥左好多, 大家睇相都望到, 佢成個肚腩都突左出黎, 雖然佢逢星期日都會去學芭蕾舞做運動, 咪就係一星期先做個一次運動羅, 家陣咪就變左肥妹仔咁, 依家佢媽媽(即我家姐)成日同佢講, 你有冇見佢靚女係咁肥架!! 唉, 咁細個就教佢d咁既野, 遲d攪到佢有厭食症就知死!!

小不良冇咩特別啦, 不過就成鬼日都扭計, 有事冇事都扭一餐, 所以就成日俾老媽打鍋甘既佢!! 可能成日同大不良一唱一和, 所以佢家陣講野都算係幾流利!!! 黎緊佢就快上幼稚園, 老媽就應該會輕鬆好多啦!!

免費娛樂

平日出街返工放工返屋企都係搭巴士出入, 搭巴士一上車, 唔係訓覺就係望下街, 再唔係就係睇下雜誌, 再唔係既就好自然會昅下巴士上面既小螢幕Road Show睇下有咩睇下啦!!

近排見到有個廣告就係成班小朋友不斷係度講:『I"粒""Gra媽", I"粒""Gra媽"!!』(仲要係高音幾度講出黎, 而且仲重複左好幾次!!!), 第一次睇呢個廣告個時咁岩就係巴士度恰埋眼訓緊覺, 聽到呢班細路講野之後, 真係成個人都彈起左, 究竟呢班細路講緊d咩, 睇返d字幕, 原來佢地係度講緊:『I love grammar』, 係一間教小朋友學習英語既中心, 嘩, 如果俾著我係d小朋友既家長, 真係唔會俾佢地入去呢間學校上堂, 什麼I"粒""Gra媽"都講 得出既, 咁都叫教得好, 真係是但搵人故都得羅!!

另外, 如果大家都有睇Road Show, 都有睇過由"爛gag王"高浩正做主持既"手機音樂排行榜"(冇記錯好似係咁叫!!), 佢每介紹一首歌都用好多形容詞又或者用一段說話去介紹o個首歌, 每每當中都夾雜住好多爛gag, 其實我唔知係個節目個編劇玩佢定係高浩正自己真係咁敬業樂業, 成日見到佢講d爛gag個時又真係幾natural high!!