新一年

今日係1月1日迎新開始!!! 受Anna朋友邀請一齊去東平洲行山, 今次係第一次行東平洲, 聽講開去東平洲既船只會係星期六&日, 或公眾假期先會開出, 而且每日只會開兩班船, 一去一返, 係咁多, 如果你當日遲到, 上唔到船, sorry, 你可以plan定下次再去既日子啦!!

天都未光就要起身~~~

準備中~~

兩人份的lunch box, 完成~~

原來是此活動係教會活動, 雖然全部都係教友, 不過今次活動純粹係行山與傳教無關, 大家只係一心諗住郊遊一番而已!! 話晒去郊遊, 少不免要整下Lunch Box, 由於當日相約左8:20am係大學站集合,所以要晨早流流6點鐘左右, 天都未光就要起身整野食, 係一個極度眼訓既情況下整野食都唔係一件易事, 當然我就唔係煮咩大餐啦, 都只不過係煎下腸仔, 滾下火腿&雞蛋, 再加埋個撈麵姐, 不過功夫雖小但係都要花費時間架!! 梳洗完畢, 兼整理好lunch box, 準時, 7點左右出門口!!
一朝早已經有好多人係度集合!!
就係呢個碼頭度上船!~~
我地就係坐呢隻船啦!!
如果大家想有位坐就要早d上船, 因為成隻船會坐爆人!!!

Anna係九龍塘火車站等埋我再一齊出發!! 嘩, 去到大學站個時, 成個站頭都已經人頭湧湧!! 原來係假日既時候都幾多人去東平洲, 我眼見有油麻地旅遊, 教協等大大小小既旅行團都係呢度集合等出發!! 人齊, 於是就正式出發, 我地由大學站原來仲要行一段路先會去到碼頭個邊上船!! 9點鐘上船, 大約坐左個半鐘既時間就到達東平洲呢個地方, 一落船, 嘩, d風好大, 好鬼凍, 個個企係碼頭度食風, 凍彊左咁!! 等齊人之後, 再由領隊先生介紹一下今日既行程, 原來係東平洲主要係分東西兩邊咁行既, 我地朝早就先行島既東面先, 係下午就係到島上唯一既士多餐廳食lunch, 之後, 再出發行埋另一邊!!

講解完之後, 大伙兒就浩浩蕩蕩出發, 不過, 領隊仲提一醒大家千萬唔好走散, 萬一自己走失, 又唔知時間自己去返碼頭搭船走, 咁就唯有等到星期六先有船接返你走啦, 呢幾日就只好同島上面d流浪狗生活!! 係東平洲上面, 主要都係睇d石景, 如果你未黎過, 又或者好鍾意影相既, 呢個地方一定好岩你, 因為佢個d天然風景真係靚得好交關, 個個團友到達之後, 個個都忍唔住會拎起部相機係度狂影, 有理冇理都係度影!!!

島上唯一既士多餐廳~~~
有團友叫左杯"紅豆冰", 好似都幾正!!

行到12點左右就差不多行完第一段既路程, 於是我地就到島上唯一既餐廳食野, 由於事前唔知有餐廳存在, 而我又整左lunch box, 所以我同anna都只係食自己個lunch box就冇係餐廳度食野, 雖然冇食野, 不過見到d團友叫個d野食都算係幾大碟同埋都好似幾好食, 最重要都唔係特別貴, 大約$32/碟, 炒粉麵飯, 你喜歡的話小菜都有得你叫, 如果下次再黎既話就可以唔駛整lunch box!!
食飽飽再起程行埋另一半, 由大約2:00p.m開始起行, 沿途風光好靚, 一路行, 各團友都不忘拎起部相機起勢影起勢影, 不過講到下午呢一段口路程相對朝早行個段就長d同辛苦少少, 不過, 如果將佢同東涌纜車徑比, 呢段路就真係輕鬆好多好多倍啦!! 由於怕回程個時冇位坐, 所以大約4:30p.m左右就行返去碼頭, 大約5:00p.m, 隻船就埋岸開始接人上船點程, 係排隊期間, 有d警察係度叫大家上船前有show一show張身分證以示核對身份, 我諗可能呢度近大陸, 所以就怕有d非法入境人士偷雞上船!! 上左船之後, 出得黎碼頭個時天都黑齊, 個時都大約7點左右既時間, 開開心心咁又過左新一年既第一日啦!!

新一年有個新既好開始, 希望同Anna係之後既日子都可以開開心心啦!!