Happy Hour 在Office

今日放工冇耐, simon話不如拎放係雪櫃個支綠茶出黎飲左佢, 咁我就拿拿聲走去pantry拎返支綠茶出黎啦!!!

當我拎到出黎個時, 師姐見到支綠茶就話:『e!!! 綠茶呀!!! 溝芝華士呀!!!』, 佢未講完, 我就係我個位度拎左支芝華士(支酒係上次唱k個時飲剩)出黎啦!!! 師姐一見到支酒真係眼都突埋出黎, 跟住笑住口咁講話:『嘩!!! 我講下左喎!!! 你地真係有架.....』跟住, 我就話:『大家黎個杯出黎~~~』, 跟住, 就一人一杯綠茶+芝華士, 飲勝!!! 岩岩, 植sir行過收工, 見到我地飲酒, 就笑笑口話小心飲醉喎, 哈, 我地出黎玩, 邊樹咁易醉呀!!!

師姐飲左兩啖之後就面紅紅啦, 跟住話再飲就醉, 所以就急急腳拎埋個袋就走左, 之後, 我就走去師姐個位度, 一打開佢個杯, 車, 佢都係飲左一啖左右之麻。

我飲完之後成塊面都紅晒, 鬼咩, kenix落左鬼咁多酒....攪到我成個燈泡咁成個人紅晒, 唔只塊面呀, 連個身都紅埋。之後, 我見到Patrick問佢我塊面係唔係好紅, 佢話:『嘩, Gary, 你冇"樹"呀!!!』

6:00p.m左右, 同eric & kenix一齊走, 落到樓下過馬路個陣, free到自己個心跳得好"行", 於是叫kenix摸下我個心, 哈, ..佢話我個心好似就快跳出黎咁濟....eric再摸下, 佢就話駛唔駛陪我行下散下酒氣先返屋企。我就好大聲咁講:『 我冇醉.....我真係冇醉....』, 講真個句, 我真係冇醉架...

同佢地分手之後, 就走去搭巴士, 自己就塞住個MP3聽歌, o個時自己都特登聽d慢歌, 唔好再激自己個心臟.....都唔敢撰d快歌聽一當到容祖兒『越唱越強 』o個首intro就立即飛去第2首, 容乜易個心起勢咁跳架, 咁咪中風....我仲好後生, 唔好攪埋d咁架野, 安全第一....安全第一...

環島行, 行死人

今年係我連續第2年第3次行『環島行』, 今年基本上都係上年班底(simon, suki & me)再加一位新成員~~小貞貞。佢地都係來自我的不同層面, simon係我同事, suki係我個friend, 小貞貞係我中學同學, 哈, 都幾得意黎自五湖四海, 集合一齊。

講返琴日情況先, 我地係參加隊制的, 照大會指示隊制的出發時間係9:15a.m.。所以, 我就約左小貞貞同suki 7:30a.m係金鐘MTR 度等, 再一齊去食早餐(係!!! 點解唔約simon呢?? ---因為, 佢上年早餐就係食得豐富得濟, 攪到行行下就屎急, 所以佢為免意外再一次發生, 都係安全第一。) 我6:00a.m.就起身morning call小貞貞, 之後, 就去沖涼, 醒一醒個人先, 再之後6:30a.m再morning埋suki, 整裝待發, 7:00a.m 就搭巴士去南昌站, 嘩, 原來都幾多人咁早返工個喎, 成個地鐵都好多人下。


就係呢條串友!!! (白花油王子)

7:30a.m, 就見到suki同小貞貞, 我地去左大快活食早餐, 都好耐未試過坐定定嘆早餐, 感覺係非常之正。食完早餐, 我地就去搭攬車。上到山頂, 就join埋simon一齊去攪左登記手續先, 之後, 就做下熱身運動, 等出發, 就係我地做緊熱身運動個時, simon兄, "嘩"左一聲, 我以為咩事啦, 原來佢話見到顏福偉(就係o個個白花油王子羅, haha!!!), simon就好興奮咁叫我幫佢同阿顏生映張合照, 我見冇蝕底我都走去同佢映張啦, 映完之後, 佢就問左我一句:『你地諗住行到幾點呀!!』, 我咪答佢:『我地上年都行到第二朝12:00左右』, 佢就掩住嘴笑笑口(我覺得佢有少少鄙視)話:『嘩, 唔駛呀!!!』, 我心諗:『你老闆, 你就話係老細姐, 得閒走去可以練下, 我地呢d打工仔, 唔駛做咩, 我地都係指在參與姐 , 唔駛咁串呀。』 我當然冇係佢面前咁講啦, 容乜易, 佢突然拎d白花油出黎"拿"我隻眼, 之後話死靚仔咁串 or 走幾個G4出黎打我咁點算呀, 我都係同佢笑笑口就走左去。



9:15a.m正式出發, 一開始成班人一齊起勢咁行。都好順暢, simon依舊保持早個星期的馬拉松個種氣勢, 一口行先一步, 我就同suki & 小貞貞一齊行啦, 話咁快simon已經打俾我話到左check point 1, 佢就係o個度等我地。大約20min左右之後, 我地都到左check point 1, 之後, 就食隻蕉休息下再出發, 沿途天氣都唔錯, 唔係太熱。

去到陽明山莊(check point 2)時間都係3:15p.m, 時間已經俾我預算的早(大會建議到達時間係5:15p.m), 大家休息左一段長少少的時間(因為之後, 段路會比較辛苦), 就再出發。


由於, 雪梨, 香蕉同麵包都係無限量供應, 我就試下雪梨夾麵包黎食啦!!!味道呀..冇咩特別...

去check point 3呢段路應該算係最辛苦的一段, 雖然係得個4km, 但由於上落差太大(又上山又落下山, 樓梯又多), 故此, suki & 小貞貞開始頂唔順。 去到check point 3時(5:15p.m), 小貞貞同我講, 佢膝蓋已經開始就快屈唔到, 由於, 再行去check point 4中間會有個支援站入面有物理治療, 我就叫佢忍下, 因為黎緊個段都係大路, 都唔係太辛苦, 到支援站做下物理治療先。

呢度係大潭水塘.....

到左支援站(7:00p.m左右), 小貞貞同suki就分別去左物理治療同醫療輔助隊度療傷, suki就巴閉啦, 兩隻腳都有事, 兩隻腳有四個醫護人員幫佢包紮。就係呢個時候, 我就聽到d工作人員話, 我地個team已經係least 5 team, o下, 唔係呀, 上年呢個時候, 我都未係least5, 今年, 我仲要係快過上年成個鐘有多喎///。 有見及此, 當suki 同小貞貞療理完, 休息一陣, 就再出發。


兩位小姐都傷晒....

支援站去check point 4全部都係平路(全程係7.5km), 有見及此, simon兄就提議行快d, 如是, 我就帶頭一直行, 兩隻腳不斷咁行, 呢7.5km可以話係完全冇停過, 仲有, 行呢段路個時, 個天時不時就洒陣雨, 時大時細, 著住件風褸又鬼咁焗, 都幾辛苦下。

幾經辛苦, 終於去到check point 4(9:10p.m), 小貞貞同我講佢個膝頭已經完全係屈唔到, 尤其是落山係更加痛, 係呢個時候, 我就同佢講, 如果係咁就不如唔好再玩, 因為係最後個段路, 有一part係完全的落山路, 而且去到終點, total仲有成8km路程, 以佢隻腳狀況唔係太適合再玩落去, 而suki隻腳就更加唔樂觀, 佢先後係check 3 & 支援站, 都要搵醫療輔助隊幫手, 雖然佢個口就話冇事, 但係我都係決定唔俾佢再玩落去。咁成team人都有2個玩唔到, 我同simon都決定唔玩, 同佢地一齊走。


呢張係我地最後一張相啦!!! (因為我地決定out, 唔玩啦!!!各位隊員辛苦晒...)

於是, 通知大會後, 我地就搭的士落返去筲箕灣個邊先, 因為小貞貞就call佢男友仔黎接佢, 順便兜埋我同simon。 suki就叫佢細細妹個男友仔去接佢。 咁我同simon & 小貞貞係太興茶餐廳食野, 由於見大家行得咁辛苦, 呢餐就由我黎請客, 我地叫左兩個小菜及抄飯麵食, haha, 我係第一個見小貞貞男朋友的人(wahahha, lingling, 奶媽你地唔狠得咁多架啦...), 佢都幾好人, 佢話送埋我地返屋企, 我話唔駛, 係紅隧放低我同simon就得(因為, 我就住荔枝角, simon就住大圍, 一個九龍, 一個新界, 就無謂煩到人啦), 但到最後, 佢都係送左我地返屋企, 真係thank you晒....

如果, 下年有時間的話, 等我再玩過先, 不過, 就可能真係未必有機會, 因為, 下年呢個時間, 我要prepare份dissertation未必有時間......

但我都覺得小貞貞同suki好好野, 隻腳咁傷都行到咁多路, very good呀!! simon兄更加唔駛講超fit呀...!!!

剪你個頭

黎緊星期六行『環島行』, 於是諗住"恤"返個短髮, 咁行山就方便d, 輕鬆d。今日一放工, 就先去旺角朗豪坊的"Italian Tomato"訂蛋糕先, 因為聽日kenix生日(今個星期連續有兩個同事生日, 今個月就有三個), 由於諗住only自己team人食, 所以就訂個1磅cake就算, 但係1磅cake就得幾款撰, 咁就訂左個"日式芝士蛋糕", 就聽日lunch拎。

好!!! 攪掂之後, 就去左尖咀o個間『Lobby』剪髮, 其實, 都有成大半年冇返黎剪, 今日唔知咩事, 阿James今日好多客, 我已經係星期二o個時已經打電話黎booking架啦, 點知我仲要等左成粒鐘先有得剪.....唉!!! 其實, 我之不過係想修一修姐。 等左佢成粒鐘, 佢就幫我剪左廿分鐘左右, 不過, 算啦, 佢都剪得o.k, 今日一路剪就見佢一路"索下""索下 ", 睇佢個勢都係傷風居多。 最後, 我攪掂埋單, 望下隻表, 嘩, 唔覺唔覺攪到成8:00p.m。

一落樓就見到阿kenix同個friend一齊, 就叫左佢一聲啦!!! 佢話我個頭攪咩剪到咁短呀, 笑左幾聲, 之後, 就同佢講拜拜, 佢就同個friend去食飯, 我就歸家啦.....

(Plan A + Plan B) 混合體

琴日, 原定同公司同事出外活動一番, 進行十年都好耐未再接觸的活動~~~『踩單車』
但這個星期的天氣十分之不穩定, 天文台仲話星期六會『天氣寒冷仲有幾陣雨』, 故此, 我地都商討如果踩唔到單車的後著, 繼而出現Plan A & Plan B :

Plan A: 好天氣---->大圍踩單車出發, 入大埔, 再搭車入大尾篤BBQ
Plan B: 落雨 ---->唱Tea K, 再出尖咀食意粉buffle

原本, 天氣唔係太差, 雖然係冇太陽, 天暗暗, 但冇雨落, 我仲一心以為o.k冇問題啦!!! 一出門口唔夠5分鐘就接到eric兄的電話話:『Plan B, Plan B, 出面落緊雨, 唔係好大, 毛毛雨, 不過就好密。』 Shit!!!! 又踩唔成, 再一次泡湯, 咁就只好照原定計劃Plan B啦!!!

大家去到K 房唱到一半時候, eric兄就提議不如今晚去BBQ呀, 好似會開心d。於是, 唱到6:00p.m我地就起程出發入小欖BBQ場, 雖然係星期六, 可能d人諗會落雨就唔去BBQ, 所以都唔算好多人。我地最後搵到個有上蓋的位置燒野食, 天文台好準下, 天氣真係幾寒下, 小欖個BBQ場都幾近海, 應該話佢係對住個海, 所以都幾好風, 時不時都有陣風吹埋黎, 真係講句:『好冷(個音高d)凍!!!』

後補+預祝+計劃

琴晚,同jaemi預祝生日(佢正日係下星期), 但我下星期要行環島行關係, 故此提早d幫佢慶祝, 我地去左尖咀的Royal酒店食消夜buffle, 今晚, 我同jessica早到左酒店, 於是jessica就打電話致各方好友位置在那, 此時, 聽到jessica與thomas的對話, 只知t兄今晚又放飛機, 唔知點解開始對佢放飛機的感覺已經有些免疫能力, 聽完之後我只是輕輕的回應:『哦!!!』一聲就算, 因為好似都已經唔係第一次, 所以都已經見怪不怪。不過, 要人打電話黎, 先同人講你唔出席, 會唔會好似唔係幾好呢, 咁大個人應該有d交帶!!!

講返個buffle, 琴晚好似冇咩人, 上次去個時都幾full下, 今次除左慶祝jaemi生日之外, 仲要後補camus兄份生日禮物, 其實係年二八o個時jessica已經拎左, 不過, 久久未能"就"到時間拎出黎, 所以就趁琴晚就順道送埋俾佢, 係件Northface女裝兩用褸, 係冇錯, 係女裝呀!!! camus兄話佢試過d男裝,『老練』咁大件, 所以就要件女裝L碼就岩駛。佢著上去都幾好睇, 幾fit呀...而jaemi個份就因時間關係, sorry未買到, 唔好意思要等下次先有啦...我地有拖冇欠呀.....

傾左一輪, 講到jessica生日去邊, 佢自己就提議去disney, 佢一講呢個活動, 座上每一個人都突然啞左咁, 冇人出聲, 鬼咩, 有人就岩岩去左, 有人就晨早去左, disney又鬼咁細, 所以都冇咩人有興趣, 最後為左完成佢個心願, 我地決定去本地薑『海洋公園』wahahhaha....佢自己就再約另一班朋友去disney啦!!! 我地就去海洋公園~~~其實,我就去邊個我都冇咩所謂, 不過, 冇計啦, 冇人撐妳, 妳勢孤力弱, 我都幫妳唔到....sorry啦....

有人辭官歸故里, 有人漏夜趕科場

標題中講的正是本人。前日公司人事部陳小姐, 打俾我講：『之前你 in 的SO(Safety Officer~安全主任)有位(小弟本身係BSA-Building Safety Assistant~屋宇安全助理), 轉唔轉過去』, 我答要諗下先, 於是第2天才答覆她。

何解仲要諗呢!!! 其實, 本身已經覺得係BD做左1年有多, 係時候出返出面做, 係BD做野, 真係令到個人懶晒, 而且學野又唔夠出面多, hea左咁耐, 都係時候走, 仲有係現在的office識到一班好玩又好人的同事, 個個後生又玩得, 轉左之後就唔知個d係咩人, 如果成班騎呢怪咁我點算呀。仲有, 仲有, 話就話個名叫SO, 其實個份人工係同依家一樣, 冇加到, 但係個工作量就有加大的可能添, 最後之不過, 係得到個虛名, 冇其他實際利益。

不過, 我想, 如果橫掂都想走, 不如轉左過去先, 再搵都一樣姐, 而且, 人依靠衣裝, 虛名呢家野都好多人buy, 起碼, 出面d人睇我份CV個時, 都好似好睇d, 有睇頭dd呀, 基於這個原因, 所以, 我都係決定轉去呢個虛名位置。係呀, 我13/3/2006就會轉位....

左轉右轉

今日放工, 同simon兄 & benny兄為下星期生日的兩位同事去買禮物而行左不少路。我講一講個行程先呀!! 首先, 起點係本人旺角office, 出發之後, 就搭巴士102號去銅鑼灣sogo(點解要去到sogo買呢? 其實, 係benny兄識人係nike shop有discount, but only係sogo o個間先有, 所以咪"老練"咁遠過海羅), 到左sogo, 我地係nike shop度睇下有咩岩啦(其實, 之前都睇岩左架啦), 於是, 就去問個sale其中一件禮物有冇黑色啦, 佢話有,不過, 要係中環個間分店先有, 咁為左份禮物, 我地就叫佢幫我地hold住, 我地轉頭再過中環拎啦!! 好, 攪掂一份。

到第2份個時, 我地又問個sale有冇件新架, 佢話有, 不過, 要係尖沙咀parkline間分店先有, o下, 唉!! 為左份禮物, 我地又叫佢幫我地hold住先啦, 我地轉頭再去拎啦.....攪掂晒, "公"家野, 就幫自己睇下有咩岩啦...haha, 最後, 我自己就買左條運動長褲for下星期行"環島行"著(好抵呀!!$299 x 70%=$209.3)

開心過後, 就high野啦, 我同simon先到中環分店拎第一份禮物(benny話要返屋企食飯, 中途就離開左我同simon)。拎完第一份, 就同simon兄搭渡海小輪過尖咀, 再行去parkline, simon講左一句：『 乜我地咁似"龍珠"咁, 要去唔同地方收集7星龍珠』, 最後, 拎埋另一件生日禮物, 大功告成, 報告時間係8:00p.m, 嘩!!! 我地由公司5:30p.m出發, 到最後原來攪左成2個半鐘.....*_*

最後我總結左2件事:
1.) 香港有4間Nike pro shop, 我同simon今日用左2個半鐘時間行左其中3間。
2.)今日條shopping路線, 幾似星期日跑馬拉松10km d路線(倒轉個隻), 銅鑼灣--->中環--->尖沙咀

馬拉蟲

期待已久的渣打馬拉松終於黎到, 今日5:45a.m開跑, 自己預計要5:00a.m左右去到尖沙咀, 由於要搭4:30a.m MTR頭班車的關係, 所以要3:30a.m起身。除左去旅行之外, 基本上都唔會咁早起身, 所以琴晚, 係我呢大半年以來最早訓的一晚, 11:00p.m已經訓左落床, 連原本想睇的『假如愛有天意』都忍痛唔睇, 早d訓。


晨早流流, 咩人都冇///

今朝"教"左鬧鐘3:30a.m起身, 一起身就沖返個熱水涼, 再食個公仔麵, 4:15a.m就出面口, 條街好靜一個人都冇, 去到MTR岩岩好4:30a.m。不過, 架車仲未到, 仲要等多成個字先到。一上到車, 就全部都係參加馬拉松d人。係尖沙咀MTR出到地面, 嘩!!!個場面幾似前排灣仔WTO咁, 排晒d鐵馬係馬路度。我就快快手去到文化中心個邊放低d行李, 去到放低之後, 見simon仲未到, 就打俾kenix(當時係5:20a.m), 電話一通, 佢問我係乜水(我聽到佢把聲似仲係訓緊, 唔多清醒個隻), 我話：『你仲唔出門口, 我都就快開跑』(佢係參加女子10km--->6:55a.m開跑), 跟住, 佢就"哦"左我一聲, 就收左線。


呢度就係彌敦道啦!!! 擺晒鐵馬

5:35a.m左右見到simon & anthory, 之後攪掂d行李, 就急急腳行去起步點, 都真係好多人, 由於太遲先到起步點, 所以都排唔到頭位。 一開跑, anthory就好似老鼠仔, 不斷向前標, 可能佢平時訓練有素, 一陣間就唔見左佢, 咁我就同simon一齊跑。




沿途不斷映相, 一係就幫simon映, 之後就simon幫返我映, 再唔係就自拍, haha, 跑到去西隧尾段, 我就開始冇咩氣, simon就繼續上, 慢慢就同佢分開跑, 都係怪平時冇練習關係, 不過算啦!!!我都沿途映下相, 開心d。一出完西隧就上天橋, 其實, 個段路覺得好快就跑完羅, 穿過天馬艦過埋會展話咁快就衝線, 不過, 都跑左1個鐘多dd。感覺幾好, 唔係好辛苦。



之後, 就去左灣仔運動場拎返先前放低d行李。攪掂晒d野, 就同simon & anthory去左灣仔飲茶, 成間酒樓都係我地呢d岩岩跑完步d運動員, 連隔離個位阿伯都話:『因乜解究, 今日咁多人, 平日冇咩人, 係喎!! 今日好似跑馬拉松喎!!!』



飲完茶都之不過係9:00a.m左右, 平時星期日呢個鐘段應該仲係屋企訓緊, 之後, 就各散東西, 我返到屋企, 沖個涼, 見個人又唔多眼訓, 就走去睇左套"黑社會"。 3:00p.m電視冇野睇, 咪走左去訓覺。

今朝跑緊個時係度諗, 點解平日, 屋企樓下好地地唔駛錢, 又唔駛早起身, 你又唔跑, 家陣大拿拿俾2舊水人地, 仲要咁早起身, 仲有咁多傻仔仲走去參加(當然包括我啦, whahaha), 唔通人類真係群體生活, 要成班人跑先開心....

拿拿臨, 大拿拿

岩岩出糧, 就拿拿臨黎左去交學費, 大拿拿拎左$7,200-黎交學費, 家陣之不過係交左頭筆數先左喎, 之後, 仲要交埋尾數$21,600-, 好彩遲d出份gratuity可以幫補下, 唔駛咁辛苦。唉!!!都話細個讀好d書啦.....

唔知點解今年又好似會好快過完, 你睇, 家下已經2月啦!!!今個月又話咁快又完啦, 黎緊星期日跑馬拉松啦, 隔個星期後又行環島行, 咁就完架啦個2月....

初七--人日

今個星期六係短週, 唔駛返工。下午到了維園領取下星期日參加的『渣打馬拉松』的號碼布, 計時晶片及相關的記念品, 今日去到維園時發覺好多人喎, 排隊的人打了很多個蛇餅, 今次係第1次參加, 所以都係參加跑10km, 如果跑半馬 or 全馬, 驚跑唔晒全程。等下年 or 下下年再考慮下玩半馬。排左大約3至4個字就拎到號碼布等東西。由於晚上, 於灣仔的皇悅酒店與親戚食buffle dinner及團拜(係呀..哈, 我地新春團拜, 一次過可以見晒咁多人, 咁就唔駛四圍去拜年咁麻煩啦!!! )。 原本, 諗住一個人傻下傻下係銅鑼灣遊蕩大半日, 點知, 俾kenix提議左一個絕佳(最重要係唔駛洗錢)消磨時間的活動~~~~去中央圖書館。

如果計埋今次, 其實我之不過係第2次去中央圖書館, 第1次去應該係n年前概事(仲要係同當時的女友去的---記住家陣我係浪子,wahahha)。去到圖書館已經係2:45p.m, 仲有成3個幾鐘先食飯, 於是就開始係圖書館打書釘, 一個人坐係圖書館靜靜地睇書, o個種悠悠閒閒生活都幾舒服。雖然, 唔係睇咩大文作, 只係睇左幾本雜誌(係呀, 中央圖書館就真係中央圖書館, 咩雜誌都有, 你講得出都有---我就睇左本jet雜誌), 但都好enjoy。

到左6:30p.m, 去到酒店, 各親戚都已經開始拎野食, 當然啦, 我第一時間同各親友拜個年先啦, 呢邊祝你『xx』, 另一邊就恭喜你『xx』, 當然啦!!!咁樣做, 都係想有返d應得的回報啦(利是)!!! 成績都算唔錯...haha, 真係恭喜, 恭喜.....食左幾輪之後, 各親戚開始停手 & 停口, 於是開始傾計, 最後到左9:45p.m左右, 大家都各自歸家去。臨尾, 我問表哥佢有冇參加馬拉松, 佢話有, 我問10km定半馬, 點知佢同我講佢參加全馬, 我一聽之下眼都突埋。佢話跑10k.m要好早起身, 佢話唔想咁早起身, 所以走去跑全馬(10km起步時間--->5:45 a.m, 全馬起步時間--->8:15 a.m), 佢都傻邊有人係咁諗野, 唔想早起身就寧願跑多30km(全馬係39km).......

新春兼潤月

今年真係好事多, 繼年頭有小狗報喜~於今年年尾會結婚後, 今晚又收到一個朋友的喜訊, 就係小貞貞呢個大冰山終於俾人劈開啦!!! 係呀, 佢苦候多年的春天黎啦!!! 實在太好啦!!!




不過, 死啦, 下次大家出黎o個時, 個個都帶多件出黎, 咁我咪好寂寞..........唉...浪子真係難做呀!!!