譚李聯婚

上上周六, 識左十幾年既好朋友兼中學同學Jaemi結婚, 雖然同Jamei諗熟, 不過由於佢同佢老公已經有好多好朋友幫手做兄弟姐妹, 所以今次就唔駛幫手做兄弟/姐妹啦!! 不過幸運既牛牛同Jessica就難逃一劫要做伴娘同姐妹!! 聽佢地講係之前個一晚, 佢地班姐妹要上新娘子屋企食餐飯兼要睇埋新娘子上頭先走人, 攪得黎都差不多成12點幾先走得人, 到左第二朝佢地又要晨早流流6點左右就到新娘子屋企集合!!! 嘩, 夾夾埋埋都係訓得個幾粒鐘, 真係辛苦晒啦!!


我地呢d唔駛做兄弟既, 就當然可以訓到黃朝八晏啦, 由於Jamei同佢老公都係誠心既教徒(唔記得係天主教定基督教??), 所以係下午就有一個教堂註冊儀式, 身為好友當然要出席見證咁重要既一刻啦!! 2點鐘去到個時, 主人家已經佈置好整個教堂十分之靚, 今次都係第一次參加教堂婚禮感覺比較特別, 開始之前Jessica同我講成個流程要成粒鐘有多, 平時睇電視個d以為只係一對新人進場, 之後牧師問人有冇人反對, 冇人反對既, 一對新人就可以錫錫, 禮成, 再之後成班人到門口影大合照就係咁簡單!! 現實版, 原來又唔係個喎, 第一, 牧師係唔會問有冇人反對, 二, 原來整個流程都較想像中長(其實應該正常都係咁, 只不過我第一次參加呢ｄ教堂儀式姐!! 見識少姐!!)　當然, 係教堂行禮氣氛比較warm, 感覺上似返主日學個d感覺, 因為又有人唱詩又有人講道!!


為怕買錯, 所以都係影左新郎哥朵花for referance use!!

完成左教堂儀式, 我同堅兄兩條友冇所事事, 就俾伴娘Jessica欽點左去旺角花墟拎花, 因為夜晚新郎哥要俾驚喜新娘子, 會事先每一圍派一枝玫瑰, 之後就當新娘子路經每一圍枱個時, o個枱人就送上一枝玫瑰予作祝福, 當然, 最後由新神哥送上最後一枝花作結尾!! Jessica已經一早係花墟定左批玫瑰花, 我地只係奉命拎野, 不過, Jessica話新郎哥送個支花要特別d要另外再買, 要"黃色馬碲蘭", 我地呢d對花冇咩研究既人, 鬼知咩係馬碲蘭咩樣, 於是Jessica立即話聖安娜西餅個枝咪係羅, ok, 立即明晒!!!


兄弟姐妹忙於佈置會場中!!

會場正正對住維港, 景色一流!!


時間尚早, 其他人未到, 兩條友仔唯有係度燃雀度日!!

去完旺角拎花, 就返去晚宴地方, 因為係d驚喜, 所以拎花上去個時都係要鬼鬼祟祟咁, 免得俾新娘子發現!!! 送貨完畢, 再一次冇所事事, 時間尚早, 牛牛又怕要等到今晚9點先有得食, 於是就同我地一齊落去Burger King食返個late tea先!! 食飽飽, 就上返去會場先啦, 不過時間都仲係好早(應該都係6:30pm左右), 而我同堅兄又廢事四圍行街, 而其他朋友仔又未到, 於是兩條友仔就只好係麻雀枱度"燃雀", 但係估唔到, 同場有人同我地一樣悶到發慌, 於是就"瞭"我地一齊打返場衛生麻雀消磨下d時間!! 好彩, 託Jamei福, 俾小弟可以拎返食Barger King d錢, 實在好運非常!!!

婚宴結束散席後, 見到新郎哥好感動咁攬實班兄弟係度喊, 場面感動萬分, 於是我就問堅兄:『點解之前我地幫你個時, 唔見你喊既!!』, 哈, 牛牛就立即話:『 我地係好理性架!!! 何況你都冇攬住佢!!』

最後, 在此再一次祝賀一對新人, 幸福快樂, 白頭到老!! 仲有, 新年就到, 快d包利是啦!! 我地上黎拜年想要瑞士糖定係蛋卷呀, whahahahah~~~

聖誕夜 - 豬肝補氣

全院滿座~~~

平安夜冇出街, 於是就係聖誕節正日出返夠本啦!! 當日下午冇咩特別野做, 於是先去太古城睇下聖誕商場免費歌舞show, 其實上年聖誕都有同Anna黎太古城睇呢d歌舞show, 今年再睇個時, 望清楚台上面d表演者, 嘩, 原來同上年一樣都係個一班人, 個班表演者話佢地既舞蹈團係黎自澳洲!! 估唔到, 今年太古城又再搵返同一班人黎表演!! 其實近呢幾年既聖誕, 每一個大大少少既商場都會有唔少既免費表演, 由歌舞, 魔術, 話劇, 馬戲......可觀性都相當之高, 如果大家可以花少少時間去check下個timetable就可以睇下呢d表演!!!

講返今日既節目先, 是日最大節目莫過於去沙田大會堂睇詹瑞文既萬千師奶賀台慶之豬肝補氣!! 話晒聖誕正日, 咁去睇之前當然要食返餐好既先啦, 於是就book左係紅磡既Cafe Le Must, 之前同朋友去過佢係新蒲崗既餐廳覺得幾好食, 所以就襯今次就去紅磡既分店食過!! 由於我地睇舞台劇, 於是就book左6:00pm早少少食, 加上平身呢間餐廳係食法國餐, 上菜既速度都相對慢dd, 所以有早d食既必要!! 講返呢間餐廳先, 係夜晚佢有個set dinner$138, 有頭盆, 湯, 主菜, 甜品, 飲品, 五道菜, menu入面有d貴價少少既就再要加多少少錢啦!! 唔知點解, 好似覺得係新蒲崗店好似係好食d咁, 可能對上一次係第一次食, 所以就不其然加多少少分, 又再加上, 自己有少少趕時間, 唔可以慢慢咁享受食物, 而且紅磡店入面d比較窄左d, 枱與枱之間都幾近下, 感覺唔多好, 不過食物都算唔錯!!

由於係紅磡過沙田都需時, 所以就拿拿臨要係7:30p.m就走人, 其實係餐廳去到尾個時, 諗住叫佢快手d上埋個甜品同埋個熱飲都比較慢, 攪到我地差不多要成7:45p.m先可以係餐廳度出發!! 為免遲到, 所以我同Anna要起勢咁跑, 好彩都岩岩好係8:00p.m準時入到去會場入場, 不過就出左一身汗!!

嘩, 入到四周圍望一望, 全院滿座, 幾勁呀, 聖誕節都有好多人黎睇, 一心諗住開心下, 都唔錯!! 之前係VCD都睇過詹瑞文既演出, 都有幾期望!! 其實講真, 全個劇基本上分左好多part, 唔係part part都好睇, 有時有d都係有d悶場, 但係唔算多, 反而我期望個d比較互動既環節相對少左d!! 好明顯, 詹生都想大家有多d共鳴, 所以都將一d比較hit既話題都快快手帶埋上台, such as倪震&亞視魔童!! 成個show大約接近3個鐘, 當中包括20分鐘既中場, 雖然中間有d悶場, 不過睇住詹生一個人由頭演到尾, 聲嘶力竭都真係唔野少!!

平安夜斬雞

原封不動既雞~~~ 開工~~
完成~~謝!!

平安夜冇街出, 實情是因為打後個3日(25,26&27號)勁出街, 加上平安夜出街費事同人迫, 所以是夜都係乖乖留係屋企食自己(因為媽媽同阿姨佢地返左大陸玩)!!

今日突然收到原隻白切雞一隻, 原先諗住就咁原隻放係碟度, 用保解紙包好再成舊塞入去雪櫃就算, 不過, 屋企個雪櫃都唔係大, 而且本身入面都塞左好多野, 根本就冇咩可能再塞多舊雞入去!! 把心一橫就索性將隻雞分屍入碟應該會易打理d!!

講真, 平時屋企煮雞斬雞都係由媽媽出手, 自己見佢斬個時都係手起刀落以為好易啦, 自己斬落去個時又係另一回事!! 今次係第一次斬雞, 以為好易, 原來睇同自己落手做真係差天共地!! 一開頭唔駛講當然係劏左對雞臂同雞翼先啦, 再黎就賴野啦, 淨返隻雞既body, 我望住佢, 佢又望住我真係不知如何入手好!! 最後左劈一刀, 右劈一刀, 最終劈到隻雞支離破碎, 上碟, 收工!!

聖誕前狂歡

其實環境同其他日本料理個d都係咁上下!!

牛乳牛肉鍋~~~

全晚最好食最有睇頭就係呢個什錦併盤, 兩個人黎食呢個併盤應該岩岩好, 不過呢個併盤都要成$300~~

有幾多野食~~~hehe~~

今年係第2年同study group同仁一齊慶祝聖誕, 記得上年慶祝聖誕節係王家沙食完飯再到戲院睇投名狀, 估唔到話咁快就一年!!! 今年有青衣小林尊之稱既Mandy提議到銅鑼灣食shabubu, 因為大部份既人都係港島區工作, 所以全部人都舉腳贊成!! 聖誕節除左食之外就係交換禮物啦!! 由於book左7點鐘, 所以就同Mandy & Steven先上去坐定定先!! 睇一睇個環境都相當不俗, 不過有一點提一提大家既, 就係入到餐廳入面手提電話會收唔到訊號, 所以如果要約人既話就要記住呢一點, 唔係d人打俾你, 你會一直都收唔到架!!


講返呢間餐廳先, 原來佢本身係百人一朱集團旗下一間餐廳, 所以平極都有限, 如果一大班人去食就應該會好dd, 兩個人去食一來食得唔多, 兩來比較唔化算!! 我地今次主要叫左兩個鍋, 一係牛乳鍋, 另一個芝士牛乳鍋, 另外再加一個什錦併盤(內有魚生, 天婦羅, 卷物&壽司<---我覺得最好食就係呢個拼盤)(d天婦羅新鮮炸出黎, 熱辣辣的, so good)!! 可能平時都係食開個d一個價任食唔嬲既火鍋, 對住呢d得個一碟得個幾塊既薄切既牛肉, 加多碟菜蔬&日本麵, 某程度上好似食極都唔夠喉, 我地呢d粗人都係一世食個d任食打邊爐岩d, 呢d高級料理都係見識過就算!!



唔好以為份份都包得咁靚就俾佢表面呃到, 入面好多都係唔等駛既野, wahhahahah~~~

沿用上年交換禮物方式, 包剪揼~~~


當然今晚除左食之外, 另一個重點當然就係交換禮物啦!! 幸好今次拎到既禮物都算不俗, 感謝, 感謝!! 我地玩得實在太噪, 俾侍應叫我地細聲d, 真係冇辦法, 玩得高興就不其然大聲叫左出黎, 不過最緊要係大家玩得開心!! 大家食飽飽, 根據前人既理論, 人有兩個胃, 食正餐一個, 食甜品一個, 我地食飽左個正餐, 於是就要去餵飽埋個甜品胃啦!! 最後一班人最好就係去Haagen Dazs食雪糕啦, 又可以食多幾個球, 多d人又可以share平d!! Good!!



悠
地址; 銅鑼灣百德新街恆隆中心3樓T02店
電話: 2881 6191
菜式: 日本菜、火鍋

瘋狂瘋狂玩樂六, 日, 一 （3）

玩左頭兩日, 終於黎到最後一日!! 今次我就同Anna到迪迪尼玩啦, 我地呢d圓左全年票既人, 係呢d大時大節唔入場玩返夠本點對得住自已呀!! 所以就襯依家迪迪尼有special function就入黎玩一玩啦!!


今次我地就放左工先入黎玩, 所以入到黎都有少少夜, 不過都唔緊要, 因為今次入黎主要都唔係要玩機動遊戲, 主要入去係睇個"睡公主閃亮舞會"同埋睇下其他特別野!! 咁好彩一入場岩岩就開始做緊巡遊表演, 由於依家既主題係"christmas"既關係, 所以所有既表演者都會戴晒d聖誕帽, 增加返D聖誕氣氛, 仲有仲有, 係入場個時仲會每人派一幅特製眼鏡, 只要你望住d燈泡, 你就可以睇到d一個個雪人圖案出現, 其實係上年聖誕都已經同anna去過迪迪尼, 個時都派過呢副眼鏡, 不過聽講, 今年仲有另一款圖案就係"天使", 原先諗住問下D工作人員有冇啦, 點知佢話要派"雪人"個款眼鏡先可以派另一款, 哎呀, 真係太孤寒啦!!


講返先, 佢今年多左個"睡公主閃亮舞會", 迪迪尼係城堡前面搭左個舞台表演歌舞, 呢個表演主要都係一班迪士尼人物同埋公主&王子一齊跳舞, 由於燈光加上音樂, 跳起上黎都真係幾好睇架, 仲要佢地跳到最後仲有d煙花放出黎成個景都好靚!!
當然, 除左個跳舞表演就仲有既就係米奇大屋啦!! 係呢個聖誕時節就特登整間大屋, 入面放晒d super大size既用米奇用品, 大家可以隨意影相, 最後, 仲可以同米奇佢合照添!!

瘋狂玩樂六, 日, 一 （２）

到星期日啦, 原先就諗住同牛牛佢地一齊去濕地公園郊遊一番, 不過大家都知禽流感出現, 家陣濕地公園會close一段時間, 攪到我地又要再諗去邊樹郊遊, 既然係咁, 就決定行山做下運動啦, 上次同Anna行過昂平360既纜車徑尚未成功, 大好機會, 今次再接再厲再行多一次!!

係美心快餐度食個靚早餐!!

晨早流流我就出發去九龍灣地鐵站同大家集合, 明明約左9點鐘, 個隻牛牛仲遲到, 9點鐘打俾佢啦, 佢就話行緊過黎, 好明顯我聽一聽佢個backgorund靜到無倫就知佢講大話, 於是就啦督爆佢話:『識你十幾年就知你講大話, 未出門口就快d黎啦!!』, 佢都知自己遲到, 即刻話:『著緊鞋, 出門口架啦!!』於是, 我就同Anna搵個地方食住早餐等佢同堅堅!!

係起點個度, 陳生同陳太好緊張係度睇緊個地圖!!

堅兄行到成條腰都彎晒, 好很誇張!!

係中途向下望, 真係好鬼斜!!

大家食完早餐就快快手搭地鐵出發!! 原先諗住先搭昂平纜車上去大佛再行返落山, 不過, 堅兄佢有畏高症, 為怕佢行落山個陣一時腳軟碌落山, 我邊樹賠個老公俾人呀, 所以最後決定都係辛苦d先行上去, 再搭返纜車落黎!! 行行重行行, 由於行上去既斜度比較大, 所以大家一開始個時都有d辛苦, 當然啦, 成班後生仔女好日都唔做運動, 一黎就行得咁激, 唔死得已經算好彩!!!

係第一個check point 休息~~

最受歡迎既香腸!!

所謂既好斜既地方就係呢個樓梯!!!

辛辛苦苦行到第一個"check point", 就當然要休息一下先啦, 牛牛今朝雖然係遲到, 不過佢一早準備左d食物俾大家有腸仔同埋牛油粟米!! 唔好睇少呢兩樣野, 腸仔同粟米真係有拎去煎過同埋炒過架!! 最攪笑既係, 牛牛問爆谷既原材料係咪粟米, 因為佢話今朝起鍋抄粟米個時, 懷疑個鍋太熱一放粟米落去個時, 聽到d粟米爆炸聲, 佢諗應該係個鍋太熱會整爆d粟米變成爆谷!!

幾經辛苦, 終於黎到第2 check point~~
有3隻流浪狗仔~~

食飽飽就再出發啦, 今次可以行上次我同Anna冇行既新路段啦!! 其實我地行到第一個check point只係成個路段既三分之一, 雖然之後既路冇咁斜同埋咁難行, 不過, 行落好似行極都未行得完咁!! 行左一段時間, 終於到左第二個check point, 原來係呢度, 可以好近距離咁見到d纜車, 大家坐係度又再食野, 我地一路食, 坐纜車d人又一直咁望住我地, 講起黎都有少少唔好意思!! 係呢度, 我地見到有3隻好得意既狗仔係度行黎行去, 聽d工作人員話, 個d係流浪狗黎架,

終於行到黎終點~~

係市集度可離遠望到大佛~~

係第二個check point休息完之後, 又再出發啦, 再行多接近一個鐘頭時間左右就行到終點 - 終於到左昂平市集, 講真, 我本人就真係第一次黎昂平市集, 之前都聽人講呢度冇咩野好行, 上到黎之後就發覺所言非虛, 雖然人流都唔少, 不過講到要睇要玩既野真係唔多!! 辛苦上到黎, 基本上都已經用晒d energy, 再加上我同Anna之前都上過大佛所以就冇再上去大佛度行, 不過牛牛同堅兄就第一次到昂平呢度, 所以就用埋最後一丁點既energy都踩埋上去!! 我同Anna唔駛講就當然係坐係下面食住豆腐花等佢地啦!!

到差不多4點半個時就走人啦, 嘩, 點知排隊搭纜車落山既人多到你唔信, 最後, 我地排左差不多成粒鐘先可以搭到纜車返落去!!