瘋狂玩樂六, 日, 一 （１）

上星期連玩3日, 由星期六玩到星期一, 日日新鮮日日開心!! 首先同Study Group同仁一齊去BBQ是也!

今日係星期六, 正常黎講就應該大把人去燒野食啦, 所以就特登搵個冇咩人去既地方燒野食啦, 我地今次就去左新娘潭(大尾篤再入)個度BBQ啦!! 雖然話就話應該冇人去呢個地方燒姐, 不過但求安心一d, 都係兵分兩路, 一邊人去霸爐, 一邊人去買野食!! 去霸爐既工作就留返俾住大埔既人去做啦, 而買野食就唔駛講係我強項啦!! 我約齊其他朋友仔係大埔火車站集合, 就出發去買野食!!

原先我地去買野食個時, 有"青衣小林尊"之稱既Mandy, 一黎就話要每款丸類都要十幾粒, 雖然我地有成9個人BBQ, 不過根據過往BBQ既經驗, 呢d眼闊肚窄既情況, 係買野食既時候都係司空見慣, 成日以為會唔夠食, 最後就落得邊個捱義氣就拎d野食返屋企既下場!! 所以就立即阻止mandy既瘋狂行為!! 雖然係咁, 不過mandy成日都口唸唸咁:『我地有9個人燒喎...........我地有9個人燒喎.........我地有9個人燒喎』, 好似死唔斷氣咁!! 成日以為個個都係生蟲咁, 一定會食好多野先得!!


唔好睇少呢度好似咁少野食, 最終都係食 o 唔 o 晒!!


買晒野食就立即搭的士入去啦, 原來由大埔打的入去新娘潭都要成七十幾蚊, 都幾遠路程下!! 入到去, 四周圍望一望, 又真係冇人黎燒個喎, 可能係星期六既關係, 呢度係冇巴士入黎(閒日&星期六冇, 星期日就有巴士到), 所以就好少人入黎BBQ!!



兩條友, 無聊玩踢毽

由日頭燒到天黑!!

兩少無猜係等的士其間又再踢毽


由下午4點起爐開始燒, 燒到差不多5點半左右, 個天都開始黑, 原先諗住好醒, 知道呢度冇咩照明燈, 得返d行燈, 於是就動用我look"黑粗長"電筒啦, 點知賴野, 買個d電芯唔岩size, 買錯左, 得物冇所用!! 好彩我仲拎多支細電筒頂住先, 唔係黑麻麻, 都唔知d野食係熟定係生, 又或者已經燶晒!! 食到差不多8點, 大家都已經有d倦意, 既然食飽飽就散水啦!! 不過, 話雖如此, 我地最後都忍唔住去左大埔好出名既"彩虹"度食埋個糖水, 大家先算係走人!!