"馬"戲團 - 星躍馬術奇藝坊

未放人入去另一個帳篷前, 所有人都係呢個大帳篷等等~~

琴晚, 我同友伴去左睇"馬"戲團, 呢個唔係普通既馬戲團, 而真係以馬街黎表演既馬戲團 - 星躍馬術奇藝坊!!

由於8點先開場, 時間尚早, 所以我地之前就近近地去左黃埔既詠黎園食左個擔擔麵!! 唔知係唔係d水準下降左呢, 依家食佢d擔擔麵好似冇咁好味, 不過, 見一場黎到就食下啦!!

早少少去到表演場地, 首先要經過一個大帳篷, 入面放滿晒一d好靚既相片, 個d相都係拍攝自馬戲團表演時既動態, 張張都靚!! 由於未到表演時間, 同埋要安排d馬匹關係, 所以大會唔會咁早放人入去另一個帳篷(另一個帳篷先係真正表演既地方)!! 四周圍望下, 嘩, 原來都幾多老外黎睇呢個表演!! 成個show既感覺都好似high晒!!

一入到去, 就已經見到d馬仔乖乖的係度

時間到, 終於放人入去, 原來係要由一個大帳篷再行一段小小既路入去另一個大帳篷!! 嘩, 一入去黑蚊蚊, 但係成個表現場地既中央位置有條水柱由高而下射落黎, 真係幾靚下!! 而且d馬仔都好乖只係企定定, 又或慢慢地四周行兩步, 無亂咁四周圍走!!

其實同d馬仔好近距離下!!

呢位小姐主力係做下過場, 只係拖住個波飄下飄下!!

我地買左既係$200門票(最平個隻), 其實, 好彩買左係尾兩個兩行, 因為, 此馬戲團標榜係以最近距離接觸馬仔既馬戲表演, 所以坐最前個行個d人, 一定係會聞到好大陣馬臭臭地既味, 唔係講笑, 我真係望住坐前排個班人($600一張飛架!!)個個都用住本小冊子蓋住自已既口同鼻, 所以呢, 貴野唔一定係好!!

好野睇既時間過得特別快, 成個show都只係得個半鐘, 真係話咁快就做完!! 多謝友件買到馬戲團飛, 好好睇的啊!!!