中秋遺物

岩岩過去中秋, 少不免屋企就會有d月餅應節, 家中老媽為人交遊廣闊, 自然有不人送月餅應節, 正因如此, 中秋已過, 國慶將自, 但屋企既月餅存量依然存在高企, 唔多但都為數不少既月餅仲係雪櫃入面, 家陣朝朝早餐都起碼吞半個月餅先返工!! Heavy得很~~~

之前已經食左幾個, 早兩日中秋正日, 同d親戚聚餐個時, 老媽都好似已經拎左幾個俾親戚佢地, 但係, 屋企依然仲有幾個係度, 岩岩數過, 好似仲有4個大, 3個細月餅健在~~唉!! 有排食!!

食月餅小貼士, 老媽話如果食月餅前, 將個月餅放入微波爐灯一灯佢, 會好食好多!!!大家都不妨試下呀!!

趁低吸納

查實我屋企好耐冇買過公仔麵...一口氣買左廿包都係唔係過份姐...

物價高企, 出前一丁既價錢標升指數一早已經超越左恆指....之前出前一丁以都係賣開$2.2-2.3, 家陣如果唔減價既時候, 佢好似成$3-3.2都有, 岩岩早兩日睇廣告話惠康大減價, $23/10包!! 今日係屋企冇所事事, 終於忍唔住走左落去買, 一口氣買左20包, hehe!! 大家趁快手買啦~~~ 入貨入貨, yeah!!!

雜

近日唔知點解成日都講野個時, 臨尾都要加多一句口頭禪:『火都黎!!』, 真係有d無厘啦間都加一句!! 唔知係唔係近排轉左新工, 有太多野煩呢, 真係火都黎!!!

+++++++++++++++++

話說, 同事上星期五離開, 轉去第2個section, 換言之, 下星期開始, 我有電腦用啦, wahhahahahha!!!!!!!

+++++++++++++++++

死火, 我好似好懶, 我諗係時候發奮, 唔好浪費呢兩年時間, 尤其是黎緊呢半年, 有咩學就要係度學晒佢為止.....

食"七"咁食

講過今年冇禮物收, 生日飯局變得多左, 雖則我係做政府工, 不過, 我只係contract, 我唔介意有禮物收架, 唔駛下下都請我食飯就算數!! 查實我唔mind又食又拎添架~~

個環境幾好既~~ (張相網上dl落黎)

上星期Macy & Suki請我食生日飯, Macy一早搵定食評睇下邊度有好野食, 於是就搵左一間樓上cafe食dinner, 呢間樓上cafe環境都唔錯, 而且十分方便就腳(就係Time Square對面), 至於食物既 質素都唔錯幾好(主力都係食意粉類, 不過一個意粉都成$88, 唔算平), 不過份量就真係算少左dd, 我地3個人叫左兩個意粉 + 1個小食, 都只係岩岩夠食!! 不過, 我覺得呢間樓上cafe適合三五知己上去食飯傾計, 由於地方唔係太大, 容納到既客人少左, 相對就唔會噪得去邊!!

我地有叫的小食 - 焗法什菌多士(係web-site download落黎的)

份量真的一般, 男仔食應該未必夠飽~~but味道幾好!!!

頭先講左, 份量唔多足夠, 所以埋左單之後, 大食Suki就話要食第2 round, 於是我地就係銅鑼灣行左個圈睇下食d咩好!! 呢兩個成日蒲銅鑼灣既小妹妹介紹左3大銅鑼灣名店俾小弟認識, 真係大開眼界, 南記粉麵, 榮記粉麵, 文輝墨魚丸大王!!!

原來呢三間野係銅鑼灣響晒朵, 小弟膚淺唔識野, 所以佢地帶左本人去左南記食左一round, 小弟見解, 南記d野就幾抵食(正常十零蚊碗粉麵!!), 味道係唔係話一食落口, 會好似味吉陽一個d咁, 好食到爆晒出黎, 又好似冇咁誇張!! o.k啦!!

下次有機會食埋另外個兩間先得.....最後, 都要多謝晒Macy & Suki既請客, 謝!!

Block 1912
(openrice link)
(officer web-site link)
地址: 銅鑼灣羅素街50-52號得發大廈3樓A室
電話: 2575 7799
菜式: 西式

2007年第二份生日禮物

大家唔好將個重點放係小不良身上, 請將眼部移向加手邊 - 係啦, 隔離o個個白雪雪既枕頭就係本人既第2份生日禮物啦!! 老媽見我個枕頭殘到呢~~冇眼睇, 所以就趁我生日就送個新既枕頭俾我, 實在太好啦!!!

p.s: 小不良因偏桃線發炎引致發高燒, 呢兩日都要留係醫院!!!

食完又食, 食完又食~~~

今年經濟起飛, 不過我地呢d長期生活係貧窮線下既人依然都係受惠唔到, 今年小弟既生日禮物突然間下跌, 可以話係歷史上既新低, 由生日到依家為止都只係得2份既生日禮物, 不過, 生日禮物少左, 生日飯局就補返數~~ 有心的, 有心的, 朋友都花心思搵d特別既地方請我食飯慶生!

建議大家閒日去(星期一至四), 可以用最抵既價錢去包場, 呢一晚我地就用左2舊水包場, 抵爆( ! )

其中一位就請本人去赤柱食飯呀!!有心思得很啊, hehe ~~~~ 而呢間餐廳原來都受到很多方面的讚賞, 故特在此亦推介俾大家~~ 我地平日去既, 我諗平日好少人好似我地咁特登入去赤柱食飯, 所以基本上, 成晚我地係以包場形式咁食左呢一餐既dinner, 我地叫左一個set dinner另加一個意粉, 都已經係好夠食!!!

可能成晚就係得我地幫襯既關係, 個侍應無聊得很, 走過黎同我地傾左幾句, 佢問我地係唔係上網見到呢介餐廳既推介先黎, 仲問係唔係係"開飯"(Openrice)個度介紹架!!! 之後, 佢自己就繼續講, 佢自己都有上網睇下人地講個d comment架~~ 哈, 查實就咁睇佢似係一個普通得很既叔叔(甚至可以叫佢做阿伯), 但係佢居然識上網睇openrice, 勁呀!!!

呢個係意式焗三文魚雲吞~~

芝士味極濃既意粉, 不過, 唔記得左叫咩名, 嘻!!~

香草烤雞薄餅, 個pizza邊好脆好香口, 當然啦, 趁熱就最好味啦!!

原先冇諗過叫dessert, 不過個待應叔叔大大力推介呢個蘋果批(可能成晚得我地呢一單生意!!), 事實上, 呢個蘋果批又幾得下, 因為係即叫即做, 新鮮蘋果即製, 酥皮地再加上一片一片熱蘋果片再再加上個凍冰冰既雪糕, 唔錯~~~ so nice~~~

小天使餐廳
(Angeletti Restaurant)

地址: 赤柱赤柱大街126號下層舖位C及D(赤柱郵政局側)
電話: 28139090/28137710
菜式: 西式

開學啦!!

好多書要讀呀!!!

轉新工既關係, 未來呢兩年都處於人球狀態, 每隔一段時間就會轉去第2個地方做野(學野), 基本上由於工作性質既原因, 由呢一刻開始都要由零開始, 係唔係俾人慢左起步呢? 係, 不過都算係已經踏出左第一步, 是好是壞, 冇人知, 一切還看呢兩年既做化~~

返新工, 由老練咁遠既office搬返到鬧市中(旺角是也), 可以慳返多少車錢, 都算係一件好事! 有好就有唔好, 全team人都係男甩佬! 咁都不突止, 之前講過自己係office用window 98已經係好慘既一件事, 點知原來低處未算低, 家陣連電腦都冇部, 我已經同世界斷絕左來往, 呀~~~ 好彩, 過埋今個星期, 有同事走人, 佢個位有電腦, 哈, 叫佢留住個位俾我先得~~

上星期返新工, 去完report duty之後就要拎d新"架生", 去到store room, 有人幫我執野, 執下一d執下一d, 執完之後, 望一望, 嘩, 成棟書, 唔講, 我以為自己去錯左地方, 行左入書局拎左張書單俾人執野添~~ 黎緊開始, 讀完4年既part-time degree, 依家又開始新既讀書生涯, 果然係"讀到老, 學到老"!!!

表你有冇之習慣由細培養

幼稚園到小學d成績表~~ 都仲keep得幾好, 幾新淨~~

前日, 唔知咩樹幹, 老媽突然問我之前有冇將返d出世紙俾返我自己keep, 因為自少我出世紙都係俾老媽keep住左係保險箱, 因為自己都唔會點用所以都冇問佢拎返, 係我記憶中, 早幾年, 老媽去開o個間銀行執粒(係呀, 真係銀行都會執粒~~~)所以就將保險d野一次過拎返晒出黎!! 咁岩, 早兩年就搬到黎呢個新屋企, 可能老媽怕d証明文件有唔見, 所以依家就有此一問!!

大家睇睇呢張幼稚園成績表第3項, 如果我細細個已經係咁, 所以大家唔好怪我咁多野講~~wahhahahah

到左琴日, 一返到屋老媽就放低左疊幼稚園至小學既成績表俾我, 當然仲有張出世紙啦, 嘩, 都唔講得笑, d成績表都仲keep得幾好, 冇穿冇爛, 都幾新淨下!! 如是乎, 就昅返下細個o個時d成績同d評語係點先, 都好似係一般, 又唔係好好, 但又未算差, 中中等等!! 另外, 我細細個已經習慣乜鬼野都塞入口, wahahahaa, 我果然係有衣食呀!!

成日都將手指, 雜物塞入口, wahahahha, 我細o個時究竟攪咩鬼呀!!

說明:
(+) .....................表示常能實行
(0) .....................表示有時實行
( -) .....................表示甚少實行

兩個磨look的對話

話說, 琴晚有人想搵我食飯, 以下係佢同我係食飯之前,係e-mail既對話, 如下:

食飯前一日

某人:『喂, 星期五食飯羅, 好唔好呀!』

我:『星期五! 我未知喎, 可能有人約我, 我遲d再confirm你呀!』

某人:『唔好啦, 星期五啦, 我係得呢日有錢, 呢日既前或者後都冇錢架!』

我:『o下! 早一日或者遲一日都冇錢食飯???』

某人:『係呀, 不過你唔好痴心妄想出黎係請你食飯喎, 都係AA制』

我就去confirm下另一班朋友約食飯既情況!!!

我:『o.k!! 咁就星期五啦!!』

隔左一陣........

某人:『咁星期五晚去中環翠華食羅!!』

我:『因乜解究要老練咁遠去中環食茶餐廳呀, 咁不如去食九記呀!!』

某人:『翠華多元化d呀麻!!』

我:『多元化??? 咁翠華有冇壽司食呀?』

某人:『九記又冇鐵板燒羅!』

我:『.................., o.k咁就去翠華啦!!』

++++++++++++++

食飯當日

某人:『喂, 我book左今晚7點翠華!!!』

我:『咁你幫我叫翠華, 同我雪定支92年可樂呀!!』

某人:『死!! 我叫佢留左80年既好立克添, 諗住你生日呀麻!!』

我:『頂! 80年好立克, d粉都硬晒, 質都變埋, 人地點沖呀!!』

某人:『咁人地bowe返溶佢咪沖到羅!』

我:『唔好啦, 你都係叫返翠華雪返我支92年可樂啦, 叫佢係我地到之前1分鐘, 開左個口去, 等支可樂透透氣, 我地去到就可以飲, 岩岩好! 我有事做, 今晚電聯!!』

就係咁完左我地兩條磨look既對話!!

Macy多謝你搵我食飯, 我要禮物呀, 唔好俾cash我呀!!! 份禮物唔駛貴架, $100都冇所謂, 生日呀麻, 要有禮物收先開心, thank~~

2007年第一份生日禮物

有新鞋著太好啦, 好感動呀!! 一早想買Lacoste既鞋, 不過, 我呢d知慳識憸既人, 好多時候都係著完一對著到殘著到爛先會換過對新, 呢對鞋既出現, 時間實在係岩岩好, 恰到好處!! 因為我對舊adidas已經頂唔順, 落雨天就一定慘水, 可憐我對腳!! 依家有對新鞋就唔駛怕啦...wahahhahaha, 多謝晒!!

平靚正

由於小弟就快離職去一個新既地方工作, 所以琴晚有同事為小弟道別, 帶我去食左餐好野!! 之前同事已經食過呢間法國餐廳, 佢話覺得呢間餐廳d野整得好好食而且唔係貴!! 我地放工6:00p.m左右就起程出發, 由於地點係新蒲崗, 呢一區真係好少去, 所以唔係有人帶路真係唔識去!

其實呢間餐廳唔算, 應該話都幾細下, 我諗夾埋都係20個位左右!! 不過, 話雖如此, 又唔係太迫, 可能時間尚早, 未有其他客人, 一坐低個waitress就幫我地斟水, 唔係講笑, 佢d水唔係一般既冰水就算, 佢係加入左士多啤梨係d水入面, 所以飲水個時, 係飲到一陣陣士多啤梨味~~

講返間餐廳, 由於地方唔大, 所以就得兩位侍應, 兩位都好nice, 好好service, 會介紹今日既special係d咩, 又會講解下d菜式係d咩, 又好笑容, very good!! 好啦, 個重點黎啦, 呢度只係$138(另加一)就有 5-course既dinner, 當然啦, menu入面有d貴少少既菜式就要另加多$10-$20啦, such as: 煎鵝肝!!

除左d service好之外, 呢度食野都好relax下, 佢唔會趕頭趕命上晒d菜俾你, 佢地會等你地全部人食完一round之後, 等你休息一陣, 先再上下一道菜! 所以呢, 如果黎呢度食野既人, 最好就係預自己食兩個鐘左右, 其實岩晒黎拍拖又或者3,4個朋友黎食飯, 可以慢慢傾下計!!

最後多謝同事既款待, 感激~~

頭盤: 法國田螺釀磨菇(開頭就咁睇以為係普通既焗田螺, 原來係起左肉再釀入去磨菇度, 幾好食!!)

餐湯: 番茄清雞湯 (同事推介, 呢個湯好得意, 成個原隻去皮番茄放係中間, 賣相幾特別!! 可能自己之前食完個田螺較濃味, 所以覺得個湯d味道淡左少少)

上主菜個時, d主菜都係用個蓋cup住, 感覺上好似high d~~

主菜: 磨菇釀牛肉卷(都幾好食, 又唔會太老, 份量其實都o.k既~~)

甜品: 雜梅餅(waitress話呢個cake係今日既special, 所以就點左, 本人不嬲都對酸咪咪既特別有好感, 岩晒何車~~)

同事的甜品: 古古力雪糕(唔好以為佢係就咁一個普通既朱古力雪糕, 其實界開個雪糕, 佢個中間係包住左雲尼拿雪糕!!)

Cafe Le Must

地址: 新蒲崗衍慶街地下49號

電話: 2321-8515

菜式: 法國菜

(小貼士: 平日一至四去食dinner, 如果用DBS VISA埋單, 食滿$300可以有9折兼免收加一)

十五週年大旅行

坐車要"登"左成粒鍾先入到去, 如果大家咁岩4個人, 不妨搭的士入去, 貴少少但舒服多多~~

今年, 同d中學同學計起黎原來大大話話都識左成15年(大部份都係中一年個年已經識), 由細玩到, 所以今年就有個特別d既慶祝方式, 我地回歸十週年都要大事慶祝, 何況我地識左15年呢, 於是就舉行左我地好耐冇玩過既中學大旅行, 原先以為大家都出席到, 點知最後都係得返我地4個鐵膽出席(我, Jessica, 牛牛, 堅), 咁其他人唔得閒咁就唯有我地四個 玩埋佢地個份啦!!


舊時既中學旅行, 年年都係10月中左右先會舉行, 今年, 我地自組既中學旅行就提前至9月, he! 就係上星期六, 原先, 我地諗住去返山頂旅行, 不過有人有異議, 所以就改動去一個貼近大自然既地點 - 大澳是也!! 其實早係幾年前都已經同牛牛&堅, 加埋牛妹都一齊去過大澳, 今次既旅程只不過由Jessica代替左牛妹而已!!

原先我地相約係東涌地鐵站, 點知各人係不同既地鐵站遇到, 真係絃都冇咁準時呀!! 去到東涌站, 牛&堅又未食早餐, 所以佢地就去左東薈城食野, 我就同Jessica行下街, 原來依家東薈城成個商場都做到係一個Outlet大集會, 所有品牌都係個邊開左間Outlet Store, 而岩岩個邊又新開左一間大IT既Outlet, 入去打個轉, 只要你細心d慢慢搵, 其實都會搵到d正貨, 不過, 我呢d生活係貧窮線下既人, 都係鍾意window shopping就算!!

良朋好友坐係碼頭傾下計, 不亦樂乎~~~

大澳, 原來係星期六入黎既話係冇咩人黎行, 對上個時, 可能岩岩係紅字假期, 多人到嘔!! 所以大家想入去大澳又唔想同人逼星期六係一個唔錯既選擇!! 大澳其實唔係好大, 開頭諗住快快行完就會出返黎再係Outlet Store再shopping過, 但係我地四個人, 行下坐下傾下計, 休休閒閒咁慢慢行, 時間又過得幾鬼快!! 原來有時, 一大班人, 同小貓三四隻既玩法, 又有d唔同, 今次大家都係度傾下計, 感覺良好!!

十幾年前的我們~~

2007年的我們~~~

夜晚, 出到去九龍約埋其他人食飯, 今次, 去左一 間叫"金蘭花"食飯, 聽個名都知係食泰國菜啦, 係九龍城我諗都應該超過20間泰國餐廳, 我地8點去地, 嘩, 佢舖頭門口已經係大排長龍, 好鬼多人等位, 好彩, 我地已經有個專員已經一早到左等位, 真係辛苦晒達達!! 其實呢間野又冇話有咩特別招牌菜, 不過d食物質素勝在平均, 都算幾好食, 大家去開九龍城都可以一試!!!

金蘭花
地址: 九龍城龍崗道12號
電話: 2383-3076
菜式: 泰國菜

第二把交椅

琴晚因為有d事, 要將整間房既櫃翻箱倒籠地要搵野, 無意間, 俾我發現到一張紙係中學時代既"風紀崗位表", (咁岩今年正值我同班中學同學仔相識15週年(由中一起計)就post d舊野出黎, 大家懷念下)!

嘩, 估唔到呢d咁咸豐年時代既野仲係度, 望一望, e, 曾幾何時, 我都威水過, 小弟曾經係學校身居"要職", 可以繼4位"風紀長"之後, 做到呢個"助理風紀長"post, wahhaha!! 不過, 依家諗諗下都唔係好明, 當時個位訓導主任因乜解究叫我做呢個位, 小弟係校內課外活動方面又唔係特別活躍, 成績更加唔係好個隻(中中庭庭啦!!! 未至於好差既~~)! 係! 小息個時可能見唔到我係走廊或者操場度走黎走去四圍玩, 不過我諗最主要原因都不外乎係課室埋頭苦幹地抄緊功課! 先唔得閒出去玩姐!!

"助理風紀長"個名就好似好威, 不過呢d都係表面風光, 一般既職責當時都係不外乎係條走廊度, 叫人唔好跑; 小息完結時, 又好似趕羊仔入返羊棚咁, 趕佢地返入課室(點解講到自己好似一隻牧羊狗咁既!!), 放學之後, 又要留係學校開"O.T.", 因為有d同學仔朝早返學遲到就要即日被罰留堂, 而我又係好似d牧羊狗咁睇實佢地, 家陣講返起我d生活又真係幾似d牧羊狗喎!!

p.s: 考眼力, 各中學同學仔, 俾機會你地自己睇下你自己守過d咩位~~

Liar Game

早陣子, 榮兄send左條link俾我, 介紹呢本漫畫"Liar Game"!! 自"死亡筆記", "金田一事件簿"等呢類推理漫畫之後, 其實都已經好少再見到呢類漫畫係市面出現, 而"Liar Gamr"這本漫畫應該係集於推理及心理分析型漫畫, 講真呢本書既畫功並不是非常了得, 但係其內容情節卻往往引人入勝!! 由於主角因某種原因而參加左Liar Game呢個遊戲, 顧名思義呢個"遊戲"就係需要各人運用智慧, 透過講大話欺騙對手從而獲勝! 呢類漫畫甚為少見, 所以覺得好得意! 其實之前, 睇雜誌都有介紹過呢本書, 不過當時就不以為意, 冇睇到, 原來睇落又幾好睇~~

故事大綱:
Liar Game由一個神祕組織策劃，顧名思義，遊戲的主旨就是要參加者藉著說謊、欺哄等伎倆來戰勝對手，贏取數以億計的獎金。故事主角神崎直，個性忠直得神奇，一開始作者就以「即使是一百日圓也路不拾遺」來描述她的忠直，又以她長期患病住院的老爸送她一個「直」字為名，突顯她自小接受教導，以忠直為人生最高所依。一個如此單純忠直的人，為甚麼會捲入這個爾虞我詐的遊戲？答案也是由於過分單純──有一天，神崎直收到一個郵包，上面有一張小小的卡片，說明這是一個遊戲，參加者一旦打開郵包就不能退出。

2007年度校友會資訊(5)

2007年度校友會資訊(5)

出席者: Cow, Gary, Ivan, Jessica, Jaemi
半出席者: Thomas
缺席者: Camus

於2007年8月24日慶祝牛牛大壽既活動已經完滿結束, 是此活動人材淍零, 有人因事未能出席, 有人因工作關係未能趕及到達會場!! 即使有份出席人仕連埋主人家之內都帶病出席是日活動, 再一次感謝大家!! 將嫁入陳家的牛牛, 決意夫唱婦隨, Ivan未諗到禮物, 佢又一樣未遇到心儀禮物, 故此禮物就先行擱置!!

先行同各校友詳細講解一下有關"如何正確使用禮物金"事宜:
1.) 禮物金額不能對換成現金, 否則就會失去某程度上的紀念性, 整件事因而變質!!
2.) 可能各校友一時之間, 未必諗到大家心儀之禮物, 禮物可於生日之後半年內行使禮物金使用權, 否則禮物金將會被扣除!!
3.) 禮物金不能額累積至下一年度!! (即今年唔買住, 留返下一年, 一口氣夾埋用$2,400-)


在此亦先作總結各人之禮物價值換算表:
Thomas: $600 - $100 = $500
Camus: $1200 - $200 = $1000

(Thomas原先承諾會出席是此生日慶祝活動, 唯當晚因臨時需要OT, 未能由內地趕返回港, 雖則"放飛機", 但誠意可嘉及有交帶, 故只扣減半數)


其他人仕之生日禮物金額維持不變~

人材淍零

上上星期五, 慶祝牛牛生日, 原先諗住同佢去最鍾意食既日本菜同佢慶祝生日, 點知, 佢話佢近排食得太多日本野, 家陣見到日本野就有少少反胃, 精明既Jessica就立即諗到去食泰國菜, 佢就立即介紹位於中港城碼頭平台一間泰式餐廳, 其實佢主要推介呢間餐廳既原因, 係因為呢間餐廳有個落地玻璃可以望晒成個維港!! Jessica話呢間有落地玻璃盡覽維港景色, 其實, 落地玻璃呢家野, 最忌就係d玻璃污糟, 個日, 我唔知係唔係佢d玻璃污糟定係我個日冇抹個淨自己副眼鏡呢, 死日望出去都係好似係濛濛查查咁~~而且個view又唔係真係咁good, 一般而!!

唔知係唔係近排天氣反覆, 一時落雨就一時天晴, 好多人都感冒, 今次食飯total 5個人, 其中有3個已經講明唔多舒服(家陣d後生, 真係~~~)!! 我諗最嚴重既都係牛牛, 是關佢基本上成晚都冇咩點食野, 完全冇晒胃口, 好慘!!

呢間餐廳收費唔算便宜, 但係野食一般啦, 不過要問一問泰式柚子沙律係唔係凍食既呢, 是關係呢間餐廳叫左一個柚子沙律, 上個沙律既時候係溫溫吞吞咁, 怪怪的, 由於有半成人都係處病病地既狀態, 全部人都冇咩胃口, 所以成晚d野食大部份都係由我包辦, 反而係同我慶祝生日多過牛牛, whahahaha~~

她
地址: 尖沙咀中港城第1座平台1號
電話: 2735-8898
菜式: 泰國菜