未來三天的節目行程

星期五 - 好耐冇上過牛牛屋企食飯, 難得畢業, 用十幾萬換件袍, 都係用盡佢, 拎埋件袍同牛媽媽, 牛爸爸仲有牛嫲嫲影返相合照先!!!!!

星期六 - 禮記好友十五年相聚, 可以見返d好耐冇見既中學朋友仔, 好緊張!!!

星期日 - 應該係最後一次著埋呢件袍返學校影畢業相(因為已經就快要還袍!!), 今次就同公司(舊)同事成班人齊齊整整呢返輯靚相!!

又到聖誕...又到聖誕

仲有成個月先到聖誕, 可能真係經濟復蘇, 家陣個個商場都已經佈置好晒d聖誕裝飾, 好鬼有聖誕氣氛!! 今年未到聖誕節, 我都提前收到一份"禮物"~~~wahahhaha, 感謝萬分!!!

講開禮物, 於聖誕節上, 我覺得要有禮物收下先會開心d, 所以我堅持(係呀, 每年都係得我提議!!!)每年同朋友們過聖誕都要交換禮物, 雖然好似好無聊兼老套, 但係我對呢項活動依然樂此不疲, 即使有機會換d垃圾返黎都總算係有禮物收過!!! 每年, 我地每年都會定一個大題目作買禮物既指標, 上年交換禮物主題係"家居用品", 好耐之前又試過, 一定要係裕華國貨買禮物, 又有一年試過, 咁岩當年係猴年, 全部人買既禮物一定要同馬騮有關!! 每一年都五花八門, 各色其式!!!

朋友們, 今年聖誕又就快到, 我地今年換咩禮物好呀???

休閒星期天

呢d咪叫天朗氣清羅~~~

星期日, 天朗氣清又時候係去郊外呼吸下大自然空氣(近排好似多左郊外活動!!! 嘻!!!), 今次選址係海防博物館, 呢間博物館都開左一段時間(應該係好耐先岩!!) 唔好以為佢會好似科學館、太空館呀一樣, 活動範圍只限於室內, 其實海防博物館沿邊係有條文物徑俾d遊客暢遊, 而且係沿海而建再加上四周圍都係d花花草草, 所以即使係閙市之中都可以感受到大自然既感覺!!! 大家假日個時不妨行下當郊遊, 閒逛都可以~~

一入去博物館門口就有個模型係地下~~

係地下買完飛就要搭lift上8樓, 一出去就會見到呢個環境!!!

唯一有冷氣嘆既地方!!!

展覽館內部~~

Lunch既時候, 由於我冇食早餐既緣故, 但又唔太想食得太heavy, 所以係博物館入面間cafe叫左個奄列餐食(唔包魚蛋 & 燒賣, 係我自己另叫), 味道一般啦, 不過個奄列好似煎得乾身得濟!!! 唔多滑溜~~~(連熱飲- $23), 再飽再起行!!

火腿奄列餐(連熱飲) -$ 23 -

講真成間博物館話大唔大, 話細唔細, 行完成個海防博物館都要2-3個鐘左右(包埋食lunch), 冇事行下都幾舒服既, 不過一定係要秋高氣爽先好去, 唔係就一定熱死你!!!

之後, 得知沙田既西田做big big激安, 所以就過左去八一八, 嘩, 好明顯香港既經濟完全復蘇晒, d人買野好似唔駛錢咁, 多人到呢, 同我上個星期去完Sogo激安既情況有過之而冇不及!!! 淨係排隊俾錢既人龍已經好鬼長龍~~(經本人估計都起碼要半小時左右!!!) 經此一見, 即使d野再平都冇晒意欲去買!!

話雖如此, 仲有另一個吸引人既地方可以去, 就係西田既food court部, 早前佢經過大裝修之後, 依家重新開返, 家陣多左好多野食, 唔駛講都係四周圍都好多人啦, 不過, 行行下我地見到一間食串燒舖頭, 排隊既人唔多, 而且都好特別下, 佢有個開放式雪櫃, 入面放左好多生既串燒材料, 任君選擇, 你鍾意食邊款串燒就可以自己夾係個兜兜度, 之後, 師傅就會即時為你炮製美味既日式串燒!!

自助夾串燒食物~~~ (都有成十幾廿款食物, 平至幾蚊串, 貴至廿蚊串都有)

夾完之後跟住俾錢, 收銀員就會再拎俾隔離個師傅燒~~

製成品是也~~ 好食!!! (鱈魚條 + 三文魚併尢魚 + 墨魚咀!!)

面試成功

總算冇驚冇險, hehe!!! Pass~~~~

問題有一, 我對眼唔係因為近視深所以先咁細(得一條線!!!), 其實.................................係天生!!

問題有二, 幸好我只係唔靚仔, 唔係樣衰!! (o.k, 我只係格衰 & 口多少少姐!!!)

問題有三, 唔......下次有機會的話, 再傾多d計!!!

生日小聚

個拿破崙蛋糕好好食, 在此謝過奶媽預早買這個生日蛋糕, 大家有得食~~~


是晚女主是也!!!

由於小貞貞生日正日(11月25日)十分繁忙, 我地唯有提早至今個星期二既晚上同佢慶祝生日!! 為左遷就大肚媽媽小狗既方便, 都盡量搵得方便佢既返屋企既地方食飯, 所以就決定去尖沙咀的小南國食飯, 原先以為自己未去過小南國食飯, 點先一黎到就醒起之前同jessica成班人一齊去換身分證個時已經係度食過飯!!!

Anyway, 小南國d食物質素未至於好好食, 但亦都唔會太難食, 不過唯一有一樣野本人覺得唔係太好既就係佢地d service, 當我地想點菜既時候, 佢地力sell佢地d套餐, 成日話食套餐抵d, 又話叫套餐d size(碟頭)會大過散叫個d, 當我地想散叫而唔叫套餐既時候, 佢地居然有少少黑面!!(不過我地最後都係屈服叫左套餐~~~) 我諗呢度唯一好處就係可以對住個維港食飯!!! 而好多人話好好食既生煎包, 我就覺得一般啦, 冇咩特別!! 反而我仲鍾意食出面街邊細細間舖頭上海店既鍋貼, 生煎包~~~

好久~~~不見

依家仲講facebook好似out左d, 不過我想係度讚一讚facebook真係有d計, 可以將我好鬼耐冇見過既一班中學同學仔再一次接駁返上黎!! 我地呢d活動攪手, 當然襯呢個時候做返d野啦~~

係呢度賣下廣告先, 各禮賢會彭學高紀念中學既同學仔請記住, 下星期六即係2007年12月1日, 我地會一齊去BBQ, 大家真係十年唔見一次, 希望大家可以襯呢個機會出黎聚一聚, 吹吹水!!!

至於詳情方面, 容後公佈(即下星三前), 而仲有d人仲未reply我係facebook 既e-mail的同學仔們, 希望盡快reply, 好讓本人安排BBQ事宜, 大大的感謝!!

紙的藝術

成張紙巾既overview!!!

再近鏡望清楚d!!

今天有人贈我一張紙(巾)!!! 如果唔係近睇, 開頭仲以為係邊隻紙巾會有咁多圖案!!! 要來係自家製的~~~ 好得意呀!! d魚仲要有泡泡, 如果大家再留意多dd, 有d冇張開口既魚係冇泡泡噴出黎架!! wahahahah!!!

係時候

正所謂心廣就身體胖, 身體有點兒健康左, 為左到下年一月可以一盡做Jackie姐妹義務, 都係時候要做返d野!! 久違左好耐冇去做gym, 家陣要重新操過先得!! 不過要食飽先有力做運動(頂! 咁咪仲肥!!), 左諗右諗去食d唔太heavy又o.k飽肚既食, 咁岩路經公司樓下"義順", 記得除燉奶之外仲有通粉類可供選擇, 哈, 岩晒, 呢d食少少又飽肚!!! Good Fit!!

碗通粉幾好味!! 唔似一般餐廳d通粉淡而冇味!!

食完先記得影相!!

我地兩個人就叫左一個雙蛋通粉, 再加各自一碗燉奶(雙皮奶 + 薑汁燉奶), 起初都膽心會唔夠食, 點知個碗通粉份量都唔野少, 之後再食埋碗燉奶, 岩岩好!!


今次去左大角咀室內運動場做gym, 呢間室內運動場都算係幾新淨下, 個健身室都好大, 唯一唔好處就係健身室入面部電視機係睇唔到無線, 亞視個電視台, 本時做gym都一邊睇住電視一邊做, 時間都過得快d!! 頭先講左, 呢度d facility都算係幾新淨, 係唯獨個磅short short地!!!


港澳義順牛奶公司
地址: 旺角西洋菜街246-248號
電話: 2393 3301

近日

近日好似好多野做, 好多野忙, 不過一坐低係工作枱前面之後, 成個

人都好汒然, 腦內一片空白, 攪咩鬼呢!!!

有叉燒飯~~啦喂!!

琴日俾選舉d人噪左成日(因為我區個投票站正正係我屋企附近), 下午出去街剪完髮之後, 返屋企再同老媽一齊落樓盡下做公民既義務, 老媽一早已經有投票心水(因早前本人家中慘水, 幸得該人相助解決), 我本人都一早決定左投邊位, 不過, 臨近投票站前, 我問老媽, 唔知如果投xxx會唔會有叉燒飯食呢!!我地呢d咁神聖既一票, 點都值一碗叉燒飯呀, 老媽突然間無言以對, 死心不息既我再繼續講落去, 咁冇叉燒飯, 我投第2個, 起碼有碟餐肉蛋飯食呀(點解會由一碗轉做一碟!!), 老媽依然都係唔理我~~~ 慘情!!!

最後結果, 我同老媽眼光都幾準, 中左, 唔知幾時有叉燒派呢!!!

撞爆

琴晚返屋企時, 老媽突然急call本人電話, 話大不良俾小不良一推撞左埋門角, 額頭即時"笠"左(咁大力!!!!), 咁岩屋企d『黃立光』(專用於用去瘀撞親)晒!! 諗住叫我去買返支返屋企應急, 原先諗住呢d野百佳一定有啦, 點知係百佳左搵右搵都唔見, 由於又太夜既關係所以都係買唔到返屋企, 不過, 返到屋企個時, 見大不良都已經訓著左, 我諗佢都應該係喊到攰晒所以就訓著左啦!!!都已經冇事啦!!

事後同人地講開撞"笠"頭呢件事, 點知有人同我講, 佢細個撞親, 屋企人都會用拖鞋鞋底係佢瘀左既位置起勢咁捽, 佢話咁樣係可以散瘀, 是否有效就又不得而知, 不過聽完之後第一個感覺就係------都幾dirty下!!!! 冇啦啦, 用你著出街既拖鞋捽喎, 一個唔覺意你對拖鞋踩過舊屎點算呀!!! shit!!!

不過, 話說回頭, 今晚個集"再會歡樂今宵"其中一段重播"蝦仔爹o地"其中一幕, 真係見到有人真係用拖鞋幫人捽以至散瘀功效!!! 嘩, 原來朋友所言非虛, 真係失敬失敬~~

藥煲

枱面d藥都係佢地!!! 真誇張~~~

呢幾日天氣轉變得幾大下, 再加上上星期日因為大不良生日既關係, 去左迪迪尼玩左一日慶祝, 從而感染到風寒, 前晚兩位大小不良終於頂唔順要一齊去睇醫生!! 前晚一返屋企就見到係枱面一袋二袋, 嘩, 全部都係藥黎架!! 咁鬼多既, 唔講以為佢地生Cancer, 兩隻野夾埋食咁鬼多藥, 呢一代d小朋友真係誇張, 病兩下就要食咁鬼多藥!!

另, 開頭講過大不良於上星期日去迪迪尼玩, 老媽都有去, 聽老媽講, 佢前前後後已經去過迪迪尼玩過3次啦!! 我真係比較out啦, 除左近日因為工作關係, 坐車入去愉景灣時路經迪迪尼門面之外, 真係一次都未去過, 不過都係算罷, 家陣香港的迪迪尼咁鬼死細, 都係等佢擴大左之後先去啦!!! (果然吃不到的葡萄是酸的~~~)

遲來的生日禮物

呢兩份就係生日禮物( ! )

上星期得到Macy來電, 說本人之生日禮物已經買到 ( ! ) (查實我生日已經係差不多2個月前既事) , 佢話件禮物放係屋企篤眼篤鼻, 叫我盡快拎佢走, 既然係咁, 就立即約今晚出黎食飯兼收取禮物!!!

相約6:30p.m相約係IFC!!, 係未食飯之前, 我陪佢去買少少野先, 我地係間舖頭搵極都搵唔到佢想要個件衫, 於是就走左去問個男sales, 個男sales做型超爆, 係佢條頸接近膊頭位置見到紋左兩位大鑽石既tattoo(有拳頭咁大架), 雖然佢已經著住裇衫, 不過都依然睇到個兩粒巨鑽露出黎, 話雖如此, 不過佢好好禮貌又有笑容~~

買完野就去食飯, Macy提議去千両, 成日都聽人講千両係高級版既元氣, 聽就聽得多, 但係未食過!! 原來又真係幾好食!! 食到中途, 諗起阿榮差不多時候放工(當時係8:00p.m左右!!!), 諗住call埋佢一齊食野, 點知佢話夜晚零晨4:00要起身幫公司做野( ! ) 冇計, 我地照食可也, 呢間日本壽司餐廳, d食材都好新鮮, 尤其是個d帶子壽司, 唔係講笑, 又真係大大舊幾好厚肉!! 另外, 本人最喜愛既腐皮壽司, 好好好好食, 佢d腐皮有汁又甜, 唔似有d壽司店個d乾"爭爭"咁!!! (題外話: 其實腐皮壽司都幾好食, 都唔明點解d人都唔係咁鍾意食腐皮壽司!!!) 整體黎講, 食物質素幾好!!! 可以一試!! 另, 由於IFC的坐位唔多, 輪候時間亦相當耐左d, 再加上我地遇人不淑, 俾位侍應哥哥仔點(咁大膽點我!! 我諗佢都係做死一世知客!!)

食完壽司再到漢堡包店都已經9:15p.m, 所以餐廳入面都唔係好多人!!!

之前經過IFC, 見到對出有一間食漢堡包既餐廳, 成日都想試下, 不過又唔係成日過去IFC行街, 既然一場黎到, 要食得盡興, 於是我就提議再到食多一餐, wahahhaha!!! 難得Macy又係一齊食, 立即去買返個set黎食先!!! 由於之前食左個正餐, 大家都飽左8成, 所以我地都係夾埋叫一個set就算, 呢度d漢堡包價錢都唔少野架, 一個set都要成$51(已經最平個隻!!!)

Oringial Set(包+drink+薯條)

侍應會幫你分開一半~~~ good service!!!

由於知道個包都應該會幾大個下, 冇理由就咁用手撕開一半架!!! 所以我地就膽粗粗問下個侍應可唔可以幫我地切開一半, 點知佢一口答應仲話咁快切到整整齊齊咁拎返出黎!!! 後來從侍應口中得知, 其實都有好多人會叫佢地幫手將個包包切一半, 咁樣就可以方便入口!! 另, 我地發現枱上面另外有一樽醋既東西, 再細問之下得知, 如果有d外國人唔鍾意用茄汁點薯條, 因為怕茄汁入面個d調味料, 用醋黎點薯條都係想要個d酸味!!


千両
地址: 中環國際金融中心商場2期3樓3099-3100號舖
電話: 22347633
菜式: 日本菜

Triple O's
地址: 中環交易廣場The Forum 1樓平台10號鋪
電話: 3401 4000
菜式: 美國菜

5。11。2007

仲有3個月~~~

食返餐好!!

幫人考完牌, 辛苦左三日(其實都幫唔到d咩手就真!!), 不過總要有個藉口俾自己出去玩下!! 於是就出左去尖沙咀行街食飯!!

夜晚放工, 去左一間印度餐廳食飯, 其實之前都未食過, 不過上網係openrice見到人地d食評好似話唔錯, 所以就膽粗粗去左呢間餐廳食飯!!! 呢間餐廳d裝潢尚算高格調, 一入去發現全部侍應都係清一色印度人, 由於我地都算係早去食飯(6:30p.m~~~~), 所以餐廳都未係有好多人, 仲好, 唔駛迫!! 不過環顧四周除左侍應清一色係印度人, 其他食客都係以外國人或印度人為主, 得返我地係中國人, 感覺上我地反而似係d小數民族咁!!!

Set A - 3兜咖哩(雜菜, 豆腐, 肉) + 薄餅 x4 + 咖哩肉條

Set B - 2兜咖哩(羊肉, 雜菌) +印式雞件 +肉條 + 薄餅x4

到左7:30p.m就有人出黎唱歌(其實幾難聽下, 大家最好7:30p.m食完埋單走人!!)

呢度其實除左散叫之外, 仲有得食buffle, 不過d食評話唔好食buffle因為得十款左右唔抵食, 於是我地就叫左兩個set dinner, 其實只要胃口唔大, 基本上就一定會食得飽!! 個所謂既set dinner入面都有好多野架, 又有飯, 又有薄餅, 咖哩當然唔少得啦!! 不過, 佢地既set dinner就唔係分開上, 佢係會用一個盤裝好晒就一次過上枱, 感覺都幾得意!!! 印度餐當然都係離唔開食咖哩, 係set dinner d咖哩就唔係太辣, o.k!!! 由於人唔多, 都係三五知已食野傾計好地方!!! 尤其是撞岩, 約去尖沙咀食飯既一大班人, 呢度就一定岩晒!!

爵樂印度餐廳
Gaylord
地址: 尖沙咀亞士厘道23-25號雅士利中心1樓
電話: 2376-1001
菜式: 印度菜

繁忙中

又係一年一度幫人考牌既時候, 呢幾日都係屈係間房度做野, 依家襯print out緊d野出黎既時候, 就上黎呢度打返兩粒字!!

死啦! 如無意外, 兩年後就會到我, 一諗到呢度就好想死呀!!

行禮啦!

呢d動作好似電影, 電視劇見得多, 真係幾娘下!! 不過, 循例都要做下!!!

琴日終於正式行禮啦, 今年既畢業禮係特別d架, 因為今年會有兩個畢業典禮一個就係由Facility舉辦, 而另一個就係Whole school舉辦的, 由Facility舉辦的好處就係可以上台行個禮!! 因為whole school的畢業禮會係紅館舉行, 所以就唔會個個學生都有得上台, only個d First Hon同學仔先有得上台, 而其他個d同學都係到咁上下就只係得個Sport Light射去佢地個Zone, 之後, 個d同學仔就要扮到好興奮咁起晒身, 舉晒手, 躹個躬, say thank you!!! 其實, 某程度上都幾無聊下~~~

頂 ( ! ) 成塊鞋底都甩左出黎!!

琴日行禮前發生左小小意外, 正所謂十年都唔會執得咁"四"正, 落街行左一陣, 突然聽到有d"撻撻"聲, 開始個時都不以為意, 點知越行d"撻撻"聲就越黎越大聲,向後望一望, 頂 ( ! ) 原來係其中一隻黑鞋既鞋底甩鬼左, 把心一橫, 成個鞋底都拆甩佢!!! 橫掂返學校都會經旺角, 唯有快快手出旺角買返對平平地既鞋頂住先啦!!!


好彩買完鞋, 再返到學校都唔係遲左好多, 而且仲見到好多同學仔, 真係好!! 唔駛講, 當然係啦啦聲換返件袍同d同學仔影返d合照先啦!!! 我諗之後都冇咩機會再同d同學仔咁齊人一齊影相見面!!! 其實所謂上台, 都只不過係上去個台度向Deapartment Head躹躬就完成左整個上台過程架啦!!! 係呀, 俾左十幾萬就係為左呢一刻之麻!!! 俾左十幾萬唔係人地躹躬俾我, 仲要我躹返人地, 真係貴到無倫!!!

悠閒的一天

原先星期天想到海防博物館閒逛一下, 但後因時間未能配合, 就立即轉個新既目的地, 一下子就諗到去數碼港, 平日就聽人講得多, 什麼李嘉欣同XX一齊去睇戲, 乜乜譚詠倫又一家去聚天倫呀!! 呢個地方真係睇報紙新聞就睇得多, 實際就真係未去過!!! 更加難得就係有人願意充當導遊, 帶本人遊覽數碼港一番!! 當然要去行一行啦!!


未到數碼港前, 導遊已經講過數碼港其實沒有什麼特別景色, 行一陣就可以行完!! 話雖如此, 我地行下行下都行左差不多3個鐘, 唔係話因為數碼港有好多野睇, 好多野參觀! 由於數碼港大部份地方都係Office既關係, 一黎到星期日就唔會有人返工, 所以星期日大家黎到呢度, 就唔駛好似出面鬧市咁同人迫, 可以四周圍輕輕鬆鬆行下, 係Food Court又唔駛等位(當然啦, 星期日食物既選擇唔會特別多啦!!) (溫馨提示: 千萬唔好叫公司三文治, d配料炸薯仔 - 唔熱, d三文治麵包 - 涼涼地!! 十個差!!)

個隻白色毛毛狗, 好大舊, 成舊棉花糖, 好攪笑架!!! 仲有, 好多狗主都鍾意拎住d"大炮"同d狗狗影靚相!!

d狗多到呢!!! 更有一狗係你左近!!!

而且係數碼港商場對開有個好大既草地, 係星期日, 原來都有唔少既狗主同佢地d心愛狗狗出黎散散步, 玩下!! 如果喜歡狗既朋友, 呢度都不失為一個好去處!!! 仲有, 依家秋涼天氣去行下仲爽呀!!

大合照

三束花 + 一隻可愛公仔!!

實在太感動啦!! 上星期六約左我生平中最要好的兩班朋友一齊出黎同我影畢業相!! 最重要既係全部人都應邀出席!! 而且仲好有心的各自買左兩束好靚既花俾我, 當然啦, 除左呢兩束花之外, 另外仲有人親自整左一束好靚靚既花俾我啦, 呢束花唔係親手整咁簡單啊, 仲係由買花到包裝都一手包辦! 好勁呀!! 仲有, 仲有, 當然唔好忘記牛牛買俾我既公仔啦!! 多得你地, 令我既畢業相, 可以更多姿多采!!! 感謝萬分~~~ 至於係Polyu影畢業相黎黎去去都係影個d景, 都冇咩特別好講!!!

夜晚, 我地就去左一間似係樓上Cafe - Our Wonderland食意大利菜!! 我地一行9人叫左8人餐($888), 其實套餐入面都已經係好多野食 - such as: 2個Pizza, 兩個意粉, 三, 四款小食, 當然仲有包埋湯, 餐飲及甜品, 食物質素o.k, 但係如果計成班朋友係度食飯傾計, 係一個值得推介既地方!! 因為地方都幾大, 十幾人坐長枱傾計都唔錯, 最重要係環境唔太嘈, 又未至於好靜!! 岩晒一班人係度玩!! 而且, 最難得大家兩班雖然都係中學同學, 但係兩班人都好少join埋一齊出黎玩, 但係當晚大家都好好傾, 實在太好!!!


Our Wonderland
地址: 尖沙咀金馬倫道5號太興廣場5樓
電話: 23122213
菜式: 意大利菜

NBA開鑼啦

今日NBA開鑼, 一向都有睇開NBA的, 現今的科技實在太發達, 可以上網就睇到以前只可以係有線 or NOW電視先睇到既比賽!! 實在太幸福啦!!

今年各支球隊都有不少交易球員既動作, 尤其是Boston, 今年有三大巨頭 - Kevin Garnett + Ray Allen + Paul Pierce, 可觀性可謂十足!!

當然, 今年Rockets都唔差, 換左好多人返黎, 不過都要有待磨合!! 幸好今日第一戰總算係羸左, 不過都係贏得兩分, 幾驚險下!! 尚未顯出, 應有既霸氣!!