天生一對

魚眼配DC出黎既效果, 攪笑乎~~

wahahaha~~~ 友伴買左個魚眼Lomo, 由於Lomo會配埋個魚眼觀景器, 只要自己拎住個再配落埋部DC後, 其實都可以影到魚眼既效果, 咁就唔駛下下都要用菲林影啦!! 當然, Lomo呢d野, 都係用菲林影, 而係影完之後, 等待沖印出黎個一段時間先係影菲林機既寶貴之處, 因為永遠都唔知自己會影到d咩出黎!!

雜

今朝早同madam出去開會, 開完會搭地鐵返公司, 去到太子地鐵站, 突然間madam問我飲唔飲湯, 說時遲那時快, 佢已經係佢個袋度拎左疊鴻福堂coupon出黎, 原來佢話佢興每次出完去開會路經太子
地鐵站時佢都會買兜湯返office飲, 佢話如果係飲水的話, 飲湯咪仲健康~~~


佢仲話:『o拿, 你黎左一個月冇野益你, 請你飲湯啦, 要唔要呀??』哈, 有野飲當然係要啦!! 最後, 我就要左個"花膠響螺煲竹絲雞湯", 唔係講笑, 幾好味下, 仲有個價錢都唔平架, $38/兜, 諗諗下我老媽平時都係咁煲, 都落足料架, 平時都係係屋企飲多幾碗先得!!(其實你係鴻福堂買外賣拎走, 可以叫佢倒起落個兜兜度可以拎返去屋企or office即時慢慢飲!! )

xxxxxxxxxxxxxxxxxxx

乖呀, 遲d有兄弟黎探你地架啦, wahahhaha~~

好野, 先從上次剝左第兩隻智慧齒之後, 有人同我講其實已經剝左下面個兩隻智慧齒, 上面個兩隻智慧齒都已經實際用途, 因為佢下面已經冇野同佢頂住, 根本就磨唔到d食物, 係既話就趁依家唔駛錢剝鬼埋佢啦!!

正所謂"一言驚醒夢中人"! 所以, 趁今日走去拆線個時, 膽粗粗走去同個醫生講:
我:『其實剝左下面個兩隻牙, 上面個兩隻係唔係即係冇用架啦!! 係既話, 我想剝埋佢!!』
醫生:『其實, 照你咁既情況剝左下面個兩隻, 基本上, 5至6年都唔會有事, 如果有事, 可以到時再剝, 唔駛咁快依家剝!! 因為d人多數一次過剝晒一邊上下兩隻, 唔會分咁多次剝咁辛苦!!』
(其實, 醫生唔知我睇牙兼唔駛錢剝牙呢個benefit只係得呢兩年, 根本就唔存在什麼5, 6年後既事, 唔趁依家剝都唔知仲有冇機會!)(所以我就............)
我:『唔~~~其實我都冇咩所謂既, 橫掂都係, 剝埋佢啦!! 一次過呀麻, 唔該!!』
醫生:『好啦, 咁你出去排期啦!!』

Yeah, 醫生終於都屈服俾我遲d book期再剝埋上面個兩隻智慧齒~~~ 發達, 家陣總算有賺啦!! whahahaha~~

復活節最後一Day

正所謂, 首尾就要呼應, 去到復活節最後一日, 當然再一次去行下山, 做下快樂健康人生啦!! 今次選擇左去"昂平360救援徑", 如果大家有搭過"昂平360"纜車的話, 其實向下望一望就見到有條山路俾人行, 個條山路本身原意係俾消防員係萬一纜車發生故障既時候用, 當然依家平日已經係開放俾大眾市民行下!!

豐富早餐~~

一朝早同友件相約係地鐵站一齊出發搭去東涌, 大約10:45a.m去到東涌站, 嘩, 一出地鐵站就已經四周圍都係人頭湧湧, 由於大部份中學生應該仲有成個星期放假, 所以都見好多後生仔女, 拎住一袋二袋入去大嶼山個邊宿營!! 都係個句, 行山前最重要係食飽先有力上山, 所以我同友伴就先去東匯城既麥o當o當食返個豐富既早餐先~~

跟手就出發, 不過根據網上資料顯示, 行此路段需時5.5小時, 所以為中途要補充體力關係, 於是先去樓下百佳買定d乾糧, 係中段可以食下野休息下!! 我地就買左個袋小餐包+沙律吞拿魚+馬仔+健康行山jelly!! 準備充足出發, yeah!!!

此乃行山徑之入口是也~~

我地首先要先搭一程短途巴士(38號), 去到逸東村再行一段少少既路經過候王廟之後, 就會去到行徑既入口!! 起先, 係網上面search過話如果要行畢整條路徑, 基本上要行成5.5小時, 可能友伴俾我呢段說話嚇親再加上當日天氣真係曬得好厲害!!再再加上之前一晚友伴因為發左個惡夢, 導致睡眠質素差左, 因而令體力&精力下降, 所以我地最後都行唔晒全程, 只係區區咁行左一個山頭就折返!!

係我影相呢一刻, 其實已經係第一個山頭, 行左一半!! 不過要上到山頂, 仲有排行, 有相為證!!

友伴最近買左魚眼Lomo, 所以全程都拎住部Lomo左影右影!!

係吊行塔下, 整部吊車就係你頭頂掠過~~

過左第一個山頂之後, 就會再落再上再落再上另一個山頭~~遠望都幾壯觀下(段路)!!

不過, 話雖如此, 其實行完第一個山頭, 原來都幾"甘"下, 成個人都虛虛地, 所以我地上到去第一個山頭, (即係第一個吊車塔!!), 我地除左不斷影相之外, 仲坐低休息下兼野餐, 由於我地坐既位置正正就係吊車塔既底部, 所以所有坐吊車上大佛或者由大佛落黎既人都會見到我地, 好攪笑, 佢地又好鍾意同我地揮手, 更神奇既係, 我地又同佢揮返手~~ 唔知點解, 突然間我覺得自己好似變左海洋公園或者係迪迪尼個d公仔, 有人同你揮手, 你又要懶cuite同人揮返手!~~ 唔係講笑, 我係吊車塔底休息&野餐咁耐, 就揮足咁耐!!

朋友們, 邊個下次想一齊行, 可以call我, 做下光合作用, 成個人都會醒神d架!!

齊齊整整

Wahahahaha!!! 上星期四同Jessica係尖沙咀Outbreak慶生, 難得今次蘇生都抽到時間出席, 我諗對上一次齊人都唔知係幾時既時啦!! 我諗大大話話都係年幾前既時, 平時蘇生往往因為工作關係, 時常都要係世界各地四圍走, 加上佢有少少天生放飛機性格,好多時我地d大型活動佢都未必能應邀出席!! 幸而, 岩岩佢就轉左新工, 依家就唔駛周遊列國四圍走, 可以出席到大型活動, so great!!

Outbreak不外乎都係一d American Food, 冇咩特別, 主要係大件頭取勝, 不過, 唔知係唔係家陣d美金疲弱, 連帶d野食size感覺上都好似縮水左!!

當晚, 成班人唔駛講又係嘻嘻哈哈, 講東講西, 暢談一番!!!

今年起各人各有各忙:

- 牛牛&堅, 仲有Jaemi & 阿譚今年年尾就舉行你地既人生大事, 你地黎緊4月就一齊去台灣影相!! 總之, 你地有咩事要幫手, 唔駛客氣隨時出聲, 幫到就盡量幫, 幫唔到都會出力幫!!!

- Jessica今年有兩大事, 今年到你大學畢業, 可以同你影畢業相啦, 仲有既就係六月大旅行, 最緊要係玩得開開心心!!

- 余弟兄, 今年重新返回校園, 努力!!

- 蘇生, 今年轉新工, 新工作新環境, 希望你一切順利!!

各校友, Jessica早前提議5月去海洋公園大鬧一番, 未知各位意下如何, 有時間, 請留言!! 謝!!

親親大自然

沿途都有呢個標誌lead住你行, 包你唔會行錯路!!

星期五復活假第一日, 原先plan左星期六同友伴先去行山進行光合作用, 不過天氣報告話星期六&日都會落雨, 所以就唯有將行程推早一日!! 原先因為諗住星期六去的話, 星期五仲有時間去搵下行山資料, 突然間推早左一日, 唯有係星期四晚&星期五朝早一早起身搵資料(唉! 平日公司有電腦咪好羅, 家陣d野, 下下都要放工返屋企先做到!!) 最後搵左個唔係太難行, 又近西貢(因為夜晚要到堅兄屋企BBQ, 佢家住西貢!)既郊遊徑行下-鹿湖郊遊徑!!


真材實料 －窩蛋牛肉飯是也！！

由於朝早仲係搵緊資料, 所以就晏左少少差不多成11點先出到門口, 係官塘join埋友伴一齊搭小巴入西貢, 正所謂食飽飽先有力氣行山, 於是就去左西貢巷仔搵野食, 我地去左源興美食食小小野先, 舊時去開遊船河, 朝早係西貢食早餐既話多數都係黎呢間舖頭仔食野!! 雖然佢舖細細, 食物款式唔多, 不過勝在d味道唔錯, 依家食小小野, 唔駛在乎佢既環境, 快快手食完先係王道!! 我地叫左個腸粉+窩蛋牛肉蒸飯+魚翅餃, good晒!!

呢個就係29R既行車時間表!! (平日同假日開出既時間都不一樣!)

食飽飽就行去搵車, 我地要搭一間29R既鄉村巴士入去鹿湖郊遊徑既起點!! 不過一開始四周圍搵, 搵極都搵唔到個站頭, 真係有d火黎, 原來佢個站頭就係係麥當當門口!! 原來佢d班次, 如果係公眾假期既話都會分兩個時段開!! 我地最後2:00左右就開車!! 差不多坐左20分鐘左右, 終於到達鹿湖既起點~~~

起點是也~~
呢個就係起點, 一開始就要行上過百級樓梯先~~

呢段郊遊徑, 全程大約4.7km, 上網睇就話行畢全程都只係需要3個鐘左右, 不過今次我地只係用左大約2個半鐘都已經行完晒呢條郊遊徑!!



呢個鹿湖全程行的多數係石屎路段, 所以行起上黎都好方便!! 尤其是天氣陰陰涼涼冇咩太陽, 行到咁上下就有d涼風吹下, 唔駛下下都大汗搭細汗, 絕對係一個行山既好天氣!! 不過唯一有個辛苦地方就係係中段既時候要上一段好高好斜既樓梯級就比較吃力, 如果係個段路上一到一半再回頭向下望的話, 有畏高症朋友就可能會俾佢嚇一嚇親, 因為實在太斜&太高!!

不過, 總括一句黎講, 呢個路段既郊遊徑都係非常易行, 大家如果想親親大自然, 吸下新鮮空氣, 不坊可以考慮行呢一段輕鬆下, 遠離一下都市!!!

源興美食
地址: 西貢福民路高勝樓19號地下
電話: 2972 0352
菜式: 港式

出走日本

話說黎緊既日本之旅, 行程中將會以自行駕車四處遊玩為主, 真係第一次以呢方式去旅行, 雖則本身係有車牌, 不過出去外國揸車的話就要去運輸署申請返個"國際駕駛許可證"先可以係香港以外既地方揸車(當然啦, 揸大膽車就例外啦!!), 原來申請呢個permit好鬼簡單, 只需要去到運輸署填返張form+兩張相再放低$80, 就可以即刻俾到你!! 過程簡單方便!!

個本所謂"國際駕駛許可證"其實只係一本類似passport咁, 不過就得個幾頁紙咁解!! 本"國際駕駛許可證"拎上手既感覺好似有少少流咁!!雖然攪掂, 不過, 由於都好耐冇揸返車, 我諗都係時候搵人補一補鐘先得, 唔係到時就客"屎"異鄉!!!

p.s: 大家唔駛驚, 其實除左我之外, 另一個同行旅伴都會揸車, 我只不過係當佢副手!! whahahahha!!!

剝~~again

星期三又去左剝牙(唔駛錢呀麻!!), 上次剝右邊隻智慧齒, 今次booking就剝埋左手邊, 老媽同我講, 叫我早d出門口, 落樓下大快活食個豐富d既早餐, 如果唔係剝完牙可能食唔到野, 個一刻我以為自己會俾人拎去問吊, 臨死前要食飽d添!! Anyway, 最後都落左去大快活食左個"滑蛋早餐"!!

記得上次醫生同我講過, 呢邊隻牙以十級難度黎計, 只係得七級(上次右手邊有成八級困難架!!), 一如以往, 同上次一樣, 一坐(訓)底醫生又係度恐我:『o拿, 上次都剝左右手邊個隻牙, 今次剝埋左邊, 順利既話就會好似上次咁快, 不過, 如果有咩意外, 你都係可能要預返個半鐘時間去剝啦!!』(當然最後都係好順利咁用左15分鐘時間就攪掂啦!!)


其實開始個時醫生問過我, 駛唔駛剝埋(左邊)上面個隻呀, 個時我心諗, 上次剝完右邊(一隻)都鍾左幾日, 今日如果我一口氣剝晒左邊上下兩隻, 我會唔會死架!! 所以最後我怕死, 決定只係剝下面個隻就算~~ 醫生所言非虛, 今次剝呢邊隻牙又真係順利好多, 話咁快就剝鬼左出黎!!

總算剝晒兩邊既智慧齒, 今次可能唔駛開刀, 到左第二日已經可以食返野(i mean 唔駛食粥!! 食飯都已經o.k!!), 塊面都冇鍾得好厲害!! 不過, 之後同人講返, 今次我只係剝左一邊既其中一隻, 佢話不如剝埋上埋個隻智慧齒啦, 你都剝左下面個隻, 咁以後食野個時冇隻牙同上面個隻牙互頂, 其實, 基本上上面個隻牙都已經冇晒作用, 聽佢講一講又好似係喎, 既然係咁, 我下次拆線個時同醫生講剝埋另外個隻先, 最緊要都係趁家陣唔駛錢郁埋佢先得~~

談, 談, 談

星期日, Suki話大家好似耐冇見面, 不如出黎食下飯, 除左我同佢之外, 當然仲有係佢既好朋友亦都係我既好同學婉雯啦!! 諗諗下又好似真係成大半年冇見過面!! 今次約左去銅鑼灣一間叫"燕萍越南餐廳食晚飯!! 7點鐘去到, 同樓面講左3位, 眼見入面大把空位都要等左一陣先有得入, 真係怪怪!!

入到去坐低, 有位好得意既侍應哥仔serve我地, 可能見一枱3人, 其中有2位係女生既關係, 佢把口零舍口乖&風趣!! 我諗呢間餐廳既特色主要係快, 因為我岩岩先order完d食物之後, 我見人有三急就快快手去一轉toliet先啦!! 點知一出黎既時候, d野食話咁快已經差不多黎齊晒, 食物上枱既速度快得好很誇張!! 我只係去一去廁所姐, 仲要只係小小左喎, d食物居然係已經眨下眼就上齊, 誇張到爆!!!

我地叫左客牛油雞翼(4隻)+咖哩黃鱔飯+豬頸肉+串燒(雞肉x2 + 豬肉x2)+馬加休炒豆苗裹稔肉撈檬(大家唔好以為我打錯)(裹稔肉, 我問過侍應佢話其實係類似一d立腸既食物)!! 食物質素在我黎講就一般啦, 不過醒在上菜速度夠快, 如果趕時間食飯既人就一定岩!! 牛油雞翼件頭夠大, 不過就只係肉多d, 味道就不過不失啦!! 不過有時佢d service就麻麻地, 話說我地食地差不多尾聲, 我地當然係放慢手腳食野一邊傾計, 點知我地食完佢就拿拿臨過黎同我地講: 食完啦, d野(餐具)我同你地收左佢!! 嘩, 咁講即係趕我地走姐!! 既然張枱都冇晒野食, 同埋空了了, 我地都唔好意思坐, 轉移陣地再傾過!!


食飽飽, 我地去左一間cafe繼續傾計, 哈, 冇見一排大家講下近況仲講下未來大計!! 而且聽到Suki鼓起勇氣去Join Working Holiday Visa去愛爾蘭玩一年, 嘩, 好威呀!! 可以暫時放低香港一切過外國闖盪一年, 呢d生活我都想過下, 我覺得去完之後, 一定成個人既眼光都擴闊不少!! 所以, 成晚我地都係圍繞呢個去外國生活既話題傾計!!

最後, 希望5月出發既Suki係外國展開你人生另一個新既遊覽, 擴闊你既視野, 充實到你既人生!!! 當然去到個邊玩得開心d, 仲要小心d啦!!

燕萍越南餐廳

地址: 銅鑼灣謝斐道482號信諾環球保險中心２樓
電話: 2832-9038/2832 2863
菜式: 越南菜

櫻花最前線

去旅行當然要做足功課, 雖然呢排係office冇腦用, 咁唯有返屋企密密用下腦啦!! 咁岩上網applydaily睇到介紹櫻花, 仲介紹左個web-site係預測櫻花開既時間, 仲有個map show左出黎邊你睇下邊度會開, 開成點樣, 開到幾到個% !!! 真係又幾好喎!!!

追貼櫻花最前線: http://www.rurubu.com/season/spring/sakura/

好緊張呀, 好快就有得去旅行啦, 不過d日圓仲係好似升得好鬼高~~

看和吃

上星期日, 正正是老媽的壽辰正日, 原先都冇諗過再同佢一齊再去慶祝(o.k, 我係有少少不孝, 不過, 過往都係咁!!!) , 不過友伴話正日生日冇人陪好似唔係咁好, 所以決定今日同老媽再一次慶祝一番, 但由於老媽佢朝早至下午已經安排左有自己節目, 所以我同友伴就只好夜晚同佢出去食飯慶祝!!

朝早有個空檔, 用得唔好晒, 於是就去左睇場早場, 原先諗住去睇"魔法奇緣" 不過技術上既問題, 最後我去左睇另一套電影"誘心唔怕遲"!

呢套電影某程度上同一般既愛程片都係差不多啦, 主要描述兩位男女主角因為年齡上分野, 從而係愛情路上多左一d矛盾同埋要考慮更多, 反而係另一條主線感覺上好似仲好睇d, 就係講緊單親媽媽MICHELLE PFEIFFER同女兒之間既關係同埋日常生活既細節!!! 如果一個媽媽係生活上俾到自己咁大既自由度同埋支持真係可以令兩代關係更加密切(電影中MICHELLE PFEIFFER支持個女女主動去追男仔, 仲俾埋意見!!), 成套電影都冇什麼高潮起伏, 去到尾段感覺上仲有少少悶場添!!

故事簡介

＜誘 心唔怕遲＞是一齣探討人生中所有人際關係的愛情喜劇。年屆40的洛杉磯單親媽媽羅茜(Rosie)（米雪菲花飾），生活上諸事不順：她製作的電視節目＜暴 走少女＞收視率下降、下屬心存不軌、女兒又進入反叛的青春期．．．多年獨身的她，更遇上比自己小11歲的英俊新星，他的確是她的理想對象，但她搞不清這個 男人是否真正愛她，或只是利用她來在電視台上位？她是否得再次說一句「I Could Never Be Your Woman」？

睇完戲之後, 友伴提議不如買個生日給老媽作一個驚喜, 於是就買左個蛋糕返屋企準備一切, 就係等待老媽回家前, 友伴仲好有心思, 花左多好時間畫左一張色彩繽紛既自製生日卡俾老媽!! cool !!! 由於想俾老媽一個驚喜(一入屋就唱住生日歌拎住個蛋糕出黎!!!), 所以成個下午我都要坐係個廳度望住電視機個升降機既閉路電視, 只要一見到老媽個身影就要立即入廚房作準備, 哈, 之前我地仲rehearsal幾次~~~wahahhah

當然啦, 最後老媽一入門口聽到我地兩個唱生日歌, 當然係開心到不得了啦!!!

上湯xx雞~~~

風沙滑豆腐~~(d豆腐超超超超滑!!!)

xx鰻魚煲~~~


夜晚同老媽去左雅蘭中心一間食素既餐廳食飯, 其實都係第一次黎呢間餐廳食飯, 主要都係係openrice睇人地d commment話呢間d野食都唔錯, 而且係屋企過黎旺角都好方便!! 頭先講左呢間餐廳係食素, 但係佢menu入面全部都係平時酒樓食既小菜一樣: 沙律素腿球 , 泰式明爐魚 , 東坡醬汁肉方 , 法式焗牛油果, 燒乳豬.........當然啦, 佢就同用返d素食煮法整d食物出黎啦, 唔係真係混d牛肉, 豬肉入去!! 話雖如此, 不過, 每款小菜d味道又真係同d真既豬肉牛肉味道差不多, 呢d可以話正式係"齋口唔齋心", wahahhaha~~~

最後, 多謝友伴預備咁多節目及驚喜為我媽媽慶祝生日!!!

常悅素食
地址: 旺角彌敦道639號雅蘭中心6樓食閣D號舖
電話: 2787 3128
菜式: 廣東菜 (酒樓, 素食)

雜

頂, 家陣日元升到巴巴聲, Y100<->HK$7.8!!! 友伴問過d專家, 佢地話家陣日本做緊年結, 所以d日元咁鬼貴!! 起碼到四月頭先會降返dd~~~

xxxxxxxxxxxxxxx

仲諗住呢兩期六合彩咁勁d獎金, 是中一個都冇死啦, 頂, 家陣連廿蚊都拎唔返, 失敗!!!

xxxxxxxxxxxxxxx

唔知近排天氣問題, 真係好似訓極都唔夠既, 朝朝早都唔多願起身, 又或者起身之後, 要多d時間先可以回返魂, 定係我有"渴睡症"呢???

xxxxxxxxxxxxxxx

近排, 除左冇電腦用之外, 個人d時間觀念都差左, 原來下星期有4日連假, 可以諗定去邊樹玩先得, 暫定做d健康活動, 行山是也~~~ yeah, 又可以進行一下"光合作用"!!

一人走兩場

由於遲左到既關係, 只可係大會堂出入等下!!

終於出黎啦!!


上星期六, 去左兩個同學仔既婚禮!! 兩個都係IVE同學仔, 佢地兩位本身都識得, o個日撞岩係好日, 所以就咁橋就撞埋一齊結婚!! 早前原定先去成班同學仔約埋一齊係朝早去其中一個同學仔既註冊儀式先, 之後下午再去另一個同學仔既註冊儀式, 攪掂就食個tea, 再之後就一班人去打牌耍樂下!! 係, 成個plan都好似幾好, 點知, 一朝早, 個個都放晒飛機, 有人話屋企有事, 有人就公司趕工要做野, oh, 最後得返我一條友走左兩邊既註冊儀式~~


一朝早, 因為遲左少少, 所以就趕唔到入去大會堂入面睇註冊, 唯有等佢地攪掂先同新娘子阿恩影張相!! 新娘出黎, 於是同佢影左兩相相之後就走去食d野!! 食完野就過返去對面海紅磡都會廣場睇阿雯註冊, 嘩, 唔係講笑, 伊甸園o個度超多人!! 當然係要恭喜晒阿雯同佢老公啦, 佢地真係好sweet同好開心呀!!

原定成班人去食tea打牌既活動, 因為各人既放飛機, 一下子冇晒!! 頭先影完相之後都係得個3點鐘, 距離去飲既時間仲有起碼4個半鐘, 一條友on下on下, 冇野做, 最後去左灣仔圖書館睇下書(因為夜晚係灣仔個頭飲), 睇睇下去到5點鐘, 頂, 點知佢話要關門, 又要諗下去邊, 一條友冇所事事走埋去個d漫畫cafe消磨下d時間, 終於俾我等到7:30!! 我成日就係等呢一刻, 實在太好啦, 終於等到, 好感動呀!!

最後, 恭祝兩對新人, 白頭到老, 永結同心!!!

冇~~~腦~~~用

嘩......久違了的電腦呀, 我好耐冇用過電腦啦!! 每日返工冇電腦用, 平時既新聞資訊都係由電腦平台汲取!! 家陣係公司冇電腦, 再加上自己返工路經既沿途都冇免費報紙派, 家陣出面街發生緊咩新聞真係唔多知, 連早兩日原來流感大肆令一位小童過身, 都係由人地口中聽返黎先知, 唉!! 遲d可能行行下街發覺, 點解通街個個都戴住口罩, 都唔知發生緊咩一回事!!!

咁都好既, 我係呢個section都只係會做一個月, 話咁快就會轉去第二個section, 今個月就乖乖地專心做野, 學野, 睇野啦!! (呢d完全係自我安慰既說話!! 唉!!)

旅行預告

唔計返深圳, 上大陸玩個d, 都有兩年冇搭飛機去旅行, 咁岩, 早陣子國泰出左一系列優惠機票, 於是有朋友提議去名古屋玩下, 順道浸溫泉兼賞櫻花~~ 暫定於4月12日出發, 至於詳情一切都有待通知及安排, 十(萬)個期待~~ yeah!!

今次去旅行, 有個好消息有一個壞消息, 好消息就係我地將會浸既溫泉有一種係叫"混浴"意思即係會男女一齊浸溫泉, 男的只會得一條毛巾條包住重要部位, 女的都只係俾條大少少既毛巾你包裹, cool, 正呀!!! 至於個壞消息既係, 係日本溫泉區個d地方, 去浸溫泉既多數都係得d公公婆婆居多, 頂~~~