濕晒

唔好講對鞋, 對襪都濕晒!!!

琴日朝早返工, 突然間落起大雨, 好彩, 我一早就上左小巴唔係肯定淋濕晒!! 以為安全冇事, 可以大步檻過啦!! 點知間車由荔枝角到官塘個天仲不停咁落雨, 起勢咁落, 落狗屎咁, 仲唔係細雨個隻! 頂!! 一落車, 成地都係水氹, 點避都避唔到! 終於行到返office之後, 完全feel到自己對鞋入面濕晒, 點解咁講, 因為我對鞋濕到, 只要我行路個時就會聽到"滋滋"聲, 可想而知係幾咁濕呢!!

所以一返到去office之後, 立即除左對鞋, 如果唔係咁濕法, 仲塞對腳係入面, 夜晚返到屋企成隻腳都肯定會發臭!!! 咁又冇理由赤腳係office通街走架, 好彩, office仲有對鞋, 個對鞋係入職個時, 公司一人派一對安全鞋俾每個staff, 基本上公司係想我地出site個時用既, 不過我由始至終一次都未著過呢對安全鞋!!! 成日都覺得佢放係個位度阻住晒, 估唔到今日用得著佢, 如果今日冇佢既話, 肯定死硬!!!