無事常相見

前日唔知發生左d咩事(可能仲係鬼節既關係), 無端端有二位平時都冇咩聯絡既朋友仔, 突然間分別黎邀約搵食飯!! 其實, 有時對呢d飯局都會覺得有少少唔自在, 因為平日大家甚少聯絡, 如果突然間約出黎, 仲要講約出黎食飯個原因係"因為想見下面, update下大家既近況!!" 嘩, 一聽到呢d原因, 都知一定係有d事, 可能我自己心邪, 唔好話見面食飯呀, 連msn, icq & e-mail都甚少聯絡, 如果唔係有d事想搵你幫手, 真係未必會搵食飯!! 當然啦, 早幾年岩岩出黎做事既時候, 更加遇到不少呢d情況啦, 因為不少有朋友會去做傳銷或者保險之類既工作!!

果然, 我呢d神機妙算, 一下子就俾我貼中左, 其中一位就話黎緊會結婚, 話到時擺酒叫我地抽空出席, 唉, 呢位人兄之前做同事個時都已經唔多講兩句, 而且仲要係唔同team!! 當然你結婚係一件喜事, 我亦都好高興你邀請我分享你既喜悅, 只不過, 我諗我真係未熟到會去飲你個餐!!

另一位都係有事求助, 當然啦, 叫到幫手, 如果能力做到既, 都盡量幫啦!

我覺得朋友之間, 得閒個時可以打電話大家傾兩句, keep住聯絡, 再唔係msn or icq say個hi都冇所謂, 如果只係有事先黎搵朋友幫手, 咁就唔係太好啦!! 所以呢, 朋友, 我等車 or 坐車返屋企個時, 就會打電話俾你地傾下計, 同你地聯絡下感情!!

知識就是力量

早陣子, 同事因為配眼鏡一事與眼鏡店發生爭執, 因為同事原先詢問有鏡片問題, 其實同事想要配一副清晰度高d既鏡片, 而有關既職員就介紹左佢Hoya一款既鏡片! 而事後, 同事返屋企之後, 就上網search下相關資料, 發現該職員所介紹個隻鏡片既清晰度俾同廠另一款model差d, 而且呢款鏡仲要係貴d! 於是同事就馬上send左個e-mail俾間鏡片廠, 問清楚個事實!!

最終, 鏡片廠立即回覆e-mail予同事有關情況!! 事後, 同事覺得有被誤導之, 所以就send左個e-mail俾眼鏡公司投訴, 之後同事更怕眼鏡公司會同佢裝副不是Hoya既鏡片(因為Hoya比其他鏡為貴), 所以佢自己拎返個眼鏡框同鏡片自己去安裝, 而且係安裝前, 佢仲自己拎住副鏡片先去鏡片廠處為鏡片驗明正身!! 後來, 佢又詢問做眼鏡公司的親戚(係行內做左幾十年), 發現, 冇眼鏡公司會同人淨係"車"返副鏡片入眼鏡框度, 佢又唔信邪, 再上網搵資料(yahoo小知識), 佢又好野喎, 又俾佢搵到有公司肯同人咁造!!

最最後, 該誤導職員打電話俾同事同佢say sorry(主因係同事send e-mail去左眼鏡公司的head office既General Manager度, 怪責落黎就要做返d野)!!

當佢同我講完成件事既始末之後, 佢就同我講左句: Gary, o拿, 呢d就係"知識就是力量", 如果你咩都唔知, 就會俾人呃架啦~~ 基本上, 我對佢個堅持真係值得佩服, 而且佢完全係據理力爭個隻, 唔怕煩, 佢最後同我講左個句"知識就是力量", 呢一句簡直係發人心省, 咁又係喎, 如果, 咩都唔知, 人云亦云, 自己又唔了解事情既底蘊, 有時蝕底既就係自己!!

下次, 下次

早陣子, 公司黎左位新同事, 呢位同事唔知副業係唔係股票經紀, 一日到黑佢個手提電話響個不停, 呢個都唔緊要, 佢自己明知自己咁多人搵佢, 而電話又不停咁響, 好心佢就自己醒目自己教返個電話去震機啦!! 佢又唔醒目, 日又響夜又響, 家陣每次佢電話響個時就會聽到Fiona既歌: 下次, 下次, 下次大慨可以......................

O.K, 其實我唔係對Fiona d歌反感, 只不過, 一日聽成十幾廿次"下次, 下次", 頂, 真係好鬼死煩!!

sir滑梯

上星期六, 見老媽係屋企冇野做, 佢平日成日留係屋企照顧個兩隻大小不良, 甚少出去行街, 咁就做下孝順仔同佢 & 大小不良&表妹(佢黎我屋企過一星期暑假)去九龍灣新商場MegaBox行下, 正所謂扶老攜幼就當然係用最方便, 最直接既交通工具去啦, 由屋企搭的士去都係$100有找, 又ok喎!! 其實, 之前都諗住同老媽黎行下, 不過之前岩岩開幕, 多人到呢!! 所以, 今日有機會就同佢地黎行下!! 個小不良唔知係唔係俾佢地縱得多, 成日都唔肯行路, 成日就要我抱, 我差不多抱足成日, 手都差不多就快斷咁濟!!

小不良是也~~後面是老媽!!!

大不良是也~~

係MegaBox每一層都有個主題, 其中9樓就係叫"兒童天地"入面有條滑梯俾d小朋友玩, 大小不良一見到好似癲左咁, 走上走落, 跑黎跑去, 起勢咁玩, 佢地玩左好耐都唔肯走!!

新居 X 2

上星期五 & 日, 連續參觀左兩間新屋!!

亂到呢!!

右下角的就係阿細的小朋友!! 五歲啦!!! 不過瘦un un咁~~

首先星期五晚先去左阿細屋企, 其實都好耐冇見過阿細, 仲有佢個小朋友都已經5歲, 佢係我朋友群當中應該係最早結婚兼有細路既人啦!!(記住佢係同我同年齡架!!) 當然啦, 佢既結婚都係有意外發生個隻啦!! 不過佢個小朋友依家都讀緊一年級, 我諗最辛苦既日子佢都總算捱過左啦!!

今次其實係由阿恩約今次既飯局, 一來係因為大家都太耐冇見, 二來佢順道宣佈佢既婚訊, 所以就打算約出黎食飯, 不過, 咁岩阿細搬屋, 相請不如偶遇, 阿細話索性今次飯局就轉移至佢新居! 上到佢屋企, 其實成間屋都未完全裝修完, 好多野都未整好!! 不過, 今次係我地入去新屋食既第一餐, 應該係入伙酒, 因為做聯絡既恩姐都唔知原來今餐係入伙酒既關係, 所以都冇特別斬料上去加餸, 真係唔好意思!!

+++++++++++

右手面的Ernest當起鼓手, 不過, 大家都係冇咩音樂感, 跟唔到個拍子, 所以玩左一陣就"收皮"~~

星期日, 終於去到小菲屋企玩, 其實呢個活動前前後後都約左成個月, 改期都先後改左3次!! 只不過係上人地屋企玩之麻, 唔講, 我差d以為自己約緊人去旅行, 個個人d時間都咁鬼難夾, 哈, 好彩, 我有不屈不撓, 打不死既精神終於約到呢0班"茂利", 今次上小菲屋企, 小菲好有心, 知道我地上去佢屋企玩, 所以就特登買盒"大富翁"俾我地玩, 唔好以為呢盒係普通版既大富翁, 佢係一個高科技既大富翁, 平時玩開個隻大富翁通常都係用紙幣現鈔進行交易買賣, 家陣"高科技版"係插卡式, 即係所以錢都係save晒係個張卡度, 所有既交易都係透過部機黎進行, 完全係電子化, 開頭玩落個時都新鮮, 不過, 玩玩下都係覺得自己現兜兜拿住D錢cash好玩d!!!


仲有, 小菲對於高科技果然係樂此不彼, 依家係NDSL大熱既"太鼓之達人", 原來小菲早係PS2時代已經引入呢隻game, 而且仲係要有個真鼓打個隻!!! 勁爆!! 呢一晚, 勁啦, 係小菲屋企打邊爐位位都係$40, 已經可以食到嘔突咁~~ 打攪晒！！！

小菲屋企, 可以用兩個字黎形容 - 簡約 , 基本上佢屋企完全冇多餘既傢俬, 好鬼鍾意呢d裝修擺設, 因為太多野反而會令屋企太雜亂, 而且會縮細屋企個活動空間, 仲有, 佢屋企窗口對住個大海, 正呀!!

BB乖

好耐冇同Jackie佢地成班人一齊食飯, 對上個次都已經係成個月之前既事, 所以就特登約出黎聚一聚! 今次出黎除左食下飯之外, 小狗順道又講埋佢已經有左BB, 由於小狗有BB既關係, 所以就特登約返係佢屋企附近食飯, 原先都係度煩緊大肚婆食d咩好, 如是就打電話去問下小狗, 開頭仲諗住佢會話食d清淡d既野, 點知小狗一開口就話, 不如去据扒 (!) 既然大肚婆話去据扒, 咁就唔駛煩!! 為左唔駛小狗周圍走, 所以係佢屋企附近食, 而佢屋企附近有得据扒既地方就得"花園餐廳", 哈, 所以我地成班人特登過對面去"花園餐廳"据扒, 不過, 去邊都冇所謂, 都係一班人食飯開開心心傾計!!

暫時聽小狗講, BB既預產期會係下年2月, 到時就有BB玩啦, whahahaha!! 另, 個日小貞貞陪小狗去左聽個d咩產前講座, 佢聽完之後同我地講返, 話d大肚婆到左生BB個時, 會連痾屎既力都會用埋, 所以呢, 係生BB既過程中, 個BB有機會會同d臭臭一齊"必"出黎!! 哎呀, 諗起個情況都好恐怖!!

另, 小狗提到依家d超聲波技術已經係可以4D scan個BB ( ! ) 4D喎!! 點4D法呢, 我真係好想知, 會唔會係好似個d戲院咁, 冇端端吹下風, 灑兩滴水出黎個隻呢!! 如果係既話又幾勁下!!

想同大家講一講, 大家如果有機會去花園餐廳食飯既話, 記住叫個什扒餐食, 因為真係好鬼大份, 好抵食, 什扒餐入面有豬扒, 雞扒, 雞全翼, 火腿, 煙肉, 另外仲可以跟飯, 意粉 or 薯菜!! 超多野, 我自己就冇叫到, 不過阿康叫左, 一睇到佢個什扒餐上枱個時個種澎湃+震撼既感覺, 真係好勁!!

IQ題一則

上網見到條IQ題, 幾得意, 俾大家估下!!

- 聯合國會議放break。(估一4字粗口)
(貼士 - 係形容當時會議地方既男廁情況 )

答案: 乜X都有!!! (有意思, 有意思!!!)

好朋友系列: Ling Ling

繼上次介紹完Jackie之後, Ling Ling都係中學同學全女班成員之一!! LingLing係我第一位認識高度唔超過/或接近5尺既朋友!! (Lingling你唔駛驚, 因為天外有天, 我呢兩年都識到d人新朋友仲矮過你)哈!! 平日如果約佢出街, 我好鍾意企係佢隔離, 因為我可以將隻手"掠"係佢頭頂度, 真係幾舒服下!! 佢既家族可以話係以"禮記"(我的中學)為指定學校, 因為佢哥哥, 表哥, 甚至佢屋企其他成員都好似先後都入讀"禮記", 成間學校, 話唔定佢撞口撞面都係自己d親戚!!

Lingling係傳統既品學兼優既學生, 由中一至中七, 永遠都係名列前矛, 我地呢d上堂訓覺, 落堂打波走去玩, 係成績之上當然可以話係遙不可及!! 真係唔明, 我地明明係兩種人, 家陣又會咁熟, 咁friend!! 不過, 又係個句, 係中學時代同佢真係冇咩兩句, 係除左抄功課個時之外! 因為好明顯, 大家玩個班都唔係同一班人!! 我地相熟既時候都已經係中學畢業之後既事!! 我諗係呢班女生之中, 除Jackie之外, 同Lingling都算係傾得至多計既人!!

Lingling的家, 比牛牛的家仲要嚴, 之前講過, 中學牛爸牛媽每逢到晚上10:00p.m左右就會開始佢地既"追魂call", 招佢地個寶貝女返屋企, 不過幸好的是, 對牛牛黎講這已成過去!! 但係呢d事情直到現在, 依然發生係Lingling身上, 當我地出街食完飯, 再去飲杯野或食個甜品既時候(多數都已經係10:30p.m左右)就一定聽到Lingling會係電話度同佢媽媽講句: 係呀, 就走啦!! 返緊黎啦!! 我曾經有一次忍唔住問過佢, 都咁大個人, 家陣都管住妳幾點返屋企, 妳唔覺得好煩既咩?? 佢解釋俾我知, 細個個時都有為此而煩過, 不過人大左, 父母仲可以管你/關心你, 呢個係一種福份, 你應該要珍惜!! 從此睇得出, 佢對"家"係十分之重視!!

係咁多個朋友之中, 我成日都覺得Lingling係讀得書最多既一位, 係中學時代佢既成績就不在話下, 雖則話佢係讀書讀得叻, 但係好不幸佢都未能順利進入大學, 只能進入higher diploma課程, 不過, 咁並冇打擊到佢, 佢完成higher diploma課程之後, 緊接再用多兩年時間就再完成埋大學degree課程! 雖然係俾人用多一年時間, 不過我覺得咁會好似抵d, 話晒用多一年時間就可以多一張cert拎, 都幾化算下!! 不過亦因為咁, 佢就從此踏上不歸路, 因為佢係學業生涯上作出一個唔太好既決定就係去進入左一個甚少女生選擇既學科!!

係呢班全女班當中, 多數由我organize大家d活動之外, Lingling就係另一個主力!! 但凡有親d咩大型活動(such as: 旅行, 返大陸, 行山, BBQ等~~~~~)Lingling都是必會事先上網搵齊資料, 做足功課, 再俾大家參考, 解釋有咩玩, 邊度玩最抵!! 記得好耐之前, 我地成班難得有一次去中山, 佢就事先去定旅行社搵左好多資料俾我地!! Lingling畢業出黎辦事之後, 發現朋友既重要性, 我記得佢同我講過, 返工放工, 生活好刻板, 好少時間同d朋友聯絡, 所以依家佢時不時都會打電話俾各朋友了解最新既生活狀況!!

係中學時代既佢因為終日埋首係書本間, Lingling對感情事一冇所知! 到左大學時代, 情竇初開既佢經常搵人問詢問意見, 我地呢d咁淵博的, 當係可以解答到佢既問題啦, 當時既我總係叫佢嘗試一下拍拖既味道, wahahha, 係我既推波助瀾下佢終於開始第一段情(當然佢都有問過其他人既意見啦)!! 曾經, 我地對佢既感情事作出一番評論, 但時間可以証明一切, Lingling恭喜妳, 係妳努力堅持自己眼光同信念下, 終於開花結果, 希望你地有一個美滿幸福既將來!! 仲有, 我真係未見過有人會恨結婚恨得咁誇張, 佢已一早疊埋心水結婚生仔, 佢仲話要30歲前就要生個隻!! Lingling依家成日都為左搵樓, 睇屋係度苦惱緊!! (好似已經接近完成階段, 恭喜晒!!), 如果佢真係買到屋之後, 我地繼Jackie, 小狗屋企之後, 又可以多一個地方玩, whahahaha!! Lingling到時妳記住買返部Wii!!!

Lingling 呢度既規矩, 要留言呀!! 我知係你地班人入面, 你算係update我個blog最快既人, 快d留言呀!! whahahaha!

(下期預告: 小貞貞)

書

依家呢個時候正值接接近放暑假尾聲, 大人細佬冇一不塞入去書局買新書, 早兩日行街經過書店, 伸個頭入去望一望, 好多人手捧一棟二棟教科書毫不壯觀, 再左上望一望, 書店掛住一個宣傳單張話:"買教科書, 可享6個月免息分期", 其實早兩年都已經聽聞家陣每年中學生買生新書, 動不動都要成3,4千(每位計), 真係貴得有點兒誇張, 如果一個唔覺意, 屋企有兩件化骨龍, 一齊讀中學既話, 真係唔死俾你睇!!

我中學個時, 老爸可以一口氣拎舊錢俾我同家姐去買書(cash喎!!!), 現兜兜咁俾我地兩條友去買新書, 真係又幾豪氣, 話晒我中學時代買書都起碼要成千幾二千銀!! 依家諗返, 都覺得老爸好野, 邊樹可以冇啦啦拎舊錢出黎呢, 好神奇呀!!

+++++++++++++++++++

上星期, 會考放榜, 表弟成績仲屎過上年, 所以放榜之後第2日, 舅父就搵我呢個最不才既表哥個幫手, 幫手睇下邊科IVE岩讀, 其實我心水叫佢讀Hotel Management, 不過佢就要讀Machine Enginee, 本身佢仲想choose Civil謮, 不過, 我總算係行內人仕, 所以一口就叫佢唔好讀呢科, 唔係第日後悔就唔好!! 琴日終於公布結果, 入到Machine Eng Year 2, 都好!!! 不過, 聽佢講家陣IVE公布收生結果係through SMS俾D申請人, 都幾先進下!!

2007年度校友會資訊(4)

2007年度校友會資訊(4)

出席者: Camus, Cow, Gary, Ivan, Jessica, Jaemi, 譚
半出席者: Thomas

缺席者: -

首先, 先提出第一點(亦是重點), 於2007年8月4日舉行慶祝Ivan大壽已經完滿結束, 感謝各位抽空去到新界區据扒(好彩唔係扒王之王!!), 由於Ivan兄尚未見到心水之禮物, 所以有關之禮物將會順延!!

值得一提既, 就係Thomas由於事前已經約左其他人食飯, 所以就未能出席是次晚間聚會! 不過, Thomas自己知自己事, 再唔出席活動既話, 佢份生日禮物只會淪落到可能買個sony耳筒都要自己貼錢都唔定!! 所以佢於飯席後再相約Ivan, 牛, Gary, Jessica再到"西貢滿記甜品屋"舉行飯後甜品聚餐!! 其餘等人因第2日有事, 故自行回家作休!!

在此亦先作總結各人之禮物價值換算表:
Thomas: $600

(雖則Thomas遲到出席"正場"慶祝活動, 但由於Thomas誠意可嘉, 今次就免除扣減金額 )

其他人仕之生日禮物金額維持不變~

未來活動預告表:

August

24/8/2007 (Fri) - 牛之生辰

September

1/9/2007(Sat) - 15週年大旅行(Local)

15-17/9/2007(Sat - Mon) - 15週年大旅行(Oversea)

(感覺好似回歸十週年咁, 有一連串活動安排!!!)

割喉核

今日老媽同我講, 表妹下星期會黎我屋企住一個星期!! 我就問下咩樹幹, 咁得閒黎我屋企住下啦, 佢就話, 佢細佬(即我表弟)黎緊下星期會入醫院割喉核(!), 而且見橫掂暑假又冇學返, 又有暑假活動參加, 咪過黎呢邊玩下~~~ O.K!! 過黎住下冇問題, 不過, 因咩解究男人老狗, 冇啦啦走去割喉核, 喉核喎!! 好歹都係男人既性徵之一呀!! 講笑呀, 於是我就問清楚d, 究竟係割包皮定係割喉核呀!!! 點知老媽依然好堅持係話去割喉核!!!

後尾, 終於老媽就再問清楚表妹, 佢細佬係發生咩事, 原來表弟佢之前成日都喉嚨發炎, 正確黎講主要都應該係扁桃線發炎先真, 佢就係醫院排期排左好耐架啦, 依家就終於同佢啦!! 所以下星期佢就會入去醫院做"割扁桃線"小手術!!

鬥雞眼

琴晚因為有d特別事, 所以就有機會同ling ling & 小貞貞食dinner, 我地明顯唔係個d"食不言, 寢不語"個類人啦, 難得咁橋大家出到黎食飯, 天南地北冇所不談架啦!! 傾傾下, ling ling話佢有個"視懶"既習慣(根據lingling既解釋"視懶"即係平時睇睇下野, 對眼睛會對住某d東西高度集中, 從而變成"鬥雞") 呢個壞習慣係細個o個時得返黎!!


如果大家記得, 細個個時(即係好耐世紀既事), 曾經有一段時間好鬼興睇個d乜鬼3D立體圖, lingling就係個段時間染上左呢個壞習慣, 人稱"好勝ling ling"既佢, 為左証明自己係叻過其他人, 從而可以得到無上既虛榮感(因為佢睇到, 人地睇唔到, 某程度上佢覺得咁樣係好威威!!!), 所以就苦練如何成功地睇每一張3D圖!!

唔知大家有冇玩過呢d遊戲, 我好坦白咁講, 細個o個時(即使到依家都係), 我真係一幅都睇唔到, 我成日以為就咁"鬥雞眼"就可能睇到個d 3D圖, 琴晚聽ling ling講, 原來睇呢d 3D立體圖都有學問, 有技巧架!! 原來唔係就咁"鬥雞"咁簡單, 原來係要集中一點先(至於集中係邊點, 幅幅圖都唔同), 之後先再黎"鬥雞", 咁先會睇得出個張3D圖係乜傢伙!!

大家試睇下上面個3幅圖, 如果睇到既話就留言講個答案我知, 我都係仲未識睇, 失敗!!!

十個爛蘋果

首先在此謝過Thomas先可以有免費首映睇!!

上星期六個晚, Thomas提過佢姐姐有星期一"Ruch Hour 3"既首映戲飛, 問我地睇唔睇, 咁有得睇當然冇咩所謂啦! 前日就msn約定夜晚冇得睇戲, 聽Thomas講當晚首映會有"整容三寶"現身!! 故此由我地食Dinner開始已經興奮地討論緊, 唔知個三位"整容三寶"會以咩形式出場呢, 唔知佢地會唔會著住Bikini游水過黎呢!!

食完飯, 我地就去左拎戲飛, 由於係首映既關係, 自然就有d首映活動, 但好不幸, 我地拎完飛之後就去左戲院門口排隊入場, 而佢既首映活動則係另一邊既出口舉行!! 即係咩都睇唔到, 邊個還返"整容三寶"俾我呀!!! 不過唯一睇到既就係Amanda.S 同蒙嘉慧, 因為佢兩個咁岩就經過我地排隊既地方!! 所以先咁好彩見到佢地, 佢兩個都好瘦, 瘦得有點兒誇張!! Thomas提到, 呢排個d Model咩Amanda.S, Lisa.S.......個個都要加個S係尾, 佢話佢都想加個S係尾, 叫Thomas.S, wahahha!! 根據同行Jessica可靠情報(佢老細同成龍好熟!! 所以佢對成龍既行蹤十分清楚), 成龍今晚唔會出現首映!!

好啦!! 講下呢套戲先, 成龍真係老啦!! 其實自從佢去左荷里活拍戲之後, 我都已經唔鍾意睇!! 今次呢套戲爛到真係唔識點講(唔怪得之, 成龍都唔敢蒲頭), 好明顯, 成套戲完全冇劇情可言, 悶到我差唔多想訓著!! 佢地想用到一d懸疑位出黎俾大家, 佢地一直追查"x蛇"既人, 原來最終發現"x蛇"係一張名單, 之後就不斷打打, 仲要唔係打得好勁, 好睇個隻喎!! 雖然, 佢係尾場係巴黎鐵塔度打, 個導演諗住成個view拍出黎會好好睇, sorry, 真係完全感受唔到!! 成套戲都好渣流灘既感覺!!

幸好, 放映時間唔係太長, 因為我地4個人, 一路睇就一路悶, 成日係度諗緊套戲幾時會完場呢!! 除非係成龍大哥既忠實Fans, 如果唔係既話, 你會一路睇一路"界櫈"!!

5.8.2007

己上色!!!

公廁隔離据扒

上星期六為左慶祝堅兄大壽成班人去左一個冇雷公咁遠既地方食飯 - 林村!! 其實呢個提議係由牛牛提議, 一開始個時, 大家都以為入得林村就當然係食盆菜, 點知牛牛永遠都有估你唔到既野出現, 今次我地係入去食西餐据扒是也!! 開頭我一直係度諗牛牛約得我地入到去新界林村, 斷估唔會係去食"扒王之王", 如果真係既話, 我諗我會忍唔住會咬人!!

個門口係唔係好似一個博物館既門口呢~~

我地一行5人先係太和火車站相約再轉搭的士, 由於唔係我book枱, 更加冇黎過, 可以咁講, 查實我連林村都未入過去, 咩許願樹, 我都係睇新聞見過下, 但係牛牛同我講, 話俾司機知, 係林村入面一個好靚, 好貴既公廁度落車就得!!

果然, 司機一聽話係"好貴, 好靚"既公廁, 就即刻開車, 仲係沿途不斷咁同我地講個公廁係幾咁靚, 仲叫我去痾返兩篤尿試下!! 而且佢話個廁所度有d真既荷花, 係真花喎!! 咁堅, 一落車, 我地第一時間當然係去"參觀"下個公廁啦! 嘩, 第一眼望過去又幾似一間博物館咁既樣!! 果然唔講得笑, 廁所入面D格局都唔少野!! 不過我搵晒成個廁所都唔見咩荷花之類既野, 我心諗唔通係個尿兜痾完篤尿之後, 會有一朵荷花彈出黎, 咁又真係幾神奇喎!! 所以我同阿譚都急急腳去左個小解, 答案係唔會有荷花彈出黎架~ 我諗個司機係講廁所門口個d盆栽都唔定!!!

其實呢間荷曄庭餐廳, 個名就好似幾中式下, 不過係呢度主打既係類似Outbreak個隻大大份既American Food食物, 即係大大塊, 通常以4, 5安士起計, 起碼要合5個人以上先可以解決到既Rib, 或者個d牛扒!! 我地一坐低, 一位類似老闆既四眼佬行過黎拎住本menu同我地講, 話呢個羊架就要烤一個鐘先得, o個個西冷扒就要整半個鐘先有得食!! 嘩, 大佬, 唔駛咁誇張呀!! 不過, 佢咁講即係d野真係堅野, 唔係平時係出面食個d扒王之王個隻, 係咁e用塊鐵板同你煎兩下就算!!!

呢個係羊架, 燒得幾好味!!!

好好食 & 超大塊既西冷牛扒, 唔好以為咁大塊佢就會好難切, 好冧, 而且一定係冇落梳打粉"拿"過!! 正!!!

d扒上枱個時, 真係唔敢相信, 先個下塊牛扒, 嘩, 大過你塊面多多聲, 而且佢伴碟既薯菜都好好食, 而值我一讚既就係佢連伴碟個d蕃茄都會同你煎一煎, 呢d detail位, 值得加下分!!! 食物固之然係好食, 呢度呢一樣好既就係d侍應, 我地坐低之後, 佢會慢慢介紹menu入面d菜式, 而且仲好細心咁話你知點邊樣菜式先係最好!! Very nice, 仲有仲有, 每次上d大件頭既菜式, such as成塊面咁大 & 成吋厚既西冷牛扒, 佢整好之後就會同你講聲, 之後, 就會問你需唔需要幫你切埋!! 呢d service幾好, 唔駛下下都係自己分!!!(因為呢d工作平時冇人做, 之後就要我落手!!)


所有野由service至食物都非常好, 唯一既唔好就係牛牛係呢d天時暑熱既天氣之下, book左張outdoor既枱, 係, 其實附近d環境真係唔錯, 不過就真係熱左d, 我一路食一路標汗!! 講真, 如果係秋天或者冬天去食, 坐出面outdoor都不失為一個好選擇!!! 食個時, 我就不斷呻熱, 牛牛佢呢條友就係度話o.k, 仲話覺得有少少凍添, 當然啦, 你對住把風扇兜口兜面咁吹, 你實涼啦, 我頂!!

荷曄庭園景餐廳

地址: 大埔林村放馬莆43號地下

電話: 2653-1313

五星級大鼠

上星期日有機會去一去新機場既二號客運大樓參觀, 真係比想像中既大得多, 入面可以媲美一個商場, 當然同又一城個d比就冇得比啦!! 不過可以話係應有盡有, 最重要既係個度唔係太多人, 而且冷氣又足, 而且各大小商舖都一應俱全, 出面d商場做final/crazy/futher sale, 呢度都一樣做緊sale, 可能款就唔夠出面多, 不過起碼呢度唔駛係出面人逼呀麻!! 仲有, 平日係出面排隊排到阿媽都唔認得既"板前壽司", 係呢d, 完全唔駛等位, walkin 話入就入!! 仲有Burger King, 本身都想試下, 不過, 見到個set都要成差不多$60而自己又唔係太肚餓, 所以就作罷!! 留返下次有機會先再去食, wahhaah!! 如果冇冇聊聊冇野做, 入黎行下都可以玩到大半日!!

既然用左十幾蚊車程入到黎機場, 難得黎到, 咁岩見有甚麼"4D超立體巨幕影館", 冇理由唔去昅一昅架, 睇到個list, 得套"五星級大鼠"似樣(其餘個d係甚麼"白馬奇緣", 齋聽個名都知唔多掂!!), 之前基本上完全冇諗過去睇呢套戲, 不過, 呢套戲上左畫之後, 都有不少人讚幾好睇, 基於唔想浪費十幾蚊車程關係, 於是就走左去睇!! 其實個戲院唔係算好大, 不過正如佢個名咁, 真係有個5層樓高既巨幕, 如果有朋友想去睇既話, 我可以話你知, 你即使坐最後個排都冇問題, 應該咁講, 其實坐最後個排先係最好!! 因為個d坐位係斜級咁上去, 而售票員都話, 最後個排係同巨幕成水平線, 睇個時應該係最舒服!!

好, 講返下個"五星級大鼠"先, 呢套戲d公仔好細緻(唔知係唔係睇巨幕既關係, 老鼠d毛真係一條條係你面前睇得好清楚), 而且好鍾意o個個好似"濤濤"個位廚師, 時不時都走出黎, 講兩句有深度既說話!! 而且去到最後有一幕係講成班老鼠(講緊應該係超過100隻)幫手係廚房煮野食, 係動畫方面成個構圖都好得意, 不過講真, 去返現實度黎講, 成班老鼠係廚房度出現, 其實都幾恐怖, 所以呢, 動畫始終都係歸動畫!! 所以去睇動畫個時, 麻煩各位放下身段, 慢慢relax & enjoy一下!!

係睇戲其間, 聽到後座有位BB係度笑同埋拍手, 哈, 個BB好得意成場戲都冇扭計!! BB都鍾意睇, 你話d公仔係幾咁得意呢!!

Customer Services

上星期, 個手提電話short左! 自己諗住用個鏍絲鈚拆開佢睇下整唔整得返, 好明顯係徒勞無功, 唯有死死地氣走去Nokia專門店整!! 如果有人去過旺角o個間Nokia專門店整機既朋友都知道, 個度係長期處於人頭湧湧既狀態, 基本上你拎左張飛之後, 起碼要等成粒鐘有多先有人叫你去counter招呼你, 我都唔係好明, 點解Nokia咁大既牌子都唔整個大d既地方, 開多d counter 去sevice人!! 永遠都係大棚人聚晒係度, 個個都成look野棟晒係度, 又唔夠座位俾人坐!! 真係撞鬼!! 下下都要等成粒鐘, 浪費時間!!

不過, 呢個都唔係重點, 就係我等緊叫no.既時候, 成日都見到有好多人好勞氣咁對住服務員, 又呢樣, 又個樣, 鬧到人地阿媽都唔記得, 唉!! 其實見到呢d情況, 我都覺得個d服務員好慘, 其實你部機壞, 又真係唔係好關佢地事, 人地都只不過係打份工, 將心比已, 你返工都唔想俾老細鬧啦!!

又, 部電話short左, 逼住要用返舊個部電話, 但係舊個部電話又唔support mmc卡, 而我address book入面d電話又入晒去mmc卡, 個幾日咁岩又要約人去食飯, 冇晒人地d電話no., 我既世界好似突然間與世隔絕!!! 好慘~~

童年回憶

早兩日行街, 落左機舖打機, 過下手癮, 打完機, 見到隔離舖頭係個d大型既貼紙舖, 見冇野做, 行左入去轉個圈, 嘩!! 時而世易, 家陣d貼紙機真係勁得好厲害!! 伸個頭入去d機度望下, 入面d佈置有d咩大光燈, 又有sofa坐, 有d仲有好多個佈景background布簾俾你自己換, 諗到既都有, 你諗唔到既都有!! 好神奇呀!! 仲有, d貼紙機都唔平個喎, 起碼都要$50一次, 最貴個部機, 好似都要成$70!!

追溯返對上一次去影貼紙相都已經係好耐世紀既事, 中學年代都有同d同學仔去玩下, 記得即使去到讀poly既時候都有成班人柴娃娃去影過一, 二次!! 之後, 人都大啦, 唔通仲同d死靚仔靚妹一齊去迫咩, 不過又咁講, 依家拎返d貼紙相出黎睇返又真係幾攪笑!! 其實, 得閒如果行開街又冇咩野做, 影下呢d相(當然唔係講緊一個友走去影, 咁鬼無聊啦!!), 當做係一個記錄, 回憶都不失為一件好事!! 雖然依家d DC又細又方便, 不過, 貼紙相又同d真正既相又有少少分別既! 我地幾時去影呀!!