袋起開心回憶

謝謝對我的不經大腦的說話盡量容忍及寬容!!!

相片 => 回憶, 都是由妳精心挑選!! 開心, 快樂, 高興, 歡樂, 愉快, 興奮, 暢快, 希望永遠都伴在我倆
旁!!! 讓更多更多更多開心回憶繼續放進這袋吧!!!

剝牙後的第二天

早餐- 豬紅粥
晚餐- 牛肉粥 + 叉燒腸

友伴告訴我, 通常剝完牙個晚到第二朝, 訓覺個時, 多數都會流到成個枕頭都係口水!! 可能有左友伴既忠告, 所以成晚我都特登合埋個口訓, 到左第二朝, 好好彩冇流到口水!!!

今日我塊面腫鬼左, 感覺好似成日含住舊棉花係個口度!! 剝左四隻智慧齒既友伴俾左個好好既另一個忠告, 呢兩, 三日, 盡量最好就食粥或者流質食物就算, 所以今日個早, 午, 晚三餐都係食粥!!

好x痛!!!

我好似人地臨死前d人講一樣, 我見到有條隧道有道光射出黎!!

話說, 琴日, 突然收到牙科醫院打電話黎話, 之前book左去剝智慧齒o個日, 醫生唔得閒, 如果今日去睇有冇問題!!! 橫掂唔係特別多野做, o.k, 就去!!!

今日準時booking時間到達, 突然間心情緊張起黎, 話晒咁大個仔都係第一去剝牙!!!

入到去, 醫生問我想剝邊隻先(因為之前book左係話想左右兩邊都剝晒, 當然都分開兩次剝啦), 我又冇咩所謂, 是但邊隻都一樣姐!!! 於是恐怖事情就咁開始啦!!!

唔知係唔係阿醫生平日好悶好得閒, 今次剝智慧齒, 前前後後嚇左我幾次!!!首先醫生同我講, 不如剝右邊個隻先啦, 因為右邊個隻難度高d, 佢話如果難度有十級黎作標準, 應該都有成八級!! 我心諗, 冇咁誇張呀~~~

之後, 佢又再講一講, 今次可能要開一刀, 而且最少要縫返一針!! 嘩, 咁大件事!! 再之後, 又再講, 開刀都算係小手術, 你最好就預個半鐘先做得完啦!! 嘩, 個半鐘喎, 人地去割包皮都唔駛咁耐呀~~(我估)!!!

講左上面一輪說話恐完我之後, 佢就正式開工!! 我就見佢係我個口度起勢咁轉(當然之前已經打左麻醉針啦, 唔係既話, 佢轉第一野個時, 我已經應該暈左!!) 佢一路轉就一路講:『嘩, 果然係同想像中一樣, 幾有難度~~~ d 牙幾硬下!!』, 由於打左麻醉針啦, 痛就唔多痛, 不過, 佢轉到咁上下, 就見佢用個夾起勢咁夾我隻牙出黎, 雖則唔多痛, 不過, 自己都feel到佢"骨...骨..."聲咁夾我隻牙出黎!! 自己都聽到心寒!!!

醫生話隻牙大隻得濟, 要將佢cut開兩節夾出黎!!

終於最後, 只係用左半粒鐘就同我起左隻牙出黎!! 佢就同我講:『雖然俾想像中難dd, 不過都好順利用左半粒鐘完成!!』頂, 開頭仲嚇得我要用成個半鐘咁誇張添!!!

依家個口自己要成日吞口水, 如果唔係就會好似成個白痴仔咁流住口水!! (今日, 就係同友伴等巴士個時, 友伴突然間同我講你口角流血水, 你都咪話唔恐怖!!) 另外, 今日知道左一件事, 友伴都幾厲害, 原來佢本身之前已經剝晒四隻智慧齒, 仲要其中一次係一口氣剝晒同一邊既上下兩隻!! cool, 聽完我都覺得佢好勁呀!! 兩隻喎, 妳要我一口氣剝兩隻, 我應該已經死左啦!! 佢仲話自己對俾人剝牙相當有經驗, 哈....哈!!!

忽然

上星期五, 友伴突然打俾我話星期六朝早不如睇早場, 佢話佢已經係身處戲院售票處, 友伴俾左兩套電影我選擇 1.) 魔法奇緣(Enchanted) or 2.) 留給最愛的情書 (P.S: I Love You), 我就話睇後者, 因為之前睇過呢套電影既內容簡介好似幾吸引, 而咁岩友伴又話睇早場, 就決定睇呢套電影~~ 其實我知友伴應該想睇魔幻奇緣多d, hehe, 下次, 再陪佢睇返先得!!

講返呢套電影, 睇佢個橋段都幾吸引, 不過唔知係唔係開頭對呢套電影有d期望定係睇早場有d眼訓, 去到中間橋段反而有少少悶!! 由其是女主角長時間唔需要工作, 只係"病"埋自己係屋企, 但係又可以有錢繼續生活, 令我覺得總係怪怪的!! o.k! 你可能話我太現實都好啦, 咁呢套又唔係科幻片, 咁都要配合返個現實所需架麻!!

不過, 從另一個角度咁講, 如果呢個世界上真係有個咁既男人可以為妳安排到咁既事, 佢真係一個好好好好好細心, 同埋好心思熟慮同埋十分之了解妳先可以做到!!! Anyway, 呢套電影其實都可以一睇既, 如果個女主角靚返d既話, 就更加好啦!!!

故事簡介

荷 莉甘迺迪 (希拉莉詩韻飾) 是一位美麗時髦的時代女性，與青梅竹馬的玩伴謝利甘迺迪﹝謝拉畢查飾﹞結了婚，謝利是一位有趣但又性急魯莽的愛爾蘭人，他們互相了解，熟悉對方的一切。兩 人生活原本幸福美滿，羨煞旁人，但天意弄人，謝利不幸得了腦腫瘤去世，留下荷莉一個人，獨自面對未來。謝利的離世幾乎令荷莉崩潰，可以令荷莉再站起來的相 信只有最了解她的丈夫，幸好謝利在離世前已作好安排，他了解荷莉會因他的離世而沮喪，所以事先預備了12封信，伴她度過頭12個月沒有他的日子。

第一封信在荷莉30歲的生日送到，並附上生日蛋糕及謝利的錄音帶，囑咐她要出外和朋友慶祝生日。之後她陸陸續續收到謝利以不同方式留給她的信，每一次她都 有一個新的體驗，有新的得著並重新認識自己‧‧‧每一封信，謝利都以一句 “P.S. I love you” 作結尾，讓荷莉仍然感受到他對她的愛。

睇完戲, 忽然興至所至柅唱k, 於是就走去附近間Greenbox睇下有冇得唱個k lunch, 哦, 又咁Q又有房喎, 仲要係俾間大房, party個隻我地兩個人, 發達, 可以大玩特玩~~ 不過, k lunch得個兩個鐘唱, 嘩咁就唱完, 友伴大叫唔夠喉, 冇辦法啦, 唯下次再去唱個先得!!!

野餐之食品~~ (一盒蒙牛+ 兩盒卜卜脆米片+ 兩杯乳酪+兩個梨)

天氣凍, 加上又落住毛毛雨, 成個沙灘, 冇咩人~~

唱完k, 時間尚早, 又冇咩特別野做, 更加唔想行街shopping同人迫, 心血來潮想去海灘逛逛(突然間好似好型, 好有詩意( ! )), 加上友伴夜晚要過對面海食飯, 於是就立即諗到去大浪灣行下, 去得沙灘就當然要順道野餐一番, 於是先去筲箕灣既supermarket買d零食作野餐之用!!

攪掂!! 買齊野之後, 我地就出發啦!!! 點知一上巴士先知去大浪灣既巴士係限時限刻出車, 所以我地就轉戰去另一個附近既沙灘 - 石澳是也!! 其實, 如果唔係司機話我知架巴士去石澳的話, 我都已經唔記得有石澳呢個地方, 因為自IVE年代之後, 已經再沒有去過呢個地方!!

搭左一程比想像中要短既路程, 好快就去到沙灘!! 雖然天氣不算風和日麗(其實仲落住毛毛大雨!), 不過係呢繁忙都市行街, 倒不如到沙灘聽下海浪聲, 吹下風, 悠悠閒閒咁過一個寧靜既下午!! 真係一個不俗既選擇!!! 再加上友伴剛才唱k癮仲未完, 一路行沙灘既時候, 佢就一邊黎個"Classic金曲下午", 唱的多是懷舊英文金曲 - "Yesterday - 昨天", "Yellow Submarine - 黃色潛水艇", " Help! - 救命", "Can't Buy Me Love - 不可以買我的愛", " Try To Remember - 嘗試記起" , "I Love Her - 我愛她", "Another Girl - 其他女孩" ....................., 好多好多歌, 友伴真的好鍾意Bealtes個喎, 大部份既歌都難佢唔到, 仲要字正腔圓唱出黎, 好勁呀!!!

p.s: 上面d歌名中文譯名係我自己作出黎架, 唔好當真呀!!!

一日三單

星期五晚IVE同學仔阿雯約左一班同學仔出黎食飯, 目的除左食下飯見下面之外, 最重要既當係就係放下炸彈啦!! 恭喜, 恭喜, 阿雯將會係38婦女節結婚, 呢日唔知係唔係一日好好既日子, 琴晚聽阿雯講, 當日, 我地同一屆IVE同學仔入面, 有3位都係係o個一日結婚添呀!!! 就咁聽都覺得好神奇啦, 點知之後仲樣野仲橋, 就係阿雯同其中一位同學仔分別book左同一間既酒樓作婚宴之用, 只係樓上樓下咁解, 哈, 呢個真係, 真係約埋一齊都冇咁橋!!!

至於星期五晚既飯局, 見下一班好耐冇約過出黎見面既同學仔, 成班人成晚都好熱鬧咁講下傾下笑下!! 上年, 大家都好似好少約出黎食飯傾計, 希望未來一年, 大家都就到時間, 多d約出黎傾下計啦!! 話晒原來我地都識左10年架啦!! 時間真係過得好快~~~

呢個Logo係由新娘子阿雯自己親自精心設計!!!由於我會去另一位朋友既婚宴, 故此抱歉未能出席阿雯既宴會, 不過阿雯都邀請我出席佢既註冊儀式, 佢仲親自送張inivtation card俾我, 感謝!! 唯一美中不足既就係, 居然寫錯左我個名! 聽佢講, 佢本身好有自信應該唔會寫錯我個名, 所以就直接落筆!! 點知居然真係寫錯左!! 哈哈!! 是但啦!! 最重要係妳請我出席姐~~ 不過唔好再記錯我個名點寫啦!!

最後一句, 恭祝妳同妳老公, 白頭到老, 永結同心!!! 恭喜, 恭喜!!

打G爐

早在新年前, 一班G仔同學上左Kim屋企打邊爐, 作為今07 intake G仔第一次舉行既集體大活動, 感謝阿Kim借出屋企俾我地攪攪震, 仲有Kim媽媽既熱情款待, Kim媽媽真客氣, 當時新年都未到就早早派利是俾我地, 都係感謝萬分, 除此之外, Kim媽媽仲特別為我地煲左一煱足料既紅豆沙俾我地打邊爐後作為甜品享用!!


雖然, 聖誕已過, 不過, 難得一大班人當然順理成章搵d野黎攪下, 於是有人提議交換禮物!! 提議不俗, 我最鍾意有禮物收, 而且, 份禮物只係限$50-80呢個range!!



今次俾我抽到一份好得意, 但係對我黎講, 真係可以話係完全冇用既禮物 - "偽薯仔室內電話一個", 外形又真係幾意, 好趣怪, 聲又唔錯(當時抽中左之後, 即場係主人家屋企試過機!!), 但無奈既一件事, 我屋企本身都冇駁到固網電話既! 我屋企個個人都係唔怕生腦癌既一族, 個個都係用手提電話傾計!! 各位如果邊位有興趣, 可以留言, 我可以將個電話俾佢~~ 橫掂, 我放係屋企都冇用!!

今次打邊爐既意義重大, 起碼初步將我地兩班唔同既人作初步聯誼接觸, 因為未來黎兩年, 我地一班人都要互相扶持, 互相交流, 去做到同一個目標:『考牌成功』, 希望, 之後再有多d呢d活動, 等大家再可以熟稔d, 玩得開心d啦!!

雜碎

早兩日, 聽到位無聊同事既對話: 『問你地條問題, 知唔知點解呢排蒙牛股會升??』
成個office冇人應佢,
於是無聊同事就自說自話:『你地要用d專業d既意見去做分析架麻, 你唔可以話俾人知, d中國工人趕住起鐵路, 做到肚餓, 所以就要勁飲牛奶, 所以蒙牛股就升!! 呢d係無知股民既分析!!』
突然間, 成個office都靜左一下!!!

xxxxxxxxx

近排天氣都暖返d, 不過夜晚仲好似有 d涼涼地!! 夜晚訓覺個時, 雖然成個房係窗口得返條好細空隙, 但係唔知點成日都好似有d陰陰涼既風吹住塊面, 成個人都寒寒地!!

近排發現自己訓覺個時, 好鍾意將自己包到好似d水餃咁, d被全部都攝晒入去自己背脊度, 好鬼暖!!

xxxxxxxxx

唔知係唔係天氣凍, 夜晚睡眠質素下降, 定係我已經患上"渴睡症", 無論去到邊, 又或者搭車既時候就會好易眼訓, 之後就會好快訓著覺, 仲要係好好訓個隻!!!

Jaemi + 校友開年飯

上星期五, 同Jaemi慶祝生日之餘, 順道為今年校友會舉行開年飯盛典!!! whahahah, Jaemi事前已經講明想今年生日係佐敦既北京酒樓食佢個Birthday宴!!! 我地大家都未去過, 食過呢間酒樓, 開頭個個都係佐敦四圍搵, 原來佢個門口好鬼穩閉, 係同o個d什麼"夜桃花"夜總會同一個入門口, 唔講俾人知既話, 人地以為你上去個d夜總會都唔定呀!!!


成間酒樓d裝修都係幾古色古鄉, 一般老酒家d裝飾格局, 同鳳城酒家差不多~~ 不過, 講鳳城酒家既話, 呢度d位就比較逼d啦, 枱與枱之間既位置基本上都只係剩返好小位置, 簡單一句:逼!! 不過, 咁講啦, 咁大家坐得埋d就可以close d啦!!!

頭盤 - 冷盤雜錦

炒海蜇頭

賽螃蟹xx松魚 - 全名唔記得, 不過炸到成條魚d骨都可以食埋!! 好脆!!

炒蝦仁 - 好多蝦, 同埋d蝦都好鬼大隻下架!!

北京填鴨

講返d野食, 今次活動我地都有8位出席, 而侍應見我地有8位, 就俾左張8-10人食既套餐俾我地, 睇一睇, 個套餐都已經包左我地想食既野(北京填鴨!), 仲好, 唔駛慢慢諗叫咩好, 於是我地就叫左個8-10人既套餐食啦!!! 唔知係唔係套餐關係, 叫完冇耐, d野食都已經好快咁上, 咁都好事關, 大家都遲左黎, order得黎個時已經8:30p.m左右, 餓得很呀!!

頭兩道都係冷盤&小炒, 個雜錦冷盤都幾好味喎, 佢個d雞好滑好入味!!! 而之後個炒海蜇頭就失色左少少, 味道較為淡味, 賣相一般, 成晚幾乎碟碟清, 唯獨呢碟炒海蜇頭仲有剩~~

再黎一道菜就係賽螃蟹, 呢道好足料, 牛牛食完之後話入面真係有蟹肉混左入去, 真係好足料而且都幾大碟下, 食食下諗起, e, 賽螃蟹唔係應該跟飯混埋一齊食既咩, 就係有呢個諗法, 差d令我地跌入左個深淵, 當時我地好聲咁大叫7碗白飯個時,

侍應阿姐大大聲問:『 真 - 係 - 要 - 7 - 碗 - 白 - 飯 ! 食得晒先好喎!!』
我地依然係理直氣壯咁話:『得, 冇問題!! 食得晒!!』
突然間, 有位侍應阿叔話:『你地個套餐入面仲有個北京填鴨, 仲有個炒拉麵喎! 仲有個雲吞雞喎!!』
頂, 俾佢講一講個心當堂虛左一虛, 即刻龜縮, 之後我地轉叫返4碗飯算!!

好彩有呢位醒目侍應提一提, 因為之後我地d野食都好足料, 幾大碟下, 尤其是個d包北京填鴨個d包皮好鬼厚, 食兩, 三塊都已經飽到嘔!! 中間仲有一道菜炒蝦仁, 雖然普通菜式, 不過勝在佢份量十足, 蝦又多又大隻, 正!!

食到中段個時, 有碟小籠包送左上黎, 大家都不以為意, 就食啦, 食完之後, 隔左一陣, 個位侍應叔叔行過黎同我地講: 『今日送左一碟小籠包俾你地!! 頭先上錯左俾你地, 應該係隔離枱, 你地個套餐係冇架!!』wahhaha, 發達, 我地賺左一碟小籠包~~~

上埋個砂鍋雲吞雞之後, 大家都停晒手, 飽到食唔落野, 大家你眼望我眼, 望住碟炒拉麵冇人有意欲去夾!! 除此之外, d北京填鴨就係呢個時候, 我地既救星出現, Jaemi既未來老公 - 阿譚放工過黎食野, 有佢呢個高人出手, 我地即刻放心晒!!


砂鍋雲吞雞 - 好重金華火腿味, 隻雞都好滑!!

拔絲蘋果 - good!!!

最後, Jaemi將本身套餐入面個甜品(高力豆沙)轉做拔絲蘋果, 佢話呢個甜品係呢間酒樓好出名, 果然唔係小野, 平時都係食開拔絲香蕉, 原來拔絲蘋果都有!!

食完之後, 真係個個都飽到上心口!!


北京酒樓
地址: 佐敦彌敦道227號1樓
電話: 2735 1316
菜式: 北京菜

超力鼠

呢d最實際~~~

我地就企係呢度等bb出黎~~~



呢張相係bb琴晚岩岩出世影既人生第一張既相!!

今日Lunch個時突然收到小狗個sms, 佢話佢琴晚9點幾小BB出世啦!! 有慈菇頂(其實一早照過超聲波都知左架啦!!!), 7磅1!!! 見到個sms之後, 就立即打電話俾各人事, 睇下大家得唔得閒, 一齊上去醫院探下小狗同埋睇下個小bb!!

其實, bb出世都黎得幾突然, 因為之前, 小狗都提過個預產期應該係下星期六(23號), 估唔到早左成個星期就出黎!! (不過, 聽奶媽講早一星期係好正常!!) Jackie就咁岩上左深圳拜年, Lingling就屋企有d事就去唔到, 最後, 就得返我, 奶媽同小貞貞去!!

臨出門個時, 媽媽話:『最好就買雞精俾媽媽, 尿片就買俾bb, 呢d野最實際, 唔好買花啦, 晒錢呀!!! 仲有記住買初生個隻尿片俾bb, 唔好買錯~~』於是就係屋企樓下個間藥房買左包尿片去探BB!! 而奶媽就買左盒被袋同件衫俾bb!!!

約左3:45pm係Sogo門口等, 一齊搭車去醫院!! 去到第一件就去見一見小狗先啦, 佢岩岩訓緊, 不過同我地傾左一陣之後, 護士就叫佢去餵奶, 我地就企左係出面等左好耐先有得見bb(因為bb要食奶)!! 嘩, bb好多一頭髮, 仲重要係佢好大粒耳珠, 唔知係唔係佢岩岩食飽飯(奶), 全程都keep住喊, 幾好精力!!! 好有energy!!!

愛鬥大

友伴 - 眼光獨到!!! 奶媽 - 對眼超大, 就快跌出黎咁濟!!牛妹 - 用間尺度起上黎, 其實同我個隻眼差不多大!!

牛牛 - 佢有個好大個黑眼圈架~~

堅兄 - 唔講以為係影左吸血彊屍對眼, 滿佈紅根!!! 佢應該睇得"閃卡"太多!!

本人 - 真係好細咩????

年初三晚上左牛牛屋企拜年, 好似講開戴con既話題, 突然有人矛頭直指話我對眼太細, 唔適合戴con, 唔係唔適合咁簡單, 仲要話係冇可能戴到con, 之後, 就有人冇啦啦拎起把間尺度下我隻眼有幾大!!!

事實証明................我對眼又好似真係細左dd~~

年初三

呢d咪就係叫做o 萬 o 人 o 空 o 巷 o~

大年初二, 晨早流流(查實都已經十一點幾!!)就俾友伴電召起身, 為的是一件事 - 入馬場!! 你話我大鄉里都係咁講, 咁大個仔我真係第一次入馬場! 由於友伴姐姐於馬會辦事, 有幾張免費入場卷, 所以襯年初三赤口唔駛拜年(查實我日日都唔駛拜年)連同友伴爸爸&姐姐一齊殺入馬場, 嬴個頭彩!!

唔係講笑, 新年入馬場, 超多人, 個個都湧住入去博殺!! 我, 友伴, 仲有友伴姐姐對跑馬仔都係一知半解, 時不時都係度問友伴爸爸問題, 左又問右問, 咩叫三T? 三T即係買邊幾場? 位置Q又係咩黎? 連嬴又係點買? .........問....問...問, 不停咁問, 起勢咁問, 好彩友伴爸爸都不厭其煩地回答我地問題!!!

第一次睇住d馬仔係我面前跑!! 勁呀!!

呢d咪叫"咆"馬經~~~佢既努力係冇白費, 為佢中馬埋下伏線!!!

我地幾個就係場邊埋頭苦幹係到聞報紙, 睇下d報紙俾咩貼士, 又跟下d賠率., 又睇下d馬評講下d馬既質素, 友伴大有斬獲呀, 佢眼光獨到, 貼中左一場馬, 中左$187~, 總算係大年初三今年先嬴個頭彩, 其實之後都貼中左另外兩場馬, 不過因為只係買左連嬴, 唔係買位置Q既關係, 所以都冇得拎錢!!!

就係呢場(第6場)中左啦!!! (6號,8號,10號)

唔係講笑, 計分牌都影埋出黎, 仲有假既!!!

嬴左錢, 就走去食Tea, 唔駛講當然係嬴錢個位請食野啦!! 食完之後, 我同友伴就上牛牛屋企拜年啦!! 今年上牛牛拜年禮物就勁啦, 我同友伴各自托左一袋8公斤既米上佢屋企拜年, 因為早前上過牛屋企食團年飯, 臨走前問牛媽媽今年要咩新年賀禮, 牛媽媽開玩笑咁話托袋米上去, 於是今年, 我就同友伴各自一人托一袋米上去拜年, whahahahah~ 勁呀!! 夜晚, 同牛牛全家人一齊去左食一個好豐富既日式料理, 感謝!!

年初二

年初二, 友伴與我都唔駛出去拜年, 就出去閒逛一番, 輕輕鬆鬆咁渡歲!! 年初二期間, 好多舖頭都未開, 加上要有呢個閒逛mood就最好去一d遠離煩囂既地方, 於是就決定去"愉景灣"行下!!! 之前都因為工作關係會到愉景灣, 但係多數都係坐公司車, 未試過係中環碼頭個邊坐船入去!!! 係中環搭船入去船費都唔平, 都要成$27位, 愉景灣主要都係d老外住既居多, 我地搭船個時, 差不多8成都係d老外!!

入到愉景灣, 由於我同友伴都未食Lunch既關係, 於是就四周圍搵下野食, 雖然肚餓但係又唔想食得太heavy, 見到一餐廳有24hr既All Day Breakfast供應, 見到其他餐廳只得pizza呀, 意粉呀呢d野食叫之外, 於是就決定食呢一間"The Flying Pan", 其實之前食人地d blog度都知係中環有一間餐廳都係有All Day Breakfast食, 一直都想試下, 但係冇記住係邊間, 岩岩上網check過, 原來就係呢間"The Flying Pan"!!! 佢係愉景灣都有分店!!!

"Poached Eggs"

"British flyup"

我地坐底之後就研究食邊款好, 由於太多選擇, 終於都各自選左一份"早餐"食, 友伴叫左個Poached Eggs (水煮蛋), 幾好食, 而且佢上面仲淋左一d "Hollandish sauce", 雖然唔係咩黎, 不過就好好味, 而且個Poached Eggs仲要一篤就流晒d蛋黃出黎, 唔錯, 唔錯; 而我就叫左個British flyup, 即係咩野都有個隻: black pudding, bacon, mushroom, grilled tomato, baked beans, sun egg!! 就咁望落去好似唔係好多(可能我大食!!) 不過食完之後, 都有少少飽既感覺!! 由於年初二既關係, 成間餐廳都冇咩人, 我我地兩個人食度食"早餐", 感覺唔錯, 哈!!

由於夜晚會有煙花表演, 所以所有船都會係7:00-8:30 p.m期間停航!! 所以我地食完個"早餐"之後, 係入面行左一陣, 就搭船返出去中環!!!

人頭湧湧呀!!!

係中環碼頭落船當然係搵返個近近地既地方睇煙花啦, 我地企左係會展隔離近海邊既地方睇煙花, 雖然係人多, 不過就肯定冇上次係尖沙咀除夕咁誇張, 有好多空位企之後, 今次仲可以睇到個好靚既view, 三隻船既煙花都可以睇得晒!!! 其實如果係唔駛太迫人既情況下, 係現場睇煙花又真係幾好睇架, 個下既震撼隔住電視機睇, 真係唔同d架!!!

The Flying Pan

地址: 愉景灣愉景灣廣場
電話: 2987 7749
菜式: 西式 (西餐廳)