日本中部之旅(四)櫻花呀!!【13/4 - Day 2】

名古屋城個度實在太多車, 根本就泊唔到位!!
我地只可以係外圍兜圈影幾張相!
我地全程都係靠呢個GPS四圍走!!
我地成日都係呢d道@馱休息, 食野, shopping

今次我地黎日本之旅, 其中一個目的就係睇櫻花, 於是我地先去最近名古屋既名古屋城昅昅先, 可能係因為星期日既關係, 係名古屋城兜左個圈之後, 發現好鬼多人兼多車, 根本就冇位俾我地泊到架車, 於領隊Henry只係係外圍兜左個圈之後, 就提議去另一個地方 - 松本城, 佢話個度仲多櫻花睇!! 領隊一下子就直上高速公路, 其中會途經一d叫道@馱既地方(其實係一d俾長途車休息既中途站, 不過呢d地方, 通常都有d餐廳又或者有d小型既超市俾你買下野補給!!), 我地就時不時係呢d地方停下, 食下野, 去一去toliet休息, 最重要又係shopping下!! 係呀, 小超市我地都買到野係唔係好勁呢!!

正式上有料(收費)高速公路~~
見唔見到呀, 我做司機呀, wahhahah~~

護城河兩側都被櫻花包住!!
影呀影, 影呀影!!
近鏡影仲靚!
由櫻花襯托出黎既松本城~~(由友伴拍攝)
行人路旁都係櫻花呀!!

由於已經上左高速公路, 即係大直路一條, 冇需任何技術可言, 所以領隊Henry就將揸車呢個重任就交托係我手上, 哈, 不負所托, 大家都未死得咁去到去松本城是也!! 大家一落車就見到全個松本城都俾櫻花圍住, 個個都忍唔住係咁嘩左幾聲, 之後既動作故然係拎起部相機影呀影, 影呀影!! 四周圍都係d櫻花, 對於我呢d未見過櫻花既人, 又真係幾壯觀下, 好多, 多得有少少誇張!! 成個地方都被櫻花圍住晒!!

原定我地影一個鐘就再趕路, 不過櫻花美景實在太美不勝收, 不知不覺我地四圍影影左成個半鐘先走人, 由於時間實在太晏, 我地要趕路, 領隊Henry就全速前進踩盡油出發我地今晚要住既民宿!!

(待續)

日本中部之旅(三)正式出發【13/4 - Day 2】

係呀, 全包宴-早餐

平時要入錢先有得玩, 家陣唔駛錢按喎, 當然要玩返夠本啦!! (除左咖啡, 汽水之外, 味精雞湯都有得飲呀!!)

一朝早起身, 酒店包早餐, 真係"包早餐", 因為全部都係得麵包食, 十幾廿款麵包俾你選擇, 另外, 最攪笑既就係酒店方面, 開放左一部平日要入錢買野飲既飲品機俾人無限次咁按黎飲野, 我地本住冇蝕抵精神, 係又按唔係又按, 每人都按左3-4杯野飲至肯收手, 哈, 又有得玩又有野飲都幾好喎!!

之後, Henry同Daisy就先去攞車, 為免各人要拖住個大喼四圍行, 所以我同Anna留返係酒店大本營等佢地歸來!!

上網~~~不過msn, applydaily全部都上唔到!!

食飽飽冇事做, 見大堂有部電腦入100円就可以上網30min, 由於Anna買唔到電話卡打返屋企報平安, 所以就諗住上網send返個e-mail返屋企報平安兼通知買唔到電話卡!! send完e-mail, 仲有十幾分鐘, 佢就俾我上下網, 我呢d一向都獨立開, 老媽都唔會太擔心我, 所以一直都冇諗過去旅行咁多日要打電話返屋企, 何況老媽唔識電腦, 更加唔會有e-mail a/c, 所以都係可以慳返!! 於是諗住上下Appledaily啦, 頂, 係日本上網原來睇唔到Aplledaily!! Too bad!!

呢部就係我地既旅遊車啦!!

等左一個鐘左右, Henry & Daisy返黎啦!! 終於見到我地將會要坐7日既旅遊車啦!! 我地今次係三菱個度租車, 聽領隊講呢架應該係1300cc or 1500cc既車, 其實在我地呢講, 最重要係塞得入我地d行李, 呢個先係最重要!! 我地當然唔識個d日本路架啦, 今次揸車, 最主要都係靠個部GPS(衛星導航系統), 感覺上好型, 話晒係香港駛鬼用GPS幫手揸車咩!! 將d行李塞晒上去車尾箱之後就正式展開我地日本中部之旅啦!!! GO, GO, GO!!!

(待續)

日本中部之旅(二)第一晚【12/4 - Day 1】

我地就係搭呢架火車出去名古屋啦!!

首先我地出左機場之後, 先要搭"名鉄"(名古屋鉄道)出去名古屋個邊!! 第一晚, 我地將會先住係名古屋, 到第二日先攞車, 真正出發我地中部之旅!! 正所謂女人都係天生購買狂, 明知打後幾日都會待係一d鄉郊地方, 冇咩機會shopping, 趁唯一一日於鬧市既地方, 仲唔拿拿臨去到酒店放低行李之後, 急急腳投奔往各大商場中!! 首先我地約定某個時間集合之後就各自行動, 話口未完Daisy一個箭步已經拖住Henry絕塵而去!!

這是我們第一晚住的酒店~~

放低行李之後就係shopping時候~

shopping~~

哈, 得返我同友伴四處逛逛, 由於怕迷失名古屋(大佬, 第一日就盪失路, 打後個幾日點玩呀!!), 所以只係係附近商場逛逛就算, 幸而Anna對shopping不太熱衷(其實佢想買, 只不過, 唔係激安所以冇咩心情買), 所以我地就向大型商場既supermarket進發, 一來可以順道買下手信, 兩來可以搵下野食醫下肚(查實, 成日以黎只係食左兩餐飛機餐, 未食過其他野!!)

日本的第一餐, 抵到爛~~

8:30p.m準時集合, 商場關門冇得shopping, 乖乖的搵野食, 係日本既第一餐, 我地是但搵左一間餐廳食, 睇一睇menu, 嘩, d野食好平呀, 一個set dinner只係需要750円左右(即係$57), 係日本喎, 幾十蚊就可以食到一個定食, 認真超值, 而且仲要幾好味個隻!!

好多鴨仔同龜仔(公)係街角結集~~

都話酒店係座落於兩燈區啦, 呢間野咪就係我地酒店對面之麻~~

食飽飽都差不多10:00p.m, 係時候返hotel執下野, 我地酒店附近原來係d紅燈區地方, 周圍好鬼多著住黑色西裝既日本仔(我估佢有d係鴨, 有d係扯皮條), 時不時就有d著得比較性感女子行過!! 個晚我地係我地酒店樓下既Familymark(日本既7仔)遇上一個識講國語(係日本人黎架)既收銀員, 佢見我地要買電話卡, 但係又唔知點攪, 於是就用一口流利既國語解釋俾我地知, 好神奇的啊!! 不過, 最後我唔記走過去問佢, 佢d國語係邊樹學返黎!!

頭先講左, 我地酒店附近都係d紅燈區, 個晚訓到3,4點個時, 俾出面街d人噪鬼醒左, 我諗大概係d人飲完酒之後要返屋企掛!! 好x噪, 噪醒我之後, 攪到我訓唔返, 於是開左陣電視睇, 睇左一陣先訓得返!!

(待續)

日本中部之旅(一)起程【12/4 - Day 1】

一行四人既日本之旅

我地今次旅程由4人幫組成, 有我, 友伴, Henry & Daisy!! 發起今次既今次旅程主要原因係因為, 早陣子國泰推出特惠機票出黎, 今次去日本機票連稅都只係大約$2100左右, 可以話係抵到爛!!!
屋企樓下已經有架A21, 好方便呀!!

我地搭朝早9:20a.m機出發, 早機即係要早起身啦, 一朝早就要成6:00a.m起身, 刷牙洗面仲煮埋個公仔麵先出門口, 由於我屋企附近已經有架A21巴士直達去機場, 係就係要俾多少少錢, 不過唔駛行咁遠, 又可以快d到機場就冇咩所謂啦!!

上機啦!!

本人不消45分鐘已經去到機場, 但係友伴比我更早一步到達, 而另外兩位旅伴則尚在路途中! 人未齊就同友伴影下相, 四周圍玩下!! 話晒我都有成兩年冇去過旅行, 難得黎到, 就係度影下相留念下先, 順道當同部相機熱下身!!! hehe~~我地今次既去程飛機, 先要經台灣再轉飛名古屋(i mean係架飛機, 我地係唔駛轉機), 不過, 難得經台灣, 我地當然唔會蝕俾佢啦, 落機四圍行下都好(即使係機場入面行下都好呀!! 冇蝕抵呀麻!!) 由於得20分鐘時間我地四圍行下, 再加上台灣機場入面冇咩野睇, 所以我地就早早返上去飛機上面!!!

一粒鐘真人蘇阿Sa真人show

我地今次雖然係坐國泰機, 不過可能架飛機要經台灣轉飛名古屋啦, 所以機程當左係短途機, 由於係短途機既關係, 機上冇得播我最鍾意睇既電影, 取而化之既就係一d冇聊既電視節目 - 有呢個"阿Sa真人show", "一粒鐘真人蘇", 唉, 好慘, 一心諗住有電影睇下啦, 家陣一d都冇得睇!!

早餐個腿蛋包, 好好食呀!!
Lunch(1)是也~~~
Lunch(2)是也~~~

由香港經台灣再轉飛名古屋既唯一好處就係我地前後會有兩餐食, 一個係早餐, 另一個自然係Lunch啦!! 開頭見到個早餐係腿蛋包, 以為係乾淨淨, 好難食啦, 又唔係喎, 個蛋都幾厚身下, 仲有個包連火腿&雞蛋都係熱辣辣架!! Great!! 至於個Lunch都唔錯, 有烏冬或者牛肉俾我地選擇, 我同友伴當然係一人一份, 可以share黎試下味呀麻!!

終於到達機場啦!!

呆呆坐坐, 係部電視機(仔)前面按來按去, 按左一陣之後, 話咁快到達左名古屋中部國際機場!! 一去日本第一不幸既事已經發生左, 我個喼俾人搬運途中, 個手把同喼腳位置爛左, 吊下吊下咁!! 好彩個喼都唔係d咩貴野, 是但啦, 而且打後既日子有架車係度, 唔駛拖住個爛喼四圍走, 冇所謂啦!

(待續)

遊下, 遊下

仲係遊雲中, 仲未集中得返精神添~~~成個人都乏乏地!! 唔知大家有冇睇過airwave爽朗香口膠o個個廣告, 話d人成日遊魂飄下飄下, 呢, 我家陣就係o個個狀態!! 十足十呀!! 個腦好似停鬼左, 好似我返黎香港個日之麻, 拖住個喼去到屋企樓下門口, 企左一陣(2-3秒), 突然間唔鬼記得屋企樓下大閘個密碼, 好彩咁岩有人出黎!! 唔係都唔知點算!!

去左8天既旅行, 放左8天假, 我諗係要d時間先回復成個人既狀態(自己搵藉口!! cool~~), 今日d野都係慢慢做先, whahahahaha~~~

回來................了

各位親愛既好朋友, 我回來了, 其實係琴晚已經返到香港, 日本中部八天之旅終於結束, 時間過得好快!! 聽日又要返工!! 盡快會打下呢八天既旅行遊記同大家分享下, wahhahaha!!!

講開又講, 琴日返黎香港個時, 成日都以為琴日係星期日, 第二日就要返工, 原來係自己記錯左日子, 所以今日係屋企休息下, 執下野!! 而且, 咁岩又撞正香港掛緊三號風球兼落黑雨, 所以班機都delay左降落(仲以為飛機可以返去日本玩多一日添!!)

今次旅程有不少既經歷, 一次好既體驗!!

唉, 聽日真係要返工啦!!

去完旅行啃麵包

琴日姐姐同我係低位唱左錢啦!!! 好大疊~~~

YeAh!!! 24小時後既我如冇意外, 已經可以"un un"腳上左飛機, 等空姐派飛機餐俾我食, 而我同時又會好忙碌咁睇下電視有咩電影睇, whaahhaha~~~

家陣d日元升到巴巴聲, 時高時低, 前日趺過低位, 不過琴日又再升返上去, 好恐怖!!! (不過對比返之前日元好似曾經係對6.5, 依家都唔係算低) 好彩姐姐睇實個市係低位個時同我入左貨唱左錢, 琴晚上完堂返屋企, 一望成疊錢放左係枱度, 都疊銀紙都成2-3吋厚架!!! 何其壯觀~~ 原先諗住好試下好似個d暴發戶咁, 將d錢一下拋上天, 之後等佢慢慢飄落黎, 感受下都個種"型"既感覺, 不過, 之後就諗諗下, 拋完咪又要自已執返, 咁on居既行為都唔咪攪, 所以最後都係放棄左!!

一下子駛晒d錢, 返黎都係捱下麵包先得!! 表面既風光都包含住無限既辛酸~~~ whahahah, 不過唔理啦, 玩左先算!!!

仲有兩日

好緊張仲有兩日就出發啦!!! 要執行李, 不過呢幾日有事仲要出街, 未得閒真真正正去執野, 前兩日, 是但塞左d野入去個喼度先, 今日都已經星期四, 星期六出發, 可能最後都係出發前一晚, 即係聽晚先可以專心執業/塞行李!! 小道消息, 聽聞友伴一早已經塞爆左個喼, 依家正諗緊有咩辦法可以minimize d行裝! 其實因為我地有一日會上雪山睇"雪之大谷", 各人都要拎件褸去, 因為件大褸既關係一下子就塞爆左個喼!! 再加上日本中部依家d天氣仲係得個18-20'c左右, 都要帶d厚少少既衫先頂得順!!


查實我咁耐以黎都未過8日既Long Trip(O.K, 好多人都去成個月又或者起碼十幾日呀麻!!! 相對我呢d只係小兒科啦!!)

今個星期六朝早9:10a.m就出發啦, 我會搭國泰CX530出發, 先到台灣轉機, 再去名古屋!! Yeah!! My Friend, 到時我地8日後見啦!! wahahahhaha~~~ 牛牛, 堅, Jaemi & 阿譚, 你地都去台灣啦, 玩得開心d呀!!

好朋友系列: 小貞貞

又係好耐冇打過好朋友系列啦!! 哈, 基本上都已經放低左一段 (長) 時間!! 上星期五去完拜山之後, join返小貞貞佢地行山, 不過, 行行下突然間小貞貞同我講左一句:『早陣子睇過你個blog, 個"好朋友系列"好似話下個到我! 點解等左咁耐仲未出場!!』哈!! o.k, o.k~~~ 依家係時候又再繼續寫返先得啦!!!

小貞貞~~ 又係我既中學同學仔, 夾夾埋埋都識左十六年! 其實比我同佢仲有淵源既應該要數到Jackie同小狗(小狗都會係我好朋友系列遲d出現), 因為佢地係由小學一齊升上中學添呀, 何止16年, 佢地識左20年都有羅!! 當然最重要既就係依家都仲係一齊玩緊啦!!

講返小貞貞先, 係中學時代, 佢本身就唔多似一個女生, 因為佢本身又比較高挑(排球隊是也!!), 再加上佢份人比較粗豪(我諗佢應該係受屋企人既感染居多, 其實佢屋企陽盛陰衰, 佢(好似)有5個阿哥!)再再加上佢個時又短頭髮, 所以係中學個時(後來聽講小學年代都已經開始偽咁叫!), 大家都叫佢做"男人"!!

由於中學既時候對佢認識唔太多, 唯一既印象只係知佢屋企有好多人, 同埋有好多個阿哥!! 小貞貞俾我既感覺有時比較沉鬱, 又有時係大顛大肺, 簡單一句, 又有少少神經質, 有時做事又井井有條, 但佢又成日係度自稱自己係"雞手鴨腳之王!! (女人既心理真係難以捉摸!!) 總之, 對佢黎講有心情好既時候會講好多野, 心情唔好就會屈下屈下, "病"埋一二邊!!

由中學時代至IVE年代都見佢積極參加運動(打排球), 對佢身體素質有一定既評價&信心, 故此佢係我係呢堆朋友之中唯一一個被我邀請一齊去參加"環島行"比賽活動, 唉, 點知我自己睇漏左眼, 去到"環島行"尾段, 佢話佢對腳已經頂唔順, 冇可能再行落去, 由於環島行既最尾段係一段落山路段, 如果堅持要佢再行落去, 我怕佢會斷腳都唔定, 所以最後就只好放棄比賽, 噢, 我玩過3-4次既環島行, 係唯一一次行完成唔到成個賽事!!

小貞貞畢業之後曾經係某大型連鎖店工作, 因為呢間公司, 我覺得係形象上佢改變左好多, 因為呢間公司需要員工係上班個時化妝, 一開始個時都聽過小貞貞話好唔慣要化妝, 咁又係, 試問本身係一個男人, 平時又點會冇啦啦化起妝黎呀!! wahhahaha, 最慘既就係, 因為小貞貞平時唔多化妝, 一旦化起妝上黎, d皮膚一下子接受唔到d chemical, 敏感起黎(我覺得係佢本身個d男人基因抗拒, 唔俾佢化妝都唔定!), 當然啦, 經過一輪既處理之後, 佢都開始適應到化妝品, 而且, 開始懂得打扮起黎終於似返個女人!!

早兩個年頭由於小貞貞係大型連鎖店工作, 由於係以輪班制返工, 加上唔似我地平日返一至六咁!! 我地d活動都好難就到佢, 有時少不免只好miss左佢!! 唔知係唔係咁既關係, 攪到我成日都將佢忘記左, 我諗呢個情況好似唔止發生過一次! 記得有一次, 約左大家係Time Square大電視機下面集合, 之後再出發入去赤柱BBQ, 當我(以為)齊人之後就上車出發啦, 點知, 入到赤柱之後先發現"賴"低左小貞貞係Time Square, 而最慘既就係佢咁岩自己部電話又冇電, 又唔記得我地d手提電話no., 所以最後佢就唯有自己返屋企!! 其實, 早陣子係Jackie結婚當日都有個極佳既例子, 話說當日我地成班兄弟姐妹去Lunch去左酒樓食飯, 走個時, 我又(以為)齊人就開車, 點知又再一次"賴"低小貞貞佢係酒樓, 最後, 佢打電話俾我問我地係邊度, 個時我先知原來又"賴"低左佢, 小貞貞唯有自己打的去新郎哥屋企!! 哈.......真係好抱歉呀!!

曾經, 小貞貞因為感情而令佢行左一段好特別既路, 雖然係其他人眼未必會睇好, 不過, 在我地呢班朋友中, 只要你有咩事的話要我地撐你, 我地隨時都會挺身而出!! 今年小貞貞既part-time生涯終於畢業啦!! 今年年尾可以同你影畢業相啦, so cool, 同時希望你快快搵返個Mr. Right啦!!

小貞貞呢度既規矩, 要留言呀!! 如果你唔留言, 下次出去玩, 我又"賴"低你架啦, wahahhah~~~

(下期預告: 小狗)

補鐘

之前提及過, 黎緊的日本之旅, 將會以自駕形式四周圍玩, 雖然自己唔係揸車主力, 不過萬一有需要我出手既時候都要落場揸下!!! 所以趁琴日有空閒時間就搵左二舅父黎補補鐘!!

其實, 自從自己拎左個車牌之後都已經好少揸車!!（屈指一算, 揸車次數應該十隻手指都數得晒!!) 今日一朝早7:00a.m起身就梳洗兼食埋早餐先入去沙田搵舅父 (呢兩日都唔知咩事, 日日都要晨咁早起身!! 仲早過返工個隻喎!) 舅父話先係沙田既工廠區試返手車, 熟左手車先再出去西貢個邊行下, 佢知道我今次去日本既名古屋, 所以就特別選擇行下西貢個d山路, 因為佢話名古屋個邊都係d鄉郊d既地方, 山路比較多, 練下西貢個d路就岩晒~~

雖然要練到好熟, 就當然冇咩可能, 不過, 總算係行返下, 起碼坐返落存車度都唔駛怕!! 最重要係補鐘個日冇炒到車, whahahah~~~

賢子孝孫

由於時間尚早, 都未算好多人, 不過晏多少少之後, 就已經人頭湧湧啦!!

上星期五乃清明節是也, 屋企一向都好少會係正日先去拜山, 你估真係未同人迫過咩, 不過礙於要同遷就各親戚時間, 最於只係得清明正日大家先得閒, 咁就唯有正日上去啦!!!

一朝早7:00a.m就起身, 快快手梳洗換衫出門口, 嘩, 仲早過平時返工出門口呀!! 正所謂食飽先有力上山拜山, 咁就先同老媽同樓下大快活食過早餐, 再搭地鐵往荃灣, 之後就再轉搭小巴上圓玄學院, 去到小巴站個時只係8:30p.m之麻, 當時小巴站已經大排長龍, 好很誇張!!

上到去圓玄學院, 放低d行裝就開工, 所謂開工不外乎都係摺下金元寶個d啦, 左攪右攪, 整整下都成粒鐘, 我地一路整d人就繼續不斷湧上黎, 成個圓玄學院都差不多塞爆晒d人!!


其實去完圓玄學院之後, 應該仲要去埋鑽石山拜太婆, 不過, 約左Jackie佢地今日行山(太平山), 只好攪掂圓玄學院呢站就過去中環個邊join佢地啦!! 佢地一行7人先到上環個邊既蓮香樓飲茶, 其實我都好想去試下, 因為個時成日係上環返工, 見到呢間老酒樓d人話幾好食, 不過又冇人陪所以就未食過!! 但係我由荃灣過得去中環都已經1:00p.m左右, 根據Lingling既行程, 差不多就要出發, 唯有留返下次有機會先去食過啦!!


我地係上環搭幾個站既"丁丁"過去中環個邊, 再行上去搭纜車去山頂, 係呀, 我地今次係先上山頂再行返落黎, 嘻, 冇辦法, 因為佢地平日少運動, 如果一下子叫佢地由山腳行返上去山頂, 我諗佢地死得咁濟!! 所以最後決定都係先搭車上山, 行徒步行落山就可以輕鬆好多!! 可能今日係紅日既關係, 又或者山頂根本就係香港景點之一, 我地排隊搭纜車上山頂個時, 四周圍多數都係得d老外, 好少香港人on居居上去玩!!


上到山頂, 嘩, 真係好似好耐冇黎過, 對上個次都應該係2-3年前既事, 上次上黎並唔係上黎玩, 而係參加左環島行比賽(環島行賽事係由山頂為起點!!) 之後, 就應該都冇再上過黎!! 今次上黎我地就四周圍行下睇下望下坐下傾下計, 行完一個圈之後, 都已經差不多3:30p.m, 之前我地於預左要去Burger King食個tea先出發行山, wahahhah, 實在太好啦, 我都未食個Burger King, 今次順道去試下, 算係補償返我冇得去蓮香樓飲茶既損失啦!!

我自己就叫左個雙層芝士孖寶, 一個set連coke+薯條就要$40, 原來Burger King係可以免費將薯條轉做洋蔥圈, 我當然就係轉洋蔥圈啦!! 不過Jackie個姪仔仲勁, 佢叫左個三層漢堡, 真係幾幾厚下!! 可能我自己期望過大, 所以食完之後, 覺得味道都只係一般貨色, 冇咩特別, 而且個塊漢堡排又唔係想像中咁juicy!!!

食飽飽就落山, 不過, 可能我地唔係太識路, 一覺唔覺意俾我地搵到條捷徑行左, 平時要用兩個鐘既時間, 我地只係用左1個鐘左右既時間就行完!! wahhahaha~~~ 我諗我地下次再行d Heavy d既路線先得!!

久違了~~

YEAH, 新既位置係前日已經安頓好晒!!! 今次轉section依然係旺角駐紮, 返工&放工都非常方便, 仲有最重要一點就係, 我又有返部電腦用啦, cool man!! 大大的感動, 好耐未似過可以係office hour上到網~~ 呢部電腦上網速度都算係快喎!!

不過, 聽上手講, 呢部電腦已經中左毒, 千萬唔好係呢部電腦過d file返屋企, 唔係就死梗, 因為佢上次已經high左野!! 未來3個月又會係度坐一坐, 3個月後就會俾人放逐出去其他部門, 到時就真係唔知咩狀況, 不過既來之就則安之啦!!!

又轉位

陣容鼎盛~~~(1)
陣容鼎盛~~~(2)

今個星期一, 係呢個冇電腦用既地方正式完結啦!! 之前講過, 走之前, 例牌動作---請野食!! 講真, 其實黎左只係一個月, 基本上除左自己madam之外, 仲有2-3位同事有傾過下計, 其餘的都真係講唔夠2句計, 有d甚至未講過野都唔定, 唉, 不過做落個規矩係咁, 都冇辦法, 唯有照買野食啦!!

因為有另一個G仔一齊係呢個section走人, 所以今次有人同我share, 唔駛好似上次咁慘一條友硬食買晒所有野, 不過今次陣容都幾勁下, 數一數先:
1.)煎釀三寶,
2.)樂園魚蛋,
3.)蛋撻,
4.)西餅,
5.)燒賣,
6.)燒肉,

今次款式冇上次, 不過今次要請埋GR(即係clerk個d!!), 夾夾埋埋都有成40幾人, 最後好似都買左成$600野食, 正所謂人本身就食貪心, 唔駛俾錢食就會立即變成成班蝗蟲咁樣, d野食一擺出黎之麻, 個個都好似餓左好耐又或者冇食飯咁一湧而上, 可憐既我最後都只係篤左少少野食!!!

話說回頭, 真係食米唔知米貴, 家陣d燒肉加價, 貴到巴巴聲, 之前聽人講d燒肉只係$60/一斤, 嘩, 今次買個d燒肉要成$110/一斤!! 家陣真係全城物價高漲~~~

p.s: 琴日轉左新section, 呢個位有電腦用架, yeah!!!