鋼條之鍊成

有位老街坊-伍太, 之前佢已經移民左去加拿大, 不過, 岩岩近排因為d私事返黎香港住兩, 三個月, 返左黎之後, 老媽逢星期日朝早都會同伍太飲茶傾下計。話說上星期日, 11點幾我仲訓緊覺 突然聽到伍太把聲係個廳出現!! 一開房門就見到伍太, 伍太第一句就講:『強仔, 好耐冇見羅!!』之後就用雙手拍拍我個膊頭就再講:『 e, 真係肥左喎!!!』, 黎到呢個位, 好明顯我覺得應該係老媽同佢飲茶個時, 係度話:『唉, 我個仔肥仔左!!』, 如果唔係人地點會用到"真係"呢兩個助語詞!!!

見佢咁講一講, 我當堂反醒一下自己!! 係呀, 我知我係肥仔呀!!不過, 唔得! 唔可以再咁落去, 我要變鋼條, 好快貶下眼就到夏天, 我係時候瘦身先!!
我有planning:
1.) 聽小安講跑步有用, 不過, 跑步前只可以食個包or米粉, 跑完之後, 就咩都唔好食, 要馬上返屋企, 沖涼, 訓覺, 仲要係立即訓個隻, 如果唔係你就會肚餓!!!(佢話訓左就唔覺餓<--不過我係驚餓醒!!)
2.) 平日, 我都係放左學先返屋企食飯, 太夜食飯都會易肥, 家陣要效法牛牛先!! 佢平日如果要返學的話, 通常都係返學前, 食個包就上堂, 放學之後咩都唔食!!
3.) Jessica話, 唔好食公仔麵, 要食就食米粉, 咁我咪要同我至愛d公仔麵拜拜, 咁supermarket我都唔駛行啦, 因為次次行親都係去睇下公仔麵減價未!!

唔知我遲d會唔會瘦到有厭食症呢!!! Hehe!!!

2007年度校友會資訊(1)

2007年度校友會資訊(1)

出席者: Camus, Cow, Gary, Ivan, Jessica, Jaemi, Melody
缺席者: Thomas

為了增強及刺激校友會各校友活動出席率, 由Gary動議一新方案, 內容如下:

根據非正式統計, 一般各校友的生日禮物籌金約$200/位(+ /-$50), 而校友總人數為7人, 根據此計算$200 x 6=$1,200, 各校友每年所獲送贈之生日禮物約為$1,200-(原來我地咁富貴!!), 在此, 為整體和諧氣氛下提議, 如缺席者, 則將其生日禮物之總額每次扣$200, 換言之, 如缺席一次者, 該年度之生日禮物之總值將由$1,200減至$1,000, 如此類推, 此機制完全符合"我為人人, 人人為我"之精神!!!
終由Camus, Cow, Gary, Ivan, Jessica, Jaemi和議並一致通過, 即時生效, 並由Melody作見證人為証!!!

另為各校友更熱衷校友舉辦之活動, 避免有人遲到早退, 破壞整個活動和諧氣氛, 故此, 早退者亦視缺席者論, 但罰款為缺席者一半($100), 除非有充足理由, 並早於活動一個月前書面申請, 則可免此責~~~Example: 活生生例子一個, Jessica為體現犧牲小我既精神, 於Camus生日宴會上已為廣大校友示範, 遲到兼早退!!! 好開心, Jessica你已經成功左, 你既生日禮物總額亦由$1,200趺至$1,100.


特此通告

中餐

星期六為賀Camus兄生日而出黎食飯, 原定去九龍城食泰國菜, 但當我早於星期四時向壽星人仕提及生日飯食泰國菜時, 佢居然話:『泰國菜! 熱氣喎!!!』, 正當我百思不得其解, 因乜解究幾時"泰國菜=熱氣"之理論時, 就係呢個時候佢就話:『不如食中菜! 泉章居呀! 我想食"梅菜扣肉"!』, 車! 根本就係佢想食扣肉之麻~~就胡亂推說出泰國菜會熱氣之理論來!!

不過, 壽星仔大晒, 等如"問題娛樂圈"玩牌面大細一樣, 你係終極一著, 你係皇牌-大晒!!! 就係咁, 我地星期六晚就去左泉章居食飯是也, 泉章居一向以多人排隊出名, 本先想book定抬, 點知佢話得6點個round先有得訂, 之後既時間都要walkin攞飛~

約左大家7:30p.m係門口等, 我當然係第一個到啦!! 拿拿聲, 拎支籌先, 等3張抬就到我地!! 過多一陣終於齊人, 眼闊肚窄既我地, 7條友(3男4女)叫左6個餸, 呢個都唔係問題, 不過, 係點餸個時出現左多肉少菜既情況出現: 雞(全隻), 梅菜扣肉(主人家指定菜式), 羊腩煲(我要叫既!! 冬天麻!! 保暖呀!!), 瑤柱豆苗(全晚唯一既菜!!), 炸大腸(點解會係酒樓叫呢d餸架!!), 仲有一碟炸蝦球(最似樣, 得呢碟!!), 仲有套餐跟例水一個窩~~~

最後, 野-當然食唔晒, 仲有既就係原來冇咩人食個煲羊腩煲, 本著食得唔好"晒"既原則底下(仲有, 主要既原因, 呢煲野係我叫!!), 一條友, 清左大半煲, 食完之後, 真係幾驚個晚返屋企會流鼻血~~今晚, 除左食飯之外, 仲有Jaemi拎左佢岩岩去完澳洲旅行d相出黎俾我地睇, 佢係岩岩上年12月個時去, 照道理當時澳洲d天氣應該係夏天, 點知佢影返黎d相(尤其是沙灘個d, 一個bikini女郎都冇), 佢話佢去個時, 澳洲天氣反常, 得返17,8度左右, 所以去到沙灘個時就冇咩人游水~~

食飽之後, 散水...各自歸家~~今年校友會第一個既生日聚餐功德完滿, 大海無量~~

牛雜

此標題special for牛牛的~~

琴日放工, 慣性同小安去食個tea, 本身諗住食完tea留係公司做下份dis, 不過, 前一日打波真係打得太激烈, (由6:30p.m開始打, 打到成9:30p.m先散水, 連續打左成3個鐘都有) 之後返到屋企成晚都訓得唔係幾好, 周身骨痛之餘, 仲間唔中醒一醒!!! 所以最後決定同小安改食dinner(橫掂佢之後都要上堂), 今次由佢決定, 佢介紹左兩間舖頭, 一間食印尼野, 另一間食雲南米線, 因為上次食tea就去左食雲南米線, 所以我就話不如去食印尼野, 呢間叫"華苑印尼餐廳", 小安同我講個時, show左openrice個評價有成59個笑笑vs 1個唔笑笑, 咁堅當然去試下啦!!!

我地兩個人, 就叫左個小食併盤 + 巴東牛肉 + 黃飯, 小食併盤有牛肉薯餅, 春卷 & 粟米餅, 我覺得個粟米餅都幾好食, 而小安就話牛肉薯餅好食d。個巴東牛肉係個老闆娘(雖然佢冇講, 不過, 我覺得佢似係老闆娘!!)介紹, 牛肉有咬口, 有少少辣, 不過, 兩個人食既份量就未免好似多左dd, 但係, 我地都食得晒喎!!! 真係平時唔好見小安, 講野細細聲, 佢真係都幾刷得, 成個港版小林尊咁!!! 佢食極唔肥個下先好野呀麻~~~簡直係神乎奇技!!

華苑印尼餐廳
地址: 觀塘物華街4號A地下(由仁信里入, 近輔仁街)
電話: 2342-7740
菜式: 印尼菜

肥仔過兩日就係你架啦!!! 俾你睇住先啦!!!

食完之後, 行多一陣, 化下d胃氣, 佢就去左上堂。之後, 我見時間尚早, 返屋企, 又唔會做dis, 橫掂都係有時間, 立即搭左間小巴出旺角買余弟兄既生日禮物--NDSL, 去到好景, 人山人海, 我發覺自己原來都好耐冇出過黎旺角行街。 左問右問, 就左大家既荷包著想, 同阿姐講左一輪價(我最鍾意同人講價, 我都話我知慳識檢架啦), 最終攪掂左!!! 原來買部細細既遊戲機, 隨機都跟幾十萬樣野, 之後跟手就拎住成袋野返屋企。

雜

係!!! 近排真係冇咩特別活動, 所以所有野都係執執碎碎, 我諗"雜"呢個標題, 應該會係未來3個月都會經常性出現~

其實上次係朗豪坊行開街個時係"朱古力"度睇岩左條褲, 諗住達遲d新年可以有條新褲著下, 不過當時見仲未sale所以就忍住手先冇買到, 等佢sale先再入貨(我好慳家架!!), 今日放工就經開尖咀, 就叫小安陪我去睇下sale未啦!! 雖然就冇舉個牌出黎話sale, 不過, 見佢好似已經平左(上次見好似$299, 家陣係$269), 所以就立即試褲再買啦!!! 試岩之後, 就去casher俾錢之際, 我見小安伸隻手入佢個包包度, 我心諗:『咁好死, 想同我俾錢!!』, 點知, 原來佢係個包包度拎左包Teample紙巾出黎, 再同我講:『你好大汗喎!! 抹下佢先啦!!』, 唔知係唔係我本身抱住個期望太大, 我個樣即刻由開心樣子一下子變成一個好低落既樣(成個過程唔駛2秒!!), 佢又見到我個樣既變化居然知我諗咩, 之後大家不其然都一齊笑左出黎!!

買完褲之後, 就返左去學校上堂, 係尖東行去學校既途中, 見到一位好熟好熟好熟樣既朋友仔, 之前知佢係外國讀書, 但就冇收到風佢返黎, 開頭就起勢咁望住佢, 但係我又唔敢叫佢, 我呢d出黎蒲, 一個唔覺意認錯人, 多幾包小安Teample(面子)都冇用啦!!! 今晚icq, 見到佢就問佢啦!! 果然, 今日見到既就係Alies, 真係好耐冇見!!! Welcome back HK!!!(雖然你好似返左黎都一段時間!!!) but好開心見返你, 雖然唔算真係見面, 搵日出黎食個tea~~~仲有得閒係度留低兩"篤"

早兩日, 同牛牛傾電話, 佢工作苦悶既時候就會四圍打電話搵人同佢消磨時間!!! o個日, 我正正係屋企發緊呆當中, 同佢傾左兩句, 本想同佢講收線想訓陣覺, 我都未開口出聲, 佢已經同我講:『Gary, 我話你知, 我feel到你想收我線, 你諗都唔駛諗呀!!! 我識左你十幾年, 有咩會唔知道呀!!!』, 牛牛, 好勁呀你!!! 咩都俾你估到~~~仲有, 牛牛話我呢排個blog, 了無生氣, 好鬼死悶, 鬼咩, 日日唔係對住份dissertation, 就係dissertation, 成個世界都係得dissertation~

失蹤人士

今日返左學校繼續我份dissertation, 因為下星期一要交另一份中期report, 所以呢幾日都頭痕, 攪到自己做咩都冇乜mood。 係CC(Computer Center)做左一陣, 突然間收Lingling電話, 佢劈頭第一句就話:『你死左呀!!! 近排唔見你蒲頭!!』。

唉!!! 自從聖誕節之後, 已經好耐都冇見過d朋友, 更加冇出去玩啦!! 每日放工唔係返學校就係留係office埋頭苦幹做份dissertation(雖然, 進度係以0.000幾個%增長, 慢得很), 我呢d姿事份子平日得閒無事就打電話約人, 再唔係就打電話同人傾下計問下近況(我認我係八卦!!!), 呢排真係將自己"ban"埋一兩邊, 不問世事。

同Linging傾左兩句(其實都有半粒鐘有多)之後, 又接到奶奶電話, 又係問我係唔係死左, 近排唔多見我蹤影!! 仲有早兩日都同左牛牛傾左都有半粒鐘電話, 真係好想出去玩, 但見到份野就...頭痛到爆, 難得d朋友關心, 真係幾開心!!

破肺

小安, 今日多謝晒~~

美食小天堂

有糖, 有餅, 有朱古力, 仲有野飲....

工作時不時都發牙痕, 又或者做到悶, 有d野咬下過下日晨先過癮。 有幸同事們都喜歡與眾同樂, 分享各類零食, 難得有時仲會送贈多少給本人作儲貨之用, 家陣枱頭已累積相當數量存貨, 零食已囤積成一個小王國並佔用本人枱面小量位置。 有時, 放工後留係公司做功課至8, 9點時, 此等食物更能發輝其小吃多滋味效能, 實屬感恩~~~

在此謝過主要零食供應商小安, 其次仲有估佢唔到時不時都會係屋企整蛋糕再拎返公司俾大家試食既Fanny。

雜

今日開始返學, 今日上堂個時居然俾我撞到一位我以為佢已經跳出左建築界既T.I同學仔, 原來佢家陣轉返入黎做, 家陣仲要同我同一間機構度做, 不過, 大家唔同center, 其實我係度睇到佢都嚇左一跳, 因為佢之前做個份工, 完全同建築係冇關係, 以為佢離開呢個範疇, 點知一個屈尾十就入返呢行。 放左學之後, 同佢傾左兩句, 問佢因咩事返黎讀書, 仲要讀BS(Building Surveying), 佢就簡單一句話:『點都要拎返個degree既~~』, 之後, 佢就同佢d同學仔傾計。

岩岩收到電話, 新莊打電話黎話今年con day即將舉行(本月29號), 叫我地呢d老鬼返去多多支持!!! 又同佢傾左兩句, 佢話今年佢地支莊13人, 5男8女, 哈, 我諗到時o'camp佢地實死硬!! 因為得個5個男丁搬搬抬抬!!! 仲有, 問左佢今年新莊叫咩名:『築個家』, 我個年個莊名叫咩呢? 死火, 好似唔記得左添!!! 係唔係叫"樑竹"呢!!(好娘~~~), 今年打黎既新莊係男丁, 原本都想同佢傾多兩句, 不過, 聽佢把聲好似興趣唔多大, 就同佢講byebye!! (上年新莊係位姐姐仔打黎, 同佢起碼傾左15min), 我都係鍾意撩女仔傾計多d~~~hehe~~

堅持、執著、硬頸

之前, Macy生日個時話過會請佢食飯, 查實佢就12月頭生日, 不過, 佢成個12月都full booking加上我又要考試, 所以個生日飯局就拖到今個星期五先食。 今次食飯我就帶左佢去旺角既 lafuma Outdoor Cafe度食dinner, 其實呢間野我係未食過, 之不過. 先前睇過人地個部落格話呢間唔錯, 如果冇記錯余弟兄亦都好似推介過呢間(好好好耐之前既事)。

放工之後, 就出左旺角等Macy, 佢黎到之後, 就問:『我地打機先定食飯先!!』, 佢真係對打機真係樂此不疲, 咁既然佢咁想打機, 大家又未餓加上時間尚早, 就走去打左舖TC4(應該係話得佢打先岩), 佢家陣既目標係solo打爆機。 大家如果有去機舖打機既話, 通常發現都係d男仔去打機, 女仔就係佢後面等/睇個男仔打, 呢個情況就正正係我地上面發生, 但係個男女位置對調, Macy就打機, 我就係後面睇o個位。

唔係講笑, 真係得佢一個人打!!

打左一舖機之後就走去食野, 不過, 都唔講得笑家陣佢閒閒地打一舖都可以差不多可以打到爆機, 相對黎講一舖都起碼打成半粒鐘有多。 我地去到呢間 lafuma Outdoor Cafe, 嘩, 可以用一個字黎形容"靜", 呢間野大就唔算特別大, 不過, 我地8點鐘上到去, 居然都係得2,3抬人, 係旺角呢個位置, 呢個鐘數, 都係得咁少人黎食, 真係唔知佢仲生唔生存到。 既然一場黎到, 就點都要試下。

你眼見個芝士火鍋配料就係得左手邊同右手邊呢兩碟, 而中間個碟係沙律。

中間個d係薯蓉, 成晚最好食就係呢舊野!!

我地叫左個set dinner(羊鞍+薯蓉) + 芝士火鍋, 我地兩個都一致認為個芝士火鍋一般姐, 其實基本上今晚個dinner最好食既居然係個薯蓉。我個人認為, 如果大一班人上去食就唔錯, 因為一黎真係冇咩人黎食, 所以一定唔怕冇位, 而且環境都十分之唔錯；兩個人既話, 最好就係上去傾下計飲下野就算, 食就可以免啦!!!

我地食完之後, Macy同我都認為食唔飽, 於是就走左去Haagen-Dazs食雪糕, 今次就由佢請客, 之後佢就再提議去打機, 我地就落返平時我地成日打既龍威(係長沙灣)機舖打, 佢第一舖由係臨到尾就死左, 之後, 佢心有不甘, 立即再入錢打多舖, 可能太急進既關係, 今次比對上兩次既成績更差。 打完呢兩舖之後, 佢心情趺到落谷低, 之後, 佢就不斷重複同我講左一句說話:『Gary, 你明唔明呀! 我睇你都唔明架啦!!!』, 佢好似個d精神病院放出黎o個d人, 成日係度自言自語, 我諗佢因為自己係欠少少就可以打爆機, 但係就係欠個少少, 所以有少少嬲自己而唔開心, 不過, 佢就未免睇得太過重!!

之後, 我就提議去松記食糖水, 食左一陣, 我見佢真係悶悶不樂(全程食糖水既時候, 佢都係低住頭食野), 我就同佢講不如打多一舖, 橫掂機舖收2點, (其實我地食糖水個時已經差不多12點鐘), 最後, 佢當然敵唔過呢個咁吸引既提議啦!!

佢終於打爆機~~~

之後, 佢就再一次神勇既演出, 今次黃天不負有心人, 今次佢終於打爆機, 雖然最後都好似幾危險下。 佢開心到飛起, 精神病人就真係有精神病, 今次佢就轉左對白, 不斷咁同我講:『我好開心呀!! 真係好開心呀!!』之後就自己有自己係度笑, 呢d就真係叫nature high!!! 打完機出黎, 望一望錶, 嘩, 成一點鐘!!! 我地係入面玩左2,3個鐘, 真係誇張。 之後, 就送左佢搭巴士, 自己就返屋企啦!!!

lafuma Outdoor Cafe
地址: 旺角花園街76A3樓
電話: 23885408
菜式: 法國菜

差

原定應該聽日先可以上網check到sem 1既成績, 不過, 學校多數都係係前一晚已經send左個result去各位同學仔既e-mail account, 岩岩check左, 今個sem 雖然讀一科, 之前仲話過自己個presentation攞"A"(其中一份assignment), 不過, overall result居然得個"C", 撞鬼!!!! 不過, 都知咩事, 阿sir冇放水, 自己開頭又貼錯題, 背到滾瓜爛熟個條偏偏又冇出到, 之後, 要答個d都係靠自己吹返黎, 呢科係elective, 唯有同自己講:『選錯科~~~』。

不過係呢科subject個lecturer度學左少少生活智慧, 佢上堂曾經講過:『入黎大學得到既唔係知識, 你地畢左業之後, 世界唔會因為你地而改變, 改變既係你對世界既睇法, 仲有既你地得到既係自信, 當你拎到一個大學學士稱銜之後, 你出去講野個時都講得大聲d, 呢d就叫自信!!!』(係呀!! 我地上堂個時, 阿sir有時就係咁無聊講咩d無謂野~~~)

唔知點解根據過往成績記錄作非正式統計, 永遠都係一個學期好完之後(話晒上個sem都有1A+1B架麻!!!), 到下一個學期d成績就會有回落既情況, 如同呢幾日股市咁, 早前高開過兩萬點, 家陣就插水式回落萬九點, 尤如過山車般上落有時~~

恭喜黃靜君

今晚打打下籃球突然收到Macy個電話, 佢好開心咁講佢終於打爆機, 咩機!! 就係前前前文提過既Time crisis 4。 佢一輪咀belebali講左一大堆野, 好明顯, 佢真係為左呢件事, 屈左好耐, 今晚佢終於可以得到解脫, 我問佢:『07年, 你既目標已經完成左, 咁你今年成年咪冇晒方向??』, 點知佢話:『唔係!!! 我要solo mode個方面著手, 我要一個人自己打爆機, 唔駛要雙打搵人陪!!(今晚佢都係打雙打先打得爆)』, 我除左恭喜佢之外, 真係唔知講咩好, haha!!! 不過, 都好多謝你, 咁難得你可以打俾我同我分享你既喜悅!!! 恭喜again~~~

p.s: Macy, 難得你咁表揚我, 我冇咩理由唔恭喜返你架!!! wahhahahahha!!!!

攪攪震

唔好以為佢怕羞面紅, 查實係天氣乾燥, 佢皮膚爆拆至真~~

去完黃金就返屋企, 一入屋, 全屋黑晒(當時9:30p.m左右), 如無意外都係老媽係時候迫大小不良訓覺, 因為大不良朝朝都要成7:15a.m左右起身(仲早過我), 因為朝早又要同佢換校服又要紮辮, 攪完佢又要攪小不良, 所以唔早d訓, 兩隻野第2日實唔願起身。 過左一陣聽聲, 大不良就應該訓著左, 老媽見小不良仲未訓得著, 於是就抱埋佢出黎, 事關老媽平日有追開亞記既"義無反顧", 聽佢講今個星期大結局, 幾大都要追。


小不良佢兩三下手勢就由小sofa跳左上去大sofa, 大sofa坐著者, 正是老媽~~

之後, 老媽就坐定定睇電視, 坐唔定既小不良就成晚係度走黎走去, 冇時停~~


玩到冇野好玩既小不良, 就開始玩埋佢如廁既道具~~ 最終, 照頭笠(唔駛驚, 佢個頭仲細, 未塞得住個口)

10:30p.m電視劇做完, 老媽捉埋小不良一齊入房訓, 我終於可以獨佔部電視機啦!!!

新玩意

今晚係學校做左一陣dissertation, 發覺原來冇隻手指仔(USB drive)係度好鬼唔方便, 於拿拿臨, 急急腳就立即執埋d架生搭巴士落去黃金買返隻手指仔先(其實自己搵個藉口走人, 唔做野之麻, wahaha)!!! 去到黃金, 以我呢d精明既消費者, 當然係四圍格下價啦!! 撞鬼佢羅...同一隻牌子既手指仔之麻, 左右隔離舖頭都可以差成$12喎, 有間近商場門口仲叫價貴多成本40有多, 我當然去左平o個間買啦!!

因緣際會

今日下午係屋企睇緊電視直播既世界網球冠軍挑戰賽既時候(有舒拉寶娃喎!!!), 突然電話響起, 望一望call display原來係Macy打黎, 一接電話佢就問我有咩做緊, 我就問佢咩樹幹啦!!!佢話原本出黎有d野攪, 不過, 岩岩canceal左, 但出開黎又唔想咁快返屋企, 就睇下我有咩做, 如果得閒不如出去打機(唔知點解我地出親街都係好似去打機多!!!), 見之前欠佢份生日禮物放左係屋企咁耐, 見今日又唔係有咩特別野做就出去會一會佢。

今日落到機舖, 佢都係打返佢成日打既Game-Time Crisis 4, 佢家陣已經可以係唔駛入錢continue既情況下, 由stage1 打到去stage3既area2(成個game total有3個stage, 每個stage又分3個area), 換言之, 佢其實差唔多已經可以打爆機, 話雖如此, 不過, 佢依然都係未打得爆機, 早陣子佢亦因為仲未打得爆機而終日屈屈不歡!!!

佢話佢應該需要有一位高手旁住佢一齊打雙打先可以打得爆機, 我當然唔可以充當高手啦, 我平日都好少打機既!! 但係, 當我地打完一舖之後, 高手就出現啦!!! 我地見到有兩位人兄, 係唔駛入錢continue既情況下就打爆機。 Macy當然心郁郁打多舖啦!!! Macy一個人打雖然都打得唔錯, 但始終未能突破之前既局面-打唔爆機。 就當我地離開個時, 又見剛才兩位高人又想打過, Macy為左圓自己打爆機既夢想, 佢居然好唐突咁同兩位高手講, 佢想打爆機但係自己一個人打唔掂, 問佢地可唔可以一齊雙打。

兩合高手聽見都不其然呆左一呆, 到最後佢地都願意一齊打雙打, Macy佢都唔係省油燈, 佢同其中一位高手聯手打到差不多最後的一個mission, 不過, 好不幸, Macy黎到呢度就死左!! 至於高手始終都係高手, 最後單拖都可以打得爆機!!(高手最後見Macy咁恨打, 最後爆機個幾槍俾左Macy開~~)

打完機之後, 佢就出去join朋友食飯, 而我就返歸。 唔係講笑, 前排Macy日日夜夜係度呻, 因乜解究仲未打得爆機, 今日見佢打完機之後, 見佢個樣好似仲回味緊頭先打機個情況。 佢話:『我o個頭近啦!!(接近就快爆近)所以咪開心羅~~~』

無聊空想

有時, 搭車冇野做, 又訓唔著覺, 就會無聊係度諗下野!! 我突然間諗到個問題, 如果, 我有一日冇啦啦死鬼左, 我又好似冇介紹過我d朋友俾我屋企人識, 咁到時, 冇人通知我d朋友黎我個喪禮, 到時咪會好冷清清!!! 所以呢, 識我既朋友, 得閒打下電話俾我, 睇下我死左未, 如果冇人接, 你就應該留個言, 再唔係就打多幾次電話俾我, 知唔知呀, 各位!!

講開打電話, 記得有一次夜晚打俾Lingling(搵佢咩事唔多記得!!), 佢冇接電話, 之後接連打左2,3次俾佢, 不果, 都係冇人接~!! 到左第2日Lingling終於打返俾我, 問我咩樹幹, 我立即問佢, 我咁夜打俾你, 當然係有事啦, 不過, 你唔會擔心我俾人捉左去強姦, 係情急既情況下打俾你求救既咩, 之後, 佢就話: "你唔出去攪攪震就已經好好!!", 我:"........................"

2007的3個第1次

琴日黃sir行過黎問我幾時再約打波, 我就立即打電話俾阿機, 阿機話咁快就約齊人話今日就打到, 今朝起身一望落街就見成個地下都濕晒, 本身都諗住冇得打啦, 不過以防萬一都係帶定d波衫波褲返公司先。 返到office, 大家就係度討論今晚點算, 於是simon兄就提議不如睇下有冇indoor運動場book, 哈, 又咁岩有場, 真係死好命!! 所以造就左今年第一場既籃球活動!

好多時既星期三, 小安因為要上堂, 但係就成8:00p.m先上堂, 放工至上堂呢段時間都冇野做, 而我又有時會留係公司or返學校做功課, 所以好多時我都會搵佢一齊去食個tea, 返左呢邊center咁耐!! 我係琴日先發現原來附近有間Italian Tomato, 既然今日食tea於是就去左呢間試下!!! 唔!! 今日我叫左個細pizze, 味道 一般姐!!! 不過, 見小安佢食佢個意粉個時, 見佢好似好好食咁, 下次有機會再食的話都係叫意粉穩陣d(早知"了"佢個d意粉黎食啦!!!)~~就係咁, 我就食左今年既第一個既tea啦!!

唔知係唔係成個月冇打波做運動, 一下子做d咁劇烈既運動, 今晚打左幾個字全場之後, 撞鬼羅, 隻右腳抽筋喎!!! 仲要係勁抽個隻喎~~~~呢一抽就成為我今年第一抽啦!!! 家陣打緊blog既時候, 隻腳都仲痛緊~~~

冷知識

今日放左工, 原先諗住返學校做下份論文, 但係又諗諗下自己好似成個月未去恤髮, 家陣朝朝起身個頭成舊屎咁, 改變計劃都係走去攪攪個頭先!!

放工執野走人, 係搭lift個時岩岩同小安一齊落樓, 佢問我放工去邊, 我當然就係答佢剪頭髮啦!! 點知佢就好語重心長咁同我講:『e, Gary!!! 你小心d喎, 冬天剪頭髮好容易會病個喎!!!』, 我就好快咁問返佢:『你試過冬天剪頭髮會病啦!!』, 佢又好自然(仲有係好認真!!)咁答我話試過, 我真係不其自然O左咀, 成個人都呆左一呆, 我都係第一次聽人講原來冬天剪頭髮係會好容易病!!

小安多謝關心, 剪完個頭之後, 依家暫時都仲未有咩發病既徵狀, haha!!!