To Love

在朋友Emmy個blog度見到呢篇文章, 覺得幾有意思, 特意將此與大家分享!!!

愛一時容易，愛一生一世卻不容易

愛一­個人……

­要了解，亦­要開解；­要道歉，亦­要道謝；

­要認錯，亦­要改錯；是體貼，亦­­要體諒；

是接受，而不是忍受；是包容，而不是縱容；

是支持，而不是支配；是慰問，而不是質問；

是傾訴，而不是控訴；是難忘，而不是遺忘；

是彼此交流，而不是凡事交代；

是為對方默默祈求，而不是向對方諸多­­要求；

可以浪漫，但不是浪費；

可以隨時牽手，但不­­要隨便分手；

以上都做到了，即使不再愛一­個人，

也只有懷念，而不是懷恨。

以上是陳志明副主教的分享

當中的意義顯淺明白, 但實際又有幾多人真係做到呢!!

撐枱腳

隻雞同碟菜都未拎出黎架~~ 記住, 我地得兩個人食左喎!!

琴晚, 照慣例大小不良星期六, 日都會返家姐屋企住不在我家的, 所以夜晚得返我同老媽安在家撐枱腳!! 下午老媽出旺角買餸去, 而我亦約左阿奶出旺角買佢上年個份生日禮物, 係呀, 係佢上年份生日禮物, 佢足足拖左成年先諗到自己想要d咩, 撞鬼!!

重點並不在此, 同阿奶買完禮物之後, 就返屋企啦!! 途經屋企樓下間酒樓, 見難得係屋企同老媽食飯, 就斬左半隻貴妃雞返屋企加料啦!! 不料返到又見到兩盒斬料, 一盒係鹵水鴨, 另一盒係鹵水豬手!!! 嘩!! 老媽大叫:『仔呀, 今晚好豐富呀!! 海鮮餐!!』, 原來老媽買左十隻鮮帶子同埋班腩, 佢仲話個份斑腩係深水海斑黎架, 成$70架!! 所以呢, 呢餐飯, 我地兩個人, 有成6樣餸 - 鹵水鴨, 鹵水豬手, 貴妃雞, 帶子, 斑腩, 青菜~~ 就食完之後, 飽到呀!!! cool, 好耐都未食得咁豐富啦, wahhahahha~~

邊個係人邊個係鬼, 我睇得出!!!

我諗好多地方都有講岩岩星期三晚個集既"溏心風暴"!!! 好好彩個晚我放學返到屋企, 換完衫就出左廳度坐度, 岩岩就睇到呢一part! 李司琪出現個段戲, 真係有d料到, 個晚係屋企我同老媽睇個時, 成間屋真係靜晒!!!

『你唔好對號入座!! 邊個做過, 應該心知肚明!!』
『我話係就係, 唔駛証據!! 呢度唔係法庭, 唔需要証據!!』
『我睇人睇左幾十年, 邊個係人邊個係鬼, 我睇得出!!』

想睇呢一段戲既可去youtube~~

呢d咪就係戲羅, 你話呀, 如果叫其他人黎做都未必做返出呢d味道!!! 妳試下叫黎姿黎演呀, 一叫action個時真係想立即拎枝鉛子筆插落佢個兩粒酒渦度!!! (sorry, 我又諗多左, wahhahah!!!)

不過, 呢套戲一開始個時都以為唔多好睇, 但係依家睇落又唔錯, 尤其是個幾位老戲骨, 夏雨, 李司琪等, 由班資深演員帶一班後生演員, 幾好!!! 但係遲d好似話李司琪會死, 夏雨就中風, 到時就由班後生擔正, 到時唔知仲會唔會咁好睇呢!!!

樂樂盈盈 vs 卜卜佳佳

又有一同事離職(呢個office流動性好高!!!), 於是今日Lunch又走左去食左餐farewell lunch, 係食飯期間, 少不免傾下計, 當中提到今日中央送黎個兩隻大熊貓會係今日送到落黎香港, 不過, 講講下原來個兩隻大熊貓仲係未改名架, 今朝睇新聞個時仲係叫緊人地no. 咩"606" &"610", 唔講以為講緊股票定係d睇緊個d監獄電影咁, 哈哈!!!

講返lunch個時先, 大家提到改名既時候, 有人提出個兩隻熊貓不如叫卜卜同佳佳, 咁以後, 我地去海洋公園探佢地既時候, 個個都可以大叫: 『"仆仆街街"過黎呀!! 係啦係啦!!! 望過黎啦!! "仆仆街街"!!!』, 如果各位有咩唔開心, 都可以去一去海洋公園大叫一番作發洩之用, 呢個提議都不俗稱! 當時在座各位人仕聽之後, 都不其然笑左出黎!!

仲有, 國寶果然係勁啦!!! 今日一朝早打開電視機既時候, 見到無線已經係四川卧龍直播呢對運送既過程, 我依然記得個主持人好興奮咁叫: 『各位睇下熊貓個鐵籠出黎啦!!!』 本身係間房換緊衫既我都衝左出黎望一望, 車, 就係得個鐵籠之麻, 包到實一實, 其他野乜都睇唔到, 都唔知有咩好睇!!

不過, 後期得知呢對國寶取名為"樂樂盈盈"之後, 感覺上好似唔多順口, 都係之前個兩隻熊貓"安安佳佳"順耳好多~~~

Where are You?

頂~~~明明就係放係個櫃通度架!! 點解會唔見左架!! 講緊唔見既係我條野, 我i-pod個條USB線, 之前明明每次用完之後都係放返入個櫃通度架麻, 有咩可能突然間消息左架!! 講到呢度, 我突然間醒起老媽係好耐好耐之前講過既金句, 舊時家姐都試過係屋企唔見野(至於唔見左d咩就唔係太記得), 於是就起勢咁翻箱倒篋咁搵, 搵呀搵, 搵到就快黎反轉成個屋企咁濟, 老媽就講左一句: 『只要冇掉到, 佢實係仲係屋企啦!! 到時到候佢自自然然就會走返出黎架啦~~~ 』嘩....聽落去又好似好有道理喎!!! 所以我家陣都係等緊佢出黎, 不過, 頂!!! 家陣冇得過歌, 點算呢!!!

milk, milk, milk

兩隻野各據一方~~

好似好耐冇提過大小不良!!! 等我講下佢兩個既生活習慣!! 基本上平日佢兩隻野臨訓前, 就算個晚既晚餐食到好飽都好, 佢兩隻野點都要嘆返支奶先可以訓得著!! 我冇講錯, 你冇聽錯~~ 大不良已經到左幼稚園中班, 到家為止都仲要用奶樽飲奶!!! 細個隻都已經去到歲半啦, 其實都應該係時候介奶!! 你睇佢兩個訓係sofa度個時, 好似成個道友咁食緊鴉片嘆緊世界咁款, 爽呀, ~~~

仲有, 話說早排, 復活節其間家姐 & 家夫同佢兩隻野跟團去左上海玩, 唉, 家陣d小朋友真係幸福, 舊時我都好似去到中三先有機會搭飛機, 仲要係用自己儲左好多年既利是錢去架!!!

撞鬼羅, 諗下諗下, 原來, 復活節期間, 我係香港冇人冇物架, 老媽同人返左大陸玩, 家姐佢地又舉家去左跟團旅行, 好在我冇事冇幹姐, 如果唔係一條友係屋企有咩事, 死左都冇人知! 一條友係屋企又冇人理, 好慘, 好可憐呀~~~ 我諗係時間睇下係唔係需要申請"平安鐘"!!! 唉!!!

快樂的夏天

未拆前, 是一個充滿氣的包包, 尤如一個漲卜卜的薯片^^

琴日突然收到小安送出的禮物, 在此先謝過!!! 小安行街剛經過APM kubrick時候(百老匯影院旁有精品, 電影, 書籍的商店), 剛見到有一個特別包裝的東西, 細心一望之下, 原來係陳綺貞+可樂王合作出的食玩包, 小安知本人喜愛陳綺貞, 加上佢又係百老匯member, 買野可以有discount, 所以就買左呢個食玩包送俾我, wahhaha, so great & so nice~~

內附: 可樂王全球限量“筆記書”（1入）, 陳綺貞最新單曲EP《西風的話》（1入）, 男生版磁鐵娃娃（1入）, 快樂的夏天便利貼紙條（1入）

呢個食玩包, 有分男生版及女生版的, 全球限量發行各5000個, 我係男生版既2366號, wahhaha!!! 岩岩上網check過, 原來男生版同女生版有些微分別, 那就是內附的EP是不同, 男的是《西風的話》, 女的是《送別》, 當然其內附的磁貼娃娃亦不相同啦!!! 其實, 開頭都唔知點拆佢好, 見佢漲卜卜咁, 唔忍心拆左佢, 但係又想知入面係d咩野, 終於就用界刀係頂口開封, 希望將破壞程度減至最低!!!

突然間有禮物收都幾開心架!! 多謝晒小安~~~

點解手牽手

近日收到一個e-mail, 內附一段youtube片段, 影片內兩隻小海獺互相拖住對方的小手, 縱使因意外而甩了手, 另一方亦努力地尋回對方, 再一次拖起手來, 情景十分得意!!!

但願已經宣佈婚期亦或浸浴於愛河中的朋友們, 能像牠倆般緊握對方的手, 不捨不棄!!!

久別重逢

早陣子忙於功課, 已經好一段日子冇返屋企食飯, 連屋企飯都唔食, 打籃球呢d費時失事既活動更加停頓左一段長時間啦!! 早在上星期由於清明及復活5天大假, 老媽亦同時享受此悠長大假, 所以直至今個星期初屋企先有返正常晚餐供應!!! 屋企晚飯雖然唔係咩山珍海味, 不過難得可以返屋企, 拎起個碗起勢咁爬d飯入口, 在家千日好既感覺, 此情此境感受良多!!!

又, 本已經約好一班波牛, 相約星期二重拾舊歡 - 打籃球是也!! 點知, 天文台早在上星期六已經預告星期二當晚將會有狂風雷暴出現, 為免各人雅興盡掃, 於是臨急臨忙將原身計劃更改為琴晚!!! 波呀!!! 好耐未掂過既籃球呀!! 相隔左兩個月, 琴晚終於可以打返波, 再一次感動T_T!!! 打返幾場波, 個人都relax返, 多做運動身體好, so great~~~ 事實, 可能前排停左一段時間冇打波, 琴日打完之後, 今日手手腳腳有d酸!!!

雜

本身今日約左jessica放左學食dinner, 之後, 我地就改左轉食tea, 其實見面目的一來大家好耐都冇見, 約出黎食個飯見下面, 傾下計, 二來當然係想拎手信, hehe, 謝謝jessica的手帶!!! 岩駛, 出街又可以多樣野戴下!!!

本身都冇諗過係blog度講出黎, 不過, 好明顯我呢d天生反叛, 你越叫我唔好做, 我就偏偏去做, 大家有冇睇過漫畫or動畫"What's Michael" 呀!! 入面有隻貓叫"加德里奧"既, 係我印象中其中一幕講呢隻肥貓發春, 於是就四圍咁叫, 就係呢個時候, 有隻好靚仔既貓仔係佢面前行過, 於是呢隻貓仔就慘遭加德里奧毒手!!! 哈....哈!!! 我今日就見到前面既一幕(叫春o個幕!!), 至於個隻靚貓仔最後會唔會成為"加德里奧"既囊中物呢, 就要等下回分解啦!!! hehe~~~

有人d皮真係好薄....嘻~~~
皮薄餡靚就係咁解!!! 嘻 again~~~

咸碟

早前睇新聞話中央政府將會送對熊貓俾香港作為回歸十周年既賀禮!!! 不過, 報導話個兩隻小熊貓本身係由人工飼養, 所以佢地本身對於交配, 傳宗接代方面可能有d困難, 所以到時黎到香港之後, 海洋公園會播『咸碟』俾佢地睇, 等佢地知道如何正確交配, 及引發佢地自行交配!!!

聽到呢到真係有d興趣, 好想睇下佢地所提及既「熊貓色情」影像係d咩東東, 唔知係唔係真係一開場有隻女熊貓, 先跳一場辣身舞, 之後, 就開始情挑呢隻男熊貓, 繼續落去唔駛講男熊貓當然受唔住呢隻咁性感既女熊貓既挑釁, 於是就..........埋牙!!! 嘩!! 勁呀!!!come on, baby~~~one more time, baby!!!

講開又講, 點解我小學個時又唔見d老師播d咁既野俾我地既, 你估我實識架!!!

要還始終都要還

事緣, 之前Suki想借本人既student card入學校既圖書館借書之用, 早在上星期已打電話俾我, 本已經約好星期四晚拎, 但到左當晚都未見佢打電話黎搵我!! 於是, 當晚就係msn見到佢個時, 問佢幾時拎啦!! 橫掂, 老媽未返到黎, 於是順道約埋佢星期五晚食個飯兼拎埋張學生証!!!

到左星期五朝早, Suki佢晨早流流就打黎, 話想cancal當晚既飯局, 皆因佢有d突發事件令佢自己白白冇左$160, 攪到成個人冇晒mood出去食飯!!! 唉!! 本身都打定輸數夜晚都係單挑返屋企食自己, 到左Lunch個時, Suki又打電話黎話今晚照原定計劃出返黎食, 佢話自己好返d可以出黎食~~, 突然間, 收到Macy既e-mail黎問我夜晚有冇地方去, 佢話突然間諗起我, 想搵食飯!! 所以係機緣巧合下, 呢兩位仲欠我一餐既人就一齊請我食左呢餐晚飯~~~講真, 其實佢兩位本身根本都唔識對方, 順便係呢次機會之下等佢地可以識多個朋友都不失為一件好事, 哈!!!

Suki一早講明想係銅鑼灣食, 最後, 我地決定去世貿o個間Rice Paper食飯, 一開頭聽呢間餐廳個名既時候都已經好熟, 原來佢係Habour City都有間!! 呢間餐廳本身係食越南菜, 我本身就未食過呢間, 野食唔係太特別, 不過, 勝在裝修同環境都不俗, 如果坐窗邊d卡位, 仲可以對住個海景食飯都算唔錯!!!


由於兩位女仕都屬於嬌小型(細粒), 所以我地都冇叫太多野食, 其實實際佢地想食完呢個正餐之後, 再去"哈緊打"食雪糕至真!!! 我地total叫左4款食物: 鮮蝦撈檬, 鴨胸黃薑飯, 牛油果軟殼蟹米紙卷 & 什菌蒸滑豆腐, d野食一般, 冇咩特別, 亦都唔係特別好味, 只能夠講起碼唔難食!! 不過, 係我地等緊野食黎既時候, 突然間, 有人行過黎問我地落左order未, 以為係d waitress, 哈, 原來係Deboarh, 真係好耐冇見過佢啦!! 原來佢同男友黎食飯, 不過, 佢男友未到, 佢黎攞位先, 仲要佢個位係我隔離張枱, 所以我就過左去同佢傾左一陣!!

兩位小姐同場競技~~~

食飽飽之後, Macy & Suki就話要做一做運動先去食雪糕, 所以我地就去左世貿上面間遊戲機中心打機, Macy唔駛講當然係一個箭步走去打Time Crisis 4, 我同Suki就去玩其他機啦!!!

呢個就係Dessert Set!!!

打完機, 我地就去左Haagen-Dazs食雪糕, 貴為Haagen-Dazs尊貴會員既Macy, 介紹俾我地知食呢個Dessert set比較抵食, 呢個set就包左一件Cake, 一球雪糕, 仲有一杯Coffee, 平日afternoon tea就$68, 不過過左tea time就要俾多幾蚊 - $75!! 今晚既cake得一款choice - chocolate & coffee cake, Macy話平時起碼有成4,5款, 不過, 是但啦!! 原先想叫一人一個set, 不過個waitress話得返兩件cake, 咁我地就叫左兩個set就算!! 既然兩位女仕請我食左餐飯, 我當然要請返佢地食甜品啦!!!

食飽兼吹完水, 都已經11點左右, 突然間Macy話想睇戲午夜場 - 『剌青』, 點知成個銅鑼灣d戲院一 鬼咁早close, 一場午夜場都冇, 有個間剩係上"十分愛"優先場, 冇野好睇, 於是就散Band!!

p.s: 多謝晒兩位, 請小弟食飯, 在此再一謝過!!!


Rice Paper
地址: 銅鑼灣世貿中心商場4樓P413-418
電話: 2890-3975
菜式: 越南菜

大掃除

由於自己留係屋企做功課的話, 自己多數都會受唔住誘惑走去睇下電視, 上下網, 打下機, 更嚴重既可能會走左去訓覺, 對於自己份功課既進度, 可以話係嚴重既拖慢!! 所以之前逢星期六&日都會迫自己單拖一條友返學校既Computer Center做功課!!

前排, 成日顧住/煩住份dissertation, 自己自己間房d衫呀, 櫃通呀全部都係亂糟糟咁!! 因為懶得執既原故, 平時洗完返黎既衫, 都係就咁塞佢入衣櫃就算!! 難得今日唔駛再學校做功課, 有時間, 就執下d舊衫順便換下季, 係呀!! 家陣我大部份時間都已經改穿短袖衫啦!!

睇見樓下有個舊衫回收鐵籠, 岩岩好!!! 頭先岩岩執完就拎左落去捐左出去!! 家陣執晒佢之後, 自己又有多d位入下貨, 又可以等自己個d成日都唔多著既衫有機會放佢走!!! 真係好~~~

囍

依家先係2007年既4月, 岩岩先過左2007年既第一季, 但係直至依家為止, 已經收到各方朋友將會係下年2008年結婚既消息, 依家閒閒地知道會係下年結婚既都已經有4-5單!!! 恭喜晒!! 繼上年, 中學朋友小狗結婚之後, 下年再黎多兩單, 呢兩位又係我識左10幾年既中學朋友 - Jackie & Jaemi, 前者就係下年年頭, 後者就係下年年尾!!! 佢兩個都係我最最最最最熟既好朋友之中既好朋友, 總之交情深到不得了啦!!!

好開心聽到自己身邊(尤其是好熟個d)既朋友結婚, 可以係人生路上搵到自己既另一半係一件十分幸福既事, 在此衷心咁祝福佢地~~~

依家都已經有4,5單, 再遲d唔知仲有幾多單黎緊呢!! e!! 岩岩諗諗下, 下年咪差不多隔個月就要去飲一餐!!!

Welcome Back

香港歡迎你~~~

食蕉

今日, 約左d同事去白石BBQ, 4:00p.m準時到達烏溪沙馬鐵站, 去到之後, 過多一陣, 得Anthory兄先到, 其他人遲遲未見, 同Anthory傾左兩句之後, 先見到Benny同Amy到!! 聽Anthory講, 其他人仕, Andy, Simon & C9要遲d先到, 我地先行入去BBQ場霸位!!

去到BBQ場, 都已經5:00p.m左右, 叫下野食, 起埋個爐, 擺下個架步都差不多5:30p.m, 呢個時候, Andy終於蒲頭!!! 隔多一陣, 接連收到2個可怕既消息, 一個係C9話有急事黎唔到, 另一個唔駛講當然係Simon, 佢又係話有急事黎唔到啦!!! 嘩~~~兩個飛機王, 擺明玩野姐, 我地呢邊預你地會黎, 一早就叫左成7人份既BBQ食物, 家陣一個唔該就話唔黎, 仲要係明明約4點, 過左個半鐘有多先話唔黎, 你要放飛機自己心中有數, 一早講明, 何解要到最後一刻先講!!!

唔好睇呢度咁少, 其實呢個時候我地已經食左好多(清左3,4樣野食)!!! 不過, 就咁望落去好似咩都冇郁過咁~~

就係咁我地5條友就要食晒枱面上面個7人份既BBQ美食!!! Andy都算有心, 佢3點先食飯, 佢仲要由對面海特登入黎!!! 都幫手食左唔少丸類食品!!! 今日BBQ聚會, 我地5條友仔不斷咁燒就不斷咁食, 我地成晚都係度燒d排呀, 雞翼呀, 丸類呀!!! 我覺得我地成晚起勢咁隊d肉類, 咁食法, 真係幾怕黎緊個星期會便秘!

就係呢梳蕉, 我就拎左返屋企啦!!!

另外, 仲有今日我仲諗住Simon兄會一齊燒野食, 係百佳買野飲個時, 特登買梳蕉, 因為平時我地BBQ都鍾意"燒蕉"(真係好好味架, 大家不坊BBQ個時可以試下燒蕉), 點知家陣佢唔黎, 今次死緊啦我!!! 家陣我一條友要食晒o個梳蕉(一梳 = 7條)!!! 當然啦, 我冇當場一口氣食晒7條蕉, 不過, 就要自己負責拎佢返屋企~~~

2007年度校友會資訊(3)

2007年度校友會資訊(3)

出席者: Camus, Cow, Gary, Ivan, Jessica, Jaemi, Judy

缺席者: Thomas

早陣子由於私事繁忙, 對遲遲未能刊出資訊(3), 深感抱歉!!! 本會於短短3個月已經為Camus(27/1/07), Jaemi(6/3/07) & Jessica(23/3/07)舉辦了3個生日活動, 各人亦各自得到自己喜歡的生日禮物!!! 感覺良好!!! 對於本校友會設立的『我為人人, 人人為我生日禮物籌備基金』亦運行自如, 多謝各member之合作~~

在此亦先作總結各人之禮物價值換算表:

Thomas: $1200 - (3x $200)=$600

其他人仕之生日禮物金額維持不變~

百佳是我好伴侶

5天紅字大假期, 除左我放假之外, 大不良間學校都成16號先開學, 家姐同姐夫都請多幾日假到16號先返工, 老媽都趁機會呢段時間放下大假, 由今日起一個星期, 老媽都同鄰居返大陸玩, 係意言下之意, 又得返我一條友係屋企!!

老媽臨走前, 整定d餸, 等我有時可以唔駛下下齋食米粉(係呀, 我家陣戒左食公仔麵), 不過, 食得米粉多, 都想有粒米落下肚, 如果唔係, 我就會好似o個d賣血者咁手軟腳軟!! 我地呢d懶佬, 唔係唔識煮飯, 不過, 懶開有條路就唔多想郁, 同埋廢事又洗米, 又洗煲, 咁鬼煩!!

就係度煩緊有餸冇飯食之際, 突然間醒起, 樓下o個間百佳個燒味檔, 有d燒味飯盒賣個喎!!! 於是拿拿臨走落樓下間百佳先, 望一望大大盒既燒味飯盒都係$9.9, 嘩, 經濟實惠, 岩岩我呢d獨身麻甩佬, 立即買盒返屋企先, 一打開, 對於食冇咩特別要求既我, 加上呢盒野只係$9.9既關係, 感覺上呢個飯盒都唔錯~~~加埋老媽d餸菜, 咁又攪掂一晚啦!!!

體感

有打過Wii既朋友都應該知!! 係遊戲機入面你可以砌返自己個樣出黎, Jackie一早就為我地整左個公仔, 上圖係我~~~ 頂.......整得都唔似既!!!

早在上兩星期, Jackie打電話話俾我知, 佢已經諗到佢今年個份生日禮物要d咩, 原來佢想要一部Wii, 黎緊五天大假期, 加上佢同小狗既生日都係4月頭呢段時間, 咁就索性約齊腳成班人貢上去佢屋企, 試機兼慶祝生日。

呢個Game係打Boxing, 都幾過癮~~耗氧量最大都係呢隻game, 玩一舖可以出晒汗!!!

小貞貞玩到幾興奮~~

琴日, 我地約左3:00p.m各自各上去佢屋企!! Jackie個姪仔一知道姑姐買左部Wii之後, 學校一放假佢已經走左黎Jackie屋企訓幾日打機, 我地上到去個時佢姪仔已經打緊機!! 呢部機其實真係成班人圍埋一堆玩先過癮, 如果得一條友係屋企玩轉黎轉去就好似有d冇謂~~ 我地由日頭打到夜晚, 中場食Dinner個時就播左隻"死神筆記2"出黎, 我自己就睇過呢套戲, 所以興趣不大, 所以就諗住打電話搵人傾下計, 點知打極都冇人接, 擔心左成晚, 後尾先知原來有人電話冇電, 仲等我以為有咩事發生添, 唉!!!

食飽睇完DVD之後, 再玩多陣UNO, 就再開Wii玩過, 唔係講笑, 平時要早訓既小狗, 今日打機打到忘晒形, 我地玩到成差不多12點幾先係Jackie屋企走!!!

員工福利

話說上次阿J生日個時, 佢俾左段短片俾我睇, 佢話佢公司早陣子唔知發咩神經, 冇啦啦請左班人返黎幫佢地按摩, 其實又唔係有咩特別野, 之但係個重點, 平日你去按摩都係訓係度俾人按摩架麻, 但係當時佢地個個同事都係坐係自己個位度, 仲要係一路做住野, 一路有條友企係你背脊, 側邊, 一路按你隻手, 整你個頭, 哈, 感覺上真係有d怪......唔好意思, 我膚淺, 我都係第一次聽, 有公司會有d咁既員工福利俾人!!

唔信, 佢就俾左段片我, 大家可以睇一睇...wahahahha

我係孝子

連續5日長假期開始, 頭炮第一擊去拜山是也!!! 今朝晨咁早就俾老媽叫醒左, 今日係清明正日我地要上圓玄學園掃墓, 原先, 往年我地都慣左會避開正日廢事同人迫, 會早d or遲d先去掃墓, 之不過, 今年二舅父係咁多日假期入面, 係得今日先得閒, 所以只好今日去同其他人迫下啦!!! 原先約好左其他親戚8:30a.m係上面等, 但我同老媽就遲左少少, 9:00a.m先上到去, 上到去個時其他親戚都到齊!! 雖然今日成個都圓玄學園都係d孝子, 但係唔算真係好多人, 俾想像既少, 起碼唔係真係去到水洩不通, 人疊人個隻!!! 就咁係攪一攪, 唔覺唔覺就咁去到12點~~

之後, 我地仲要過去鑽石山o個邊再拜, 過往, 我地都係去開圓玄學園個邊就算, 今次去埋鑽石山呢個, 真係好少可, 係我記憶中, 對上個次黎都應該係幾歲既時候。 原來鑽石山呢個係我既太公, 不過, 聽老媽講, 原來佢都未見過太公個樣, 太公一早已經過左身, 過往多數都係得大舅父同二舅父去掃墓, 我諗可能今年佢地見冇時間, 又橫掂都係成棚人, 就順便全部人都過埋去!!!

鑽石山個邊原來係原始行上山個種座地墓地, 聽舅母講呢d就真真正正搵山黎拜, 幸好, 太公個位都唔係算係d特別高, 只係山腳至山腰位置, 我見到有其他人個d仲勁, 唔係講笑真係行山咁行上去。 我地上到去, 成村人又係度摺摺摺個d元寶呀, 舅父個d就清下d雜草咁啦!! 又攪下攪下, 成3點幾先離開....

講下講下, 係唔係好似冇提過我地中間有冇食過野, 係呀, 我地由頭到尾都冇食過野, 好彩一朝早出門口之後, 同老媽去左大快活食左個早餐先姐, 如果唔係真係唔多掂~~咁樣攪一攪都成日, 行足成 日, 好倦呀~~~~

冇屎病

今日有人同我講左一個有關屎既新常識, 縱然淵博如我, 自問都見過聽過聞過大大小小奇怪事件, 都不其然應為呢個新常識係一個天為驚人既新發現!!
聽佢講, 話說有一次, 佢係屋企突然無程程發高燒, 仲燒到要特登向公司請sick leave留係屋企休息先得!! 之後佢就發現左一樣大事件, 呢件事就係 ~~~ "原來當一個人長期冇屎痾(便秘), 係會令人燒高燒架!!!"

至於點解佢會認為發高燒係同冇屎痾有關呢!!! 其實主要原因係o個排天氣良好, 又唔係特別凍, 又唔係特別熱, 佢自已更加冇食錯野, 所以應該唔會係因為冷傷風所引至而發高燒, 仲有, 仲有另一個最最最主要令佢對呢個"Theory"堅信不移既原因, 就係o個次, 當佢有得"去"既時候, 佢將d毒排晒出黎之後, 佢個燒就"爸爸"聲就即刻退返晒落黎.....自此之後, 佢就覺得冇屎痾係會令人發高燒啦!!!

當我聽完佢講之後, 我既反應淨係識得笑....whahahhah~~~真係笑到停唔到口wahhahah....

靚靚明信片

話說Macy早在3月中既時候, 去左日本既京都旅行, 佢呢次旅行, 係有位日本既網友接待佢, 真係好!! 佢今次同上次去蘇梅島既時候一樣, 都寄左張card俾我, 好靚..多晒!!! 佢返黎香港之後, 我問佢今次寄左幾多封名信片出去, 佢話大概8張左右, 哈!!! 實在太多謝, 我有幸可以成為你8個會諗住寄明信片的人其中的一位!!

不過, 你唔好諗住因為咁, 我就會唔記得你仲欠我一餐飯, wahhahah!!! 做完份功課, 就要做返之前未做既野!!! hehe~~~

p.s: 仲有呀!! 叔琪, 你都有份呀, 你都欠我一餐呀...whahahhah

拖欠

成舊水, 遲d仲有本係public library借既書要還~~都應該又幾十蚊...

話說做呢份dissertation其間, 少不免都要借下d Reference Book, 充下大頭鬼, 話俾人知自己有睇過下書呀, 有時更加要引經據典, 冇返一兩本書旁下身點得呀!! 所以一早就借左幾本書作天書之用, 一心諗住, 我個d書既topic咁鬼冷門(Heritage Conservation - 古蹟保存), 邊樹有人會借呀, 所以一早就好鬼淡定冇人會黎同我爭啦!! 咁就如常臨到還書既日子前夕, 就上網renew個booking啦!!

有一次如常上網renew個booking啦, 一打開renew個版面, 佢就話有人book左我本書, 冇得再俾我renew個booking, 哎呀!! 邊個粉皮係度攪攪震, 攪到我冇得renew!!! 話明係天書黎架麻, 俾佢落左係人地手上面我仲得了架!! 所以就算冒住要被人罰, 都要keep住本書到最後先放返出去。

直至琴日終於交左份dissertation之後, 就順道去還書啦!!! 去到Library之後, 個Librarian就同我個:『同學, 有罰款喎!! $105!!』, 嘩, 心諗, 兩本書遲左成個月, 原來要成舊水, 不過, 呢幾本書(有d係public library借)又真係幫到我, 呢d錢點都要駛架啦!!

就係咁, 終於還埋跟左我成2個幾月既Reference Book, 唔係講笑真係日日都孭住呢幾本書係背囊度, 家陣終於可以放低呢個重擔....cool

Game Over (後補)

唔好意思, 有d野想再補充一下, 仲有要多謝埋Macy, 因為佢"十分之關心我", 話說有一次佢打黎俾我, 就同佢傾左短短15-20分鐘既對話入面, 佢就足足講左起碼有50次同一句說話:『我打黎係關心你架, 你知唔知呀!!』 可想而知佢真係幾咁關心我呢!! 在此謝過, 仲有當然謝過你張明信片啦!! 好靚!! 遲d有時間, 先再開個版新既blog講下你張明信卡片~~~^^