端午節的一天

今日雖然係放假, 但係又係要晨早流流起身(真係唔知點解, 近排d假期 or 星期六, 日都冇覺好訓.....成日要早起身), 因為今朝朝早要去拜山, 你會問點解端午節去拜山? 其實係因為, 我阿公係端午節之後一日生日即生忌是也, 所以今日就成個家族去左"團拜"。今朝, 7:30a.m起身(仲早過平日返工~~~), 梳洗過後, 就先同阿媽落樓下食個早餐再出發。

去到荃灣地鐵站, 就先去join返兩位阿姨, 之後就浩浩蕩蕩咁坐小巴上去"圓玄學園"進發(其他家族成員就各自上去)。今日天雨濕濕的, 上到山頂就更加濕, 又濕又悶熱, 好辛苦下, 難得上到去, 當然又要摺下d"衣紙", d親戚摺下呢樣攪下o個樣, 都攪左一陣子(好話唔好聽, d親戚到老左之後, 我地呢d後生, 實唔識攪(衣紙, 香.......)咁多野!!! 到時都唔知點算!!), 最後, 拜得阿公, 老豆, 太婆都差不多成11:00a.m。

大家族難得出得黎, 就仔仔孫孫一齊食個lunch先, 舅父係尖咀的百樂酒店book左位食lunch buffet, 原來每位都係$64蚊, 當然啦, 一分錢一分貨, 野食就唔係好好多款, 一般啦, 最重要係搵到地方俾我地成18人有地方聚腳, 一班親戚, 又表哥表妹成班一齊係度傾下計, 交流下大家彼此生活情況。 食完之後都已經去到2:30p.m。由於今晚6:15p.m約左人出去食飯, 又唔想行街行足4鐘, 於是乎又去我最鍾意用黎hea時間的地方, 對!! 又係o個d漫畫cafe, 今次係尖咀去左一間, 今次係睇左一套家陣由劉德華拍緊, 由漫畫改編而成的電影叫『墨子攻略』的漫畫。 其雖然其畫功一般, 但內容十分緊湊(推介一下, 可以值得一看, 尤其是劉生都拍緊佢)。

今晚, 由Denise發起由本人代辦(簡單黎講, 係佢"點"我去約人先真!!!)發起今晚端午節飯局, 本人開頭諗住幾條友食下飯仔就算, 但係橫掂都係約, 就不如約多d人, 如是就攪左個『8th BRESS - 莊員飯局』, 其實係poly讀higher diploma年代, 入左自己department的socity攪活動, 從而認識一班由其他course的人, 好幸運亦因為係攪活動當中同佢地成為好朋友, 尤其是BRE雙辣- Cherry & Denise, 因為當時, 我同佢地兩位係O' camp當中負責做M.C之一職, 當年整整一個summy為大家帶來很多難忘回憶。



講番, 今晚的聚餐先, 今晚勁呀, 有Denise & Erneshu, 小菲 &佢男友, Harvey, Carrie, 阿耀, 阿龍, 一行9 人一齊去左Outback Steackhouse食dinner, 其實今晚, 只係欠Ronnie, Cherry & Jerry, 先算係整莊, 奈何佢地都岩岩有d事, 唔得閒黎唔到。 其實自從大家畢業之後, 大家都好少出黎食飯(當然啦, 我同cherry & denise就有自己約出黎), 今次可以話係畢業之後(都成3-4年啦!!)第一次約到咁多人出黎食飯的一次, 好難得!!!! 成晚, 大家都係講下彼此狀況, 閒聊一番, 不過, Denise & Carrie都仲有下一場, 於是, 大家8:30p.m左右就完結左今晚的相聚會。 希望下一次, 有機會真真正正約齊成班人一齊啦, 當然啦, 呢d野都係由我統籌啦, hehehehe!!!