婚宴

黎緊12月, 將會係我既好朋友小狗既結婚大日子, 我同佢由中學相識到依家, 我同另外幾位朋友當然係被邀請做姐妹啦, 哈, 哈, 係唔係好奇怪我會係做姐妹呢, 其實, 小狗玩開個批既中學同學, 基本上完全係全女班的, 但係唔知點解偏偏就夾著我呢個男生。 自中學畢業之後, 每次既約會都會有我呢個男生既出現, 哈, 每每同人地講起上黎都覺得幾威下...wahhahahha...成個馬扶咁....wahahhahah

琴日, 阿Ling同我講佢放工之後同小貞貞會去睇姐妹衫, 問我有冇興趣一齊去, 我呢d八卦人士梗係要去睇下啦, 於是一放工就標出office門口, 我地首站先到太子既金都商場逛一逛先, 其實呢個金都商場, 我成日搭巴士呀, 或者行聯合中心都成日經過, 但係就永遠都冇行過入去, 都唔知入面係什麼家伙, 什麼格局, 今日同Ling &小貞貞行完一轉之後, 終於知道是什麼一回事, 不嬲都知入面係買d結婚野, 不過, 係估唔到林林總總既野都有, 例如, 我見有間舖頭係專賣d閃閃下既高跟鞋, 原來個d鞋跟位都有得特別款式, 今次真係大開眼界。

原來, 女仔choice d姐妹衫都幾煩下, 由要睇款, 又要睇顏色, 又要改短, 又怕肥得劑, 又怕個"zone"托唔起, 我地由6:00p.m睇到10:00p.m, 當然中間有段時間去左食野啦, 我地由金都行到朗豪坊再行到家樂再再行埋去新之城, 大大話話都起碼廿幾三十間, 不過, 睇黎睇去都好似睇唔上眼, 仲有主角新娘話最好就全部姐妹都係米白色就最好。 當然啦, 行左咁耐到最後都係冇咩總結。 要下次等埋主角新娘及其餘既姐妹一齊出席再choice過。

不過, 我發覺原來結婚都真係幾多野攪, 就單單係選著咩衫就已經諗到頭爆。 仲有咩, 酒席呀, 婚紗相呀, 就連去咩地方渡蜜月都要煩一餐, 當然啦, 同自己心愛既人一齊攪雖然係煩, 但係應該都係開心既。 未來黎緊個兩, 三年都應該將會有好多朋友仔結婚, 幾時又輪到你地呢!!!