姐妹團

12月頭就係小狗結婚大日子, 佢屋企終於都係上星期裝修, 傢私, 電器都入伙, 於是就call齊姐妹&兄弟團上新居參觀兼商討結婚當日既事宜。 小狗新居其實係佢未來老公(Micheal)既舊居, 不過, 家陣新婚就所以打算將佢完全裝修過先入住, 間屋都有成千尺架!!!! 講返今日先, 我地約左2:00p.m係北角MTR度等, 齊人就浩浩蕩蕩上去, 一上到去成班兄弟都已經到齊, 開頭我同Jackie, Ling佢地諗, Micheal個樣都唔差, 個班兄弟都應該有返咁上下啦!!! 一入門口, 一眼見晒.....唉, 你見我咁既語氣都知咩樹啦!!!! 除左個伴郎係好樣d之外, 其他就......我都真係可以話係用非筆墨能所形容。

今次上去商討結婚當日既rundown, 小狗係我地上黎既前一日, 用電腦打左個流程表出黎, 入面講明, 幾點至幾點攪d咩, 幾點至幾點要做d咩, 唔係講笑, 結一次婚真係要攪好多野!!! 今日上到去, 小狗就已經叫左到會, pizza, 意粉, KFC, 黎招呼我地呢班姐妹&兄弟團, 大家食飽飽之後, 就開始聽小狗&Micheal既briefing, 講解完畢兄弟團就走先, 剩返我地呢班姐妹係新居, 就係呢個時候小狗就拎左姐妹團only既自製沙律出黎食, 應該話係似自助沙律吧咁~~~一碟碟不同配料放晒係度, 自己自由配搭。

我地傾到差不多6:00p.m就走人, 我, Jackie, Ling & 奶就落左去 銅鑼灣行街, 主要目的係幫奶睇下件姐妹衫。不過, 佢身形就比較過度健康所以要幫佢搵都唔係一件易事。最終行晒成個銅鑼灣都係搵唔岩, 就搵到地方食飯傾下計。