風雨不改靚人靚景豪華團 (序)

上星期二左右, 突然收到達達個電話問我黎緊國慶10月1日去露營有冇興趣, 我當然冇問題啦, 原本就想叫埋牛牛去, 不過, 由於事出突然, 牛牛一時間未能請假, 所以冇得去。 講開露營, 對上次, 已經係中,小學年代, 當時去左報名參加個d什麼"愛丁堡獎勵計劃"(家陣好似已經改左名), 其中一個item就要去train露營, such as: 點用指南針&地圖, 如何搵出自己既座標, 點樣起營, 生火(都係用gas爐姐)&用cookset煮野食...等等..講起原來都有十幾年冇玩過露營呢個玩意。

講返點解今次個camp會叫『風雨不改靚人靚景豪華團』先, 平日去camp都係用gas燈, 但上次同macy傾開去camp, 佢就提議話有一隻"車頭燈"係鴨寮街的, 光度比gas燈勁好幾倍, 於是我就提議今次不如用"車頭燈"。係星期六個日下午, 我就出發去鴨寮街買燈, 但係出到去發現落大雨, 於是, 我就先打俾傑佬&達達問清楚, 聽日仲去唔去到, 佢地兩個都話, 我地今次既camp係風雨不改, 無論如何都一定會去, 叫我安心去買燈。

至於點解叫豪華團呢, 由於達達, 傑佬之前, 報名參加左一個廣播劇既比賽, 而佢地段片又得到冠軍, 而獎金更加係有成$3,000 cash, 所以今次去camp既所有駛費都由阿公出, 個個都唔駛拎錢出黎。

最後就要解釋下咩叫靚人靚景呢, 話說, 係我地去營地既途中, Andy幫佢女友影相, 影完之後, Andy就用一種好深情既語氣講左一句:『哎呀! 我依家先知道咩叫做靚人靚景』, 好景不常, 呢句本身只係Andy同佢女友阿儀講既說話, 居然俾哥同傑佬聽到, 佢兩個就當然將呢件事發揚光大啦, 自此之後, 呢句"靚人靚景"既說話就充斥住成個camp入面, 達, 傑佬, 沖哥, 阿松等等, 得閒冇事就彈呢個金句出黎, 就連食食下飯都可以講出黎, 所以呢個camp由原本叫『風雨不改豪華團』改到家陣既『風雨不改靚人靚景豪華團』啦!!!