6分鐘- 450cc

今日係short week, 不過, 前一日認應承左阿媽話陪佢去保險箱拎返d野(聽佢講話間銀行要關閉, 所以要拎返d野走), 於是, 今日又係晨早流流俾人叫左起身, 同媽媽 & 兩個甥女一齊落樓下飲個早茶, 先再出去銀行。出到銀行, 好快手就攪掂, 之後就返左屋企。

下午, 又係落雨天, 又冇得曬太陽, 見冇野做無無聊聊咁, 不如做番d有益活動, 於是乎就走左出去旺角的紅十字會中心走去"放血"(捐血), 其實, 以自己黎同身邊的朋友比較的話, 據我所知我的捐血次數算係最多的一個, 連埋今次, 已經係第9次捐血啦!!! (當然啦, 如果同50次, 100次個d比, 我先得個10次都唔夠, 當然係蚊比同牛比啦!!!)

不過有少少慚愧的是, 原來, 我對上個次捐血已經係3年前的事, d人話男人可以3個月之後再去捐血, 我就足足隔左成3年先再返去捐。 之前都想再去捐, 不過, 就成日都搵唔到d合適時間去, 所以就一拖再拖, 拖到今日先去...

講開3年前o個次捐血, 都唔係好似今日咁, 特登走去捐血中心架!!! o個次, 都係咁岩出街做野, 見到個流動捐血站, 見自己又就快收工而手頭上工作又攪掂, 咪順勢去捐血羅...都係因為方便先去左捐, 如果唔係又唔知拖到幾時...

今日去到捐血中心, 就先填好表格, 再同護士見一見面, 之後再做個血紅素test, 就o.k可以開始捐血。當我捐完之後, 個護士就同我講：『先生, 捐完啦!!! 唔!!! 6分鐘捐完450 cc』, e, 我心諗乜家陣紅十字會有捐血比賽咩?? 睇下邊個最快泵爆(滿)包血就有得贏呀!!! 咁獎品係咩呀, 係唔係可以幫你縮短捐血限期, 即係人地要等3個月後先可以再捐, 你就可以2個月之後就已經可以去捐, 仲有, 捐完之後, 你可以俾其他人食多兩包餅(實際上已經係任食)

捐血其實一d都唔痛, 其實放咁d血出去, 自己唔會有咩損失, 而且又幫到人, 何樂而不為, 各位朋友唔好再俾藉口自己, 有時間就去捐下血。