"林"友

話說琴日朝早有個eviction operation(意即將有關佔用該僭建物人仕, 驅逐出該單位, 以便下一步有關行動), 其實早係兩個星期前都已經知道有呢個operation, 不過, 之前都未做過, 唔知會有咩野發生。 一朝早, 大佬行埋黎我個位度同我講:『喂, Gary, 準備好d野, 我地去"林"友』, 我當堂啞晒口, 唔係咁誇張呀, 我地一行3人, 每人都拎住頂安全帽, 之後又鐵筆, 又鎚仔, 又鎖鏈(因為清左場之後, 就唔可以再俾人進入該單位),就坐車出發。 全程車大家都好緊張, 一來唔知該單位住客搬走左未(之前已經出左信, 通知佢地要搬走), 如果未搬走, 會唔會同我地對抗(容乜易, 好似電視新聞個d咁, 擺定晒d石油氣罐等我地上到去, 一鍋熟。)

通常, 呢d operation, 我地都會通常警方到場, 睇下需唔需要協助, 當我地到達現場時已經有警察係度等我地。 之後, 等埋大大佬, 我地3條友就"立"架生, 我地當街當行拎住d鐵筆呀, 大鎚呀, 個感覺好似先前有段政府廣告咁, 『先生, 唔好意思, 我趕時間上去爆格!!!』, 上到去, 大佬先睇下單位內有冇人, 冇人有反應, 就問大大佬點攪, 大大佬就話:『做野羅, 爆佢門』, 就係咁,我地3條友仔, 又用鐵筆, 又用大鎚, 仲要加埋大佬破門一腳, 攪掂, 衝門而入, 確定冇人, 就將大門的門鎖拆掉並加上鎖鏈, 成個過程無驚無險,攪掂..

之後就夜晚放工約左jessica, 牛 & ivan去拎身份証, 放工之後, 走去左尖咀join埋一齊去, 由於牛7:30pm-8:00pm係公司開會, 咁我同jessica & ivan就先行去尖東拎左先, 拎到張身份証, 望一望, 點解個人歪歪地架!!! 都冇計啦, 都要照收, 成個過程又係話咁快就攪掂。

之後去左山林道一間"大盛"食日本野, 呢間之前都有朋友介紹過, 但係仲未有機會去食, 次次去親山林道都見呢間野好多人排隊等位, 今次都唔例外, 我地留左名, 都要等成45min先有位, 野食o.k, 唔算貴, 叫晒成抬野食, 最後埋單都係每人$90..