免費的午餐

琴晚, 達達打電話俾我話聽佢日既遊船河有人脫腳, 問我如果唔駛錢去唔去, 我呢d咁精打細算既年青才幹, 更係話去啦, 就係咁, 冇啦啦就有餐免費餐食啦。其實之前達達都問過我去唔去, 不過, 我話冇錢所以就唔去拒絕左佢, 點知佢琴日仲主動打黎, 仲要係唔駛我俾錢邀請我去, 我成日都話機會係你面前, 只要你好好把握, 機會隨時都可以掌握係你手, wahahhaha.......

今日約左牛8:30a.m係旺角等, 琴晚都醒目怕自己唔知醒, 已經一早教定鬧鐘。點知, 今朝一起身, 望一望個鐘已經8:00a.m, 頂, 我唔係教左7:30a.m架咩, 望清楚個鐘真係攪左7:30a.m, 不過, 教完之後就冇將個制撥去alarm個邊, 所以就冇響到。 於是就拿拿臨, 刷牙洗面執架生(毛巾, 太陽油等), 仲煮埋個麵食添, 用左15min時間就出到門口, 出到旺角就真係岩岩好8:30a.m, 好在今日係星期日&時間尚早, 交通暢順冇塞車, 話咁快就到。今朝, 牛約埋珍妮花&志勤食早餐, 我去到個時佢地都仲係係度食緊, 早知就唔駛咁急啦!!

9:00a.m就去左小巴站搭紅van入西貢碼頭, 話咁快30min就入到去西貢碼頭。 今日原來都有幾多人去大部份係達達d同事, 跟住就係朋友跟朋友去個d(即係我呢類), 今日我見佢地買左好幾打既啤酒(又喜力, 又嘉士伯, 又伯威, 又ICE, 呢度夾埋都起碼7,8打), 今日係遊船河, 係一d健康既活動, 所以今日全程我都係滴酒不沾。

今日全程船唯一既遺憾就係玩唔到wakeboard, 嚴格d黎講我係連快艇都冇上過, 因為太多人輪, 又同其他人又唔係好熟, 所以就玩唔到, 不過, 算啦橫掂今次係唔駛錢黎, 冇得玩, 只能夠同自己講, 我係唔駛俾錢架, 咪讓人地俾左錢既人玩先羅, 都開始覺得自己幾識自我安慰, haha, 所以都係自己係甲板上面搵個位曬太陽, 不過, 講開曬太陽今日個天都冇咩陽光出現過。

到左下午, 見到牛同珍妮花想游埋岸, 我同志勤(當時係甲板曬緊太陽)見係時候落一落水過一過冷河, 就沖左落水同佢地一齊游過去, 點知原來珍妮花同志勤同唔係好識游水, 尤其是珍妮花, 雖然佢係攬住個水泡, 不過見佢踢極水都好似唔多郁咁, 成個人係水中心停濟不前, 於是我就拖住佢個水泡游上岸, 哎呀, 牛竟然唔理佢個fd自己一早就游左上岸, 仲要話做咩咁慢架, 唔係講笑一上岸對腳軟晒, 要休息返夠本先返上船。 之後, 返上船個情況一樣, 不過珍妮花今次醒, 佢自己知自己事, 游得唔快所以佢係不動聲色既情況下, 唔等我地佢自己慢慢游左出去一大段先, 不過以佢蟻"欄"既速度, 我話咁快就過左佢頭, 今次我決定先返上船拎個浮床, 先過去"救"佢(剛才我係冇水泡架), 我一來再一回都仲係快過珍妮花, 我就叫佢拉住個浮床拖佢返去啦, 拖拖下, feel到突然間重左既, 原來志勤係唔聲唔聲之下就捉住左個浮床, 冇計, 就順手拖埋佢返去。 上到船, 牛又試係度講:『我上左船之後就望左好耐, 望到你拖住佢地兩個返黎』, 頂, 見到又唔幫手.....

今日達達好似好亢奮, 成日撩人飲酒, 今日佢好似shortgun左3個啤酒, 有一罐係志勤幫佢頂。 今日玩到5:30p.m已經返碼頭, 之後就各散東西, 歸家去....