忽然一病

係的士上面影下小不良個樣, 成日流鼻水~~~

琴晚BBQ個時收到老媽打電話俾我話佢唔係咁舒服, 睇下我會唔會早d返去, 不過, 佢知我BBQ之後, 佢就話如果有事就俾我....當然最後都冇事啦!!!

到左第兩日, 我11:00a.m起身個時, 老媽話轉頭同佢去一轉法國醫院, 佢話小不良好似病病地, 不如去睇一睇醫生(因為佢平時都係去開法國醫院睇醫生), 佢都順便都睇埋, 就係咁, 一早起身就立即去梳洗完就出門口。 其實早兩日, 大不良已經入左廠, 主因都係哮喘, 佢都已經訓左兩晚法國醫院。全屋3個女人都病晒, 今次真係死火!!!!

姐妹團

12月頭就係小狗結婚大日子, 佢屋企終於都係上星期裝修, 傢私, 電器都入伙, 於是就call齊姐妹&兄弟團上新居參觀兼商討結婚當日既事宜。 小狗新居其實係佢未來老公(Micheal)既舊居, 不過, 家陣新婚就所以打算將佢完全裝修過先入住, 間屋都有成千尺架!!!! 講返今日先, 我地約左2:00p.m係北角MTR度等, 齊人就浩浩蕩蕩上去, 一上到去成班兄弟都已經到齊, 開頭我同Jackie, Ling佢地諗, Micheal個樣都唔差, 個班兄弟都應該有返咁上下啦!!! 一入門口, 一眼見晒.....唉, 你見我咁既語氣都知咩樹啦!!!! 除左個伴郎係好樣d之外, 其他就......我都真係可以話係用非筆墨能所形容。

今次上去商討結婚當日既rundown, 小狗係我地上黎既前一日, 用電腦打左個流程表出黎, 入面講明, 幾點至幾點攪d咩, 幾點至幾點要做d咩, 唔係講笑, 結一次婚真係要攪好多野!!! 今日上到去, 小狗就已經叫左到會, pizza, 意粉, KFC, 黎招呼我地呢班姐妹&兄弟團, 大家食飽飽之後, 就開始聽小狗&Micheal既briefing, 講解完畢兄弟團就走先, 剩返我地呢班姐妹係新居, 就係呢個時候小狗就拎左姐妹團only既自製沙律出黎食, 應該話係似自助沙律吧咁~~~一碟碟不同配料放晒係度, 自己自由配搭。

我地傾到差不多6:00p.m就走人, 我, Jackie, Ling & 奶就落左去 銅鑼灣行街, 主要目的係幫奶睇下件姐妹衫。不過, 佢身形就比較過度健康所以要幫佢搵都唔係一件易事。最終行晒成個銅鑼灣都係搵唔岩, 就搵到地方食飯傾下計。

逃

早兩個禮拜jessica問10月尾個long weekend有咩攪, 岩岩見堅搬左新屋, 又到天高氣爽時分, BBQ就最好架啦!!! 堅兄岩岩10月搬左入去壁屋(真係監獄個壁屋)既宿舍, 佢話佢樓下有個BBQ場可以俾人燒野食, 咁就順理成章慶祝佢新屋入伙兼BBQ大會。

今日, 約左各人6:30p.m係旺角街市買野, 唔知係唔係我時間觀念太好呢, 我就好準時6:30p.m到達, 我都預左有人遲到架啦, 不過唔明點解佢地都好鍾意岩夠鐘就打電話俾我講同一番說話:『Gary, 我遲少少, "你地"買住野先啦!!!』(講過呢句說話既人, 包括Camus, Jessica & Cow), 我就只能夠答返佢地(我真係答左呢個答案3次):『邊樹有"我地"姐, 由頭到尾都係得我一個人企左係度之麻!!!』

咁我都醒, 自己走左去先達行左一個圈, 如是者, 差不多7:00p.m Camus就打俾我話佢同Melody已經到左, 我就行過去啦, 之後, 輝仔&阿達都到到埋, 咁我地就買住野先, 今次BBQ阿達話想燒得"豪"d, 我地就走左去買海鮮啦, 我地買左d扇貝, 海蝦, 烏頭, 魷魚, 原本想買龍蝦仔, 不過唔見有, 所以就冇買到, 之後就去丸呀, 香腸呀, 排類等, 為免大家眼闊肚窄, 買個時都盡量唔買咁多, 咁我同阿達買其他野個時, 就叫Melody & Camus去夾d丸類啦, 轉個頭望一望佢兩條友仔, 一夾就夾左成起碼20粒(係only墨丸左喎,仲未夾其他丸類, haha), 於是我就當機立斷stop左佢, 抽咁d墨丸出黎。 最後, 買完野都差唔多都7:30左右。

入面個BBQ場都幾靚!!!!

我地兵分兩架的士入去, 平時入西貢就成日都會經過壁屋監獄, 但就真係未試過入去, 家陣仲要係入去BBQ, 都幾型下, hahaha!!! 之後, 就分工, 有人起爐, 有人洗野, 有人去supermarket買乾貨(紙碟, 錫紙等....) 話咁快就有得食, 原先定左食飽飽就開始我地個winning大賽, Melody好有心架, 佢自己拎埋私家手掣黎, 耐何大家一路燒又一路傾計...傾下燒下都已經12點, 有d人第2日要返工, 所以要走先, 所以最後都打唔到機, 唯有下一次出黎玩個時再打過啦!!!!

呢個就係扇貝~~~個網係我地用平時個d燒烤網屈出黎...

第一次BBQ燒烏頭...原來都幾好食...

我, 牛, Jessica, 輝仔, 達就燒到最後, 大約2:00a.m左右先搭的士歸家去!!!!

p.s: 岩岩醒起一樣野, 上次Melody係Thomas生日dinner時, 好似講過佢會整個cake出黎, e, 點解冇左既.....

勞動日

今日唔知咩樹幹係工作安排方面異常既旺場, 平時每個星期二既朝早都係要出site做野, 由於我本身係主力處理舊樓天台屋既工作, 即係話每行一座樓既最低消費就起碼要行7層樓, 上去完就自然就要落返黎啦, 今日我同Anna大大話話就行左3座舊樓, 前後即係行左21層樓。 返到office, 有人打電話黎話佢隔離o個間天台屋就快會"林", 呢d野可大可小, 唔知佢講真定講笑架麻, 於是就拿拿淋打電話睇下下午有冇吉車, 去睇下咩情況。

下午, 我就同Ricky出去睇下發生咩樹幹, 而Anna則留守office大本營, 上到去, 睇下有冇樹啦, 幅牆咩樹都冇, 佢既堅硬程度可以話係硬過你食偉哥加印度神油, 直不甩咁, 用腳踩左佢兩野都冇樹, 於是走人, 出開黎, 就順手去埋另一單case, 又行多7層, 今日大大話話都行左成35層樓。

仲有單野呀....阿差仔(佢係今個sem教我個科既tutor), 又係度攪攪震, 因為黎緊又有persentation, 原先係諗住跟返之前第一次persent既次序, 點知最尾個組同學仔就唔係太想又做last個team, 因為一來怕太近exam, 兩來份dissertation迫在眉睫, 於是同差仔request啦, 點知差仔就同佢地講, 如果佢地唔想做last 一team, 咁咪每一team推前一組, 即係第4組就做第3組, 第3組就做第2組~~~~o下, 我係第一組喎.....咁我咪變相係last team, 我當然死都唔濟啦....搵我笨七呀.....今日我就不斷打電話同另外o個3team人周旋左一大輪, 大家終於有共識, 最後就要send個mail俾差仔, 只要差仔"肯"接受我地既方案就咩都解決晒!!!!

差仔, 我話你知, 你唔好再係度攪攪震, 我個人家陣好燥, 秋天既天氣係火d....

今日簡直係身心疲乏~~~~

『放、逐』vs 『鬼上頭』vs 『鬼書友』

星期六, 同Macy打完機之後, 就去左灣仔食飯, 是夜係同Thomas補祝生日, 今次食飯地點係由Jessica定的, 呢個地方既前身係一間係海旁邊既麥當奴, 家陣就轉左做一個食海鮮既餐廳。 我地原先約左7:00p.m係灣仔MTR等, 點知等齊人都成7:30p.m先可以起行。 我, jessica, thomas & 堅就係灣仔地鐵站行去目的地。

之前7:00p.m個時, Camus & Melody(路痴1號&2號)打俾我話佢地會搭天星小輪過黎, 我當然叫佢地自己直接去餐廳(因為一條直路行過去, 15min就到), 唔駛特登再行返過黎地鐵站join我地, 當我地就快行到去餐廳既時候, 收到路痴1號就打俾Thomas話佢仲未搵到間餐廳, 佢地好似盪失路, 唔知去左d咩地方, 哈.....兩個路痴, 經過Thomas遙遠控制兩隻老鼠, 佢兩個終於搵到我地, 之後就join埋一齊行過去。

一入門口, 嘩!!!!!好型個喎, 有幾個架"踞架兵"叫我地放低d野, 要好似係機場過關咁, 個個人都要過一部金屬探測既儀器, 先入得去, 可能呢度係海軍俱樂部啦, 所以要check清楚先入得去。 But anyway, 入到去, 其實個個都行到身水身汗(都唔明家陣已經十月中, 都唔似秋天), 不過, 難得黎到呢度梗係食個景, 冇理由係indoor食既麻(indoor有冷氣), 於是我地就坐outdoor, 不過, 坐出面對住個係填海既海景, 不過都o.k既!!!! 至於食個方面, 我都係覺得一般啦, 話佢好食又唔係, 唔好食又好似唔係, 不過, 可能佢地(only Camus & 堅)都唔食海鮮, 所以有好多野都冇choice, 最後只係點左幾度菜。

頭先, 係等人個時, 我就同Thomas提議, 如果今晚早食完不如去睇戲, 我推介俾佢話"放、逐"好好睇, 點知佢話不如睇"鬼上頭", 再唔係"鬼書友"都得架, 佢話佢自己好耐冇睇過d恐怖嚇人鬼片,但係佢講呢d野既時候個表情係異常既興奮, 唔知佢係唔係工作壓力大得濟, 要睇d鬼卡嗌下, 發洩下。 當然啦, 最後我地冇睇個套什麼鬼乜乜啦, 夜麻麻睇埋d咁既野, 傻既咩, 俾幾十蚊夜麻麻自己嚇自己, 我地就去左Time Square既UA睇『放、逐』, 今晚, 堅話佢聽日仲要返工唔去, 路痴1, 2號就話要返屋企做功課, 所以都唔去, 最後剩返我, Jessica & Thomas3條友去睇午夜場(12:10a.m)

『放、逐』故事大綱 : 殺手和(張家輝)為妻靜(何超儀)和BB重返澳門落地生根，昔日好兄弟火(黃秋生)與肥(林雪)奉大佬大飛(任達華)命來殺他，但另一對好兄弟泰(吳振宇)與貓(張耀揚)為情義來保護他，五人衝突驟然而起......
亂世的Liberdade酒店是罪惡蘊藏，四人隨和來到這裡，遇上老闆謝夫(張兆輝)。謝夫提出兩個選擇，一是暗殺澳門大佬，一是搶奪一噸黃金。和選擇前者，但卻命喪槍下。靜視火等為殺夫仇人，不惜一切追殺他們。 宿命安排下，火四人意外來到搶金地點，衝突中得到黃金，並結識神鎗手陳警司(任賢齊)，眾人惺惺相惜。正當一行人準備遠走高飛之際，火收到大飛電話: 靜和BB在他手上…

呢套戲係由杜sir拍, 基本上佢拍d戲真係幾得, 我之先幾鍾意佢拍個套『PTU』, 佢拍出黎真係幾有型有格, 成日睇d影評話呢套係『鎗火』既延續, 我又覺得又唔係, 鎗火比較平實d, 呢套就下下誇張, 邊樹有人熱辣辣仲著住件褸通街走, 不過, d主角位位都好型, 就連林雪都有一手。 呢套戲值得一睇~~~~



『放、逐』- 金句

• 『一噸黃金有幾重?』『一千兩百磅』『一磅有12安士』
• 『一噸辛苦有幾重? 重既咪辛苦, 輕既咪唔辛苦羅』
• 『一噸愛又有幾重? 痴線!!!! 愛係感覺, 邊度冇得計幾重!!!!』

Official Site：http://www.exiledthemovie.com/

The Quarterdeck Club
地址: 灣仔龍景街1號分域碼頭海軍商場地下
電話: 28278882
菜式: 澳洲菜

遊戲王 - 無難度

今個星期同Macy傾講msn, 佢問我幾時剪頭髮, 我話下星期掛, 之後跟手, 佢就約我星期六一齊去James度剪髮(呢個James唔係我之前係lobby度剪開個合, 佢係Macy個fd黎)。

琴晚, Macy msn同我講話佢有d事話會遲少少先到(因為我地原先係約埋一齊去salon度) 如是, 今日我就一個人去左salon先, 差不多剪到埋尾個時, Macy就到啦, 等埋佢剪完個頭都差不多成3:00p.m左右, 之後, 我地就去左茶餐廳食tea, 因為一早講左今日剪完頭髮就去食tea, 再之後就去打機, 呢間茶餐廳係我介紹俾佢食架, 查實呢間餐廳係我細細個已經係度食入面個特餐: 沙爹牛肉麵+火腿奄列+餐包+凍飲, 係一個十分抵&好食的茶餐, 仲有仲有, 呢個特餐只不過係$24, 真係抵食都爛~~~

食完之後先係戲肉, 話說Macy係一個打機王, 雖然佢細細粒粒, 不過佢對打機呢個玩意, 真係樂此不彼, 佢老早之前已經講定食完野就一定要去打機, 所以食完野之後, 坐左一陣, 就走左去附近一間既大型機舖, 佢基本上最鍾意玩既Game係槍game仲要係新個隻"Time Crisis 4", 唔係講笑佢真係有練過, 佢$3已經可以過到Stage 1(成隻game有3個Stage), 我就最多去到Stage 1既一半多少少就死。 另下, 佢仲教我玩隻篤篤game-水族世界, 佢仲千吩咐萬吩咐話如果我要打blog既話, 一定要提呢個game係佢介紹俾我玩。

我地唱左$40, 原本諗住"風"一聲就會用晒, 唔知係我地打機技術好定係呢度d機平(呢度d game平均平出面$1左右 - such as:篤篤game都係$1/鋪), 我地最後由4:15p.m左右入機舖打到差不多6:30p.m先走, 出返黎o個時真係天到黑埋。 之後, 因為我過海去灣仔約左thomas食佢既birthday dinner, 所以就大家一齊搭702巴士落南昌站, 係搭巴士個時, 唔知Macy係唔係係機舖入面吸得太多兩手煙多得濟, 佢話佢打左兩個鐘頭機, 個人好開心, 好興奮, 不過, 佢話個重點係用$40兩個人分, 可以消磨到兩個鐘既時間, 佢覺得好抵....後尾佢仲約我話, 睇下幾時得閒, 不如放工之後約埋一齊再去打機, 哈, 我諗政府真係係時候設定全面禁煙, 一個吸兩手煙既人居然可以high成咁都有......

新華菜餐廳
地址: 長沙灣青山道334號
電話: 2387-3698
菜式: 港式

獲益良多

今日放工留係office做下份dissertation d reasch perpartion, 有位同事都stay係office做dissertation(我地唔係讀同一科), 不過, 同佢傾左兩句, 原來發覺佢做o個個topic同我o個個都係差不多, 之後聽左佢講左好多意見, 因為佢下個月已經要交份dissertation, 其實家陣佢都已經做得七七八八, 又因為佢做得七七八八既關係, 所以佢之前係搵左好多data又有好多referance。

係今晚, 佢講左好多好有用既資料俾我, good晒, 仲有, 真係未做到有d野真係唔知, 原來Google有個進階search, 叫做Scholar Google Search Enginne(學術搜尋)呢個search enginne真係好好用架, 尤其對我地呢d要做dissertation既人就真係好岩用, 因為平用yahoo or google search野, 通常都係彈左一大批唔知乜鬼野既公司web-site出黎, 而呢個Scholar Google就only幫你搵一d journal or人地既dissertation, 真係好鬼好用~~~

我的第七份生日禮物

今日同舊center同事simon慶祝生日, lunch個時特登走出去旺角同成班同事一齊飲茶, 飲完茶之後, 就係送禮物既時候, 佢地除左送份禮物俾壽星仔之外, 仲補送返一份俾我, 一件Nike長袖tee, 家陣天氣仲熱, 暫時都未著得住, but anyway, 多謝呢班好同事....

有吉士, 有理想

就係呢張啦!!! (上面係人地d資料, 雖然係通街派姐, 未問過人就post出黎, 都係block左d 重要個人資料)

今朝返工, 日日都經過條天橋先返到office, o個條天橋有好多人係度派傳單, 基本上平日人地派到俾我, 我都會拎張傳單走, 其實都係幫下佢地可以早d放工呀麻...今日, 我就見到個後生女仔派傳單, 佢派到黎就好自然拎啦, 起初都不以為以啦, 拎到上手係一張四四方方既紙, 上面寫左d野, 睇下d內容, 哈, 哈, 原來呢張野唔係一般既宣傳單張黎個喎...

呢位高小姐都幾好野, 為左創業就一朝早係度派呢d傳單, 都幾有興趣想知佢創d咩業呢...如果有人收到呢位高小姐既傳單, 你不妨打去問佢有咩好路數.....

路經此地

今日放工約左舊center個邊d同事打波, 係放工搭lift落樓個時, 聽到一位同事講, 佢聽電台新聞個時話今日有架巴士撞左埋去座大廈度, 好似好大件事, 起先都不以為意, 以為小事一樁, 去到旺角join其他人就出發上去京士柏公園, 我地途經窩打老道個邊上去, 遙遠望到有好多人圍觀, 以為有咩事發生啦, 就八八卦卦, 貢埋上去親下熱鬧, 唔睇又由自可, 一睇都幾壯觀下, 成架巴士個車頂剷左出黎, 巴士唔駛講啦, 有圖你睇, 成架都飛左入去行人路入面。

我經過o時已經係晚上6:15p.m左右, 其實距離事發時間都已經有2個鐘有多(岩岩睇yahoo即時新聞話事發時間係4:30p.m左右), 其實家陣都係等緊d工人搬架巴士走, 冇咩特別野睇, 不過, 唔知點解有好多人圍晒係度望住架巴士, 個個都係度望住一部靜止左爛晒架巴士剷左上行人路, 我同d同事都係度講, 都唔知有咩咁好睇, 個個都企晒係度, 個種感覺好似d人係深夜時分係屋企打開電視機既國際台, 係度睇telefishion(魚樂無窮!!!)一樣, 唔知有咩好睇, 但係都依然全神貫注咁望住。

岩岩返到屋企, 上yahoo新聞睇左少少資料, 原來呢件交通意外做成1死12傷都幾大件事。

不長人

今晚放學如常搭火車落旺角轉701巴士返屋企(因為搭火車轉701巴士係免費架, 好過舊時搭102巴士仲要行餐死), 由旺角新世紀行落去旺角個條天橋個時, 離遠處突然間見到位好鬼細粒, 細粒到唔似係正常人size既人行係我前面(當時未見到樣), 心諗, 係我識咁多人之中係得Macy係呢d咁既size, 難道呢個世界仲有d低處未算低既事情出現, 就係度仲諗緊既時候, 以我身手咁矯健既後生仔, 一個箭步已經去到呢位袖珍人士後面, 見到佢一個側面, 就見度此袖珍少女眼戴紅色眼鏡框既, 係我記憶中Macy都係好似戴紅色, 行多近多兩步望清楚d, e, 真係佢黎(果然呢個世界上, 再冇人可以細粒過佢)。

於是拎起手提打俾佢啦, 點知佢miss call冇聽到..原本都想行過去同佢打聲招呼, 不過, 見佢同d fd傾得興高采烈, 所以最後都係冇打擾佢, 就自己走左去搭巴士, 上左巴士之後, 先醒起佢好似都係搭701返屋企, 所以就打左個電話俾佢同佢打聲招呼。

返到屋企, 先前Macy話係泰國o個邊寄左張postcard俾我, 今日收到啦!!! Thx, 多晒!!!一拎起張postcard就見到佢寫左d野, 其中, 佢話佢係泰國曬到好黑, 返到黎香港可能會嚇親我, 唔知係唔係我衰格呢, 我一睇到呢句, 我就係度諗, 一個賓妹走黎同你講, 佢曬黑左, 你會俾咩反應佢呀...諗到呢度, 我就不其然笑左出黎(唔好意思, 我好鬼鍾意自娛---自我娛樂)~~~~~ but anyway, 多謝你張postcard, 仲要係好有心寫左段字, 唔係單單寄張card就算......

07渣打馬拉松

上星期收到渣打寄信黎, 話下年2007年渣打馬拉松可以開始接受報名, 原本都預左下年3月之前既所有任何活動(包括下年既環島行)都會先暫時一下, 等dissertation攪掂之後先再去玩, 所以封信寄左黎之後都係望左兩望就掉左係一二邊。

早兩日同Macy傾講馬拉松d野, 佢話佢黎緊會報名跑半馬, 講講下先知, 原來今年大會有個特別安排, 就係今年會將男女子組(10km)夾埋一齊起跑, shit, 大家雖則知道, 上年大會既安排係男子組先行起跑, 接住隔左幾個字時間先到女子組起跑, 結果上年我就係同左成班又臭又大汗既麻甩佬一齊跑, 仲要, 上年跑完之後, 我同simon & anthory去飲茶, 飲完茶就見同女子組d靚女跑完出黎, 我就係度諗點解我要俾錢去跑步呢, 仲要係同一班麻甩佬跑!!!

大會d高層一定都係男人, 果然知道我地係度諗d咩, 所以今年就重新整理個d安排程序, 不過, 冇用, 今年都係暫停一年, 下年先再報名啦。

turnitin

前排收到學校send出黎一個mail話今晚有個briefing session係關於一個"turn it in"既system, 其實, 呢個system係主要for final year既學生用, 因為final year既學生都要做disseration。 講一講呢個system先, 其實呢個system主要係check你有冇抄襲(plagiarism)其他人既文獻, 功課, 作品, 著作等...只要你將你份功課放上去呢個system上面, 呢個system會有個超級強大無敵既database, 只要你係抄襲人地d文獻, 功課, newspapar而又冇take referance, 佢就會show到你邊段係抄人, 係邊樹抄, 一一咁show晒出黎。

聽完呢個briefing session之後, 不禁流左滴冷汗, 佢仲有個厲害地方就係, 你千萬唔好諗住呃到佢, 將original既句子, 加個the, an, a 或者將佢由passive轉acive, 佢都可以將佢分析到出黎你係抄襲, 呢個system既發明真係好堅。 唔係話自己真係會抄人功課, 不過, 做功課個時唔多唔少都會睇唔少書做referance, 咁聽完之後唔多唔少都有d壓力, 自己萬一唔覺意抄左人地d野都幾麻煩。 　

不過, 話說回頭, 家陣都仲未開波, 除左之前見過一次supervisor之後, 成個9月, 就好似咩都未動過手, 家陣都係時候動工, 唔係真係做唔切, 就死啦!!

渾渾噩噩

唔知係唔係成個9月個人去得盡得濟, 連續3個星期既六&日, 唔係去camp(一個自已生日camp, 一個就係岩岩既露營), 就係幫人考牌, 之後又有中秋, 當然啦9月係我既生日月, 中間平時閒日又夾雜下同d朋友食飯聚餐等節目啦, 到家陣個人好似有少少透支, 成個人做起咩上黎都好似提唔起勁, 冇里精神咁, 好似成日都未訓醒咁(雖然平日都已經係咁!!!!)

琴日岩岩交左學費, 成$7,635~, 一出糧俾佢食左一大半, 又係時候節衣縮食, 不過咁都好既, 冇錢就出少d街, 當係俾自己休息下啦, 一來係時候要專心開始做份dissertation, 二來黎緊今個月既星期六or日, 得閒又有太陽的話, 可以去泳池游下水都好, 健康得黎又合乎經濟原則。 不過, 最緊要都係多多休息先得~~~

新鮮熱辣岩岩影, 佢地一早訓左覺, 個小不良不知不覺又一歲~~

p.s: 今日係雙十節, 圍城大日子, 原來都係我個小不良既生日, 仲有, 仲有, 今晚睇"東張西望"o個時發現, 梅姐原來都係今日出世。 今晚就屋企冇煮飯, 叫pizza外賣, 當係慶祝佢生日。

人肉兩團圓

呢張相係牛牛天台影落去樓下既足球場既情況, 有好多小朋友係度玩緊~~
呢張相都係同一個地點, 不過, 就過左十一點, 球場大燈熄左之後既情況~~

上星期五係中秋正日, 之前由Jessica發起話大家各人做完節之後去睇戲, 原本呢個提議都冇咩問題, 不過, 問題就發生在佢話要睇成龍既『BB計劃』, 就係呢度出左事啦, 我夠擔講, 呢度根本冇咩人仲會走去睇成龍d戲, 所以呢, 最後, 我地決定去BBQ, 仲係要係阿牛屋企個天台度BBQ, 呢個諗法簡直係型爆, 一來方便兩來唔駛同人迫&要霸爐。

由於牛牛屋企本身係冇BBQ爐, 於是係早兩日之前, 我已經去左日本城買左個小小既BBQ爐拎左去佢屋企先, 其實都唔係好貴都係$79。 至於食物方面就有勞晒牛爸爸&牛媽媽, 佢地兩位幫我地perpare左好多野食, 到最後我地都好似食唔晒。

講返o個日先, 當晚我要同屋企人做節食飯先, 今次係去灣仔皇悅酒店食buffle, 放工之後就搭MTR去到灣仔等埋老媽&兩個甥女一齊過去酒店, 去到個時, 姨&大舅父等人都到左, 而其他人都陸陸續續都到齊, 我地都差不多有成19人, 又係一個大家族食飯。食到8:45p.m我自己就走先, 佢地就繼續坐係度, 傾計, 食野。

我地就係呢個天台上面燒野食~ (堅, 文 & 牛爸爸合力起爐中)

唔駛半粒鐘, 我就搭巴士去到牛牛屋企, 不過, 一上到去天台, 見到達達到堅都仲未起到個爐, 不過, 佢地最大既問題係連炭精都冇買, 唔怪得之起唔到啦! 之後, 我仲聽到牛媽媽話佢已經等唔切, 自己返左落樓下整左個杯麵黎食。 哈, 鬼咩, 攪左咁耐, 真係餓死人, 好彩我食完野先黎姐。 攪攪下都差不多成10:00p.m先起到個爐, 有得燒, 今晚就勁羅, 人才濟濟, 有我, 達, 堅, 牛, 恩, 文, Kit, Andy, 傑佬, 志勤 & 佢女友, 仲有牛牛兩位表姐&佢地老公, Jessica就屋企做完節先過黎, 都差不多成11:30p.m先黎到。 原本珠珠都話會黎, 點知傑佬再一次施放佢既花言巧語就令到珠珠冇黎到(佢同我地講話珠珠病左黎唔到, 至於事實係點, 冇人知)。

不過, 傑佬都好, 起碼呃到珠珠, 最慘就係達達, 聽聞Winnie今晚都黎, 不過, 佢又係病左, 佢就打電話俾達達話佢病左, 食唔到野, 叫佢DHL d BBQ食物俾佢(Winnie住係牛牛屋企附近 - 的士5min車程), 所以達達一開始就不斷燒腸仔呀, 又燒雞翼呀, 仲叫Andy幫手燒埋一份, 之後, 佢就急急腳搭的士飛去Winnie度, 佢走之前, 我地都開盤買佢冇一個鐘都冇唔到黎, 點知佢好神氣咁話, 半粒鐘之內一定返到黎, 所言非虛, 佢真係半粒鐘之內返到黎, 失敬, 失敬...

燒到咁上下, 傑佬, 堅, &兩位牛表姐夫就落左去打牌, 我地就繼續BBQ, 再夜多少少, Jessica & 輝仔都黎埋, 不過, 大部份人都已經落左樓下涼冷氣。 12:00a.m左右, 兩位表姐&表姐夫都返屋企, 於是我地就開始另一個遊戲, 就係Winning大賽, 今次都係打partner, 今次就由牛牛拍傑佬, 我就拍志勤, 今日我同志勤就勁啦(不過都係多得志勤, 我有d眼訓, 經常係門前射失, wahhahah), 贏多輸少, 我地今次玩一鋪$20, 今日大大話話都有百零蚊斬獲, hehe, 今晚可以免費搭的士, 打下打下, 我地不知不覺已經打到成5:30a.m, 大家都眼訓就各自歸家。

風雨不改靚人靚景豪華團 (下)

前一晚我地玩到成2點幾先訓。 第二朝, 我隱約聽到營外面有d聲, 如無意外應該係Andy同佢女友執野d聲, Andy之前已經講左第兩日一早佢就會走先, 因為佢第二日仲要返工。咁我當然係冇理佢啦繼續訓覺, 訓到9:30a.m左右, 熱醒左, 我地訓o個個camp係兩邊開口, 但係其中一邊就拉埋左, 所以就通唔到風, 起身之後, 當然係"了"醒埋隔離d人啦, 起左身, 傑佬佢地仲係隔離營訓緊, 達達就隨手拎起個波仔, 直飛去佢地個營度, 好明顯佢地個營都算係扎得唔錯, 大大飛左幾個波過去個營都唔林。 我地即食麵大廚~~

之後, 其他人都起身, 我地就煮早餐食啦, 今朝我地既大廚係由Kit負責, 今朝, 我地有出前一丁麻油麵&豬骨湯底, 仲有前一晚仲未開封既香腸。

大家食飽飽, 休息左一陣, 又開始我地既活動, 又再黎多次男女子混合沙灘足球。 今次, 又係嬴左個隊有獎金, 所以大家又異常地賣力, 不過, 阿恩唔知係唔係琴晚玩飛行棋慘遭圍剿, 攪到成日都要做situp, 個人虛左, 食飽之後就自己走返入個營度繼續訓覺, 冇同我地一齊出去玩。

阿恩食飽左又走入去去個營入面再訓過。

呢個灘d浪都幾大下~~~

我地玩完沙灘足球之後, 個個都死晒狗咁, 我就走左出去衝浪, 鹹田呢度d浪比得上大浪灣個邊, 所以都有d鬼鬼黎呢邊滑浪, 就係咁, 我就走左去衝浪, 一落水, cool d水真係好涼, 好爽, 於是就係咁衝, 起勢衝, 就係咁我就衝左大半日, 玩完之後就發現自己原來曬傷左。

開始收營~~
要幾條友先收到一個營!!

玩到差不多2:00p.m, 大家都返去開始執野, 因為執完野之後, 就諗住係間士多度食埋個豐富Lunch先走人, 家陣執得黎都差不多。 執完野, 重新分配埋d行裝都差不多去到3:00p.m, 執野都大大話話用左成粒鐘時間。

開始出發去食lunch~~

先叫一碟炸薯條食...

照原定計劃先去士多食Lunch先, 今日我地叫左幾碟炒麵飯一齊share黎食, 其實係呢d山卡啦地方叫碟炒麵飯都係$35/碟, 已經係好抵, 冇開天殺價, 仲要有返咁上下水準真係有d火喉架, 幾好食, 唔錯, 唔錯。 之後, 食食下途中, 聽到有人講, 有隻船入左黎送貨, 陣間坐去個時可以載人出返去, 不過, 要成$70位, 我地當然冇理佢, 我地有手有腳自己行出去姐。

食飽出發>>>>>

食飽之後都成4:00p.m啦, 係時候出發, 如果再唔行都唔知幾時先返得到屋企, 一開始由沖哥帶路, 不過沖哥本身已經係帶病在身狀態不足, 今日一開波我地就行錯路, 幸好途中問人, 知道我地行錯路, 於是我地就走返去起點再重新行過。 今次終於行岩路, 行行重行行, 今次我地用左1個鐘多少少既時間已經到達赤徑個邊既路段, 呢一邊應該冇先前經西灣再入campsite個段路咁辛苦。

同可愛妹妹影大合照***
就係搭呢隻船, 出返去黃石碼頭~

返到中心, 將d行裝塞返入個大櫃入面..

就係赤徑諗住影返幅團體照既時候, 就遇到一家人, 佢地個小妹妹好鬼得意, 如果大合照個時就叫埋妹妹過黎一齊影相。 影完相, 我地就係赤徑呢邊搭返隻船過去黃石碼頭, 之後再轉巴士出去。 當我地出到去黃石碼頭o個時, 傑佬就提議不如先拎晒d行裝返中心先, 其實今次camp d架生(such as:營, cook全部都係係佢做野既青年中心個度借出黎, 家陣一齊拎返去, 咁就唔駛大家咁辛苦先拎返屋企之後再拎過出黎, 既然今次係豪華團, 我地就決定搭的士由黃石碼頭搭返去中心。 由於的士都係得5個位, 我地就叫阿恩&Kit先行返屋企先, 我地幾個男生就拎晒d野去中心先。 返到中心, 再執埋d野都已經差不多7:00p.m, 大家都倦, 之後就各自歸家。今次camp好好玩, 希望下年可以再一齊去過。

風雨不改靚人靚景豪華團 (上)

達達約所有人12:00p.m係西貢等, 我由於要拎埋牛妹佢地2個既睡袋&地席, 連埋自己個set就已經有3個睡袋+3張地席, 仲有拎埋兩支"車頭燈", 所以自己私人物品都冇咩位塞入個背囊度, 自己都係帶左一件背心, 一條泳褲&加多對拖鞋就算, 我就約佢兩姐妹11:15a.m係旺角等, 順手幫我拎d野。

我地3個好準時就到達西貢, 其他人都陸陸續續到達, 今次本身, 應該係有6男5女, 點知阿松d女性朋友放左佢飛機, 之後, 原定傑佬既女友珠珠都會去, 但因為傑佬耍左少少手段, 令珠珠去唔到。而Andy&阿儀又突然加入, 所以就出現6男3女既情況出現啦。

首先, 我地就分左3批人1.) 買野黨, 2.) 早餐黨, 3) 睇野黨(我地將d行李放低晒係一個地方, 唔駛拎住d野四圍走, 所以要人睇住), 而我就被分派去做買野黨, 今次camp, 我地dinner個餐係自己煮, 所以就要係呢個時候諗下今晚食d咩啦, 今晚我地既大廚有Andy & 傑佬, 就由佢地去諗今晚我地食咩啦, 家陣買個關子, 遲d再講今晚食咩送。

如無意外, 應該係呢個時候已經整爛左d蛋~

護蛋不力之徒!!!(大家將張相放大, 你就見到個膠袋底部已經流左蛋黃出黎)

買得野黎都差不多2:00p.m, 今次我地camp site既地點係西貢既, 我地首先搭的士去到起點, 再行差不多個半鐘既路程就到達camp site, 由於天氣清涼, 唔係好猛太陽, 所以行起上黎都唔係特別辛苦。 首先我地係會先經過西灣先會到達鹹田呢個camp site, 就係我地係西灣要越過其中一條小水溪之際, 俾我地發現左一件事, 就係由kit妹專責既"雞蛋安全小組"居然發現有流產事件發生, 佢手持個袋雞蛋居然發現就蛋黃流出。

右上角就係鹹田camp site


大功告成!!!

經過西灣之後, 要再攀多一個山頭就到達鹹田camp site, 大家幾經辛苦3:30p.m左右終於黎到, 個個都放低晒所有行裝休息下先, 休息左一陣, 我地又再分工啦, 部份人就去起營, 部份人去執石仔, 今次我地有11個人, 我地就帶左2個6人營 & 1個4人蒙古包, 就先起左個6人營, 由於達達, 傑佬佢地上兩年都有去露營, 所以起營對佢地黎講可以話係冇難度, 話咁快就起左3個營。 由於Lunch冇食野關係, 我同恩&kit就走左去士多醫下肚先, 其實另一個main point係, 唔知d大廚既手勢係點, 萬一今晚d野食有咩樹發生, 咁家陣都有個餐蛋麵墊底呀麻, haha!!!

食飽飽, 返到去沙灘, 我地就黎左場男女子混合沙灘足球比賽, 原來係沙灘上面踢波比平時係地面踢波要力好多, 唔怪得之, 小志強要成日去沙灘練波啦, 都有佢地道理既, 玩到差不多6:00p.m左右, 都係時候清洗一下d cookset perpare開始煮我地今晚既大餐。


清洗乾淨之後, set好個場, 7:00p.m左右就開始兩位大廚既比併, 首先, 我地今晚係有三個爐頭, 其一個爐頭係用黎煲飯 & 煲湯, 係你冇聽錯, 我地真係去煲湯, 仲要唔係一般既罐頭忌廉湯, 而係Andy由頭都尾都堅持要煲既番茄薯仔湯, 基本上係呢度根本冇人贊成煲湯, 但係最後出黎既結果, 最得既就係呢個湯。 而另外兩個爐頭就分別由有美女阿儀做助手既大廚Andy主持, 而另一邊既爐頭就有牛家兩姐妹助陣由傑佬揸fit, 聽佢地講上兩年由於都好大風既關係, 所以佢地既Dinner係食沙多過食送, 佢地往年既飯送含沙量可以話係超過20%, 所以今年就加左個QC驗明, 每逢任何器可能, 有機會or或者接觸到/過d沙, 就會先用水沖洗一下先, 所以今年食d送係一丁點兒沙都冇。


油爆午餐肉!!(傑佬話一時錯手落多左油)

呢個就係所謂既『咸牛肉炒蛋』

番茄薯仔湯, ok架!!!
全晚失敗之作, 黑椒雞柳
半磚牛油爆香菇

唔係講笑, 咁樣炒一炒, 都用左成兩個鐘既時間, 即係話由起點行過黎campsite, 仲快過我地煮一餐飯, 仲要係9條友係度煮個隻, 最後差唔多9:30p.m先有得食。 講下今次有咩食先, 岩岩講過有個湯啦, 之後有一煲好靚仔冇燶底, 完全熟透既白飯, 有魚香茄子, 黑椒雞柳, 木每菜煎肉餅(其實, 呢個肉餅係百佳個d一早整好晒成set既, 開頭都唔知買黎做咩, 可能諗住呢d現成野, 難食極都有個譜), 仲有咸牛肉抄蛋, 香煎香腸&午餐肉, 2斤生菜, 牛油爆香菇(係用左半磚牛油個隻喎), 仲有灣仔碼頭水餃, 唔係講笑大大話話九送一湯, 白飯任裝。

就係大家食食下飯之際, 係士多個邊突然爆左幾下煙花, 唔係滴滴金個隻, 真係爆煙火喎....有相為証架....國慶果然係國慶呀, 真係特別d~~~

食飽就要洗野啦, 成班人就浩浩蕩蕩走去士多個邊, 個度有條公家水喉, 成班麻甩佬就係度洗野, 攪掂晒d野之後, 就係士多休息左一陣, 先返去。 因為返到去就開始我地既"瘋狂飛行棋", 何謂"瘋狂飛行棋"就係, 如果俾人食左一次, 就要做掌上壓 or situp 5下, 唔係講笑, 得閒冇事, 陰d陰d, 分分鐘你一晚都可能做左成百下以上。

仲有呀, 為左令大家更加入呢個遊戲, 呢個game如果第一名勝出, 就可以有$300大元獎金, 第二名都有$100, 所以大家玩個陣時更加咬牙切齒, 講到尾其實d錢都係阿公個度出之麻...

(待續)