秘撈2代

上星期六, 去完阿狗屋企, 同阿Ling佢地出去行街shopping, 阿Ling話有份秘撈做, 不過, 只係做一晚仲要係通頂, 問我做唔做, 我呢d搵錢至上, 梗係做啦 (各界朋友, 記住有咩part-time要人, 唔好怕羞隨時call我)

之後佢就send左份工既少少資料俾我睇, 原來呢份工係佢同事之前做過, 家陣又要人所以就問埋阿Ling, 阿Ling就問埋我。 其實呢份秘撈只係係實惠做盤點員, 因為家陣都將近年尾, 照理d舖頭都需要盤點, 所以就要請d part-time幫下手, 呢份工都有成$40/hr架, 不過, 聽阿Ling個同事講, 呢份野, 基本上都唔係好多野做, 又唔駛搬搬抬抬, good晒。

今日放左工就拿拿林去左實惠個office(係上環)填張form兼做個小小既interview(其實都係介紹下自己, 都冇咩特別)。 之後聽個in我個位HR講, 佢話通常如果係請你的話都會編返你去你屋企附近既"實惠"舖頭度做storetake, HR話通常都係舖頭收工前2小時已經入場take野, 咁即係10:00p.m (close)既話, 8:00p.m已經要進場。 不過, 佢就話8:00p.m開始take數, 不過就唔知會take幾耐, 快既零晨2,3點都攪掂, 佢話都有舖頭試過take到第二朝既6:00a.m, 叫我最好預左通頂。

我心諗今次我醒啦, 如果真係有得做, 一定唔會好似上次咁快快手攪掂晒d野, 我明白『時間就是金錢』呢個道理, 慢慢做, 賺多你幾個鐘都好呀, whahahahha!!!!