日本中部之旅(十四)險象環生【18/4 - Day 7】

早餐食多兩啖飯落肚先有力行~~

朝早一起身, 個個都話落完再浸一浸個溫泉先去食完早餐, 本先我都諗住可唔可以一睹係男湯大窗望住雪山黎浸溫泉既情境啦, 點知一入到男浴室時, 已經見到有工作人員係度清潔中, 知道浸就可能冇得浸, 咁就唯有快快手沖個熱水涼就算數啦!!! 之後, 聽返Anna講, 佢地女湯個面未有人黎清潔, 所以可以欣賞到個雪山情境!!

正常人既裝備係咁雪褸雪鞋雪帽.......
好好既負責人~~

沖完個熱水涼就去食早餐, 食飽飽又開始上房執行李出發!! 就係我地執緊行李既時候, 領隊Henry突然間衝入房同我地講, 佢話頭先問過負責人:『家陣出面咁大風雪, 我地點出去好??』 之後, 負責人就同佢講會有"救援", 由於領隊既日文都係麻麻地, 所以所謂既"救援"詳細情況就唔多知!! 於是我地就斗膽假設, 其實負責人會唔會見到我地裝備簡陋, 如果就咁出去實死冇生, 同我地call左部直昇機俾我地, 接我地出去, 哈, 如果係就發啦!!

當然啦, 坐直昇機就唔駛發夢啦, 呢個係冇咩可能發生, 不過, 負責人就會借幾對雪靴俾我地著, 唔駛我地個個都就咁著住對波鞋學人行雪山!! 咁就實在太好啦!! 除左帶我地出去之外, 仲有就係幫兩位女仕拎埋佢地d行李!! 咁我同領隊Henry既負擔都輕左不少!!

Anna就跟住負責人行~~
你睇身邊經過既人個個都係一身滑雪裝備, 我地就.......唉!!
括住大風行~~~
雖然係d大風雪, 不過d風景又真係幾靚~~

好好既負責人, 同我地講大家要跟得貼d, 要跟住前面o個個, 萬一走散就麻煩!! 今日出面比起琴日黎講係仲大風左, 而且d冰起勢咁打落個頭度好鬼痛, d冰飛落塊面度好似同你做緊磨沙!! 一句講晒, 自己只會眼望住前方, 慢慢一步一步咁行, 好彩負責人借左對雪靴俾我地著, 因為經過琴晚既大風雪, 地上既積雪又厚左一層, 我地每踏出一步, 成隻小腿都會插到落雪入面, 如果著住對波鞋的話, 對鞋應該已經埋左係d雪入面啦!! 拎唔返出黎~~~

終於就快到達室堂車站!!
返到室堂啦!!
坐車返落山啦~~~
見返d樹啦!!
轉埋程纜車就到返山腳~~

幾經辛苦終於行到返去室堂車站, 感謝負責人既照顧, 同佢道別後我地就係室堂休息一陣, 再留意一下, 其實負責人出黎車站都仲有其他事辦, 原來佢落黎車站要拎當日既報紙返上去雷鳥莊, 而且仲有d野可能要補給!!! 我地休息完定一定神之後, 就搭返旅遊巴&纜車返落去山腳, 完成左我地兩日既雪地之旅!!

(待續)

日本中部之旅(十三)上雪山【17/4 - Day 6】

惡夢就由呢一刻開始!!!
岩岩由室堂車站行出去, 仲好有笑容, 因為仲未知前路係有幾咁辛苦!!
呢個牌就係提示人, 小心碌落山!!
開頭睇地圖以為好近~~

係室堂車站休息左一陣, 再次開始我地始料不及既漫長既路途!! 根據領隊Henry指示, 我地夜晚住宿既地方 - 雷鳥莊距離室堂車站只係大約半小時既步程!! 我地個個都以為真係行幾步就應該會好快到!! 但係........事與願違, 一路行一路覺得唔多對路, 但係領隊的話永遠是對的!! 所以就繼續行啦!!行...行...重行行...
我地既路程係幾咁漫長~~~
離遠望到我地既雷鳥莊!! 查實佢有3層高架, 家陣俾積雪堆左其中既地層同一樓!!

行左差不多45min既路程, 我地終於離遠望到我地個雷鳥莊!!! 望一望清楚, 雷鳥莊似近還遠!! 我地仲要先落斜再上返山先去到!! 就係我地落斜既時候, 突然架括起一陣大風雪!! 令到我地企都企唔穩, 加上係條斜路兼且係踩住d雪, 成個人根本就好難平衡到, 所以我地只可以踎低咁行, 如果唔係分分鐘吹左落山都唔定!!!

原先既正常入口係咁~~~(圖片來源: 雷鳥莊web-site)
不過因為落雪門口已經被雪活埋左!! 要爬落去先可以入到去酒店!!
呢個就係我由下面入口影返上去個情景, 真係要爬落去架, 唔講得笑!!

經過一輪攞我地命既路程之後, 終於抵達我地會住一晚既雷鳥莊, 負責人見我地成身濕鬼晒之後, 都話我地咁既行裝好鬼危險!! 其後, 我發現其他入住呢間酒店既人, 大部份都係著住整齊既滑雪裝備, 又雪靴, 又雪褸, 又面罩, 又雪褲, 仲有滑雪板先黎!! 我諗呢間酒店其實主要係service d滑雪人士黎住, 日頭滑完雪, 夜晚就入黎住!! 我地呢d柴娃娃旅客入黎呢d地方住, 更本就係一個錯誤既選擇!! wahhahaha~~~我發現, 話半粒鐘行得晒個路程, 係講緊個d有晒架生既滑雪人士, 唔係我地呢d平民!!

負責人見我地d衫褲鞋襪都濕晒, 就帶我地去地下一個叫乾燥房既地方, 焗返乾d野!!
個個係乾燥房放d晒d野之後, 就立即上房!!
房外景色, 一片白濛濛的雪地!!
我地要補充體力, 係時候食野, 食呀食, 食呀食!!!
望住個雪山浸都幾寫意!! 上面呢張相係website度搵出黎!!

我地係乾燥房放低d野之後, 就立即上房!! 好攰呀!! 頭先大家出晒奶力先行到黎雷鳥莊呢度, 一入到房, 個個都已經訓晒落地下休息!! 攰到想死!! 於是係食飯之前, 個個都唔多願郁!! 落到飯堂食飯, 可能今日先係第一日開山, 成個飯堂得個貓仔3,4隻, 大約10個人左右啦!! 雖然d飯餸同早幾日比, 唔係特別好食, 可能實在行得太辛苦, 我就得別開胃, 不過反而其他同伴就調反轉, 係行得太辛苦, 反而係冇咩胃口食野!! 講開呢間雷鳥莊, 基本上又係冇咩設置, 唯一特別就係男, 女湯度都可以望住出面個雪山黎浸溫泉, 不過我就實在太夜先去浸, 加上出面好大風雪, 所以就冇開到窗!

是夜, 房間又係冇電視機, 加上出面又括住大風雪, "把.....把.....把"聲咁, 係一個需要休息(接近需要冬眠)既情況下, 10:30p.m左右大家就好早就去左訓覺!! 不過一諗起聽日又要好辛苦先出得返去, 成個人都唔係點訓得著!! 當然講就係咁講, 疲倦令我好快就進入夢鄉!! 但係成晚出晚真係好鬼大風, d雪打落塊窗度, 又真係幾響下!!

(待續)

日本中部之旅(十二)漫天風雪【17/4 - Day 6】

早飯是也~~

今早6:00a.m起身, 原先諗住上去山頂展望台度睇下日出, 點知, 天公不做美, 成朝都落住毛毛細雨, 即使我同領隊上到山頂展望台都冇咩野好睇(係我地上去長望台個時, 兩位女仕當然係仲訓緊覺啦), 既然冇野睇就順道揸車落去白川鄉入面昅一昅有咩睇, 方便陣間正式出發個時可以立即知道去邊度玩&買野, 唔駛再四圍摸, 慳返d時間!!

雖然個天落住毛毛雨, 不過都難阻各人四圍影相既雅興!!

食完早飯, 執埋行李同主人家結帳兼Say Goodbye, 再一次出發新一日既旅程, 頭先同領隊Henry已經係白川鄉兜左個圈知道大概邊度有野影相同買野, 其實我地逗留係白川鄉既時間並唔多, 因為, 我地又要趕住去立山黑部呢個景點, 由於車程需時, 加上雪山既開放時間只係去到每日既3:00p.m就會關閉, 所以只可以係白川鄉逗留大約兩個鐘就要走人!! 如果時間唔係太趕急既話, 其實, 仲有好多地方可以慢慢欣賞!!
資料顯示立山黑部既高度都幾高下, 而我地去既室堂都離海拔2400m高!!

首先係山腳坐呢架纜車上山的中段(美女平)!!

車廂內觀~~

今日行程去立山黑部, 其實上立山黑部主要目的就係睇"雪の大谷", 何之謂"雪の大谷"呢?? 其實立山黑部既山頂係冬天既時候會係落大雪, 而厚厚既積雪(大約18m高)會堆晒係山頂上面!! 冬天既時候立山黑部係會關閉的冇人上到去, 但係一到左春天既時候, 日本既工作人員就會利用GPS系統確認返位路線出黎, 再配合摌雪機將原先既道路掘返出黎!!
上雪山既路線圖~~

上雪山既路線係先到立山黑部既山腳(立山駅)放低架車, 先坐大約15min既纜車上到中段(美女平), 之後就要再坐一個鐘頭既旅遊巴再上山頂(室堂), 由於我地夜晚會入住係雪山入一面一間旅館, 所以我地會係山腳將我地既旅遊車停泊過夜(無料停泊 - 唔駛錢架!!), 再執好一晚住宿既日用品就正式出發!!

美女平!! 係呢度轉車上去!!
岩岩上去個時仲見到d樹~~
越上越高之後, 就終於得返d雪, 已經見到兩旁厚厚既雪牆!!

上到美女平, 我地就要再轉旅遊巴上去接近山頂既地方欣賞"雪の大谷", 旅遊車既車程大約一個鐘, 今日係立山黑部開封既第一日, 其實係今日既朝早大約9:00a.m係山頂有個開幕儀式, 我地當然冇可能咁鬼早就上到去啦, 不過, 我諗我地可能係第一批上去睇"雪の大谷"既香港人掛, 哈, 哈, 好似好威下!!

呢個就係出口, 一行出去就可以見到"雪の大谷"~~
出面落緊雪, 好鬼凍, 條路就係靠後面個d摌雪車掘返出黎!!
好凍好凍好很凍~~~
唔係講笑, 真係好高下(d雪牆), 根據現場資料所得, 雪牆高度已經去到16m高!!

去到室堂呢個車站已經係人頭湧湧!! 好多人, 我地一落車就立即搵出口出去睇"雪の大谷"有幾勁!! 嘩, 頂, 一行出去, 好很大風, 好凍呀!! d風"把把"聲兜口兜面飛埋黎!! 好多人一路行一路影相, 我地呢d唔識死既, 手套又唔戴, 冷帽又唔戴, 只係著住件爛鬼羽绒真係差d凍死, 但係一場黎到又無理由唔影相, 嘩, 真係唔講得笑, 每影一張相, 自己對手就凍到差不多唔係自己咁, d手指僵硬程度可以話係用火燒都冇咩感覺!! 每影完一張相就要將自己對手塞返入去個衫袋度, 暖返下先可以再伸出黎影過第二要相!!

咪就係呢檔賣包包羅, keep住有人排隊買!!

出去睇完"雪の大谷"之後, 幾經辛苦先行得返去車站, 當時大家已經凍到隻積咁!! 友伴個件所謂厚褸就更加唔多掂, 因為出面落住雪攪到佢件褸都濕晒!! 加上佢又唔記得自己件螻有帽, keep住行"雪の大谷"個時, 俾d風雪兜口兜面打落黎, 真係幾辛苦下!! 返到車站, 見到有間餐廳門口有檔賣熱辣辣既紅豆包, 諗都唔駛諗即刻買返個黎食, 暖暖個胃都好!! 日本人真係識做生意, 知道d人行完出去雪山會好凍咁返黎, 即刻係門口整個蒸籠係門口引你班友仔買個幾十蚊既包!! 真係賺死佢!! whahaha~~~

休息左一陣, 我地就向今晚住既地方 - 雷鳥莊進發!!

(待續)

日本中部之旅(十一)最美麗的第七天中的白川鄉【16/4 - Day 5】

其他既合掌屋!!

今晚我地住既地方就係因為"最美麗的第七天"而被帶起熱潮既白川鄉(其實呢套電視戲我一集都冇睇過), 我地由頭先個遊樂場到白川鄉呢個地方, 車程都要成兩個半鐘呀!! 真係辛苦領隊Henry!! 睇返d資料, 原來白川鄉係9年前已經被列入為係世界文化遺產 - 其原因係因為佢地仲保留住一d獨特既住屋 - 合掌屋, 合掌屋的屋頂本身係由厚厚既木材同埋稻草舖砌成A字型, 目的係要將冬天落既雪左右兩邊卸出去, 而且唔係就咁薄薄舖一層就算啦, 而係厚厚咁舖左起起碼四, 五層既木材同稻草先可以頂得住冬天落個d雪同埋先唔會入風!!

白川鄉全景!! 如果冬天落住雪, 成個景會仲靚!!!

我地首先去到我地今次住既地方 - 大田屋度放低行李先!!! 屋主話趁依家天未黑可以先上山頂睇一睇成個白川鄉個全相先, 其實所謂既山頂, 揸車只需要10min時間就到, 嘩, 係山頂望返落去又真係幾靚下, 但係如果換轉係冬天個時睇, 應該會仲仲仲更加靚, 因為所以合掌屋既屋頂都會被舖上厚厚的雪!!

呢間就係我地住既合掌屋啦, 叫"大田屋"
玄關是也~~
走廊是也~~
我們的睡房是也, 又係4個人一間房呀!! 哈!!

睇完靚景, 我地就返去合掌屋度執下行李(呢個基本上已經成為左我地每日既指定動作, 因為每日唔多唔少都會買下d手信!!), 差不多6:30p.m我地就食飯, 今晚既一餐應該係咁多餐之中最豐富既一餐, 因為大家都不斷咁添飯, 平均大家都食左兩碗飯, 因為d餸實在太靚同埋太好味啦!! 所以大家都不其然添多少少飯!!

個爐係堅野黎架!!!入面係燒緊柴架!!

食飽飽, 我地就坐左係個廳度影下相, 因為係個廳中間吊住左個爐灶, 起先我以為係個裝飾, 只係裝假狗, 不過近d望真d, 入面真係有火燒緊, 係堅野黎個喎, 所以佢地會將鍋麵豉湯放係個爐側旁, 一來方便我地, 二來可以保溫!! 而且個爐灶上面個起左個架, 架上面仲放左好多野, 呢d就真係善用空間!!! 食飽之後返房, 原來主人家已經趁我地食飯既時候已經為我地舖好晒d床舖, 真的萬二分感謝!! 由於我地既間房係冇電視機供應(得頭先個食飯廳有!!), 加上周圍都係冇舖頭俾我地shopping, 再再加上第二朝我地又要早起身(6:00a.m呀!!!), 係冇咩活動既情況下, 大家都提早訓覺!!!

(待續)